Mąątɛ̨nɛ̨ 141 - Yálá laawoo hɛɓɛ (dc)

Mąąwɛli hvɛliwoo

1 Davidə nwɔ Yálá hvɛli woo.

¹ Davidə nwɔ Yálá hvɛli woo. Yai-Laa, gáá ə́ təlii: 'Pa kilɛ mą́ą́! Ŋą́ kɛi ə́ təli, ə́ wəli tɔɔ nwóó ɓa.

² Nwɔ́ hvɛli wooi ə kɛ ə́ lííla yɛ lansan, Ɛlɛɛ, ŋą́ ɲééɠaa hąŋąn, ə ɓo yɛ yələ wilii haláá.

³ Yai-Laa, 'ə́ yee kɛ nááləi ɓa, nááləi mąąkpɛ.

⁴ 'Hvó nį́i lɛɛ laa hvo ɉon a pələ ɲɔ̨n, 'gɛ, və́ ɲéé too nɛ̨ŋɛ̨n dúwɔ́ hu, kwa mɛ̨nį ɲɔ̨n gɛ nuą, və́ pa di wɔ hɛli kɔ̨nɔ̨n ta kɔɔn.

⁵ Tələnmolon a gɛ́lɛ, wɛlikɛmąą túwɔ́ li, tələnmolon a kɛi ɉútɔɔ, nwun na nɛ̨ɛ̨ li; Kɛlaa, nu ɲɔnwɔ̨ɔ̨ nwɔ nɛ̨ɛ̨laa nwɛi, ŋą́ nwún gulɔ mu. Ə mą kɛ tii, gáá lɔ mą gɛ́ Ə́ hvɛli, bələi mąn di kaa túwɔ́i la a ɲą́ą́ a ɲɔ̨nwɔ̨ɔ̨.

⁶ Daa di ɲɛ̨itɔwɔ nuą hu wolo kwɛni kpuwulu ɓa, diɛi tii kɛi kwəinɛ̨ɛ̨ kulɔi, ɓɛlɔwai di kɛi nwóó mąn na, gɛ́ kɛ diɛ:

⁷ «Bələi lɔ da kɛɛ hin na, diɛ lɔi ɓuwo, bələ lɔ ɓə di ku kɔ́wɠaa taɠa taɠa la, ɲąmuątaa pələ nwun na.»

⁸ Ɲɛ̨́i həɛi lɔ yɛ́, Ną́mu Yálá, yɛ́ lɔ ɓə ŋą́ mą́ą́ kilɛ ə́ hvaŋąn mu, hvó nɛ̨́ɛ̨́ laa və́ haa.

⁹ Ɉɛlɛn daa dɛ dɔ́wɔ, maaləi mɛ̨nį ɲɔ̨n gɛ nuą daa dɛ, mą́ą́kɔ̨nwɔ̨, və́ kɔ́ la.

¹⁰ Nuąi di hvo ə́ kɔ́lɔn, di kaa pai kɔ́i la, a di kpɔ kpɔɔ ɓaalə, ɲą́ą́ nwɛ́i, gɛ́ nwɔ́ li ɓo.