Mąątɛ̨nɛ̨ 16 - Yálá laawoo hɛɓɛ (dc)Yɛnɛ̨ɛ̨ hɛnŋąą lɔwai, nwɛ́i ɓaa a Yai-Laa 1 Davidə nwɔ kpɔwɔ mąąyɛɛ wələ 1 Davidə nwɔ kpɔwɔ mąąyɛɛ wələ Ee Yálá! 'Ə́ ɲɛ̨́i kɛ mą́ą́, mąąhɔlɔɓo, yɛ́ ɓə ŋą́ ə́ kɛ a mą́ą́ kilɛi. 2 Ŋą́ kɛ Yai-Laa ɓa: «Yɛ́ ɓə a Ną́mu! Nwɔ́ nwun na nɛ̨ɛ̨ lɔ ɓaa a yɛ́! Da kpɛli hvo nąą pulu, ə kulɔ lɔ ə́ pulu!» 3 Ɓɛ yɛnɛ̨ɛ̨, ɉeeɓolaaɠaai kpɔ a Yálá nwɔɔ, di ɓɛlɛ kaa diɛ, gəlee wɛli kaa mą́ą́ kpɔ kɛnɛ̨. 4 Kɛlaa, nuąi di kaa di nɛ̨ɛ̨i gwɛlii haliɠaa yəi, di kpɔwɔ kala mɛ̨nį ta lɔ ɓə di kaa bɛlɛi mą, a di mąą gilɛ həɠəi di moi. Kɛlaa, nwɛ́i, va kɛa di kɔ kpɛli a yələ ta. Di laa hva kpɛli kɛa tɛ ná. 5 Yai-Laa, gwɛ́lin maa a yɛ́, nwɛ́i ɓaa a yɛ́! Nwɔ́ yɛnɛ̨ɛ̨ kaa ə́ yee-kɔnma. 6 Mɛ̨nįi aa gáá, gaa a mɛ̨nį ɲąąnɛ̨ɛ̨, ŋą́ą́ nɛlɛɛmun ɉəɠə ɉu, ŋą́ą́ tɔɔ nɛlɛɛ kɛɛnąą. 7 Ŋą́ Yai-Laa laa mąąwiɛ, yai a níɛwoo kɛmun, ə mą kɛ kpinįi, gílaa pɔ̨nɔ̨ɔ̨i yili hu. 8 Gíli tɔɔi lɔ Yai-Laa ɓa a yələ kəlee, gɛ mɛ̨nį tɔɔni mamįiyee hu pələ, mą́ą́ hva kpɛlin. 9 Yili mąą mɛ̨nį ɓa, níinɛ̨ɛ̨i gwəi, nį́i yɛ mąną, gbínį ə ɓo liilaa hu. 10 Mąąhɔlɔɓo hvó pai nɛ́ɛ́i ɲɔ̨muątaa yee kon ma, hvá ə́ wɔ tí mun lɛɛ kámą hu. 11 Yá yɛnɛ̨ɛ̨ kɛ pələ lɛ mą́ą́, kwəinɛ̨ɛ̨ kɛnɛ̨ lɔ ɓə ə́ lííla; a mɛ̨nį ɲąąnɛ̨ɛ̨ɠaai kpɛɛ hvo mą, diɛ ɓə ə́ ɓa-mįi-yee hu. |