Mąątɛ̨nɛ̨ 145 - Yálá laawoo hɛɓɛ (dc)

'Ka gu Yálá mąątɛ̨nɛ̨ wələ too

1 Davidə nwɔ Yálá mąątɛ̨nɛ̨ wələ.

¹ Davidə nwɔ Yálá mąątɛ̨nɛ̨ wələ. Nwɔ́ Yálá, nwɔ́ Tɔɔmun, gáá ə́ laa tɛi, gɛ́ ə́ laa mąąwiɛ, və́ ɲɛ̨n dee li.

² Ŋą́ ə́ mąąwiɛ a yələ kəlee, gɛ́ ə́ laa mąątɛ̨nɛ̨, və́ ɲɛ̨n dee li.

³ Yai-Laa kɛnɛ̨i, Mąąnɛ̨ɛ̨i lɔ di mąątɛ̨nɛ̨, nu hva pɛli gɛnɛ̨ pələ kiliin ɉi.

⁴ Di kaa lɔ pai kɛi ə́ kɛ mɛ̨nįɠaa mąątɛ̨nɛ̨i, kwɛlan gəlee da nwɔɔ, diɛ ə́ wɔ kúláálaa hukulɔ.

⁵ Gáá pai kɛi ə́ wɔ kpalo mɛ̨nįɠaai bələ ɓoi, ə mą kɛ, ə́ mąąwiɛ pələ aa ə́ ɲɛ̨i pono kɛnɛ̨.

⁶ Di kaa pai kɛi ə́ hvąŋą kɛnɛ̨ pələ, mąą ɲɔwuɔ hukulɔi, ɛlɛɛ, ɲą́ą́n gɛ́ ə́ wɔ walawalalaa hukulɔ.

⁷ Mɛ̨inɛ̨ɛ̨ kpɛa kpɛai ə́ gɛ, di kaa pai kɛi mąą hɛli pui, diɛ ə́ wɔ tələnmolaa mąą kwəinɛ̨ɛ̨ kulɔ.

⁸ Yai-Laa kili lɛlɛɛ gwəi, Níi nɛ̨ɛ̨ gwəi, hva nii holi ɉá, wɛlikɛmąą kili lɔ ɓə gwəi.

⁹ Yai-Laa nwɔ mɛ̨nį lɛlɛɛi nu kəlee pɔ, nii nɛ̨ɛ̨i gwəi nwɔ pɛli hɛnŋąą kəlee pɔ.

¹⁰ Ə́ kɛ mɛ̨nį kəlee pɛlɛɛ gee ɓa, di kaa pai kɛi ə́ mąątɛ̨nɛ̨i, Yai-Laa, ə́ yee pɔnuą diɛ ə́ mąąwiɛ.

¹¹ Bələi ə́ wɔ Tɔɔlaa mąąwiaai la, diɛ mo, diɛ ə́ wɔ kuláálaa bələ ɓo.

¹² Diɛ ə́ kɛ mɛ̨nį kpɛa kpɛa hukulɔ nuą diɛ, da ə́ wɔ Tɔɔlaa nwɔ mąąwiɛlaa hu kɛnɛ̨ pələ.

¹³ Ə́ wɔ Tɔɔlaa kaa a yələ kəlee tɔɔlaa, ə́ wɔ heeɓolaa a lamun a kwɛlan gəlee da nwɔɔ.

¹⁴ Nuąi diɛ di too, Yai-Laa a ɲee pu di mu, yiiɠaai daa too, a di haŋąn ə di tɔɔ.

¹⁵ Di kəlee di ɲɛ̨i kpɔnŋąąi lɔ yɛ́, di kilitɔɔ yɛ́, yáán, yá di kɔ̨nɔ̨n dɛɛ di pɔ a ɲələ.

¹⁶ Ya ə́ yee laaɓo, hɛn kpɔ di wɛli kaa yɛ́, di nɔ̨ɔ̨ ə ɓo di ɉu, yá di pilɛ a di liiɓa.

¹⁷ Yai-Laa haŋąąi gɛ mɛ̨nį kəlee hu, a kulɔ nwoo ɓa gɛ mɛ̨nį kəlee hu.

¹⁸ Nuąi da Yai-Laa hvɛli, gaa di kwɛlɛ, a nuąi kpɔ da vɛli a tɛ̨ąi.

¹⁹ Nuąi da ɲɔw mą, a di liiɓa kɛ, a nwəli tɔɔ di tomą woo ɓa, yɛ di ɓalo.

²⁰ Yai-Laa a ɲɛ̨i kɛ nwɛlikɛmąą nuą diɛ, Kɛlaa nuąi di hva kulɔ di woo ɓa, a di hu kala.

²¹ Yai-Laa mąątɛ̨nɛ̨ woo kaa pai kɛi ná, nukan gəlee diɛ Naa Mąąhəɠɛɛ mąąwiɛ, a yələ kəlee da nwɔɔ.