Mąątɛ̨nɛ̨ 105 - Yálá laawoo hɛɓɛ (dc)Yálá a kulɔ nwoo ɓa 1 'Ka Yai-Laa Laa tɛ, 'ka Naa tɛ a wələ woo nɛ̨ɛ̨, 'ka gɛ mɛ̨nįɠaa hu kulɔ nu huwu kəlee lɔwai. 2 'Ka wələ too mą, 'ka hvɛli pɛlɛ gɔwɔ mu, 'ka kɛ nwɔ kpalo mɛ̨nįɠaa hu kulɔi gee mɛ̨i pɔlɔɔ-pɔlɔɔ. 3 Naa Mąąhəɠə mɛ̨ni ə ka ɓələn, kaai Yai-Laa kwɛlii, 'ka gɛ kwəinɛ̨ɛ̨ hu. 4 'Ka Yai-Laa kwɛli, da ŋą huwalawalai 'ka ɲɛ̨ilain gwɛli a hvąŋąlɔ. 5 'Ka ka kiliŋąhiɛ gbalo mɛ̨nįɠaai Ə gɛ diɛ, da gwɛlɛɛin mɛ̨nįɠaai ə kɛi gɛ, da gití wooɠaai kɛi kulɔ na. 6 Kaai a nwɔ tímun Abrahamə kwəi, da niiɓamun Ɉakɔbə lonnii! 7 Yaa lɔ ɓə a Yai-Laa, gu wɔ Yálái li, Yaa lɔ ɓə a lɔi kəlee ɲąąwooɓo. 8 A gili lɛɛ nwɔ mįnɛ̨i hu, a yələ kəlee, a nwooi ə gwɛlɛ a yələ kəlee mɛ̨nį. 9 Mįnɛ̨i da Abrahamə di ɉəɠə, Ə mɛ̨ilɔ a gwɛlai ə mo Isaakə ɓa. 10 Ə naa a tɔ́n, Ɉakɔbə ɓa, da Israɛlə di ɉəɠə a mįnɛ̨ a kwɛlan gəlee mɛ̨nį. 11 Yɛ kɛ mą: «Gáá Kanaan lɔi tɛɛi ə́ pɔ, ə kɛ a ka kwɛlin, a ka wəlingią lɔi.» 12 Di kpulu hvo kɛ kɛnɛ̨ li, di ɓo a nwɛ̨ąą nɔi. 13 Di kɛi tɛɛ, da həɠə nɔi yiihu, di li yiihu, da kulɔ tɔɔlaa yiihu, di li dakpɛli hu. 14 Hvo nu ta lɛɛ laa, hvo hee di mɛ̨i, ə tɔɔɓɛlaa hu tɔɔ di mąą mɛ̨nįɓa. 15 Yɛ kɛ diɛ: «Nuąi ŋą́ di həɠɛɛ ɉu, 'Ka hvo tunwɔ̨n diɛ, 'ka hvo mɛ̨nį ɲɔ̨n gɛ a gwə́i mɛ̨nį hu kulɔ nuą.» 16 Ə pulu ɲąątɔɔ nɔi ɓa, ə kɔ̨nɔ̨n gəlee kpɛɛ. 17 Ə Ɉosɛfə tɔɔ di tɔwɔ, yai di nɔwɔtɔɔ, yɛ luwɔ. 18 Di gɔwɔ lɔ kpɔ̨nɔ̨ hu, di yɔwɔn gbulon gwąną. 19 Ə lɛɛ ɉu, mɛ̨nįi di mo a naa, bɔ mɛ̨ni ə kɛ, Yai-Laa woo ə nwɔ kwəi kwələlaa lɛ. 20 Tɔɔmun ə mo, yɛ di volóon, nɔi nąmu ə mo, yɛ di ɓo mą. 21 Ə ɉee nwɔ pɛ́lɛ́i nwun na, ə gɛ a ɲəi hɛnŋąą kəlee nwun nąmu. 22 Yɛ pɛli nu kpɛa kpɛaɠaa kanąn ɉi gbinį ɓa, yɛ kili tɛɛ kalanɉonŋąą pɔ. 23 Yili pulu, Israɛlə ə li Eziptə lɔi hu, Ɉakɔbə ə mąąkilɛ Kamə nwɔ lɔi hu. 24 Yálá ə nwɔ nu huwui hu kɛ̨nɛ̨ lɔ poto poto, di hvąŋą ə tɛɛ di yowoɠaa diɛ. 25 Ə di kili mąą hvalin di kwəi, diɛ wɛlikpɛɛmąąlaa kulɔ a nwɔ nu huwui, diɛ nwɔ tínuąi ɓowo. 26 Ə nwɔ tímun Moisə tɔɔ, da nui ə ɉəɠə ɉu a Aarɔn. 27 Di kwɛlɛɛn mɛ̨nį kɛ lɔ, a di hvaa woo, Eziptə lɔi hu, di kwəi pili mąą mɛ̨nįɠaa kɛ Kamə nwɔ lɔi hu. 28 Ə kpinį tɛɛ, nɔi ə lɛɛ kpinį hu, nu hvo hɔlɔɓo hvo naa hɛa too. 29 Ə di wɔ yáɠaai mąą pənə a ɲąmą, ə di wɔ hɔ̨nwɔ̨leeɠaai paa. 30 Gbəŋə ə tɛ nɔi, ə nɔi kulɔ, di lɔ kpɔ dɔɔɓɛlaa yíi pɛlɛ́ɠaa mu. 31 Ə mo von mą, ə pa, da heelon, yiliɠaai kpɛli di nɔi nąą kəlee kulɔ. 32 Ə hanwon kpuwulu pu di mɛ̨i, a tulɔ mąą hvalin, ə nwɔ̨n doo nɔi. 33 Ə di wɔ hihɛnŋąą, da di wɔ ɓá wuluɠaai kɛlɛ, ə nɔi hu wuluɠaa yali. 34 Ə mo peeləɠaa diɛ, di pa, a bonįn ɉuwui tii lonon və kɛ mąi. 35 Di nɔi hu kala kəlee mįi, di nɔi hihɛn gəlee mįi. 36 Ə lon doloo tolooɠaa kəlee paa nɔi, a diɛi ti a di ląŋą lonnii. 37 Ə nwɔ nuąi kulɔ laa, a di yeelaholoon ŋąą, hɛni da wali di ɓo di yəi, ɛlɛɛ, nu tai lɔpee hvo kalin, nwɔ nu huwui lɔwai. 38 Eziptə kwəi ə nɛ̨ɛ̨, di li mɛ̨nį ɓa, mąąhɔlɔɓo, ɲɔw aa kɛ pili di hu. 39 Ə tulɔ kpinįn bɛlɛ nuą mɛ̨i, yɛ di mąą kpɛ, ə nwɔ̨n dɔɔ, yɛ di mɛ̨i pono kpinįi. 40 Di vɛli, ə haɉaliɠaa tɛɛ di pɔ, ə di pilɛ a yələi pələ kɔ̨nɔ̨n. 41 Ə kwɛni kpuwulu ɓɛla, yá ə kulɔ ɉu, yɛ laa nɔi pun ɉu, yɛ tɛɛyá kɛ̨nɛ̨. 42 Nwoo mąąhəɠɛɛi ə gwɛlɛ, nwɔ tímun Abrahamə ɓa, gili ə too ɲą. 43 Ə nwɔ nu huwui kulɔ laa a kwəinɛ̨ɛ̨ kɛ̨nɛ̨, ə niiɓa nuą kulɔ laa, diɛ tómą a kwəinɛ̨ɛ̨. 44 Ə tɔɔɓɛlaa di wɔ lɔi həɠə, ə dɛɛ di pɔ, diɛ huwu ta kpɛliɠaa kɛ kólo tɔlɔ mįi. 45 Əgɛ, di di yee kanąn lɔ nwɔ tɔ́n nwooɠaai diɛ, diɛ nwɔ tíɓoɠaai kɛ. 'Kánikookwəi! |