Mąątɛ̨nɛ̨ 132 - Yálá laawoo hɛɓɛ (dc)Mįnɛ̨ pɛlɛ́ lon nwɔ hɛli yələ 1 Ɲee mąąhəɠɛɛ tɛ wələ. 1 Ɲee mąąhəɠɛɛ tɛ wələ. Yai-Laa! Davidə kili 'ə kɛ ə́ ɲą, Ə́ kiliŋąhiɛ nwɔ mɔ̨nɔ̨ɠaa kəlee diɛ. 2 Ya ɓə gwəla Yai-Laa ɓa, ə nwoo kwɛlɛ Ɉakɔbə nwɔ kilɛn nąŋąlon ma, yɛ kɛ mą: 3 «Vá kpɔ lɔ ɲə́i bɛlɛ́n! Vá kpɔ ɉɛ̨́ą hu lɔ ɲə́i gbin ŋą! 4 Vá kpɔ ɲɛ̨́i pɛlɛmą! Vá kpɔ ɲɛ̨́ikɔlɔn bɛlɛmą! Vá kpɔ yíi lɛɛ laa hvo pa ɲɛ̨́i! 5 Hvo kɛ li, ŋą́ gbɛa kɛɛnąą ta hɔlɔɓo a Yai-Laa nwɔɔ, a Ɉakɔbə nwɔ kilɛn nąŋąlon hee pɛlɛ́!» 6 Ku bələ mąn, diɛ gaa Ɛfrata, ku gaa Yaarə yɛɛkɔwɔi. 7 'Ka gwə li bɔ, 'ka gu kwɛli hvilɛ mą nwɔ tɔɔkpəlin lííla. 8 'Ə́ muhəɠə, Yai-Laa! 'Pá ə́ hvįitɔɔ pɛlɛ́ mu! Yɛ́ ká ə́ wɔ mįnɛ̨ kon, ɓɛi ə́ hvaŋą kaa laai! 9 Ə́ wɔ haláá laa həli nuąi, di kwąną həɠə ə kɛ a tələmolaa, ə́ yee pɔ nuą di tómą a kwəinɛ̨ɛ̨. 10 Ə́ wɔ tímun Davidə mąą mɛ̨nį ɓa, dɔɔmun ə́ ɉəɠə ɉu, hvo ə́ pulu tɔɔ mą! 11 Yai-Laa ə nwoo kwɛlɛ Davidə ɓa, tɛ̨ą li, hvo pai həɠəi nwoo pulu, ə kɛ mą: «Ə́ kwəi lon da ɓə, gáá pai ɉeei ə́ wɔ tɔɔkpəlin mɛ̨i, 12 Ə́ lonnii da nwɔ́ mįnɛ̨i pɔ yíi ɓo, da dɔn nwooɠaai gáá pai nɛi diɛ, di lonnii kpɛli mąn, di kaa pai heei ə́ wɔ tɔɔkpəlin mɛ̨i ɲɛ̨n deei hvo mą.» 13 Mąąhɔlɔɓo, Yai-Laa aa Siɔn taa həɠə ɉu, ya ɓə gaa bɔ, ə kɛ a ɉee taa; 14 Gaa pai kɛi a vį́itɔɔi a yələ kəlee, nąą ɓə gáá pai heei laa, gáá nąą pɔ. 15 Gáá lúwɔ́ kɛi mą, ŋą́ lúwɔ́ kɛ ɉu hɛnŋaa diɛ, gɛ́ nwɔ yeehvowolo nuą pilɛ a kɔ̨nɔ̨n. 16 Gɛ́ nwɔ haláá laa həli nuą mąąyili həɠə kɛ a ɓalo mɛ̨nį, ɛlɛɛ, ɉu lonnii diɛ tómą a kwəinɛ̨ɛ̨. 17 Gáá pai Davidə huwu hvaŋą tɛi ɓɛ Siɔn, ɛlɛɛ, nui ŋɛ̨i ŋą́ ɉəɠə ɉu, ŋą́ nwɔ nwɔ̨n ɲąątɛ yɛ lən. 18 Ŋą́ nwumɛ̨ həɠə too ɲowoɠaa kwąną, Kɛlaa nwɛi, nwɔ tɔɔɓɔlɔi ɲɛ̨i a tɔɔ. |