Mąątɛ̨nɛ̨ 140 - Yálá laawoo hɛɓɛ (dc)

Davidə nwɔ Yálá hvɛli woo

¹ Nwələ ɲɛ̨itɔwɔmun. Davidə.

² Yai-Laa, 'gulɔ nu ɲɔ̨nwɔ̨ɔ̨ yəi, 'mą́ą́kɔ̨nwɔ̨ nwąnąlɔmun ɲəi.

³ A nuąi tii da mɛ̨nį ɲɔ̨n mąą kili tee di kwəi, diɛ kɔ́ tee a yələ kəlee;

⁴ diɛ di nɛ̨n gulɔ, yɛ nu nwąną kaalə, tumu nwąną ɓə di la.

⁵ Yai-Laa, gúlɔ nwąnąlɔmun ɲəi, mą́ą́kɔ̨nwɔ̨ wɛamun ɲəi a diɛi tii dóó mɛ̨nį mąą kiliŋąhiɛ lɔ ɓə diɛ.

⁶ Kpɔwɔ ɲąąkɛ̨nɛ̨ nuą daa hɛlɛn dɛ dɔ́wɔ, daa diŋɛ̨n ɉee dɔ́wɔ, daa ɓaləɠaa tɛ dɛ́ɛ́ pələ hu.

⁷ Ŋį́ kɛ Yai-Laa ɓa: «Nwɔ́ Yálá ɓaa a yɛ́!» Yai-Laa, ə́ wəli tɔɔ nwɔ́ nɛ̨ɛ̨mąą hvə wooi ɓa.

⁸ Nąmu Yálá, yɛ́ ɓə a málo hvaŋą, yɛ́ ɓə nwún mąąkɔ̨nwɔ̨ gɔ hu.

⁹ Yai-Laa, mɛ̨nįi nu ɲɔ̨nwɔ̨ɔ̨ɠaa kaa bɔ, 'hvó hvaa mą, 'hvó ə́ yee hee di wɔ nwundɔɔ hu wooɠaa mu, 'hvó di wɔ ɲaba nwundɔɔi hu nɛ̨ɛ̨.

¹⁰ Nuąi daa kɔ́ hee mą́ą́, di hvo di nwun dɛ mą́ą́ mɛ̨nį hu, nwoo ɲɔ̨n da kɛ moi, 'ə yɛɛ a di nwun.

¹¹ Nwɔ̨n deŋą ə yɛɛ di mɛ̨i, yɛ tulɔ, di di pili ɓoloon gɛnɛ̨ hu, di hvo kulɔ laa.

¹² Laa kalanuą di hvo pai lɛɛi nɔi, mɛ̨nį ɲɔ̨nwɔ̨ɔ̨ ə hvilɛn wɛa nuą pulu, ə lɛɛ la ɉu haa ə di həɠə.

¹³ Gíli kaa ɉu, gɛ́ Yai-Laa kaa pai, mąąwɛlinuą di wɔ tɛ̨ą ɓoi, Yɛ yeehvowolo nuą mąą mɛ̨nį ɲɛ̨i kulɔ.

¹⁴ A tɛ̨ą, tələnmo nuą kaa pai ə́ laa tɛi, kwəi kwələ nuą diɛ di wɔ yɛnɛ̨ɛ̨ kɛ liilaa hu.