Mąątɛ̨nɛ̨ 118 - Yálá laawoo hɛɓɛ (dc)1 'Ka gu Yai-Laa mąąwiɛ, mąąhɔlɔɓo nwɔ mɛ̨nį lɛlɛɛi, ɛlɛɛ, nwɔ wɛlikɛmąąlaa ɲɛn deei hvo mą. 2 Israɛlə ə mo tii, yɛ kɛ diɛ: «Nwɔ wɛlikɛmąąlaa kaa ɲɛn deei hvo mą!» 3 Aarɔn nwɔ pɛ́lɛ́i mu nuą diɛ kpɛli di mo tii, diɛ mą: «Nwɔ wɛlikɛmąąlaa ɲɛ̨n deei hvo mą.» 4 Nuąi da ɲɔw Yai-Laa ɓa, di kəlee di mo tii, diɛ mą: «Nwɔ wɛlikɛmąąlaa ɲɛ̨n deei hvo mą!» 5 Ɓɛlɔwai ŋą́ kɛ la liihɛlɛn gɛnɛ̨ hu, ŋį́ Yai-Laa təli, Yai-Laa ə nwoo mu hon, ə volóon na ɓo. 6 Yai-Laa kaa búlu, va ɲɔw, lə kpɔ ɓə nukan a pɛli gɛi a ɲą́ą́? 7 Yai-Laa kaa búlu, ya ɓə a kpɔnmąą tɛɛ bɔ́, gɛ́ nwɛ́likpɛɛmąą nuą tooi kaa. 8 Nu ya ə́ lɛɛ ɲəi kɛ Yai-Laa ɓa, yili hviɛlaɓoɔi, ə tɛɛ nu lɛɛ ɲəi kɛɛ nuą diɛ, ɓa. 9 Nu ya ə́ lɛɛbɔ kɛ Yai-Laa ɓa, yili hviɛlaɓoɔi, ə tɛɛ nu lɛɛ ɲəi kɛɛ tɔɔɓɛlaa diɛ, ɓa. 10 Yɛnɛ̨ɛ̨ nuą kəlee di mą́ą́kpɛlaan, Yai-Laa laa hu, ŋį́ di ɲąąyíi. 11 Di mąątinɛ̨n di doo gee hu, di mą́ą́tinɛ̨n kpɔ kɛ-kɛ! Kɛlaa, Yai-Laa laa hu, ŋį́ di ɲąąyíi. 12 Di tinɛ̨n ŋąąi kɛ mą́ą́, yɛ kwɛ̨inŋaa da kpinįn a nu, di yɛɛ lɔ di pulu, di luwun yɛ mɔ̨nun gbowo nwɔ̨n, Yai-Laa laa hu, ŋį́ di ɲąąyíi. 13 Ə́ kɛi bíli ə gɛ ŋį́ too, Kɛlaa, Yai-Laa ə mą́ą́kpɔn mąąɓo. 14 «Ya ɓə gaa a nwɔ́ huwalawala, da nwɔ́ kɔ́ wələ! Yaa lɔ ɓə a málomun!» 15 Kwəinɛ̨ɛ̨ woo da yeetɛɛmąą wələ, diɛ lɔ ɓə tooi tələnmo nuą yəi bɛlɛ́n; diɛ kɛ diɛ: «Yai-Laa ɓa-mįi-yee kaa kuláálaa kɛi! 16 Yai-Laa aa mamįiyee tɛ, Yai-Laa ɓa-mįi-yee kaa kuláálaa kɛi!» 17 A tɛ̨ą, və́ pai haai, ŋą́ lɛɛ a vúlú; ə gɛ, ŋį́ Yai-Laa kɛ mɛ̨nįɠaa hukulɔ. 18 Gaa a tɛ̨ą, Yai-Laa ə ɉútɔɔ, Kɛlaa yaamun, hvo gwɛ́lɛ haa ɓa. 19 'Ka tələnmo kponŋaa laa ɓo dɔ́wɔ, ŋį́ lɔ laa, ŋį́ Yai-Laa laa mąąwiɛ. 20 Yai-Laa nwɔ pɛ́lɛi laaləi pələ ɓə, tələnmo nuą da lɔ la. 21 Gáá ə́ laa mąąwiɛi, mąąhɔlɔɓo ə́ nwóó mu hon, ə́ yee tɛɛmąąlaa tɛɛ bɔ́. 22 Gwɛnii bɛlɛ́ tɔɔ nuą di lənə mą, ya ɓə kɛ a bɛlɛ́ nwun ɉon gwɛni. 23 Yili ə həɠə Yai-Laa pɔ, yili kaa gu ɲɛ̨i ɓa a kwəipili mɛ̨nį. 24 Volói Yai-Laa ə ɉəɠə ɉu, ya ka: Vólói ŋɛ̨i mąą mɛ̨nį ɓa, 'ka gu gu kwəinɛ̨ɛ̨! 'Ka gu pili yələi a ɓələn! 25 Ee Yai-Laa! Nɛ̨ɛ̨ yɛ́, ɓálo! Yeetɛɛmąą laa tɛɛ ku pɔ! Yai-Laa nɛ̨ɛ̨ yɛ́, gɔ́ nɛ̨ɛ̨ kuɔ. 26 Nui ti pai Yai-Laa laa hu, Mąąwiɛ ə kɛ mą! Ku kaa Yai-Laa yəi bɛlɛ́n, kuɔ lúwɔ́ too kaa. 27 Yai-Laa ɓə gaa a Yálá, ya ɓə kɛɛ pono tɛɛ ku pɔ, 'ka tɔɔ a ka yɛli gwala laa ə ɓo ka yəi, ə lɛɛ ɉu ka həli ɉaláá kulɔi mįnɛ̨ɠaa diɛ. 28 Yɛ́ ɓə ə́ kaa a nwɔ́ Yálá, ŋą́ ə́ laa mąąwiɛ, nwɔ́ Yálá, ŋą́ ə́ laa tɛ. 29 'Ka Yai-Laa mąąwiɛ, mąąhɔlɔɓo nwɔ mɛ̨nį lɛlɛɛi, nwɔ wɛlikɛmąąlaa ɲɛ̨n deei hvo mą. |