Mąątɛ̨nɛ̨ 107 - Yálá laawoo hɛɓɛ (dc)Nwələ hɛɓɛ nąąn ną Yálá hɛɠɛɛɓo woo 1 'Ka Yai-Laa laa tɛ, mąąhɔlɔɓo nwɔ mɛ̨nį lɛlɛɛi, nwɔ wɛlikɛmąąlaa ɲɛ̨n deei və mą. 2 Nuąi Yai-Laa ə di nwun mąąkɔ̨nwɔ̨, 'di pənə nwɔ̨nɔ̨ di ɉukulɔ; a diɛi tii ə di nwun mąąkɔ̨nwɔ̨ di mɔ̨nɔ̨ɓo nuą yəi, 3 yɛ di kulɔ lɔi kəlee hu, yɛ di ɲąąkpɔn, diɛ həɠə hvoló həɠəi pələ da dooi pələ, diɛ həɠə ɲá nwuɔ̨ pələ da ɉɛɠɛɛ pələ. 4 Daɠaa di lan lɔi pun ɉu, pələ puɔɠaa hu, di hvo kɛi taa kaa, yii nu a kɛ ɉu. 5 Pulu yɛ di kpɔlɔɔn, kpələ wɛli yɛ di hon, di hu yɛ haa! 6 Di lɛɛ di wɔ mɔ̨nɔ̨i tii hu, di tomą Yai-Laa pɔ pələ, ə di kulɔ di wɔ liihɛlɛn mɛ̨nįɠaai hu; 7 Ə di hvilɛn pələ haŋąą mɛ̨i, diɛ pɛli taa hɔlɔɓoi, nuą di ɓo ɉu. 8 'Di Yai-Laa hɛɠɛɛɓo kani, nwɔ wɛlikɛmąąlaa mąą mɛ̨nį ɓa; da mɛ̨nį ɲɛ̨ikɛnɛ̨ɠaai ə gɛ nu kanŋaa diɛi; 9 Mąąhɔlɔɓo, ə yá tɔɔ kpələ wɛli həɠə mun na, ə pulumun gɔ́ a kɔ̨nɔ̨n kpɔ kɛnɛ̨. 10 Daɠaa di kɛ kpinį hu, haa yeekɔn ma, di ɓo laanɔ̨nwɔ̨ hu kpɔnɔ̨ ŋą! 11 Mąąhɔlɔɓo daa kɛ kulɔ Yálá woo mu, daa Hɛn Gəlee Mɛ̨imun Yálá nwɔ liɛwooɠaa lɛɛ. 12 Yili ə di hutɔɔ a mɔ̨nɔ̨, ɛlɛɛ, nu ta hvo kɛi kpɔnmąą tɛɛ di pɔ. 13 Di lɛɛ di wɔ mɔ̨nɔ̨i tii hu, di wɔlɔ Yai-Laa ɓa, ɛlɛɛ, ə di ɓalo, ə di kulɔ di wɔ kwəipili mąą mɛ̨nįɠaa hu; 14 Ə di kulɔ kpinį yəi, da nwun na pili kpinį yəi, ə di wɔ kpɔnɔ̨ɠaa tee diɛi. 15 'Di Yai-Laa laa tɛ kani, nwɔ wɛlikɛmąąlaa mąą mɛ̨nį ɓa, da gbalo mɛ̨nįɠaai ə gɛ nu kanŋaa diɛ, mąą mɛ̨nį ɓa. 16 Mąąhɔlɔɓo, ə kwɛli kponŋaa ɓɛla, ə di laakpulu kwɛliɠaa hu yali yali. 17 Nu taɠaa di wɔ nɛ̨ŋɛ̨nŋaa mąą mɛ̨nį ɓa, di lɛɛ kpɔ a nu kpɛli kpɛliɠaa, 18 di wɔ túwɔ́ pələ ɲɔ̨nŋaa daa kɛ di kulɔ di wului, kɔ̨nɔ̨n gəlee kun aa hee di hu, di ɓo haa wolo la. 19 Di lɛɛ di wɔ mɔ̨nɔ̨ɠaai tii hu, di tomą Yai-Laa pɔ pələ, Yai-Laa ə di ɓalo, ə di kulɔ di kwəi pilimąą mɛ̨nįɠaai tii hu. 20 Ə nwoo tɛɛ, yɛ di hali kɛ, yɛ di kulɔ kámą yəi. 21 Di Yai-Laa kulɔ mɛ̨nįnwoo ɓa laa tɛ kan, da gbalo mɛ̨nįɠaai ə di kɛ nukanŋąą diɛ. 22 Di ɉɛɠɛɛɓo haláá kulɔ kan, di gɛ mɛ̨nįɠaa loloɓo a kwəinɛ̨ɛ̨. 23 Nuąi ɲá ŋą kələnŋaa hu gboloyá ŋą, diɛ di kɛ kóloɠaa kɛ yá kpɛa-kpɛa ŋą. 24 Yiliɠaai di Yai-Laa yee pɔɔ da nwɔ kpalo mɛ̨nįɠaa kaa gboloyá hu. 25 Ə hvaa lɔ, tulɔ hvaŋą ə muhəɠə, yɛ gboloyá kɛ takpa takpa. 26 Gələnŋaa tii di kɛi tɛ yələi, diɛ yɛɛ ɲá tooi kpɛa-kpɛa hu, liihɛlɛn ə ɓo ɉu nuą diɛ, diɛ kɛ di haa kpɔ hvąą-hvąą. 27 Di nwun ɉu yɛ tínɛ̨n, diɛ tɔɔ tapi-tapi, yɛ lɔɔ hon, Gələn ɉiɛ yɛlɛ kpaɠala kəlee yɛ pili diɛ. 28 Di lɛɛ di wɔ mɔ̨nɔ̨i tii hu, di tomą Yai-Laa pɔ pələ, Yai-Laa ə di kulɔ di wɔ liihɛlɛn gɛnɛ̨i tii hu. 29 Ə dulɔ hvaŋą kɔ́lɔ haamą, ɲá ə mɛ̨i haa. 30 Di kwəi ə nɛ̨ɛ̨ vąŋą tɔɔ mɛ̨nį ɓa, Yálá ə li a diɛ, ɓɛi di kɛ bɔ də li laa. 31 Di Yai-Laa nwɔ kulɔ nwoo ɓa laa laa tɛ, ɛlɛɛ, kpalo mɛ̨nįɠaai ə gɛ nukanŋaa diɛ mąą mɛ̨nį ɓa. 32 Di gɛ̨nɛ̨ pələ hu kulɔ kan nɔi lonnii diɛ ɲąąkpɔn ɉu, di dɛ̨nɛ̨ galanɉonŋaa di wɔ nwundɔɔ hu. 33 A pɛli ə yá kpɛa-kpɛa mąą pənə a lɔi pun ɉu kpalaa, ə yá nwun gulɔiɠaa mąą pənə a kpələ wɛli həɠə lɔi. 34 Ə lɔi lɛlɛɛ mąą pənə a kwɛni lɔi, ɉu nuą kili ɲɔ̨nwɔ̨ pələ ɓa. 35 A pɛli Ə lɔi pun ɉu kpalaa mąą pənə, a pɔwa lɔi kɛ̨nɛ̨, yɛ gbali lɔi pun ɉu kpalaa kɛ a ya nwun gulɔi. 36 Ə pulu həɠə nuą hee laa, diɛ taa tɔɔ nąą, a nu hee taa. 37 Di kaa pai kɛi tíi kɛi laa, diɛ hihɛnŋaa hin naa, diɛ di ɓa kulɔ. 38 Yálá ə lúwɔ́ too diɛ, di huwu hu ə ɓɛlɛ kpɔ kɛnɛ̨, ɛlɛɛ, Yálá hvo hvaa mą, di wɔ taatɛlɛɛɠaai hu hvo kala. 39 Yili pulu, di huwu yɛ tíkpə, di yɛ yɛɛ, luwɔlaa yəi, mąąwɛlilaa, da liikələn gwəi. 40 Yili pulu, Yálá ə wɛlikpɛɛmąą laa lɔ nu kpɛa kpɛa kili pɔ, ə di lɛɛ laa diɛ li di nwun na pili pələ mɛ̨i. 41 Kɛlaa yɛ mąąwɛli nuą mąą kɔ̨nwɔ̨, yɛ di huwu hu kɛ̨nɛ̨, yɛ taatɛlɛɛ kpulu. 42 Tələnmo nuą di yili nąą kaa, diɛ pili yələi a kwəinɛ̨ɛ̨, ɛlɛɛ, yili yɛ kili ɲɔ̨n gwəi nuą laa pɛlɛ mą. 43 Gbɛɛ ɓə yɛi kɛ a mɛ̨nį kɔ́lɔn mun? Ə mɛ̨nįɠaai ti kəlee mąąkpɛɛ, ə Yai-Laa nwɔ mɛ̨inɛ̨ɛ̨ mąą mɛ̨nį kpaɠala kaa. |