Mąątɛ̨nɛ̨ 139 - Yálá laawoo hɛɓɛ (dc)Mɛ̨nį ta hvo loo li Yálá ɓa 1 Nwələ ɲɛ̨itɔwɔmun. Davidə nwɔ wələ. 1 Nwələ ɲɛ̨itɔwɔmun. Davidə nwɔ wələ. Yai-Laa! Yáá mą́ą́kpɛɛ! Yáá gwə́i mɛ̨nįɠaa, kɔlɔn, 2 Ŋą́ kɛ laani-o, ŋį́ múhəɠə-o, gbaɠala kaa Yɛ́; Yá gwə́i mɛ̨nįɠaa lɛɛ kwɛaa la, ə́ gɔlɔn. 3 Ya ɉíɛ pələ, ə mą kɛ, ɲíi pɛlɛ́ mɛ̨i kaa, ə́ dɛ́ɛ́ kpaalə kəlee kɔ́lɔn a nɛlɛɛ. 4 Nwooi gɛ́ ŋį́ mo, hva kpɛli ni tɛ ná, Yai-Laa yáá mąn gɔlɔn. 5 Yáá ə́ yee kalan tee mą́ą́, ə́ yee yɛ ɓo mɛ̨́i. 6 Gɔ́lɔ́n bələ taaləi tii ə́ yəi, yili yee tɛɛi mą́ą́, Nąnŋąąi mɛ̨́i, vá pɛli həlii mą! 7 Mį́ kpɔ ɓə ŋą́ pɛli lii laa, hvá gáá? Mį́ kpɔ ɓə ŋą́ pu, ŋą́ li laa, vá kɛ ə́ ɲɛ̨i mu? 8 Ŋą́ tɛ yələi pələ, yɛ́ ka! Ŋą́ yɛɛ ɲąmuątaa, ə́ ɓo laa! 9 Ŋą́ humo yələɓɔi lɔwai tɔwɔ, ŋą́ koon, ŋį́ laŋin hvóló tooi mɛ̨i, gɛ́ li heei gboloyá pulu pələ; 10 Nąą nwɔ̨nɔ̨, ə́ yee ɓə a də́nə́n dɔɔ, ŋą́ kɛ laa ə́ ɓa-mįi-yee ŋą. 11 Ŋą́ kɛ diɛ: «Tɛ́ɛ́hilɛ-kpinį ə mɛ̨́i kpulu, gwɛ́lɛ kɛɛpono mąą ə pənə a kpinį!» 12 Ə mą kpɛli kɛ ti, dɛ́ɛ́hilɛ-kpinįi tii, hva lɛɛ gwɛ́lɛ a kpinį, ɛlɛɛ, gbinįi tii mąą a pənə a yələɓoɔ kɛɛpono, tɛ́ɛ́hilɛ-kpinį a kɛ yɛ yələɓoɔ! 13 Yɛ́ ɓə nį́i too ɉú, Yɛ́ ɓə dóó néé kwəi. 14 Váái kpɔ tii mą, gɛ́ kɛ diɛ: Bɛ́li pələ kaa a yɛlɛ ə́ yəi, a kwəi pilimąą kɛnɛ̨ɛ̨, Ə́ kɛ mɛ̨nįɠaa da nu kwəi pilimą! Gaa kpɔ tii a tɛ̨ą, ŋą́ą́ yili kpaɠala kɔlɔn. 15 Ną́ą́ ta hvo loo li yɛ́, ɓɛlɔwai ŋį́ kɛ la loo pələi, diɛ ɉéé gíila, yɛ da kɛi həɠə pala kɛɛ nąą loɔ ɓa. 16 Və́ nii kɛ kɛ li a nu leelee, ə́ ɲɛ̨i ə kɛi mą́ą́. Nwɔ́ hvólóɠaa kəlee, mąą mɛ̨nį pɛ̨ɛ̨i kɛ ə́ wɔ hɛɓɛ́i hu, ɓɛlɔwai dɔ̨nɔ̨ kpɛli hvo ni kɛ kɛli la laa. 17 A tɛ̨ą! Yálá! Mɛ̨nįi ə́ kwəi, gbaɠala kaa laa walaai mą́ą́, damąąi, ɉu kɛnɛ̨! 18 Ŋą́ kɛ kpɔ bɔ, ŋį́ di lonon, damąąi dɛɛ ɲɛ̨ąkow ɓa. Ŋą́ nwún gbɔlɔɔ, ŋį́ gbɔ́wɔ́ kaa ə́ yee ŋą. 19 Yálá! Ə li kɛ, yá hvaa kɛ mą, nuąi di hva kulɔ di woo ɓa ə́ di paai! Ɲąmą pu nuą, 'ka həɠə gwɛ́lɛ. 20 Ə́ yowoɠaa da kɛ ə́ laa ɓoi a nuą ɓowo pələ, diɛ ə́ mąą mɛ̨nį ɓo a ə́ laa kala pələ. 21 Yai-Laa! Akɛtii, nuąi da wɛlikpɛɛmąąlaa kulɔ a yɛ́, vá mɔ̨ɔ̨ pɛli wɛlikpɛɛmąąlaa kulɔi a diɛ? Nuąi da kɛ kɔ́ pɛlɛi yɛ́, ŋį́ di hviiɓo? 22 Di wɛli kpɛɛi mą́ą́, daa kɛ a ɲą́ą́ gbíníi ɲówóɠaa. 23 Yálá! Gwə́i pələ kaa, gwə́i kili kaa, níihɛlɛn gáá mą́ą́, ə́ gɔ́lɔn. 24 Gáá kpɔ a nɛlɛɛ, ə gɛ və́ pa ɉon a pələ ɲɔ̨n. 'Li a ɲą́ą́ ɓalo hva kpɛɛ pələ mɛ̨i. |