Bìoball air-loidhne

« Roimhe

Air adhart »

Mąątɛ̨nɛ̨ 119 - Yálá laawoo hɛɓɛ (dc)

Yálá nwɔ tɔn nwooi mąątɛ̨nɛ̨ wələ

¹ Nuąi di yíi pələ mąąkulɔi hvo mą, di nwun na nɛ̨ɛ̨i, a diɛi da hiɛ a Yai-Laa nwɔ tɔn nwooi.

² Nuąi da lɛɛ nwɔ yɛnɛ̨ɛ̨ hon bələ pulu, diɛ gwɛli di kwəi tɔ̨nɔ̨ mɛ̨i, di nwun na nɛ̨ɛ̨i.

³ Diɛi di yee hvo mɛ̨nį ɲɔ̨n ɉu, diɛ hiɛ nwɔ pələi mɛ̨i.

⁴ Yɛ́ kpinįi ɓə ə́ wɔ tɔn nwooɠaai lɛ, əgɛ, di di hon gbɔ a yɛlɛ.

⁵ 'Ɉú wala wala ɉiɛ pələ hu, gɛ́ pɛli ə́ wɔ tiɓoɠaai kɛi,

⁶ akɛtii, nwumɛ̨ hva nee tɛ a ɲą́ą́; ɲɛ̨́i ə ɓo lɔ a ɉəɛ ə́ wɔ tiɓoɠaai diɛ.

⁷ Gáá pai kɛi ə́ laa tɛi a gwə́i kwəlɛɛ, gɛ́ ə́ wɔ tələnmo wooɠaai mąąkwɛli.

⁸ Gáá bɔ ŋį ə́ liiɓa mɛ̨nįɠaa kɛ, 'Hvó ə́ yee kulɔ mú tɛ̨ɛ̨tɛ̨ɛ̨?.

⁹ Nui nwųnų kɔ́lɔi, a ɉiɛ pələ yɛlɛ kɛ pələ kɛ ləi? Hvo kɛli ə́ woo hon.

¹⁰ Gáá ə́ kwɛlii a nį́i kəlee, 'Hvó nɛ́ɛ́ laa, mą́ą́ hvo kwɛa ə́ wɔ tɔn nwooɠaai diɛ.

¹¹ Mɛ̨nįɠaai ə́ mo, ŋą́ di kanąn níi pɔ, əgɛ, və́ pa nəi nɛ̨ŋɛ̨n ɉəɠə yɛ́.

¹² Mąąwiɛ ə kɛ yɛ́ Yai-Laa, mą́ą́ kwɛli ə́ liiɓa mɛ̨nįɠaa diɛ.

¹³ Mɛ̨nįɠaai kpɔ a kulɔ ə́ la, di kaa lɔ kɛa ná a wələ.

¹⁴ Ŋą́ą́ lɛɛ ə́ wɔ tɔn nwooɠaai pulu, ŋą́ą́ gwə́inɛ̨ɛ̨ mɛ̨nį hɔlɔɓo, gaa lɔ yɛ ŋą́ kwiɛn a hɛngɔw kɛnɛ̨ɛ̨.

¹⁵ Ŋą́ ə́ wɔ tíɓoɠaai nąą kili too gbɔ́ɔ́ ŋą a yələ kəlee, ɲɛ̨́i ə ɓo lɔ ə́ wɔ pələɠaai diɛ.

¹⁶ Ə́ liiɓa mɛ̨nįɠaa kaa a nííɓa mɛ̨nįɠaa, vá lɛ̨ą ə́ woo ta ɓa.

¹⁷ Ə́ wɔ tímun maa a ɲą́ą́, ɉon a nɛlɛɛ, əgɛ, ŋą́ yɛnɛ̨ɛ̨ kɛ, ɛlɛɛ, gɛ́ lɛɛ ə́ woo pulu.

¹⁸ Ɲɛ̨́i hvoloon, gɛ́ pɛli, ə́ wɔ tɔn nwooi lɛlɛ pələ kaai.

¹⁹ Nwɛ̨ą ɓaa a ɲą́ą́ nɔi ŋɛ̨i mɛ̨i, 'Hvó ə́ wɔ tíɓoɠaai loo mą́ą́.

²⁰ Mɛ̨nįɠaai ya mo, ŋą́ níí muhəɠə a gwɛli mɛ̨nį kpɔ a yələ kəlee.

²¹ Gbɔwɔ ɲąąkɛ̨nɛ̨ nuąi tii da kɛ di mąą kwɛai, ə́ wɔ tíɓoɠaa diɛ, a diɛi tii di nɛ̨ŋɛ̨n naai, Yá ə́ pamą diɛ.

²² 'Gúlɔ lalan da tɛɠɛɓoɉu di yəi, mąąhɔlɔɓo, ŋą́ hiɛ a ə́ wɔ tɔn nwooɠaai.

²³ Ə mą kɛ lɔi ɲąąwooɓo nuą daa di ɲąąkpɔn, diɛ hvaa pɛlɛ mą́ą́, ə́ wɔ tímun kilitɔɔi lɔ ə́ lííɓa mɛ̨nįɠaa diɛ.

²⁴ Ə́ wɔ tɔn nwooɠaai kaa a gwə́inɛ̨ɛ̨ mɛ̨nį, diɛ ɓə da níɛwooɓo.

²⁵ Ɓɛ kaali, ɲą́ą́ ka tooni munuun ɉu, yɛ bələi ə́ mo lai: 'Pənə kani ə́ dóó nwų́nų kɔ́lɔ hu.

²⁶ Ŋį́ ɉíɛ pələɠaa hukulɔ yɛ́, ə́ nwóó pulu pənə, ə́ kwəi mɛ̨nįɠaa lɛ mą́ą́.

²⁷ Ə́ wɔ tɔn nwooɠaai hu yíi ɓo pələ lɛ mą́ą́, gɛ́ pɛli ə́ kɛ mɛ̨nį kpɛa kpɛaɠaa lɛɛi gíli pɔ.

²⁸ Liikələn gwəi aa ɲɛ̨́iyá yɛɛ mą́ą́, 'múhəɠə, yɛ bələi ə́ naakwɛlanmo la.

²⁹ 'Mą́ą́kwɛa lɛɛ mɛ̨nį ɓa, ə́ wɔ tɔn nwooi pulu mɛ̨inɛ̨ɛ̨ kɛ mą́ą́.

³⁰ Tɛ̨ą pələ ɓə ŋą́ ɉəɠə a nííɓa, vílɛnŋąąi lɔ ə́ wɔ tíɓoɠaai pulu, gɛ́ di kɛ.

³¹ Gáną́nŋąąi ə́ laawoo ɓa, Yai-Laa! 'Hvó ɲą́ą́ kolon.

³² Gáá gilɛ həɠəi ə́ wɔ tɔn nwooi nwɔ pələɠaai mɛ̨i, mąąhɔlɔɓo, yaa ɲéé la hvoloon.

³³ Yai-Laa, ə́ lííɓa kɛ pələ lɛ mą́ą́, gáá bɔ ŋį́ di kɛ a ɲéé lɛɛ tíi.

³⁴ Kiliŋą laa mąą tɛɛ bɔ́, əgɛ, gɛ́ pɛli lɛɛ ə́ wɔ tɔn nwooi pulu, gɛ́ bɔ mɛ̨nį kɛ gwə́i tɔnɔ̨ mɛ̨i.

³⁵ 'Vílɛn ə́ wɔ tɔnŋaai hiɛ pələ mɛ̨i, mąąhɔlɔɓo, yili ɓə ɲąąnɛ̨ɛ̨i mą́ą́.

³⁶ 'Gíli tɛnɛ̨n dɔɔ ə́ wɔ tíɓoɠaai pɔ pələ! 'Hvó ɲɛ̨i tinɛ̨n hɛngɔw pɔ pələ.

³⁷ Ɲɛ̨́i həɠə ɲą́ą́koloon mɛ̨nįɠaa pulu! 'Pənə ə́ dóó nwų́nų kɔ́lɔi, əgɛ, ŋį́ ə́ liiɓa kɛ.

³⁸ Mɛ̨nįɠaai ə́ naakwɛlanmo ə́ wɔ tímun ɓa, di pɔ mɛ̨ni kɛ mą, əgɛ, nuą diɛ pɛli ɲɔwii yɛ́.

³⁹ Ŋą́ ɲɔw lalan ma, 'voló mą́ą́, ə́ wɔ kiti wooɠaai pa lúwú ɓə.

⁴⁰ A neelee, ə́ wɔ tɔn nwooɠaai wɛli kaa mą́ą́, 'Pənə ə́ dóó nwų́nu kɔ́lɔi a ə́ wɔ tələnmolaai.

⁴¹ Ee kə Yai-Laa! Ə́ wɔ wɛlikɛmąąlaa ə yɛɛ mɛ̨i wɛ! A máloi yá mo, yɛ bələi ə́ mo la.

⁴² A kɛ ti, lalan nwoo hutoo woo a kɛ ná; mąąhɔlɔɓo, ə́ woo ɓə gílitɔɔi mą.

⁴³ 'Hvó tɛ̨ą mąąkwɛa nááləi ɓa, mąąhɔlɔɓo, ɲɛ̨́i heɛi ə́ hvaawooɠaa tɔwɔ.

⁴⁴ Ɲéé kaa lɔ pai kɛi ə́ wɔ tɔn nwooi diɛ a yələ kəlee.

⁴⁵ Ŋą́ nwɔ́ yɛnɛ̨ɛ̨ kɛ nɛ̨́ɛ̨́ hu, mąąhɔlɔɓo ə́ wɔ tɔn nwooiɠaai ɓə gáá bɔ.

⁴⁶ Gáá pai kɛi ə́ wɔ tiɓoɠaai hukulɔi tɔɔɓɛlaa ɲɛ̨i ɓa, hvə́ pai nwumɛ̨i yili kɛi.

⁴⁷ Ə́ wɔ tiɓoɠaai da níi hon gbɔ kɛnɛ̨, di wɛli kaa mą́ą́ kpɔ kpąąn.

⁴⁸ Ɲéé haŋąąi ə́ wɔ tiɓoɠaai pɔ pələ, di wɛli kaa mą́ą́ kpɔ a mɔlɔɔ, ə́ liiɓa kɛ mɛ̨nįɠaa lɔ ɓə nwɔ́ kiliŋąhiɛ a hvilɛn mą.

⁴⁹ Nwooi ə́ mo ə́ wɔ tímun ɓa, ə́ kili lɛɛ ɉu, yai ə́ gílitɔɔmą.

⁵⁰ Ya ɓə a níílaa nwɔ mɔ̨nɔ̨i hu, ə́ woo kwɛlɛ woo tii ɓə a váŋąlɔ.

⁵¹ Kpɔwɔ ɲąąkɛnɛ̨ nuą di di laa pu ɉú kɛnɛ̨, Kɛlaa, və́ həɠə ə́ wɔ tɔn nwooi pulu.

⁵² Yai-Laa, mɛ̨nįɠaai wɔlɔ ə́ mo, di kili kaa ɲą́, diɛ ɓə da níílaa.

⁵³ Níí a kɛ kələn ɉii gwə́i kpɔ kɛnɛ̨, ɓɛlɔwai ŋą́ kɛ nɛ̨ŋɛ̨n ɉəɠə nuą kaai la, diɛ həɠə ə́ wɔ tɔn nwooi pulu.

⁵⁴ Bɛlɛ́i ŋɛ̨i gáá lɔ mu lɔwai tawolo, Ə́ liiɓa mɛ̨nįɠaa lɔ ɓə di kaa a nwɔ́ wələ woo.

⁵⁵ Ŋą́ gíliŋąhiɛ ə́ laa ɓa a kpinį, Yai-Laa, əgɛ, ŋį́ ɲéé kanąn ə́ wɔ tɔn ma.

⁵⁶ Nwų́ɔ̨ tiɛ̨ ɓaa, ŋį́ ə́ wɔ tɔn wooɠaai pɔ mɛ̨nį kɛ.

⁵⁷ Ŋą́ kɛ kpɔ diɛ: Nwɛ́i ɓaa, ŋį́ lɛɛ ə́ wooɠaa pulu Yai-Laa!

⁵⁸ Gáá kpɔ tɔɔi a nwą́nąi, ŋą́ ə́ líiɓa kɛ, kpɔnmąą tɛɛ bɔ́, yɛ ɓələi ə́ mo la.

⁵⁹ Ŋą́ą́ gíliŋąhiɛ dúwɔ pələ hu, gáá pənəi ŋį́ pa ə́ wɔ tɔn nwooɠaai pɔ.

⁶⁰ Gáá mą́ą́hulɔi, vá nwų́ɔ̨ wɔlɔ, ə́ wɔ tiɓoɠaai kɛ mɛ̨nį hu.

⁶¹ Nuąi di hva lɛɛ di woo pulu, di wɔ ɓaaləɠaai daa mą́ą́tinɛ̨n, Kɛlaa ə́ wɔ tɔn nwooi nwɛi, vá lɛ̨ą mą.

⁶² Ŋą́ múhəɠə a kwiihɛ̨ą, gɛ́ ə́ laa tɛ, mąąhɔlɔɓo ə́ wɔ kiti wooɠaai haŋąąi.

⁶³ Nuąi kpɔ da ɲɔw yɛ́, kwa diɛni ɓə ku tɔɔ, a diɛi tii da kɛ ə́ wɔ tiɓoɠaai hon ɉii.

⁶⁴ Ə́ wɔ wɛlikɛmąąlaa aa lɔi laa hvɛɛ Yai-Laa, mą́ą́kwɛli ə́ liiɓa mɛ̨nįɠaa diɛ.

⁶⁵ Yai-Laa! Yáá mɛ̨nį lɛlɛɛ kɛ ə́ wɔ tímun ma, yɛ bələi ə́ mo la.

⁶⁶ Kiti haŋąą da mɛ̨nį kɔ́lɔn ŋąą di tɔlɔ lɛ mą́ą́, mąąhɔlɔɓo, náái ə́ wɔ tiɓoɠaai la.

⁶⁷ Gɛɛ kpɔwɔ mąąyɛɛ hvo lɔ ɉú, ŋį́ kɛi lan, yiihu kɛa, gáá ə́ wɔ tɔn nwooiɠaai hon ɉii.

⁶⁸ Ə́ wɔ mɛ̨nį lɛlɛɛi! Ə́ nukpɔɔi! Ə́ wɔ tiɓoɠaai lɛ mą́ą́.

⁶⁹ Kpɔwɔ ɲąąkɛnɛ̨ nuą daa náá kala a di wɔ lɛɛ wooɠaa, nwɛ́i, gáá ə́ wɔ tiɓoɠaai pulu gwə́i tɔ̨nɔ̨ mɛ̨i.

⁷⁰ Di lii ɲɔ̨nwɔ̨ɔ̨ di kwəi kpɔ kɛnɛ̨, nwɛ́i, ə́ wɔ tɔn nwooiɠaai ɓə da níí hon.

⁷¹ Mą́ą́ yɛɛ mɛ̨nį ə́ yəi, kaa mą́ą́ a mɛ̨nį lɛlɛɛ, əgɛ, ŋį́ ə́ wɔ tɔn nwooɠaai mąąkwɛli.

⁷² Tɔn nwooi a kulɔ ə́ la, yili hviɛlaɓoɔi mą́ą́, ə tɛɛ hɛni da wali puɔ gee mɛ̨i ɓa.

⁷³ Ə́ bɛ́li a ə́ yee, ə́ ɉúwala wala, 'gɔ́ a kili, gɛ́ pɛli ə́ wɔ tiɓoɠaai hukpɛi.

⁷⁴ Nuąi da ɲɔw yɛ́ da gáá, di kwəi a nɛ̨ɛ̨, mąąhɔlɔɓo, gílitɔɔi ə́ woo ɓa.

⁷⁵ Yai-Laa, ŋą́ą́ gɔlɔn gɛ́ diɛ, ə́ kwəi kiliɠaai haŋąąi, ɛlɛɛ, nwún mąąyɛɛ mɛ̨nį ə́ yəi, dɛ̨ą kaa ə́ pɔ.

⁷⁶ Ə́ kulɔ mɛ̨ni ə́ woo ɓa, a níílaa, yɛ bələi ə́ naakwɛlanmo la ə́ wɔ tímun ma.

⁷⁷ Ə́ wɔ ɲɛ̨imąąwɛli kaa ə lɔ nį́i hu, ŋį́ ɓalo; mąąhɔlɔɓo, ə́ wɔ tɔn nwooi ɲąąnɛ̨ɛ̨i mą́ą́.

⁷⁸ Gbɔwɔ ɲąąkɛnɛ̨ nuąi tii kɛi lɛɛ pɛlɛ mą́ą́, di nwumɛ̨, nwɛ́i, ə́ wɔ tiɓoɠaai ɓə ŋą́ gíliŋąhiɛ mą.

⁷⁹ Nuąi da ɲɔw yɛ́, di pənə di pa bɔ́, di kaa pai ə́ liiɓa mɛ̨nįɠaa kɔ́lɔn ɉii.

⁸⁰ 'Gɛ ŋą́ hvilɛn ə́ tɔn nwɔ nwooɠaai pulu a neelee, əgɛ, nwumɛ̨ hvo pa tɛ a ɲą́ą́.

⁸¹ Ɲɛ̨́i aa lɛɛ málo yələ tɔwɔ ə́ yəi! Vį́į́ kəlee aa kpɛɛ! Kɛlaa, gílitɔɔi lɔ ə́ woo ɓa.

⁸² Mɛ̨nįi ə́ naakwɛlanmo, ɲɛ̨́i hɛlɛn dɛɛi kpɔlɔ dɔwɔ! Ə́ kaa pai níí laai a lə yələ?

⁸³ Gúlaai wɔlɔ kɛ ɓálá haɠa ɓa, Kɛlaa, və́ lɛ̨ą ə́ lííɓa mɛ̨nįɠaa diɛ.

⁸⁴ Ə́ wɔ tímun nwɔ hvólóɠaai kaa pai lamui lɔ nii tii? Lə yələ ɓə ə́ kaa pai mɔ̨nɔ̨ɓo nuą kiti teei la?

⁸⁵ Kpɔwɔ ɲąąkɛ̨nɛ̨ nuą daa lɔwa tee dɔ́wɔ, diɛ ə́ wɔ tɔ́n nwooi hu kala la tii.

⁸⁶ Ə́ wɔ tíɓoɠaai kəlee kaa a tɛ̨ą, nuą hvilɛn ŋąąi búlu a kili ɲɔ̨nwɔ̨ɔ̨, 'Pá kilɛ mą́ą́!

⁸⁷ Vį́į́ aa kɛ kpɛɛ, nąą aa lɛɛ kɛ tiikpə, diɛ kɛ di dóó, ya pa, və́ həɠə li ə́ wɔ tíɓoɠaai pulu.

⁸⁸ 'Pənə ə́ dóó nwúnu kɔ́lɔi, mąąhɔlɔɓo ə́ kulaai ə́ woo ɓa, ɛlɛɛ, mɛ̨nįɠaai kulɔ ə́ la, ŋį́ di gɛ.

⁸⁹ Yai-Laa, ə́ laawoo kaa laa a yələ kəlee, yələkɔlɔn ɉu, mąą hva hvalin.

⁹⁰ Ə́ haŋąąi a yələ kəlee, ə́ lɔi laa, ɛlɛɛ gaa lɔ naai.

⁹¹ Bələi lɔ ə́ mo la, bələ lɔ ɓə hɛn gəlee kaa nií la, aa lɛɛ ɉu, haa kəlee yələ aa həli. Mąąhɔlɔɓo, yɛnɛ̨ɛ̨ kəlee pilɛɛ geemɛ̨i, a tí yɛ́.

⁹² Ə li kɛ ə́ wɔ tɔn nwooi hvo kɛ a nííɓa mɛ̨nįɠaa, yɛ ŋą́ą́ haa laanɔ̨nwɔ̨ hu.

⁹³ Vá lɛ̨ą kpɛli tanɔ̨n, ə́ wɔ tɔn nwooɠaai diɛ, mąąhɔlɔɓo, di haalai ɓə, ə́ nwɔ́ yɛnɛ̨ɛ̨ pu la nįnɛ̨ kɔ́lɔi.

⁹⁴ Ə́ pɔɔ ɓaa a ɲą́ą́! 'Málo! Mąąhɔlɔɓo, ə́ wɔ tɔn nwooɠaai kɛ lii kaa gwə́i.

⁹⁵ Nuąi di hvo Yálá pɔ, di kɛi nwún na pili pələ kwɛli, nwɛ́i, níí laai lɔ ə́ wɔ tɔn nwooɠaai mɛ̨i.

⁹⁶ Lɛlɛ kəlee ɲɛ̨n ma kaa mą, Kɛlaa ə́ wɔ tíɓoi nwɛi, ɲɛ̨n ma hvo mą.

⁹⁷ Ə́ wɔ tɔn nwooi wɛli kaa mą́ą́! Ŋą́ ɉu kpɛ a yələ kəlee.

⁹⁸ Ə́ wɔ tíɓoi aa gílí kɛ̨nɛ̨, aa dɛɛ ɲówóɠaa di wɛi ɓa, ŋą́ ɲéé hveelɛi hee mu, a yələ kəlee mɛ̨nį.

⁹⁹ Gílí ɲąą kulaai dɛɛ gálámɔ̨ɔ̨ kəlee ɓa, mąąhɔlɔɓo, ŋą́ ə́ wɔ tɔnŋaai hu kpɛ.

¹⁰⁰ Mɛ̨nį kulɔɉu kɛ kili kaa ɲə́i dɛɛ galanɉonŋaa diɛ, mąąhɔlɔɓo, ŋą́ ə́ wɔ tɔn nwooɠaai pɔ yíiɓo.

¹⁰¹ Ŋą́ nɛ̨ŋɛ̨n bələ kəlee mąąlaa, gɛ́ pɛli lɛɛi ə́ woo pulu.

¹⁰² Və́ nwún gulɔi mɛ̨nįɠaai ə́ mo mu, mąąhɔlɔɓo, yɛ́ ɓə kili tɛɛ bɔ́.

¹⁰³ Ə́ wɔ tɔn nwooɠaai nɛ̨ɛ̨i ná, dɛɛ kwɛ̨in nwulɔ ɓa.

¹⁰⁴ Ə́ wɔ tɔn nwooɠaai daa mɛ̨nį hukpɛ kili tɛɛ bɔ́, yili mąą mɛ̨nį ɓa, lɛɛ pələɠaa kəlee wɛli aa kpɛɛ mą́ą́.

¹⁰⁵ Ə́ laawoo kaa a nwɔ̨n nən, gɔ́wɔ mu, yɛ ɓo a kɛɛpono dɛ́ɛ́ pələ hu.

¹⁰⁶ Ŋą́ą́ gwɛ́la, ɛlɛɛ, nwóó lɔ ɓaa a nwóó, gɛ́ ŋą́ ə́ wɔ tɔn nwooɠaai pɔ yíiɓo, di haŋąąi.

¹⁰⁷ Laanɔ̨nwɔ̨ aa ɉɛ́ɠɛɓo kɛ̨nɛ̨, Yai-Laa, 'málo, yɛ pələi ə́ mo la.

¹⁰⁸ Yai-Laa, nwɔ́ hvɛli wooɠaai, gáá naa həlii yɛ́, 'ə́ yee hee mu, Ə́ liiɓa mɛ̨nįɠaa lɛ mą́ą́.

¹⁰⁹ Bələ nwun na pili mɛ̨nį hɛlɛnŋąąi kɛ nwún mɛ̨i, Kɛlaa, vá lɛ̨ą ə́ wɔ tɔn nwooi ɓa.

¹¹⁰ Ɲɛ̨ninuą di hɛlɛn dɛ dɔ́wɔ, Kɛlaa və́ mą́ą́ kwɛa ə́ wɔ tɔn nwooɠaai diɛ.

¹¹¹ Gwɛ́lin mąą Ə́ laawoo a yələ kəlee, yá ɓə a gwə́inɛ̨ɛ̨.

¹¹² Ŋą́ tɔɔ a nwą́ną́i, gɛ́ ə́ wɔ tɔn nwooɠaai pɔ yíiɓo, Və́la li a yələ kəlee.

¹¹³ Huhveelɛmun nwɛli kpɛɛi mą́ą́, Kɛlaa, ə́ wɔ tɔn nwooi wɛli kaa mą́ą́.

¹¹⁴ Mą́ą́ kilɛi da mą́ą́kpɛ kpanąn maa a yɛ́, ə́ woo ə gílitɔɔi mą.

¹¹⁵ Kaai a mɛ̨nį ɲɔ̨n gɛ nuą, 'ka mą́ą́ laa, gɛ́ nwɔ́ Yálái nwɔ tíɓoɠaa kɛ.

¹¹⁶ 'Ə́ yee pu mú, gɛ́ pɛli lɛɛi yɛnɛ̨ɛ̨, yɛ bələi ə́ mo la, 'hvó ɲɛ̨́i lɛɛ bələi kpɛli kpɛli.

¹¹⁷ 'Ə́ yee hee mú, ə gɛ ŋį́ ɓalo, ɛlɛɛ, ə́ wɔ tíɓoɠaai di hvo pai kulɔi gílí pɔ.

¹¹⁸ Nuąi daa di mąą kwɛa ə́ laawoo ɓa, ə́ di pili, mąąhɔlɔɓo, di kɛ mɛ̨nįɠaa ə kɛ lɔ a lɛɛ.

¹¹⁹ Yáá Nwąnąlɔnuą kəlee kɛ a kwɛli kpo, yili mąą mɛ̨nį ɓə ŋą́ ə́ hvaa wooɠaa wɛlila kɛ la.

¹²⁰ Ŋą́ kɛ ə́ ɲɛ̨i ɓa, ɉúwɔ hu a kpɛlin, gɛ́ ɲɔ́w ə́ wɔ kiti wooɠaa diɛ.

¹²¹ Ŋą́ túwɔ yɛ bələi ə́ mo la tələnmolaa hu, 'hvó dóó mɔ̨nɔ̨ɓo nuą yee ɲą.

¹²² Ə́ wɔ tímun gɔ́ a nwunnąnɛ̨ɛ̨, kpɔwɔɲąąkɛ̨nɛ̨ nuą di hvo hee mɛ̨́i.

¹²³ Ɲɛ̨́i kaa kpɔlɔ málo mɛ̨nį tɔwɔ a yələ kəlee, da tələnmo yɛnɛ̨ɛ̨i ə́ naakwɛlanmoi.

¹²⁴ Ə́ wɔ tímun ɉon a wɛlikɛmąąlaa, ɛlɛɛ, ə́ hvááwooɠaa hu pɔ̨nɔ̨ mą́ą́.

¹²⁵ Gáá a ə́ wɔ tímun, mɛ̨nį hu kpɛ kili tɛɛ bɔ́, gɛ́ pɛli ə́ hvaa wooɠaa kɔ́lɔn ɉii la.

¹²⁶ Yai-Laa, ə́ kɛ́ mɛ̨nį kɛ yələ aa həli mą, daa ə́ wɔ tɔn mąąkalai.

¹²⁷ Nwɛ́i, ə́ wɔ tíɓoɠaai wɛli kaa mą́ą́, dɛɛ hɛni ɓa, ə mą kɛ hɛni hu waa kpɔ hva-hva.

¹²⁸ Yili mąą mɛ̨nį ɓa, ŋą́ ə́ wɔ tɔn nwooɠaai kəlee kaa a ɉaŋąą. Lɛɛ pələɠaa kəlee wɛli kpɛɛi mą́ą́ kpɔ tɛ-tɛ.

¹²⁹ Ə́ wɔ lɔi hu tɔnŋaai ɲąąnɛ̨ɛ̨i, yili mąą mɛ̨nį ɓa, ŋą́ di kɛ.

¹³⁰ Ə́ laawoo, kili ɲąpono, a kili tɛɛ lɛapɛlɛɛ pɔ.

¹³¹ Ŋą́ náá taɠa kpɔ kɛ̨nɛ̨ ə́ woo tɔwɔ, gɛ́ mukpələ, ə́ wɔ tíɓoɠaai di mąą pulu kaa mą́ą́.

¹³² Ə́ ɲɛ̨i lɛlɛɛ hee mą́ą́, ə́ mą́ą́ hvaalɛɛ, nuąi ə́ laa wɛli kaa diɛ, bələ ɓə mąąnɛ̨ɛ̨ ə́ di hon na.

¹³³ Váŋąlɔ a ə́ wɔ tɔn nwooɠaai, 'hvó mɛ̨nį ɲɔ̨n nɛɛ laa hvo hee mą́ą́.

¹³⁴ Nuąi daa hee mɛ̨́i, 'gúlɔ di yəi, əgɛ, ŋą́ ə́ wɔ tɔn nwooɠaai pɔ yíi pɔ.

¹³⁵ Ə́ ɲɛ̨i lɛlɛɛ hee ə́ wɔ tímun ma, Ə́ liiɓa mɛ̨nįɠaa lɛ mą́ą́.

¹³⁶ Ɲɛ̨́iyá kpɔ kpɔɔ kaa tooi mą́ą́, mąąhɔlɔɓo, di hvo ə́ wɔ tɔn nwooi pɔ yíiɓoi.

¹³⁷ Yai-Laa, ə́ haŋąąi, ɛlɛɛ, yii lɔpee yá mo, ɉaŋąą.

¹³⁸ Ə́ wɔ tɔnŋaai tɔɔ a ɉaŋąą, a tɛ̨ą hu ponoɔ.

¹³⁹ Níi ə kɛi kələn gwə́i, ɉú yɛ kpɛlin, a ɲówóɠaa kaai ŋį́ kɛi mo, diɛ həɠə ə́ wooɠaa pulu.

¹⁴⁰ Ə́ laawoo mąą kulɔi tai lɔpee hvo mą, nwɛli kaa ə́ wɔ tímun ma.

¹⁴¹ Bələi mąn və́ kɛnɛ̨ li la, di tɛɠɛɓɔɔ ɉú, vá lɛ̨ą ə́ wɔ tɔn nwooɠaai diɛ.

¹⁴² Ə́ haŋą pələ, gaa a yələ kəlee mɛ̨nį, ə́ wɔ tɔn nwooi ə ɓo a tɛ̨ą.

¹⁴³ Ɉú aa pu mą́ą́, níi aa hɛlɛn, Kɛlaa ə́ wɔ tíɓoɠaai ɲąą nɛ̨ɛ̨ kaa gulɔi.

¹⁴⁴ Mɛ̨nįɠaai yá mo, gəlee hąŋąąi ɲɛ̨n deei və mą, mɛ̨nį hukpɛ kili tɛɛ bɔ́, gɛ́ pɛli nú kɛi.

¹⁴⁵ Gáá ə́ təlii a nwą́ną́i Yai-Laa! 'Nwóó mu hon, əgɛ, ŋą́ ə́ liiɓa mɛ̨nįɠaa kɛ.

¹⁴⁶ Gáá ə́ təlii, 'pa kilɛ mą́ą́ ə́ málo! Əgɛ, gɛ́ pɛli lɛɛi ə́ wooɠaa pulu.

¹⁴⁷ Ŋą́ humo, ŋą́ kulɔ yələɓɔi tɔwɔ, gɛ́ tomą ə́ pɔ pələ, gílitɔɔi ə́ woo ɓa.

¹⁴⁸ Ŋą́ ɲį́nąą ɓo yələɓɔi gbįnį mu, mɛ̨nįɠaai ə́ mo, gɛ́ gíliɲąhiɛ mą.

¹⁴⁹ Ə́ wəli tɔɔ nwóó ɓa, ə́ wɔ wɛlikɛmąąlaa hu, Yai-Laa, bənə ə́ dóó nwúnų koloi, yɛ bələi ə́ mąą kili tee la ə́ kwəi.

¹⁵⁰ Biɛn doo nuąi tii, a nwąnąlɔ nuąi tii, di kaa lɛɠɛi mą́ą́, a diɛi tii daa di mąą kwɛa ə́ wɔ tɔn nwooi ɓai.

¹⁵¹ Ə́ wɛi, Yai-Laa, ə́ kaa gwɛ́lɛ, ə́ wɔ tíɓoɠaai kəlee di ɓo a tɛ̨ą.

¹⁵² Mɛ̨nįɠaai ə́ mo, gbaɠala kaa mą́ą́ a ɉu kwɛaa, a nwooɠaai ə́ mo a yələ kəlee mɛ̨nį.

¹⁵³ Nwɔ́ mɔ̨nɔ̨i kaa, ə́ gúlɔ ɉu, hvó gaai, və́ lɛ̨ą li ə́ wɔ tɔn nwooi ɓa.

¹⁵⁴ Mą́ą́ mɛ̨nį ɲɛ̨i kulɔ, nwún mąąkɔ̨nwɔ̨, ə́ woo too ɉu, əgɛ ŋą́ pənə ŋą́ too nwúnų kɔ́lɔi, yɛ bələi ə́ naakwɛlanmo la mą́ą́.

¹⁵⁵ Nwun mąąɓo mąą kwɛai nwąnąlɔ nuą diɛ, mąąhɔlɔɓo, di hva ə́ wɔ tɔn nwooi kwɛli.

¹⁵⁶ Yai-Laa, ə́ wɔ wɛlikɛmąąlaa hu kɛnɛ̨ɛ̨i, yɛ bələi ə́ naa la ə́ kwəi, pənə ə́ dóó nwúnų kɔ́lɔi.

¹⁵⁷ Mɔ̨nɔ̨ɓo nuą, da ɲówoɠaa daa tamą, Kɛlaa, və́ mą́ą́ kwɛa li ə́ laawoo ɓa.

¹⁵⁸ Ŋą́ hvulunuą kaa, da ɓaɠi lii tɛ a ɲą́ą́, mąąhɔlɔɓo, mɛ̨nįɠaai ə́ mo di hvo bɔ mɛ̨nį kɛi.

¹⁵⁹ Bələi ə́ wɔ tɔn nwooi wɛli kaa la mą́ą́, nąą kaa tai, Yai-Laa, dóó nwúnų kɔ́lɔi, a ə́ wɔ wɛlikɛmąąlaa.

¹⁶⁰ Wooi a kulɔ ə́ la, gaa lɔ a tɛ̨ą, mɛ̨nįi lɔpee ə́ wɔ kiti wooi a mo, gaa a tɛ̨ą a yələ kəlee.

¹⁶¹ Tɔɔɓɛlaa di mɔ̨nɔ̨ ɓo, nwun və kɛ mą, Ə́ wooɠaa lɔ ɓə ŋą́ ɲɔw mą.

¹⁶² Gwə́inɛ̨ɛ̨i, ə́ wooi ə́ gwɛlɛ mąą mɛ̨nį ɓa, lɔ yɛ, nu a kulɔ hɛn gɔw kɛnɛ̨ mɛ̨i ə́ tɛɠii.

¹⁶³ Lɛɛ mɛ̨nį wɛli kpɛɛi mą́ą́, mɛlɛ hvo gwə́i, ə́ wɔ tíɓoi ɓə nwɛli kaa mą́ą́.

¹⁶⁴ Ŋą́ kwɛli hvilɛn yɛ́ gee mɛ̨i mɛ̨ihveelɛ, hvóló tɔnɔ̨ yee mu, ə́ wɔ kiti wooɠaa hąŋąąi mąą mɛ̨nį ɓa.

¹⁶⁵ Nuąi ə́ wɔ tɔn nwooi wɛli kaa diɛi, di kaa liilaa hu, di wɛi, di kalin ɉɛn və kɛa di tɔwɔ.

¹⁶⁶ Ee Yai-Laa! Ɲɛ̨́i kaa ə́ wɔ malo mɛ̨nį tɔwɔ! Ɛlɛɛ, ŋą́ ə́ wɔ tɔnŋaai pɔ mɛ̨nį kɛ.

¹⁶⁷ Dɔnŋaai ə́ di tɔɔ, ɲéé kaa di mu, di wɛli kaa kpɔ mą́ą́ a neelee.

¹⁶⁸ Ə́ wɔ tíɓoɠaai, da ə́ wɔ tɔn nwooɠaai, ŋą́ gəlee pɔ mɛ̨nį kɛ, dɛ́ɛ́ pələɠaa kəlee kaa ə́ ɲɛ̨́i ɓa.

¹⁶⁹ Ee kə Yai-Laa! Dómą woo ə həli kpɔ ə́ lííla wɛ! Mɛ̨nį hukpɛ kili tɛɛ bɔ́, yɛ bələi ə́ mo lai.

¹⁷⁰ Ee kə! Nwɔ́ hvɛli wooi ə həli kpɔ ə́ lííla-ee! 'Gúlɔ mɛ̨nįi, yɛ bələi ə́ mo lai.

¹⁷¹ Ee kə! 'Ə́ mąątɛ̨nɛ̨ woo ə lɛɛ lɔ yɛ kulɔ ná! Mąąhɔlɔɓo, yá kɛ mą́ą́kwɛlii ə́ wɔ tɔn nwooɠaa diɛi.

¹⁷² Ee kə! Nɛ̨́n ə ə́ wɔ tíɓoɠaai too a wələ, mąąhɔlɔɓo, ə́ wɔ tíɓoɠaai kəlee kaa a tɛ̨ą.

¹⁷³ Ə́ hvąŋą ə pa, ə kpɔnmąą tɛɛ bɔ́, mąąhɔlɔɓo ŋą́ą́ ə́ wɔ tɔn nwooɠaai həɠə ɉu, a nííɓa.

¹⁷⁴ Yai-Laa, ə́ yei ɓə gáá bɔ ŋį́ ɓalo hɔlɔɓo laa, ɛlɛɛ, gwə́inɛ̨ɛ̨ hɛn maa ə́ wɔ tɔn nwooi.

¹⁷⁵ Gɛ́ ŋį́ lamun yɛnɛ̨ɛ̨, gɛ́ pɛli ə́ mąątɛ̨nɛ̨i, ə́ wɔ tɔn nwooɠaai diɛ mą́ą́kpɔnmąąɓo!

¹⁷⁶ Gáá lɔ lia li nwún ma, yɛ ɓɛlaa haai aa pili, 'hvilɛn, ə́ ə́ wɔ tímun kwɛli, mąąhɔlɔɓo, və́ lɛ̨ą li ə́ wɔ tíɓoɠaai diɛ.

« Roimhe

Air adhart »

Bible Society in Guinea-Conakry

Lean sinn:

Ceanglaichean taic

Sanasan