Mąątɛ̨nɛ̨ 102 - Yálá laawoo hɛɓɛ (dc)Mąąwɛlimun nwɔ Yálá hvɛli woo 1 Mąąwɛlimun aa kpɔlɔɔn, nwɔ Yálá hvɛli woo; gaa nwoo laai Yai-Laa ɓa. 2 Yai-Laa, Ə́ wəli tɔɔ nwɔ́ hvɛli wooi ɓa, 'nwɔ́lɔ woo ə həli kpɔ Yɛ́! 3 'Hvó Ə́ ɲɛ̨i həɠə ɲɛ̨́i, ɲələi mɔ̨nɔ̨ a hee la ɉú. Ɲələi ŋą́ Ə́ təli la, 'Ə́ wəli tɔɔ kpɔ a nɛlɛɛ nwóó ɓa, 'Ə́ nwóo mu hon ɉa. 4 Hvó gaai, nwɔ́ hvólóɠaa kaa lɔ kpɛɛi, yɛ nwɔ̨n nulu, gɔ́wɠaa diɛ kələn yɛ kpáɠa nwɔ̨n. 5 Níí kaa lɔ yɛ da kala tee, a kpala, gɛ pələi ti, ŋą́ą́ lɛ̨ą gɔ̨nɔ̨n ma. 6 Nwóó laa pələ kɛ̨nɛ̨i, gɔ́lɔ́ aa kanąn gɔ́w ɓa. 7 Gáá yɛ lɔi pun ɉu nwɛ̨ni, yɛ taa kpoloon ɉu Múu. 8 Gɛ́ yiikpəlin ɉəɠə, gɛ́ nwóó laa, yɛ nwɛ̨ni a kɛ dɔ̨nɔ̨ kɔn ɉu, pɛlɛ́ kɔ́nma. 9 Ɲówóɠaa da túwɔ́ lɔ vííɓoi, nuąi kɛi mą́ą́tɛ̨nɛ̨ toloo toloo, diɛ nɛ̨ŋɛ̨nnaa kɛ a náá. 10 Luwu aa lɛɛ a gɔ̨nɔ̨n, ɲɛ̨́iyá da gbə́lə lɔɔ daa humu a di kee. 11 Mąąhɔlɔɓo, yáá Ə́ liiholi bɔ́ ɓəɠə-ɓəɠə, Yáá dɛ́ yələi, Yáá bílí kwɛa la. 12 Nwɔ́ hvólóɠaa kaa lii yɛ nįnįn, ŋį́ ɓo yɛ kala tiliin, gɛ́ kpala. 13 Kɛlaa, Ə́ wɛi, Yai-Laa, Ə́ kaa lɔ a Heeɓomun a yələ kəlee, Ə́ kili ə ɓo lɔ nuą ɲą a kwɛlan gəlee. 14 Ə́ kaa pai Ə́ muhəɠəi, Siɔn taa wɛli ɓa. Mąąwɛli kaa yələ aa həli, a tɛ̨ą, ɲələ aa ɉəli! 15 Gwɛniɠaai di Siɔn tɔɔ la, di mąą liihɛlɛn kaa ə́ wɔ tínuąi diɛ, ə mą kɛ ɉu munuun-gbala, mąąwɛli yɛ di hon. 16 Lɔiɠaa kaa pai ɲɔwi Yai-Laa, laa ɓa, yɛnɛ̨ɛ̨ tɔɔɓɛlaa kəlee diɛ ɲɔw Ə́ mąąwiɛ̨ pələ ɓa. 17 Ɲələi Yai-Laa kaa pai pənəi yɛ Siɔn tɔɔ la, nuą da gaa mąąwiɛ̨ pələ hu. 18 A ɲələi ti gaa pai ɲɛ̨i tinɛn ɉi la nuą daa too, di pɔ pələ, di wɔ hvɛli wooi pɔ pələi, gaa pai ɲee heei di wɔ hvɛli wooi mu, hvo kɛa pai di pilii. 19 Mąąnɛ̨ɛ̨ mɛ̨nįi ŋɛ̨i ə pɛ̨ɛ̨ nuąi pai ku pulu di mąą mɛ̨nį ɓa, nu huwu nįnɛ̨i pai, diɛ Yai-Laa mąątɛ̨nɛ̨. 20 Yai-Laa yɛ lɛɛ ɲəi bɛ́lɛ́n yələ kɔlɔn ɉu, yɛ nwun mąą ląŋąn, yɛ lɛɛ yələi, yɛ ɲɛ̨i pili lɔi mɛ̨i. 21 Yɛ nwəli tɔɔ gahonąminą ɲiŋɛ̨ woo ɓa, nuąi daa di kiti tee a di paa mɛ̨nį, yɛ di nwun mąąɓo. 22 Di kaa pai Yai-Laa Laa ɓoi a lolo, Siɔn daa kwəi, diɛ mąątɛ̨nɛ̨ Ɉerusalɛmə daai. 23 A ɲələi nu huwuɠaa kaa pai di ɲąą kpɔn ɉii la, diɛ kwɛli hvilɛn Yai-Laa ɓa. 24 Aa vį́ikpɛɛ, ŋį́ ɓo ni bələ hɛ̨ąi. Aa nwɔ́ yɛnɛ̨ɛ̨ hu kpuo. 25 Yili ɓə gɛ, gɛ́ kɛ mą: Nwɔ́ Yálá, ŋį́ kɛ Yɛ́: 'Hvó nwɔ́ yɛnɛ̨ɛ̨ lɛɛ ɉamąi, hvó ɉə́ɠə́! 26 Yɛ́ ɓə wɔlɔ lɔi kpalan naa, yələ kɔ́lɔn gaa a ə́ yəi pɔɔ. 27 Di hu kaa pai kalai, Kɛlaa, ə́ wɛi, ə́ kaa lɔ pai kɛi laa, di kaa pai haɠai, yɛ həɠə, Yɛ́ di mąą hvalin, yɛ bələi da həɠə mąą hvalin na, di kaa pai həɠəi laa, dakpɛliɠaa diɛ hee laa. 28 Ə́ kɛ pələ laa lɔ ɓaa a Ə́ kɛ pələ, kpɛɛ hvo ə́ wɔ kwɛlanŋaa diɛ. 29 Yɛ́ tínuąi lonnii kaa pai di heei hɔlɔɓoi, di huwu kaa pai kɛi lɔ tɔɔni ə́ lííla. |