Mąątɛ̨nɛ̨ 147 - Yálá laawoo hɛɓɛ (dc)

Yálá yee a pɛli mɛ̨nį kəlee ɓa, 'gu mąątɛ̨nɛ̨

¹ 'Kánikookwəi! Nɛlɛɛ ɓaa, gu gu wɔ Yálái laa tɛ, Gu wɔ Yálái laa toɔ a wələ ɲąąnɛ̨ɛ̨ ɓə kɛnɛ̨,

² Yai-Laa ɓə pənə ə Ɉerusalɛmə tɔɔ, Gaa pənəi yɛ Israɛlə nwɔ kɔluwɔ pɔlɔɠaa ɲąąkpɔn.

³ Nuąi di lii yalia di kwəi, a di ɓalo, yɛ di wɔ palaɠaai waa.

⁴ A pɛmɛ̨lɛ̨n-gɔwɠaa lonon, yɛ di tɛi tɛi di təli a di laa.

⁵ Ku Nąmu Yálá kɛnɛ̨i, vaŋą kɛ̨nɛ̨, Gili kɛnɛ̨i, ɲɛ̨n və mą.

⁶ Yai-Laa a ɲee pu nuąi da di nwun mąą yɛɛ, di mu, yɛ nwąnąlɔ nuą yee pɛlɛ lɔi ɓa.

⁷ 'Ka Yai-Laa hɛɠɛɛɓo wələ pili mą, 'ka bɛlɛ gwəi yɔw gu wɔ Yálái ɓa.

⁸ Ya ɓə a yələ kɔ́lɔn mąą yili a tulɔ kpinįn, yɛ tulɔ pɛli lɔi mąą mɛ̨nį ɓa, yɛ kalaɠaa ɓɔn yeeɠaa diɛ.

⁹ Yɛ kɔ̨nɔ̨n dɛɛ taatɛlɛɛɠaa pɔ, gwąą-gwąą lonnii da vɛli, a di kɔ́.

¹⁰ Hoo nwɔ huwalawala hvəi a niiɓa, nu kɔ́wɔ wulu vąŋą mąą, mąą kpaan və mą.

¹¹ Kɛlaa Yai-Laa a giliŋąhiɛ kpɔ a nɛlɛɛ, yɛ vilɛn, nuąi da ɲɔw mą diɛ a diɛi da di kilitɔɔ nwɔ kulɔ nwooɓa laa ɓa.

¹² Ɉerusalɛmə, Yai-Laa mąąwiɛ, Siɔn, ə́ wɔ Yálái mąątɛ̨nɛ̨

¹³ Mąąhɔlɔɓo aa ə́ wɔ kpon naa kpulu kwɛliɠaa mąątɔɔ, aa lúwɔ́ too ə́ lonnii diɛ.

¹⁴ Ya ɓə liilaa yɛnɛ̨ɛ̨ tɛɛ ə́ wɔ lɔi pɔ, yɛ ə́ pilɛ a mɔ̨nun nįnɛ̨.

¹⁵ A wɛlɛɛ tɔɔ lɔi pɔ, Nwoo yɛ hiɛ nąą kəlee a gilɛ.

¹⁶ A tulɔ mąą pənə a luwú-luwú, yɛ nąląąn ɉuwia yɛ wiɛhunwɔ̨, yɛ daɠa.

¹⁷ A hanwon gbuwulu kpɛa kpɛa pu, gbɛɛ ɓə nii a kpələi gwɛlɛ taaləi tii tɔwɔ?

¹⁸ Yai-Laa a hvaa lɔ, daa mą həɠeen, A ɲee ɓo lɔ hvaŋą ɓa, yáɠaa daa mąn tɛɛ.

¹⁹ A nwoo lɛ Ɉakɔbə ɓa, ə nwɔ tɔnŋaai, da nwɔ tíɓoɠaai tɛɛ Israɛlə pɔ.

²⁰ Hvo ta lɔi ta lɔpee hon ni tii, dai lɔpee hvo ta nwɔ tíɓoɠaai kɔ́lɔn ni. 'Kánikookwəi!