Mąątɛ̨nɛ̨ 103 - Yálá laawoo hɛɓɛ (dc)

Yálá a nu ɲɛ̨imąąwɛlikaa

1 Davidə nwɔ wələ woo.

¹ Davidə nwɔ wələ woo. Nį́i! Yai-Laa mąąwiɛ, gɛ́ níí ə Naa mąąhəɠɛɛ mąąwiɛ.

² Nį́i, Yai-Laa mąąwiɛ, 'Hvó lɛ̨ą ɲəi mɛ̨inɛ̨ɛ̨ ta lɔpee ɓa.

³ Ya ɓə a ə́ hɔn gəlee mąąhvaalɛɛ kpɔ tɛ̨ɛ̨tɛ̨ɛ̨, yɛ ə́ mąą ɲɔ̨n gəlee kpɛɛ.

⁴ Yɛ ə́ nįį kulɔ haa wolo la, yɛ ə́ ɲɛ̨i pɔ̨nɔ̨ a wɛlikɛmąąlaa da liinɛ̨ɛ̨ gwəilaa,

⁵ Yɛ ə́ pilɛ ə́ wɔ yɛnɛ̨ɛ̨ yəi mu a ɲəi hɛnŋaa, ɛlɛɛ, yɛ pənə yɛ ə́ pu ə́ nįnɛ̨ kɔ́lɔi yɛ kúwɔ.

⁶ Yai-Laa a túwɔ́ a tələnmolaa, nuąi kpɔ da di yee pənə di hui, a di wɔ tɛ̨ą ɓo.

⁷ Ə nwɔ pələɠaai lɛ Moisə ɓa, Ə gɛ mɛ̨nį kpɛa kpɛaɠaa lɛ Israɛlə lonnii diɛ.

⁸ Yai-Laa liinɛ̨ɛ̨i gwəi, a nu mąąwɛli kaa; hva níiholi ɉa, gaa a wɛlikɛmąą.

⁹ Hvo lɔ laa kiti tee mɛ̨ni ɓa a yələ kəlee, hva nu hɔn ɉee gwəi a ɉu kwɛaa.

¹⁰ Hva gu hon yɛ bələi gu wɔ nɛ̨ŋɛ̨nŋaa kaa la, hva gu wɔ túwɔ́ pələ ɲɔ̨nŋaai kwələ kulɔ yɛ bələi gwa tuwɔ la.

¹¹ Bələi lɔ yələkɔlɔn nwɔ heeɓolaa kaa la lɔi ɓa, bələ lɔ ɓə nwɔ wɛlikɛmąąlaa kɛ̨nɛ̨ la ɲɔw mąą nuą diɛ.

¹² Bələi lɔ hvóló həɠəi mąąkwɛaa la hvóló tooi ɓa, bələ lɔ ɓə a gu hɔn mąąkwɛa la guɔ.

¹³ Bələi lon gaa nąn a non ɉon na a wɛlikɛmąąlaa kɛnɛ̨, bələ lɔ ɓə Yai-Laa a nuąi da ɲɔw mą di hon na a liinɛ̨ɛ̨ gwəilaa.

¹⁴ Mąąhɔlɔɓo, ɉɛn di gu pɛli la ə gɔlɔn, gbaɠala kaa mą yɛ gu kaa a pɔlɔ.

¹⁵ Nu kan nwɔ yɛnɛ̨ɛ̨ kaa yɛ kala tiliin, yɛ powa yɛ kpomói wulu;

¹⁶ yaa lɔ ɓaa hvaŋą a tɛɛ, hva kɛa kɛ laa, ɓɛi ə kɛ laa, nąąkili hva kpɛli lɛɛ nąąi ɲą.

¹⁷ Kɛlaa Yai-Laa nwɔ wɛlikɛmąąlaa kaa a yələ kəlee mɛ̨nį, nuąi da mąąwiɛ di mɛ̨i; ɛlɛɛ, a yiliɠaai lonnii di wɔ lonnii hon a wɛlikɛmąąlaa;

¹⁸ A nuąi ti da nwɔ mįnɛ̨i pɔ yíi ɓo, di wɔ kiliŋąhiɛ ə ɓo nwɔ tɔ́n nwooiɠaai kɛ mɛ̨nį ɓa.

¹⁹ Yai-Laa aa nwɔ tɔɔ kpəlin hvilɛn yələkɔlɔn ɉu, nwɔ tɔɔlaai heɛ hɛn gəlee mɛ̨i.

²⁰ Kaai a nwɔ malakaɠaa, 'Ka Yai-Laa laa mąąwiɛ, kaai a nwɔ kuláá kpɛa kpɛaɠaai, 'ka nwoo pɔ mɛ̨nį kɛ, 'ka nwoo mɛ̨n nɔ, 'ka nɛɛ mą ka bɔ mɛ̨nį kɛ.

²¹ 'Ka Yai-Laa laa mąąwiɛ, kaai a nwɔɔ kɔlaɠaɠaa, kaai a nwɔ kalanɉonŋaa, kaa niiɓa kɛi.

²² 'Ka Yai-Laa laa mąąwiɛ, kaai a nwɔ pɛli hɛnŋąą kəlee, kɛɛnąą kəlee ɓɛi kpɔ ŋą Heeɓolaa nwɔ kələn nwoo ə li laa. Nį́i, Yai-Laa mąąwiɛ.