Mąątɛ̨nɛ̨ 111 - Yálá laawoo hɛɓɛ (dc)'Ka gu Yálá nwɔ mɛ̨inɛ̨ɛ̨ɠaa kili too gu ɲą 1 'Kánikookwəi! Gáá Yai-Laa laa tɛi a níi kəlee, Tələnmolonnii lɔwai, ɲąąkpɔn gɛnɛ̨ɛ̨ hu. 2 Yai-Laa kɛ mɛ̨nįɠaa ɲɛ̨i kɛnɛ̨ɛ̨ ɓə! Nuąi gɛ mɛ̨nįɠaa wɛli kaa diɛ, da ɲąą kaa. 3 Gɛ mɛ̨nį kəlee lɛlɛɛi ɲɛ̨i pɔ̨nɔ̨ɔ̨, nwɔ tələnmolaa ə ɓo laa a yələ kəlee mɛ̨nį. 4 Ə gɛ mɛ̨nį lɛlɛɛɠaa kili lɛɛ nuą ɲą, Yai-Laa nwɔ mɛ̨nį lɛlɛɛi, ɛlɛɛ nii nɛ̨ɛ̨ gwəi. 5 Nui a ɲɔw mą, a kɔ̨nɔ̨n dɛɛ mąą nu pɔ, nwɔ mįnɛ̨i kili kaa ɲą a yələ kəlee. 6 Ə gɛ mɛ̨nįɠaa hvaŋą kɛnɛ̨ pələ lɛ nwɔ nu huwui ɓa, a lɔiɠaa di wɔ hɛngɔw tɛɛi ə mo di bɔ. 7 Ɲeepɔ kolóɠaa kaa a tɛ̨ą, ɉaŋąą; nwɔ tɔn nwooɠaai kəlee kaa a tɛ̨ą mɛ̨nį. 8 Ə dɔnŋaa tii laa a yələ kəlee mɛ̨nį, di kaa a mɛ̨nį haŋąą da tɛ̨ąą. 9 Ə nwɔ nu huwui hvoloon na ɓo, ə nwɔ mįnɛ̨i laa di nwuɔ̨ a yələ kəlee mɛ̨nį; naa mąąhəɠɛɛi, mąą ɲɔwuɔ. 10 Kili kɛ ɲəi kpalatɔɔi ɓaa, nu ə ɲɔw Yai-Laa ɓa, nuąi da yili kɛ, yɛnɛ̨ɛ̨ hon bələ mąą gbąnąlaa kaa di yəi; di kaa pai kɛi dɛ̨nɛ̨i a yələ kəlee. |