Mąątɛ̨nɛ̨ 106 - Yálá laawoo hɛɓɛ (dc)Nɔi lonnii 'ka hvaa ka hɔn ma Yai-Laa ɲɛ̨i ɓa 1 'Kánikookwəi! 'Ka Yai-Laa laa tɛ, mąąhɔlɔɓo nwɔ mɛ̨nį lɛlɛɛi nwɔ wɛlikɛmąąlaa ɲɛ̨n deei hvo mą! 2 Gbɛɛ ɓə a pɛli Yai-Laa nwɔ kuláálaa hukulɔi, yɛ dɛnɛ̨, yɛ pɛli ɉu? 3 Nuąi da tɛ̨ą mɛ̨nį kɛ, di nwun na nɛ̨ɛ̨i, a diɛi ti da tələnmo yíi ɓo a yələ kəlee! 4 Ɓɛlɔwai yá kɛi pa ə́ wɔ nu huwui mąąwɛli kaai la, Yai-Laa, ə́ kili lɛɛ ɉú, ɓɛlɔwai Yá kɛi pa nwun mąąɓoi la, 'ə kili kɛ ɉú. 5 Gɛ́ pɛli ə́ liiɓa nuą di wɔ nwun na nɛ̨ɛ̨i kaai, Ə́ gwə́inɛ̨ɛ̨ nwɔ́ nu huwui nwɔ kwəinɛ̨ɛ̨ hu, gɛ́ nwɔ́ɔ́ hɔlɔɓo ə́ kwɛlin nwɔ ɲɛ̨i ponoi hu. 6 Kwaa nɛ̨ŋɛ̨n ɉəɠə lɔ yɛ bələi ku nąnni di ɉəɠə la yɛ́i, kwaa lan, kwaa ku hɔn gɛ. 7 Ku nąnni di hvo yɛ́ kwɛlɛɛn mɛ̨nįɠaai, mukulaa kɔ́lɔn ni, Eziptə lɔi hu. Di lɛ̨ą yɛ́ mɛ̨inɛ̨ɛ̨ɠaa tamąą diɛ, di di kwɛli tee Veengbɔ̨nɔ̨ gboloyá kwɛlɛ. 8 Kɛlaa, ə di ɓalo, Naa mąą mɛ̨nį ɓa, yɛ vąŋą lɛ la tii diɛ. 9 Ə tómą Veengbɔ̨nɔ̨ gboloyá mɛ̨i, yili ə kpala, Ə nwɔ nuą tɛɛ paalə kpon hu kwɛaa hu, a di kɔwɔ mąą kpalaa, yɛ da kɛi hiɛ lɔi kpalan mɛ̨i. 10 Ə di kulɔ di yowoɠaa yei ɲą, a diɛi kɛi wɛlikpɛɛmąąlaa kulɔ a diɛ, Ə di mąą kɔ̨nwɔ̨ di yəi. 11 Nuąi kɛi di mɔ̨nɔ̨ ɓo, Ə di lɛɛ yái, di tai lɔpee, hvo kulɔ ɉu. 12 Nwɔ nuą di laa kɛa vaa woo la, diɛ mąątɛ̨nɛ̨ wələ too. 13 Ɉu hvo kpɛli kwɛa, daa mą lɛ̨ą gɛ mɛ̨nįɠaa diɛ, mɛ̨nįi kɛ gwəi, di hvo naa kulɔi mąąkpɔn ni. 14 Di hvilɛn di liiɓa mɛ̨nįɠaa pulu, nɔi pun ɉu, di Yálá hu kɔ́ɔn nɔi pun ɉu. 15 Mɛ̨nįi di vɛli mą, Ə dɛɛ di pɔ, Ə dɛɛ di pɔ, di pilɛ ɉu. 16 Di kɛɛ bələ pɔ, di tolo kulɔ a Moisə da Aarɔn, a nui tii Yai-Laa ə ɉəɠə ɉu, ə gɛ a nwɔɔi. 17 Lɔi laa ə ɓo, ə Datan kpələ, ə Abiramə nwɔ nu kpului mɛ̨i kpulu. 18 Nwɔ̨n nən ə nɛ̨ŋɛ̨n ɉəɠə nuąi tii kələn, ə nu kpului tii kɛ a tiɠi. 19 Di nįŋɛ̨ lon mąąnįnįn bɛli Horɛbə yee ɓa, di pɛlɛ diɛ kwɛli hvilɛn mą. 20 Di di wɔ ɲɛ̨ipono mąąhvalin, a nįŋɛ̨ mąąnįnįn, a kalatiliin mįi hɛn. 21 Di lɛ̨ą Yálá ɓa, yaamun tii a di nwun mąąɓomun a yai mɛ̨nį ɲɛ̨i kɛ̨nɛ̨ɠaa kɛ diɛ, Eziptə lɔi hui. 22 Yɛ kwɛlɛɛn mɛ̨nįɠaa kɛ Kamə nwɔ lɔi hu, da mɛ̨nį mąą ɲɔwuɔɠaa Vəəngbɔ̨nɔ̨ gboloyá kwɛlɛ. 23 Ə di hu kala mɛ̨nį, mąą kili tee gwəi, Kɛlaa, niiɓamun, Moisə ə kpɛ̨ąn mɛ̨nįi ti tɔwɔ, ə nwɔ kɛɛ kala líiholii hvoló nuą diɛ. 24 Di tɛɠɛɓo nɔi lɛlɛɛ kɛ̨nɛ̨i tii hu, di hvo Yálá woo kaa a tɛ̨ą. 25 Diɛ hvaa di nwun ɉu, di wɔ pɛlɛ́ɠaai mu, di hvo lɛɛ Yai-Laa woo mu. 26 Yili ə ɲee tɛ yələi, ə gwɛla, yɛ gaa di paai nɔi pun ɉu. 27 Yɛ di hu taɠa taɠa lɔiɠaa hu, yɛ di hu kala lɔi takpɛliɠaa hu. 28 Yili pulu, di hvilɛn Baalə Peɔrə pulu, diɛ ɲąmuą kɔ́ haláá hɛn mįi. 29 Di Yálá lii kələn gwəi a di túwɔ́ pələ, lɔi wolo ɲɔ̨n ə pɛlɛ diɛ. 30 Kɛlaa, Pinasə ə muhəɠə, ə di lɔwai pɔn bu, ɛlɛɛ ɲɔ̨n tii ə kpɛla mą. 31 Di yili pɛ̨ɛ̨ nwuɔ̨ a tələnmo túwɔ́, a kwɛlan gəlee mɛ̨nį. 32 Di Yálá líiholi Meriba yá kwɛlɛ, Moisə ə yili ɉu mɔ̨nɔ̨ mįi. 33 A lɛɛi di hvo mo nwoo mu, Moisə ə dɛɠii hvaa ɓo. 34 Nu huwuɠaai Yálá ə kɛ diɛ; di di kəlee di paa, di hvo gɛ di hvo gəlee paa. 35 Da huwu takpɛliɠaa di too di kee pɔ, di di yee lɔ di tuwɔ pələɠaa hu. 36 Diɛ tí di wɔ haliɠaai diɛ, yili ə kɛ a hɛlɛn dɛɛ di tɔwɔ. 37 Di kɛi di lon ɉinąą, da di lon nɛ̨ąą kulɔ a haláá, ɲįnɛ̨nŋąą diɛ. 38 Di kɛi kwəi kwələnuą ɲąmą pu, a di lon ɉinąą da nɛ̨ąą, di kɛi di kulɔ a haláá, Kanaan haliɠaa diɛ, nɔi mąą ə liɓi tii a ɲąmą laa pɔɔ. 39 Diɛ di kpɔwɔ mąąliɓi, a di túwɔ́ pələ, a di pulu tɔɔ Yálá ɓa, di kɛ mɛ̨niɠaa hu. 40 Yai-Laa nwɔ líiholii ə ɓɛla nwɔ nu huwui mɛ̨i, nwɔ nuą wɛli ə kpɛɛ kpɔ mą tɛ̨ɛ̨ tɛ̨ɛ̨. 41 Ə di tɛɛ huwu takpɛliɠaa pɔ, di yowoɠaa diɛ hee di mɛ̨i. 42 Di yowo ə di mɔ̨nɔ̨ ɓo, di di mąą yɛɛ yili yee mu. 43 Yálá ə di kulɔ mɛ̨nįi, gee mɛ̨i pow pow, Kɛlaa di kɛi lɔ tɔɔ na a wəlii kpɔlɔ. Diɛ di nwun nɔ nɛ̨ŋɛ̨n ɉu. 44 Ə di wɔ mɔ̨nɔ̨i kaa, a ɓɛlɔwai ə di tómą woo mąn na. 45 Mįnɛ̨i da diɛ ni di ɉəɠə, ə giliŋąhiɛ mą, nwɔ wɛlikɛmąąlaa kɛnɛ̨ hu, ə nwoo yali bulu. 46 Nuąi li a diɛ luwɔlaa hu, ə gɛ yiliɠaai di di ɲɛ̨imąąwɛli kaa. 47 Yai-Laa, ku wɔ Yálá! 'Ku ɓalo wɛ! 'Ku kulɔ huwu takpɛliɠaa lɔwai, ə ku ɲąąkpɔn. Kuɔ pɛli Ə́ laa Mąąhəɠɛɛ tooi a wələ, ɛlɛɛ, Ə́ mąątɛ̨nɛ̨ mɛ̨nį ə ɓo a ku ɲɛ̨i pono mɛ̨nį. 48 Mąąwiɛ 'ə kɛ Yai-Laa ɓa, yai a Israɛlə nwɔ Yálá! Wɔlɔ-wɔlɔ da wɔlɔ-wɔlɔ, və́ ɲɛ̨n dee li! Nɔi lonnii kəlee di mu hon, diɛ mą: «Yálá ə kɛ tii! Mįiną! 'Kánikookwəi!» |