Mąątɛ̨nɛ̨ 116 - Yálá laawoo hɛɓɛ (dc)Yálá hɛɠɛɛɓo wələ 1 Yai-Laa wɛli kaa mą́ą́, mąąhɔlɔɓo a ɲee hee nwɔ́ nɛ̨ɛ̨mąąhvə woo mu. 2 A nwəli tɔɔ nwóó ɓa, ɛlɛɛ, nwɔ́ yɛnɛ̨ɛ̨ kəlee yee mu, gáá pai kɛi dəlii. 3 Ɲílɛɛi kɛ a haa nwɔ yɛliɠaa, ɲąmuątaa nwɔ kpɔ̨nɔ̨ɠaai daa kɛ ɉón, liihɛlɛn, liikələn gwəi, daa kɛ hee mą́ą́. 4 Ŋį́ kɛi Yai-Laa təli a Naa, gɛ́ kɛ mą: «Nɛ̨ɛ̨ yɛ́! Yai-Laa, 'gúlɔ mɛ̨nįi.» 5 Yai-Laa lii nɛ̨ɛ̨i gwəi, dələnmoɔ, gu wɔ Yálái a nu ɲɛ̨imąąwɛli kaa. 6 Nuąi kɔ́lɔn və diɛ, Yai-Laa a ɲɛ̨i kɛ diɛ, vį́ikpɛɛi kɛ, kɛlaa, ya ɓə málo. 7 Nį́į́ wolo, 'pənə ə́ ə́ hvįįtɔɔ, mąąhɔlɔɓo, Yai-Laa aa mɛ̨inɛ̨ɛ̨ kɛ yɛ́. 8 Yáá nwɔ́ yɛnɛ̨ɛ̨ kulɔ haa yəi, yáá ɲɛ̨́i kulɔ nɔ̨nwɔ̨i, yáá gɔ́wɔ həɠə lan bələ mɛ̨i. 9 Gɛ́ pɛli hiɛi Yai-Laa ɲɛ̨i ɓa, yɛnɛ̨ɛ̨ nuą lɔwai. 10 Ə mą kɛ ɓɛlɔwai ŋį́ kɛi kɛ la diɛ, Mą́ą́wɛliɛi a mɔlɔ, gílitɔɔi lɔ kɛ mą. 11 Ɉú pu pələ mą́ą́, ŋį́ kɛi kɛ diɛ: «Nu kəlee kaa a lɛɛ nuą.» 12 Mɛ̨inɛ̨ɛ̨ɠaai kpɔ Yai-Laa ə gɛ mą́ą́, ŋą́ pɛli bɔɔ kɛ pələ kɛi ləi mą? 13 Gáá pai málo mɛ̨nį mąą lɔɔ pui a kwəinɛ̨ɛ̨, gɛ́ Yai-Laa təli a naa. 14 Mɛ̨nįɠaai ŋą́ naakwɛlan mo Yai-Laa ɓa, gɛ́ gəlee kɛ. 15 Yai-Laa nwɔ nuą haa mɛ̨nį, a nwąną mą kpɔ kɛnɛ̨. 16 Nɛ̨ɛ̨ yɛ́ Yai-Laa, mąąhɔlɔɓo gáá a ə́ wɔ tímun, gáá a ə́ wɔ luwɔnɛ̨ąi lon ɉulɔnu; yaa ɲíli yɛliɠaa hvoloon. 17 Gáá pai ə́ hɛɠɛɛɓo haláá kulɔi, gɛ́ Yai-Laa təli a naa. 18 Mɛ̨nįɠaai kpɔ ŋį́ naakwɛlanmo Yai-Laa ɓa, ŋą́ gəlee kɛ, ŋą́ yili kɛ tii nwɔ nu huwui kəlee ɲɛ̨i ɓa. 19 Yai-Laa nwɔ pɛlɛ́i, gwəli hɛ̨ąɠaa, Ɉerusalɛmə taa, ə́ kwəi kpɔ kpɔɔ. 'Kánikookwəi! |