Mąątɛ̨nɛ̨ 109 - Yálá laawoo hɛɓɛ (dc)Nui daa pɛlɛ mą gaa Yálá təli 1 Nwələ ɲɛ̨itɔwɔmun, Davidə nwɔ Yálá mąątɛ̨nɛ̨ wələ. 1 Nwələ ɲɛ̨itɔwɔmun, Davidə nwɔ Yálá mąątɛ̨nɛ̨ wələ. Yálá, yɛ́i gáá ə́ tɛnɛ̨i, 'hvó ə́ laa pilɛ. 2 Mąąhɔlɔɓo, nu ɓowo laaləi ɲɔ̨nwɔ̨ɔ̨ kaa tinɛ̨n ɉi a ɲą́ą́, di kaa lɛɛ wooɠaa ɓoi mą́ą́, a ɲąąhɛn nwooɠaa. 3 Daa mą́ą́tinɛ̨n daa doo gee hu, a wɛlikpɛɛmąą wooɠaa, diɛ kɔ́ pɛlɛ mą́ą́, nwun və mą. 4 Diɛ nwɔ́ wɛlikɛmąąlaa pɔɔ kulɔ a kiti pɛlɛɛ mą́ą́, ɲą́ą́n, ə́ hvɛli woo lɔɓə ná. 5 Daa mɛ̨inɛ̨ɛ̨ pɔɔ kulɔ mą́ą́ a mɛ̨nį ɲɔ̨nwɔ̨ɔ̨, diɛ ɓɛlan naa pɔɔ kulɔ a yowolaa. 6 Diɛ kɛ diɛ: Ka gu nu ɲɔ̨nwɔ̨ɔ̨ ta kwɛli tai, nu ta ə tɔɔ tai mamįiyee hu pələ, yɛ ɉɔn mo. 7 Gitíi ŋɛ̨i ə kala mą, nwɔ hvɛli wooi ə kɛ a nɛ̨ŋɛ̨n! 8 Nwɔ hvólóɠaai ta 'ə kulɔ mą, nu ta kpɛli 'ə dɔɔi kulɔ ɲəi. 9 Nonnii di lɛɛ a təlilɛa, nɛ̨ą ə lɛɛ a kalanin. 10 Nonnii di kɛ a laatee lɛapɛlɛɛ, diɛ di kɔ̨nɔ̨n vɛli, nuą di di kpɛ, di wɔ pɛlɛ kpoloonŋaai mu. 11 Nui kwələ tɔɔ mą, mąą nu ə ɲəi hɛnŋąą kəlee kulɔ ɲəi, nwɛ̨ąą di too ɉɔlɔɓo hɛn ɉu. 12 Nu ta hvo nulaa kɛ mą, nu ta hvo nwɔ təlilɛai mąąwɛli kaa. 13 Ɉuwu ə pu, di laa ə kpɛɛ yɛnɛ̨ɛ̨. 14 Di nąnni di wɔ nɛ̨ŋɛ̨n gili ə lɛɛ Yai-Laa ŋą, nee nwɔ nɛ̨ŋɛ̨n mąą hvaa hvo lɛɛ. 15 Gəlee di nąą kili ə kɛ lɔ Yai-Laa ŋą a yələ kəlee mɛ̨nį, di laa kəlee hu ə pu ɓɛ yɛnɛ̨ɛ̨. 16 Mąąhɔlɔɓo hvo kɛ túwɔ́ li, a nukan dúwɔ́ pələ, ɛlɛɛ, yɛ mąąwɛlimun mɔ̨nɔ̨ ɓo a baa pələ, yɛ yee hvowolomun nii yali gwəi. 17 Yii kpɔ nwąnąlɔ túwɔ́ lɔ ɓə nwɛli kaa mą, nɛ̨ŋɛ̨n naa ə yɛɛ kani a nwun, yii kpɔ hvo lúwɔ́ pɔi, lúwɔ́ ə mąą kwɛa kani mą. 18 Yii kpɔ ə nɛ̨ŋɛ̨n naa kɛ a gɔnmą həɠə, nɛ̨ŋɛ̨n naa ə hiɛ kani gɔlɔi nąą kəlee yɛ yá, ə lɔ dɔɔ-tɔɔiŋaa hu, yɛ mąątí-wulɔ. 19 Nɛ̨ŋɛ̨n ə kɛ a gɔnmą həɠə, ə kɛ a ɉɛ̨ą yili kɔ́lɔi, a ɉɛ̨ą yili la, a yələ kəlee! 20 Bələ ɓə Yai-Laa kaa pai gálámąɓo nuą tii hon ɉii la, da nuąi da kɛ mɛ̨nį ɲɔ̨n moi a náá. 21 Ɛlɛɛ, yɛ́i a Yai-Laa Ną́mu Yálá, mą́ą́ mɛ̨nį ɲɛ̨i kulɔ, ə́ laa mąą mɛ̨nį ɓa. Ə́ wɔ wɛlikɛmąąlaa ɲąąnɛ̨ɛ̨ ɓə, málo. 22 Ɲą́ą́ ga, hɛn və ɲə́i, mą́ą́wɛliɛ, ɛlɛɛ, níi kpɔ kpɔɔ yaliɛi gwə́i. 23 Gáá lii lɔ, yɛ nįnįn a lɔ gbąin, di kaa gbɛ́i, yɛ peelə. 24 Pulu həɠə pələ ɲə́i, mą́ą́ kaa kpɛlin ɉii gbə́lin yɛ kɛlɛ gee hu, ŋą́ą́ kpala, gɔ́lɔ gɔ́w yɛ kanąn ɓa, kɔ̨nɔ̨n kolo too pələ ɓa. 25 Di ɲɛ̨i ɓa, gáá a hɛn mąąnɛ̨ɛ̨ di bili, da gáá, diɛ di nwun gbɛŋɛ̨n. 26 Yai-Laa, nwɔ́ Yálá! 'Pa kilɛ mą́ą́! Nwún mąąɓo! Mąąhɔlɔɓo ya kulɔ ə́ woo ɓa. 27 Əgɛ, di pɛli gbaɠala kaai, diɛ kɛ, yɛ́, ə́ yee kɛ mɛ̨nį li, da ə́ kɛ mɛ̨nį li, yɛ́i a Yai-Laa. 28 Di wɛi, da nɛ̨ŋɛ̨n naa kɛ, ə́ wɛi, yɛ́ lúwɔ́ kɛ. Di di muhəɠə náá ɓa, yili ə kɛ a di nwumɛ̨ mɛ̨nį, Kɛlaa mąą ə pənə a yɛ́ tímun kwəinɛ̨ɛ̨ mɛ̨nį. 29 Ɓáá ə kulɔ gálámąɓo nuą diɛ, nwumɛ̨ ə di hon, ə kpɛlaan a diɛ di nąą kəlee, yɛ biliɉu. 30 Gáá pai Yai-Laa laa tɛi kpɔ a nwóó kɛnɛ̨ɛ̨, gɛ́ dɛ̨nɛ̨ nu kpulu kɛnɛ̨ɛ̨ ɲɛ̨i ɓa. 31 Mąąhɔlɔɓo aa tɔɔ mąąwɛlimun mamįiyee hu, yɛ gulɔ kítí ɲɔ̨nwɔ̨ɔ̨ tee nuą yəi. |