Maafîu 9 - Yálá laawoo hɛɓɛ (dc)Jesus ə kpɛlɛɠɛlɛ ɲɔ̨n gɛmun da kɔ́lɔi pono ( Markə 2.1-12 ; Lukə 5.17-26 ) 1 Jesus ə tɛ gələn ɉu, ə pənə nwɔ̨nɔ̨ ə ɲa teen, ə li bɔ taai. 2 Nuą di pa bɔ a kpɛlɛɠɛlɛ ɲɔ̨n gɛmun da, naa liihu. Yii kɛa ə ɲɔ̨n gɛmun tii kpəŋə nuą di wɔ laa na laa kaa, ə mo ɲɔ̨n gɛmun tii ɓa, yɛ mą: «Nón! Ŋą́ą́ ə́ kɛ nɛ̨ŋɛ̨nŋąą mąąhvaalɛɛ.» 3 Yaan, tɔ́n galamɔ̨ɔ̨ taɠaa di kɛ laa, di kɛi mo di kwəi pələ, diɛ kɛ mą: «Nui ŋɛ̨i aa Yálá lalan.» 4 Yii kɛa Jesus ə di wɔ kiliŋąhiɛi tii kaa, ə mo diɛ, yɛ diɛ: «Lə mɛ̨nį ɓa ka káá ka kiliŋąhiɛi a ɲɔ̨nwɔ̨ɔ̨? 5 Akɛti, mɛ̨nį hveelɛi ŋɛ̨i, nɛlɛ ɓə mo laa nɛ̨ɛ̨: Dɔlɔɔ ɓaa, ‹Ə́ kɛ nɛ̨ŋɛ̨n mąąhvaa aa lɛɛ›; veelɛnąą ɓaa, ‹Ə́ muhəɠə ə́ hiɛ?› 6 Gáá bɔ ka gɔlɔn kaa, heeɓolaa kaa Nu Lon ɲəi ɲɛnɛ̨ɛ̨ ŋɛ̨i hu, ə nɛ̨ŋɛ̨n mąąhvaalɛɛ.» Yili pulu, ə mo gbɛlɛɠɛlɛ ɲɔ̨n gɛmun tii ɓa, yɛ mą: «'Ə́ muhəɠə, əí laa lii həɠə, ə́ li ə́ yəi bɛlɛ́ laaləi.» 7 Ɉulɔnu tii ə muhəɠə, ə li ɲei bɛlɛ́ laaləi. 8 Yii kɛa nu kpului tii ə yili kaa, di ɲɔ̨w, diɛ mąąwiɛ tɛɛ Yálá pɔ, yaai a ɉuwalawalai taaləi tii tɛɛ nuą pɔ. Matie təli mɛ̨nį ( Markə 2.13-17 ; Lukə 5.27-32 ) 9 Jesus həɠɛɛ laa yɛ li, gɛɛ tɛɛi, ə hulɔnu ta kaa heeni nįįhɔ̨nwɔ̨ kulɔ taɓali ɓa. Naa ɓa kɛ a Matie. Ə mo mą, yɛ mą: «'Hvilɛn búlú!» Yili ə muhəɠə, ə hvilɛn bulu. 10 Di kɛɛ Matie yəi bɛlɛ́n, kɔ̨nɔ̨n mį́į́ kɛi lɔwai, Jesus da nwɔ kalan nɛai, ə mą kɛ, nįįhɔ̨nwɔ̨ kulɔ nuą, da túwɔ́ pələ ɲɔ̨n gɛ nuą di hee taɓali ɓa diɛ kɔ̨nɔ̨n mį́į́. 11 Yii kɛa Farisiɛ̨ɠaa di yili nąą kaa tii, di mo Jesus nwɔ kalan nɛai diɛ, diɛ diɛ: «Lə mɛ̨nį ɓa ka kalamɔ̨ɔ̨, da nįįhɔ̨nwɔ̨ kulɔ nuą, ə mą kɛ, túwɔ́ pələ ɲɔ̨n gɛ nuą, di yee kaa kɔ́wɔ tɔ̨nɔ̨ hu?» 12 Jesus ə di woo mɛ̨n. Ə mo diɛ, yɛ diɛ: «Nuąi di kɔ́lɔi ponoɔ̨, di mąąkpaan və hali kɛmun ma. Hvo kɛ li ɲɔ̨n gɛ nuą ɓə di mąąkpaan gaa mą. 13 'Ka li, ka nwoo ɲɛ̨i mukulaa kwɛli; yai da kɛ mą: ‹Ɲɛ̨i mąąwɛli kaa ɓə gáá bɔ, ə tɛɛ taatɛlɛɛ haláá kulaa ɓa.› Mąąhɔlɔɓo, və́ pa li, nu haŋąąɠaa kwɛli, kɛlaa, ŋą pa nɛ̨ŋɛ̨n ɉəɠə nuą kwɛli mɛ̨nį ɓa.» Di Jesus mąąningɛ hin nɔ mɛ̨nį ɓa ( Markə 2.18-22 ; Lukə 5.33-39 ) 14 Nąąlɔwai, Ɉaan-Batistə nwɔ kalan nɛai di pa diɛ Jesus ɓa: «Lə mɛ̨nį ɓa kwa Farisiɛ̨ɠaa kwa hin nɔ, ə́ wɔ kalan nɛai di hva hin nɔ?» 15 Jesus ə di woo ŋąąpənə yɛ diɛ: «Gaa ka kwəi, nɛ̨ą həɠəmun mɛlaa da mąąwɛli hee ɓo a nɛ̨ą ya yələ? Yili hva kɛ tii. Kɛlaa, gaa pai kɛi a yələ ta, nɛ̨ą həɠəmun tii kaa pai həɠəi di pɔ; nąąlɔwai ɓə da hin nɔ la. 16 «Nu hva həɠə mɛla nįnɛ̨ ta tee mą, yɛ həɠə pɔlɔ woloi hɔlɔ la. Mąąhɔlɔɓo, ɉəɠə ɓɛla nįnɛ̨i tii a kɛi kulɔ bɔlɔ ɓa, a nwolo hu kɛnɛ̨. 17 Nu hva lɔɔ nįnɛ̨ pu hvolowo pɔlɔ hu, hvó naa kpulu. A kɛ tii, nɔɔ nįnɛ̨ wəleen a volówo ɓɛla. Da hvɛɠɛ a volówo da nɔɔ. Kɛlaa, da lɔɔ nįnɛ̨ pu hvolowo nįnɛ̨. A kɛ tii, veelɛi tii ta hva kala.» Nɛ̨ɛ̨nu ta ɓalo mɛ̨nį da nɛ̨ɛ̨non da nwun mɛ̨nį ( Markə 5.21-43 ; Lukə 8.40-56 ) 18 Ɓɛlɔwai Jesus ə kɛi mɛ̨nįɠaa tii ɓo la diɛ, Ɉuifə kalanɉon da ə pa, ə pɛlɛ gɔɠɔ mu, yɛ mą: «Nón nɛ̨ɛ̨nu a haa, kpɔlɔ yiihu, gɛ́, ə́ pa ə́ ə́ yee pɛlɛ mą, ə ɓalo.» 19 Jesus ə muhəɠə ə hvilɛn bulu da nwɔ kalan nɛai. 20 Nɛ̨ɛ̨nu ta ə kɛ laa, ɲąmą ɲɔ̨n ə ɓo mą, aa kɛ lamun mą. Ɲɔ̨n tii, aa kɛ kwɛlan bow-kɔw-hveelɛ kɛ mą. Ə tɛɛ Jesus pulu pələ, ə ɲee hee nwɔ həɠəi wəli la. 21 Mąąhɔlɔɓo, ə kɛi giliŋąhiɛ yɛ kɛ mą: «Akɛ ŋą ɲéé hee lɔ nwɔ həɠəi wəli la, gɔ́lɔ́i a pono.» 22 Kɛlaa, Jesus ə tinɛ̨n ə gaa. Yɛ mą: «Nón nɛ̨ɛ̨nu, ə́ wɔ laa na laa a ə́ ɓalo.» Nɛ̨ɛ̨nu tii kɔ́lɔi ə pono kpɔlɔ tii ŋąąɓa. 23 Ɓɛlɔwai di həli la Ɉuifə kalanɉon tii yəi bɛlɛ́n, di tulu hvɛɛ nuą kaa laa. Nu kpulu kɛnɛ̨ ə kɛ laa diɛ wɔlɔ. 24 Jesus ə mo diɛ yɛ diɛ: «'Nu kəlee di kulɔ! Nɛ̨ɛ̨non hvo haa li, gaa yii.» Nuą tii kəlee di yɛlɛ Jesus ɓa. 25 Nu kpului tii kulaa ɲɛnɛ̨ɛ̨, Jesus ə lɔ bɛlɛ́n, ə nɛ̨ɛ̨non tii hon a ɲee, ə nwun. 26 Mɛ̨nįi tii mąą tin ə too nɔi nąą kəlee. Ɲɛ̨ipu nuą hveelɛ ɲɛ̨i hvoloon mɛ̨nį 27 Jesus həɠɛɛ laa yɛ li, ɲɛ̨ipu nuą hveelɛ di hvilɛn bulu, diɛ tómą, diɛ kɛ mą: «Davidə Lon, ku ɲɛ̨i mąą wɛli kaa, ə́ ku ɲɛ̨i hvoloon.» 28 Ɓɛlɔwai Jesus ə lɔ la bɛlɛ́n, ɲɛ̨ipu nuą tii, di lɛɠɛ Jesus ɓą, yɛ diɛ: «Ka laai na kaa, ŋą pɛli mą ŋį́ yili kɛ?» Ɲɛ̨ipu nuą tii diɛ mą: «Ee! Ną́mu, yá pɛli mą.» 29 Nąąlɔwai ə ɲee tunwɔ̨n di ɲɛ̨ikɔwɠaa diɛ, yɛ diɛ: «Pələi ka wɔ laa na laa kaa la, ə kɛti kaa!» 30 Di ɲɛ̨i ə hvoloon. Jesus ə mo diɛ a nwąnąi, yɛ diɛ: «'Kaa ɓə! Və́ bɔ nui lɔpee ta hvo gbaɠala kaa.» 31 Kɛlaa, di lɛɛ lɔ kulɔi, diɛ Jesus mąą mɛ̨nį bələ taɠa, di wɔ lɔi nąą kəlee. Jesus ə muugbɛ ta laa hvaa 32 Ɓɛlɔwai Jesus da nwɔ kalan nɛai di kɛ la bɔ də li, nuą di pa a hulɔnu ta bɔ muugbɛ ɲįnɛ̨n yɛ ɓo bulu. 33 Jesus ə ɲį́nɛ̨n tii kpɛ. Ɉulɔnui tii yɛ kɛa hvaa. Nu kpului tii kəlee kwəi ə pili diɛ, diɛ kɛ: «Ee! Ku hvo ta yii mąą mɛ̨nį ɲɔ̨nwɔ̨mą da kaa li, Israɛlə lɔi hu.» 34 Kɛlaa, Farisiɛ̨ɠaa di mo diɛ kɛ: «Ɲįnɛ̨nŋąą di nwun nąmu nwɔ huwalawala háálai ɓə gaa ɲį́nɛ̨nŋąa kpɛi la.» Jesus ə nu kpulu ɲɛ̨i mąą wɛli kaa ( Markə 6.6 , 34 ; Lukə 10.2 ) 35 Jesus ə kɛi tɛɛ daa kpɛa-kpɛaɠaa da daa pəlɛɛɠaa hu, yɛ nuą kalan di wɔ Yálá hvɛli pɛlɛ́ɠaa mu; yɛ Yálá-taa tɔɔlaa mąą wɛlɛɛ lɛlɛɛ ɓo diɛ, yɛ ɲɔ̨n ɉuwu kəlee kɛ nuą kɔ́lɔi pono, ə mą kɛ, nuąi kpɛɠii kaa diɛ. 36 Yii kɛa Jesus ə nu kpulu kɛnɛ̨i tii kaa, di mąą wɛli ə ɉon. Mąąhɔlɔɓo, di kɛ pələ ə kɛ yɛ ɓɛlaaɠaai di pulu mun və mą, di hviikpɛɛ, di taɠa-taɠaa. 37 Jesus ə mo kɛa nwɔ kalan nɛai diɛ, yɛ diɛ: «Ka káá gaai, mɔ̨nun gbala kɛnɛ̨i, kɛlaa, dee nuą di hvo tamą li. 38 Yili ɓa, ka díi nąmu hvɛli, ə gɛ, ə mɔ̨nun dee nuą tamąą tɛɛ di nwɔ mɔ̨nun tee.» |