Mąątɛ̨nɛ̨ 10 - Yálá laawoo hɛɓɛ (dc)1 Yai-Laa, lə ɓə kɛ yai ə́ kaa kwɛaa la, yɛ́ ə́ loo a mɔ̨nɔ̨ yələɠaa? 2 Nwąnąlɔmun nwɔ nwąnąlɔlaa kɔ̨nɔ̨n maa mąąwɛlimun, nwɔ gbąnąlaa hɛlɛn lɔ ɓə a too ɲą. 3 Nu ɲɔ̨nwɔ̨ɔ̨, a gbɔwɔ ɲąąkɛnɛ̨, a gwəi kiliɠaa hvulu hɛn gwɛlimun, a vulu hɛn tii ɉɔlɔɓo, yɛ tɛɠɛɓoɉulaa kulɔ a Yai-Laa, yɛ gonon dɔɔ mą. 4 Nu ɲɔ̨nwɔ̨ɔ̨ a tɛɠɛɓo Yálá hu, yɛ ɲąŋąɲąŋąlaa kulɔ la; hva kpɛli giliŋą hiɛ, a kɛ kɛi diɛ Yálá hvo laa; gwəi kili kəlee ka tii. 5 Nu taaləi tii, gɛ mɛ̨nįɠaa hu a nɛ̨ɛ̨ mą a yələ kəlee; yii hvilɛn na Yálá nwɔ kitii ɓa, gwəi kili hva yili kpaɠala kaa, dɛɠɛɓoɔ ɲowoɠaa hu. 6 A kɛ kɛi gbɔwɔ ɓa: «Gáá tɔɔni gbilin, ɲąąnwąnąą hva pɛli gáái kpɔ tanɔ̨n kpɛli.» 7 Nɛŋɛ̨n naa woo, nu ɓowɔ mɛ̨nį, da wea mɛ̨nį lɔ ɓə na. 8 Aa pələ hɛlɛn dɛ veen ɉu, yɛ nuą mąąhɛn, nooɔ kpɔ kɛnɛ̨, yɛ kwəikwələmun baa, yɛ ɲɛ̨i laa a mąąwɛlimun; yɛ mąąhɛn. 9 Aa pələ hɛlɛn dɛ, nooɔ kpɔ kɛnɛ̨, yɛ yala a kɛ nwolo hu; a bələ hɛlɛn dɛ kpɔ kpąąn, yɛ wolo mąąwɛlimun ma. A wolo mą, yɛ ɲala a nwɔ tumɔi. 10 A kɛi mąąhɛn kɛ, a mąą yɛɛ, yɛ mąąpɛlɛ, yɛ laŋąn nɔi ɓa, yɛ too mąąwɛli nuą mɛ̨i. 11 Yɛ kɛ gwəi pələ: «Yálá aa lɛ̨ą yili ɓa, aa ɲįnąą kpulu, hvo mɛ̨nį lɔpee ta kaai.» 12 Yai-Laa! Ee Yálá! 'Haŋą ə́ tɔɔ; Ə́ yee haŋą, ə́ ə́ kɛ mɛ̨nį kɛ, 'hvó lɛ̨ą mąąwɛli nuą diɛ. 13 Lə ɓə kɛ yai nu ɲɔ̨nwɔ̨ɔ̨ a tɔɔ yɛ Yálá lalan, yɛ kɛ kpɛli diɛ gwəi pələ: «Hvo pai hvilɛn ɉi búlú hvo gwɛ́lii?» 14 Ə́ wɛi, yá nu ɲɛ̨iyá da nwɔ mɔ̨nɔ̨ kaa, yá di kaa, yɛ́ di laa ə́ yee kpala, ɛlɛɛ, nui a mɔ̨nɔ̨ laa lowo, a gilitɔɔ yɛ́, Yɛ́ ɓə a təli ɓalo. 15 Nwąnąlɔmun, nwɔ nwąnąlɔ yeei hu yali, nwɔ nwąnąlɔlaa hvɛla tɛɛi bɔ, ə kwɛlɛɛn ə́ ɲɛ̨i mu, hvó kɛa gaa. 16 Yai-Laa kaa a tɔɔmun a yələ kəlee, hį́i takpɛliɠaa daa kwɛlɛɛn nwɔ lɔi hu. 17 Yai-Laa, yá mąąwɛli nuą liiɓa mɛ̨nį kɛ; yá di liikpələ, yɛ́ ə́ wəli tɔɔ di woo ɓa. 18 Yɛ́ təlilon nwɔ tɛ̨ą ɓo, da nui daa hee mɛ̨i, ɛlɛɛ, nui daa mɛlɛ kpɛɛmą; hva kɛa hvaa mą, nu kan hvo mɛlan mąąɲɔw! |