Mąątɛ̨nɛ̨ 104 - Yálá laawoo hɛɓɛ (dc)

'Ka gu yɛnɛ̨ɛ̨ pɛli Yálá mąątɛ̨nɛ̨

¹ Nį́i, Yai-Laa mąąwiɛ, Yai-Laa nwɔ́ Yálá! Ə́ kɛnɛ̨ɛ̨i tai! Ə́ mąąyiliɛ a lɛlɛ da ɲɛ̨ipono.

² Ə́ kwaną həɠə kaa a kɛɛpono, yá yələkɔlɔn ɉu lɛan, yɛ həɠə múmu.

³ A nwɔ pɛlɛ́ɠaai tɔɔ yáɠaa mɛ̨i yələi pələ; yɛ tulɔ kpinįnŋaa kɛ a ɉiɛ wotolo; yɛ hiɛ kulɔ hvaŋą hu.

⁴ Yɛ hvaŋąɠaa kɛ a nwɔ tí nuą, nwɔ̨n nənŋaa di ɓo a nwɔ kɛlaɠaa.

⁵ Ə lɔi kpalan naa kpɔ tin-tin, tumun və mą a yələi lɔpee ta.

⁶ Ə gboloyá hiɛ mɛ̨i, ə gɛ a gwąną həɠə, yáɠaa di ɓo yeeɠaa mɛ̨i.

⁷ Yá tómą di mɛ̨i, da pu, diɛ gilɛ həɠə ə́ wɔ yələgbąnąą tin ma.

⁸ Diɛ lan yeeɠaa mɛ̨i, diɛ yɛɛ yéé lɔwaiɠaa, diɛ li ɓɛi ə́ nąą hvaaɓo diɛ.

⁹ Ə́ di ɲɛ̨n naa, yɛ́ di hvo nąą mąą tɛɛ, di hva kɛa pənə di hvo lɔi lɛɛ yá mu.

¹⁰ Ə́ yáɠaa laa ɓoloonŋaa hu, ɲá yɛ lia tɛɛ yeeɠaa lɔwai.

¹¹ Lɔwɔ huwɔɠaa diɛ di kpələ ɉu, lomą kwaną kpalaa, yɛ kpələ wɛli kulɔ laa mą.

¹² Yələi nwɛ̨niɠaa diɛ di taa tɔɔ gwɛlɛ, di woo yɛ tɔɔ ɲunwu-ɲunwuɠaa hu.

¹³ A lɛɛ heeni ɉeei, yɛ tulɔ pu yeeɠaa mɛ̨i, lɔi yɛ pilɛ, ə́ kɛ kolóɠaa dɔlɔ hu.

¹⁴ Yá kalaɠaa ɓɔn lɔi mɛ̨i, taatɛlɛɛɠaa kɔ̨nɔ̨n mɛ̨nį ɓa, nu kan ɲɛ hihɛn ɲɛa, yɛ gɔ̨nɔ̨n ɉɔlɔɓo ɉu lɔi yəi.

¹⁵ Lɔɔ yɛ nu kan gwəinɛ̨ɛ̨, Yɛ́ di ɲɛ̨i wulɔ kulɔ, yɛ di ɲɛ̨i wulɔ kulɔ, dɛɛ wulɔ ɓa. Kɔ̨nɔ̨n yɛ hvąŋą tɛɛ nu kan bɔ.

¹⁶ Yai-Laa nwɔ wuluɠaai diɛ pilɛ, ə mą kɛ Liban kpitiliɠaai ə di hin.

¹⁷ Nąą ɓə nwɛ̨niɠaa da di taa tɔɔ laa, ɓilikoko yɛ nwɛi tɔɔ ɓɛlɛɠaa hu.

¹⁸ Ɓɛɛlaɠaa bɛlɛi ɓaa yee tɔɔɠaa tonna, kɔ́láá-yilɛ yíi ɓaa kwɛni wolo hu.

¹⁹ Ə ɲąnįn bɛli, kúúɠaa hee mɛ̨nį ɓa, hvóló ə naai lɔwai kɔ́lɔn.

²⁰ Yá kɛɛ tɛɠi, kpinį li, wɛlai huwɔɠaa kəlee, diɛ lia hiɛ-hiɛ́.

²¹ Yalaɠaa diɛ huluun, di kɔ̨nɔ̨nŋaa pulu, diɛ di kɔ̨nɔ̨n vɛli Yálá ɓa.

²² Kɛɛ hu a pono lɔ, daa mąn lɔ, diɛ li ɓɛɠaai da pɛlɛ laa.

²³ Nu yaan, yɛ li bɔ-yɛa, yɛ ɲee pɛlɛi gɛ kólo ɓa, ə lɛɛ ɉu yələ ə wulu.

²⁴ Yái-Laa! Ə́ kɛ kóloɠaa tamąą ɓə tai! Ə́ gəlee kɛ a kiliŋąlaa kɛnɛ̨, lɔi laahvɛɛi a ə́ wɔ pɛli hɛnŋąąi.

²⁵ Gboloyá kaa lə! A ɲá kɛ̨nɛ̨i ti, yɛ li lɔ dąną dąną, huwɔɠaa diɛ gɛ lɔ ɉu ɉúwu-ɉúwu, bɛlɛɛ-pɛlɛɛ mąn, gbɛa kpɛa mąn.

²⁶ Kələn gbɛa-kpɛaɠaa diɛ ɓo ɲą, diɛ li, diɛ pa, da yáihɛn ə́ bɛli a ə́ pələ kɛ hɛn.

²⁷ Ɉuwɔɠaa tii kəlee, di kilitɔɔi yɛ́, yɛ́ kɔ̨nɔ̨n dɛɛ di pɔ, a ɲələɠaa.

²⁸ Yá di kɔ́ la, diɛ ɲɛɠɛ, Ya ə́ yee laa ɓo, diɛ pilɛ.

²⁹ Ya ə́ ɲįnąą kpulu, di hu a pu diɛ, Yá di nɔ̨ɔ̨ kulɔ di hu, di nwun na ə pili, di pənə a pɔlɔ.

³⁰ Ya ə́ nɔ̨ɔ̨ too di hu, di di muhəɠə, Yɛ́ yɛnɛ̨ɛ̨ ɲɛ̨ilai mąąhvalin na.

³¹ Yai-Laa Mąąwiɛ̨ pələ, 'ə lɛɛ lɔ laa kpan kpan! Yai-Laa, kɛkólóɠaa di gwəinɛ̨ɛ̨!

³² A ɲɛ̨i pili lɔi mɛ̨i, lɔi mąą a kpɛlin, A tunwɔ̨n yeeɠaa diɛ, di mɛ̨i lulu yɛ tɛ.

³³ Gáá pai kɛi Yai-Laa mąątɛ̨nɛ̨ wələ tooi, nwɔ́ yɛnɛ̨ɛ̨ kəlee yee mu, voló kpəlii nii ɲə́i, gɛ́ hvɛli kɛ la nwɔ́ Yálái ɓa.

³⁴ Mąątɛ̨nɛ̨ wələi gáá dooi, ə nɛ̨ɛ̨ nwəlii! Ɛlɛɛ, Yai-Laai, 'ə kɛ lɔ a nwɔ kwəinɛ̨ɛ̨.

³⁵ Nɛ̨ŋɛ̨n ɉəɠə nuą 'di kpɛɛ lɔi mɛ̨i, nuąi di hva kulɔ di woo ɓa, 'di hvo lɛɛ yɛnɛ̨ɛ̨! 'Lúwɔ́ kɛ Yai-Laa ɓa, nį́į́ wolo! 'Kánikookwəi!