Mąątɛ̨nɛ̨ 108 - Yálá laawoo hɛɓɛ (dc)Gáá nwoo tɛi Yai-Laa pɔ pələ 1 Davidə nwɔ wələ. Yálá mąątɛ̨nɛ̨ wələ. 2 Nwɔ́ Yálá, níi aa laa gwə́i, gáá ə́ laa tɛi a wələ, gɛ́ ə́ mąątɛ̨nɛ̨ wələ too. Nwɔ́ mąąwiɛ! 3 'Ka nwun! Bɛlɛgwəi da gololon gwɛnįn, gáá pai yələɓɔi nwun ɉii. 4 Yai-Laa, gáá ə́ hɛɠɛɛɓoi nu huwu kəlee ɲɛ̨i ɓa, gɛ́ ə́ laa too a wələ, nu huwu kəlee lɔwai. 5 Gbalai tɔɔ, yɛ́ tələnmolaa laŋįnŋąą, tulɔ kpinįn mɛ̨i pələ ə́ wɔ tɛ̨ą mɛ̨ni ɲɛ̨n deei hvo mą. 6 Yálá! 'Ə́ muhəɠə, 'ə́ tɔɔ yələ kɔ́lɔn mɛ̨i, ə́ mąąwɛi pələ ə hee lɔi mɛ̨i. 7 Əgɛ, ə́ wɛlikɛmąą nuą nwun mąą ə pɛli ɓoi, nwóó mu hon, ə́ ɓa-mįi-yee hvąŋą kɛnɛ̨i 'ə kpɔnmą́ą́. 8 Yálá woo ə tɔɔ nwɔ pɛlɛ́ mąąhəɠɛɛi mu, yɛ kɛ diɛ: «Ɲą́ą́ ɓə a yee tɛɛmąąlaa! Gáá Sisɛmə taa ɲąąkwɛlɛi ɉu, gɛ́ Sukotə ɓoloon ɉu tee a gbuɔ kpuɔ. 9 Galaadə kaa a nwɔ́ɔ́, Manase ə ɓo a nwɔ́ɔ́, Ɛfraimə kaa a nwúɔ̨ ɓɔlɔ, Ɉuda ə ɓo a nwɔ́ ɲąąwooɓo kɛ túnwɔ̨n. 10 Moabə kaa a nwáá tɛa. Edɔmə ə ɓo a gɔ́wɔ́ hu hiɛi. Gɛ́ tómą Filisti lɔi mɛ̨i.» 11 Gbɛɛ ɓə pai lii a ɲą́ą́ guláá taa kɛnɛ̨i hu? Gbɛɛ ɓə pai lii a ɲą́ą́ Edɔmə lɔi? 12 Ə kulɔ ə pulu Yálá, yɛ́i yáá ku pili, Yálá, yɛ́ hvó kɛa, ku wɔ kulááɠaai mąąkpɛi? 13 'Pa, ə́ kpɔnmąą tɛɛ ku pɔ, ku yówóɠaa tɔwɔ. Mąąhɔlɔɓo, nukan nwɔ kpɔnmąą a nu ɓowó. 14 Kwa Yáláni kwa tɔɔ, kwa mɛ̨nį kpɛa-kpɛaa kɛ, Yaa tii ɓə pai ku yówóɠaa kiin giin ɉi. |