Mąątɛ̨nɛ̨ 135 - Yálá laawoo hɛɓɛ (dc)Israɛlə nwɔ Yálá mąątɛ̨nɛ̨ woo 1 'Kánikookwəi! 'Ka gu Yai-Laa Laa mąątɛ̨nɛ̨, kaai a Yai-Laa nwɔ tínuą, 'ka mąątɛ̨nɛ̨. 2 Kaai tii Yai-Laa yəi bɛlɛ́n, ku wɔ Yálái yəi bɛlɛ́n, ɲəi gwəlii! 3 Kanikookwəi! Yai-Laa nwɔ mɛ̨nį lɛlɛɛi! 'Ka naa too a wələ, nwɔ mɛ̨nį ɲąąnɛ̨ɛ̨i kɛ̨nɛ̨! 4 Mąąhɔlɔɓo Yai-Laa ə Ɉakɔbə həɠə ɉu a nwɔɔ, Ə Israɛlə kɛ a gwɛlin nɔi. 5 A tɛ̨ą, gbaɠala kaa tii mą́ą́, Yai-Laa kɛ̨nɛ̨i, ku Nąmu yee tɛɛi yáláɠaa kəlee diɛ. 6 Mɛ̨nįi lɔpee Yai-Laa kaa bɔ, a gɛ, lɔi mɛ̨i ɓɛ, ə mą kɛ yələ kɔ́lɔn ɉu, gboloyá hu, ə mą kɛ ɲąmuątaa. 7 Ə həɠə kpɔ lɔi kpɛlai pələ, a tulɔ kpinįnŋaa muhəɠə, tulɔ ə duwɔ, yələ gbąnąą ə ɓɛla, tulɔ yɛ pu, ə hvaŋąɠaa kulɔ ɓɛi ə di pu laa gee mɛ̨i. 8 Ya ɓə Eziptə lɔi hu lon dɔlɔɔɠaa paa, ə həɠə nukanŋaa pɔ, ə həli la daatɛlɛɛɠaa pɔ. 9 Ə kwɛlɛɛn mɛ̨nįɠaa da kpalo mɛ̨nįɠaa kɛ, ə́ wɔ lɔi hu, Eziptə. A Faraɔn da ɲee pɔ nuą. 10 Ya ɓə lɔi kpɛa kpɛa wolo, ə tɔɔɓɛlaa hu wala walaa paa. 11 Sihɔn ka, yai kɛ a Amɔrə tɔɔmun, Ogə ka, yai kɛ a Basan tɔɔmun, ɛlɛɛ, Kanaan tɔɔɓɛlaa kəlee. 12 Yili pulu, ə di wɔ lɔiɠaai tɛɛ Israɛlə pɔ diɛi a ŋą nu huwu, ə kɛ a di kwɛlin. 13 Yai-Laa, di kaa pai kɛi ə́ laa ɓoi a yələ kəlee, Yai-Laa, ə́ laa kili kaa pai lɛɛi nuą ɲą, ɲɛ̨n deei hvo mą. 14 Mąąhɔlɔɓo Yai-Laa, a nwɔ nuąi di wɔ tɛ̨ą mɛ̨nį ɲɛ̨i kulɔ, a nwɔ tínuąi ɲɛ̨imąąwɛli kaa. 15 Lɔiɠaa di wɔ haliɠaai kaa a hɛni da wali, nu kanŋaa ɓə da bɛli a di yee; 16 Laaləi kaa diɛ, di hva hvaa, ɲɛ̨ikɔw ə ɓo diɛ, di hva kɛɛ kaa; 17 Wəli kaa diɛ, di hva mɛ̨nį mɛ̨n, wooi lɔpee hva kulɔ di la. 18 Nuąi da di pɛli, di kɛ pələ kaa lɔ yɛ diɛ, ə mą kɛ, nuąi da di kilitɔɔ diɛ. 19 Israɛlə nu huwu, 'ka Yai-Laa hɛɠɛɛɓo, Aarɔn nwɔ pɛlɛ́i mu nuą 'ka Yai-Laa hɛɠɛɛɓo. 20 Levi nwɔ pɛlɛ́i mu nuą 'ka Yai-Laa hɛɠɛɛɓo, kaai kpɔ ka ɲɔw Yai-Laa ɓa 'ka Yai-Laa hɛɠɛɛɓo. 21 Yai-Laa hɛɠɛɛɓo woo ə tɔɔ Siɔn daai, a yai tii heeni Ɉerusalɛmə daai! 'Kánikookwəi! |