Mąątɛ̨nɛ̨ 144 - Yálá laawoo hɛɓɛ (dc)Davidə nwɔ Yálá hɛɠɛɛɓo woo 1 Davidə nwɔ wələ woo. 1 Davidə nwɔ wələ woo. Mąąwiɛ ə kɛ Yai-Laa ɓa, yai a mą́ą́kɔ̨nwɔ̨ kwɛni, ya ɓə a ɲéé ɲąątɔɔ kɔ́ ɓa, yɛ ɲéékpiɛɠaa tənən dɔɔ, kɔ hu. 2 Dɔ́ɔ́ bulumun ni, da mą́ą́kɔ̨nwɔ̨ taa, nwɔ́ kɔ́ taa ka ti, da gúlɔ ɉumun, mą́ą́kpɛ kpanąn, bɔɔli ɓə ŋą́ mą́ą́ kilɛ laa, a nwɔ́ nuąi lɔ nwɔ́ heeɓolaa yee mu. 3 Yai-Laa! Lə kɛ hɛn gbɔ ɓaa a nu, yai yá mąą liihɛlɛn ɉee-o? Lə kpɔ ɓaa a ɉaa kɔ̨nɔ̨n tii, yai yá mąą kiliŋąhiɛ kɛ-o? 4 Nu kaa lɔ yɛ hvaŋą, nwɔ yɛnɛ̨ɛ̨ ə ɓo yɛ nįnįn a tɛɛ. 5 Yai-Laa, yələ kɔ́lɔn voloon, ə́ yɛɛ, tunwɔ̨n yeeɠaa diɛ, di mɛ̨i lulu ə tɛ! 6 Yələgbąnąą ɓɛla, ə́ di hu taɠa taɠa, ə́ wɔ tonwąɠaai pili, di di taɠa di kee ɓa. 7 Lɛɛ yələi, ə́ ə́ yee haŋą, ə́ málo, ə́ gúlɔ yánwąną yəi, ə́ gúlɔ nwɛ̨ą nu huwu ɲəi. 8 Yai naaləi kaa lɔ a lɛɛ kɛ laaləi. Mamįiyee ə ɓo a nu ɓowo yee. 9 Yálá, gáá pai wələ nįnɛ̨ tooi yɛ́, gɛ́ bɛlɛgwəi yɔw yɛ́, ɲɛli ə ɓo ɲą pow. 10 Yɛ́ ɓə ya kɔ́ nɛ̨ɛ̨ tɔɔɓɛlaa diɛ, yɛ́ Davidə nwun mąąkɔ̨nwɔ̨ ɓɔwa kwɛa yəi. 11 'Málo, ɛlɛɛ ə́ mą́ą́kɔ̨nwɔ̨ wɛ̨ą nu huwu yəi, yai naaləi kaa lɔ a lɛɛ kɛ laaləi, mamįiyee ə ɓo a nu ɓowo yee. 12 A kɛ ti, ku lon ɉinąą da kɛ yɛ, wulu ɓɔnŋaa, di ɓɔn nɛlɛɛ a di muhəɠə yələ, ku lon nɛ̨ąą di ɓo a kpɔn ɉu kulɔ nɛ̨ąą, di mąąnɛ̨ɛ̨ tɔɔ pɛlɛ́ɠaa mu. 13 Ku wɔ mɔ̨nun gələɠaai laahvɛɛi, di laahvɛɛi kpɔ kɔ́n kɔ́n a kɔ̨nɔ̨ ɉuwu kəlee. Ku wɔ taatɛlɛɛɠaai diɛ di kaa a waa, di ɓo a waa kpulu tamąą ku wɔ yɛɛ kɔ́wɔɠaai hu. 14 Ku wɔ nįŋɛ̨ɠaai daa kpɛa kpɛaa, di hvo kɛa pɛlii wolo ɉį́i ɓa wɔlɔ woo hva kɛa tɔɔ ku wɔ taaɠaa hu! 15 Nwun na nɛ̨ɛ̨ nuą ɓaa, a nuąi mɛ̨nį huwui tii kəlee kaa di yəi! Nwun na nɛ̨ɛ̨ nuą ɓaa a nuąi Yai-Laa kaa a di wɔ Yálá. |