Mąątɛ̨nɛ̨ 115 - Yálá laawoo hɛɓɛ (dc)Yálá yaa taanɔ̨n nɔ ɓə mąąnɛ̨ɛ̨ di mąąwiɛ 1 Kuɔ hvəi, Yai-Laa, kuɔ hvəi mąąnɛ̨ɛ̨ ku mąąwiɛ hɔlɔɓo; kpələ́! Kuɔ hvəi, kɛlaa yili mąąnɛ̨ɛ̨i ə kɛ Ə́ laa mąąhəɠɛɛ ɓa, ə́ wɔ wɛlikɛmąąlaa, da ə́ wɔ tɛ̨ą mąą mɛ̨nį ɓa. 2 Lɔi takpɛliɠaa di hvo nəi pa tɔɔ diɛ kɛ mąi: «Di wɔ Yálái kaa mįnɛ̨?» 3 Ku wɔ Yálái kaa yələ kɔ́lɔn ɉu, mɛ̨nįi lɔpee a nɛ̨ɛ̨ mą, a gɛ. 4 Di wɔ yáláɠaai kaa a hɛni, da wali, a diɛi a nukanŋaa yee pɔɔi. 5 Laaləi kaa diɛ, di hva hvaa, ɲɛ̨ikɔ́w ə ɓo diɛ, di hva kɛɛ kaa. 6 Wəli kaa diɛ, di hva mɛ̨nį mɛ̨n, hunwɔ̨ ə ɓo diɛ, di hva hɛn gun mɛ̨n. 7 Yee kaa diɛ, hva hɛn ɉon, kɔ́wɔ ə ɓo diɛ, di hva hiɛ la, woo kɔ́w taanɔ̨n gbɛli hva kulɔ di kwąną kpɔwɔlɔn hu. 8 Nuąi di pɛli, di kɛ pələ kaa yɛ diɛ, da nuąi kpɔ da di kilitɔɔ diɛi. 9 Israɛlə lonnii, 'ka ka kilitɔɔ Yai-Laa ɓa. Yaa lɔ ɓə a di mąąkpɔnmąą ɓomun, da di mąąkpɛ kpanąn. 10 Aarɔn yəi bɛlɛ́n nuą! 'Ka ka kilitɔɔ Yai-Laa ɓa, Yaa ɓə a di mąąkpɔmąą ɓomun da di mąą kpɛ kpanąn. 11 Kaai ka ɲɔw Yai-Laa ɓa, 'ka ka kilitɔɔ Yai-Laa ɓa. Yaa ɓə a di mąąkpɔnmąą ɓomun, da di mąą kpɛ kpanąn. 12 Gu kili kaa Yai-Laa ɲą, a kɛ lúwɔ́ kɛi guɔ. Gaa pai lúwɔ́ kɛi Israɛlə nwɔ pɛlɛ́i ɓa. Gaa pai lúwɔ́ kɛi Aarɔn nwɔ pɛlɛ́i ɓa. 13 Gaa pai lúwɔ́ kɛi nuąi da ɲɔw Yai-Laa ɓa diɛ, bɛlɛɛ pɛlɛɛ mąn, gbɛa kpɛa mąn. 14 Yai-Laa ə hɛn gəlee ɲąąnɛ̨ɛ̨ ka yəi, kaa mąn, ka lonnii mąn. 15 Yai-Laa ə lúwɔ́ kɛ kaa, Yai yələ kɔ́lɔn da lɔi di pɛli. 16 Yələ kɔ́lɔn gaa a Yai-Laa nwɔɔ, lɔi nwɛi, ə dɛɛ nu kanŋaa pɔ. 17 Nuąi daa haa, diɛ hvə da Yai-Laa mąąwiɛ, a diɛi tii da yɛɛ lɛ̨ąmąą taai. 18 Kɛlaa ku wɛi, kuɔ ɓə kwa Yai-Laa mąąwiɛ, yiihu da yələ kəlee. Mąąwiɛ ə kɛ Yai-Laa ɓa! 'Kánikookwəi! |