Mąątɛ̨nɛ̨ 148 - Yálá laawoo hɛɓɛ (dc)

Yɛnɛ̨ɛ̨ hɛnŋaa kəlee 'ka Yálá laa tɛ

¹ 'Kánikookwəi! Yələ kɔ́lɔn! 'Ka Yai-Laa mąątɛ̨nɛ̨! 'Ka mąątɛ̨nɛ̨ yələi pələ kpɔ ləɠə ləɠə!

² Kaai ɓaa a nwɔ malakaɠaa! 'Ka mąątɛ̨nɛ̨! Kaai a nwɔ kɔlaɠaɠaa kəlee! 'Ka mąątɛ̨nɛ̨.

³ Hvóló ka ɲąnin! 'Ka mąątɛ̨nɛ̨, Pɛmɛ̨nɛ̨n-gɔwɠaa kəlee! 'Ka mąątɛ̨nɛ̨ a ka hvələ pələ.

⁴ Yələ kɔ́lɔn mɛ̨i pələɠaa! 'Ka mąątɛ̨nɛ̨! Yáɠaa kaai yələ kɔ́lɔn mɛ̨i pələ! 'Ka mąątɛ̨nɛ̨!

⁵ Mąąnɛ̨ɛ̨ di Yai-Laa mąątɛ̨nɛ̨, mąąhɔlɔɓo ya ɓə kɛ diɛ, di kɛ yɛnɛ̨ɛ̨; diɛ kɛ laa.

⁶ Ə di pɛli a yələ kəlee mɛ̨nį, ə tɔnŋaa laa, di hvo pai mąą tɛɛi.

⁷ Lɔi hu hɛnŋaa, 'ka Yálá mąątɛ̨nɛ̨, gbaatow-gbono da yái hɛnŋaa kəlee, 'ka mąątɛ̨nɛ̨.

⁸ Nwɔ̨n da hanwon, luwú-luwú da nąląąn, tulɔ hvaŋą, kaai ka nwoo pɔ mɛ̨nį kɛ;

⁹ Yee kpɛa-kpɛa da yee kpu-kpuɠaa kəlee, ɓá wuluɠaa da kpitiliɠaa kəlee,

¹⁰ lɔwɔ huwɔɠaa da taatɛlɛɛ kəlee, tala hɛnŋąą da nwɛ̨niɠaa kəlee,

¹¹ yɛnɛ̨ɛ̨ tɔɔɓɛlaa da nu huwu kəlee, ɲɛ̨itɔwɔ nuą da lɔi ɲąąwooɓo nuą kəlee,

¹² hilɛlɛa da nɛ̨ɛ̨lɛa kpɛlimąn, nu pɔlɔ-pɔlɔɠaa da lɛapɛlɛɛ;

¹³ 'Ka Yai-Laa laa mąątɛ̨nɛ̨, mąąhɔlɔɓo naa kɛnɛ̨i, yaa tanɔ̨n gbən, Mąąɲįnɛ̨n ɉeɛi lɔi da yələ kɔ́lɔn di mɛ̨i!

¹⁴ Aa nwɔ nu huwui hvaŋą tɛ, aa ɲɛ̨i pɔ̨nɔ̨, ɲee pɔnuą kəlee nwun muhəɠə mɛ̨nį li, diɛi ɓaa a Israɛlə lonnii, a nu huwui tii nɛɠɛɛ mą. 'Kánikookwəi!