Mąątɛ̨nɛ̨ 12 - Yálá laawoo hɛɓɛ (dc)Davidə kaa Yálá hvɛlii, yɛ ə gulɔ lɛɛ nuą yəi 1 Nwələ ɲɛ̨itɔwɔmun, gwɛnįn, ɲɛli ə ɓo ɲą mɛ̨ihaaɓa, Davidə nwɔ wələ. 2 Yai-Laa, 'pa kilɛ-mą́ą́! Tələnmo nuą daa kpɛɛ, tələnmo mɛ̨nį aa kpɛɛ nu kanŋaa lɔwai. 3 Lɛɛ lɔ ɓə da gɛ di kee ɓa: Di laawulun yɛ ɲąątɛ kɛ, di nɛ̨n ə ɓo di la hveelɛ. 4 Ee Yai-Laa! Nu ɓowo nuą tii, nɛ̨n gboloon dai di la, Ə́ bɛlɛ nwoo kpɛa-kpɛa ɓo nɛ̨n tii kəlee ɓa. 5 A nuą tii da kɛ kɛi diɛ: «Ku laaləi a mɛ̨nį nɛ̨ɛ̨ kuɔ, ku nɛ̨n dɔɔi ku pulu, gbɛɛ ɓə ɲee a pɛli kuɔ, ə hee ku mɛ̨i?» 6 Ya ɓə Yai-Laa a kɛ diɛ: «Mąąwɛli nuą laanɔ̨nwɔ̨ ɓo pələ, da yeehvowolo nuą wɔlɔ pələ, múhəɠə hiɛ kpɔlɔ li. Nui di kɛi di lɛayá pili mą, gɛ́ ɉee liilaa hu.» 7 Yai-Laa wooɠaa kaa a woo hu pɔnɔ̨ɔ̨ɠaa, di kaa yɛ walii, daa ɉəɠeen gee hu hveelɛ, yɛ walii daa ɉuwaa gee mɛ̨i mɛ̨ihveelɛ. 8 Gaa tii, Yai-Laa, Ə́ wɛi, Yá kulɔ Ə́ woo ɓa. Yá ku mąąkɔ̨nwɔ̨, a yələ kəlee, nu taaleei tii yəi. 9 Nu ɲɔ̨nwɔ̨ɔ̨ɠaa kaa lia tɛɛ, mɔ̨ɔ̨-mɔ̨ɔ̨, kɛɛ nąą kəlee ɓa, ɛlɛɛ, túwɔ pələ ɲɔ̨n ɲee aa tɛɛ nu kanŋaa diɛ. |