Maafîu 7 - Yálá laawoo hɛɓɛ (dc)Hvo ə́ ɓɛlan gití tee ( Lukə 6.37-38 , 41-42 ) 1 «'Ka hvo ka ɓɛlaa kiti tee. Ə gɛ, Yálá hvo pa ka kiti tee. 2 Mąąhɔlɔɓo, bələi lɔ ə́ kaa ə́ ɓɛlan gití teei la, bələ lɔ ɓə Yálá kaa pai ə́ kiti tee la. Bələi yá hɛn gɔwɔn na, yɛ́ dɛɛ nu pɔ, bələ lɔ ɓə da gɔwɔn na, di dɛɛ ə́ pɔ. 3 Lə mɛ̨nį ɓa galai ə́ ɓɛlan ɲɛ̨i, ya lɔ ɓə yá gaa, nwulukpiɛn ŋɛ̨i gaa ə́ ɲɛ̨i, hva yili kaa? 4 A kɛti, yá pɛli kɛi ləi ə́ ɓɛlan ma: ‹Galai ŋɛ̨i ə́ ɲɛ̨i; tɔɔ, ŋį́ gulɔ, akɛ wulukpiɛn mə ə́ wɔ ɲɛ̨i kɔ́wi ɓa?› 5 Lɛɛmun! Gbɛa ni ə́ wɔ wulukpiɛn kulɔ ə́ ɲɛ̨i. Yili pulu, yá pɛli kɛa ə́ ɓɛlan nwɔ kalai mąą kpɛɛi ə́ gulɔ a nɛlɛɛ. 6 «Ka hvo hɛn mąąhəɠɛɛ tɛɛ yilɛɠaa pɔ, ə gɛ, di hvo pa tinɛ̨n di hvo wolo kaa. Ka hvo ka wɔ hɛniɠaai pu ɓoiɠaa kɔ́wɔ mu, ə gɛ, di hvo pa dan a di kɔ́wɔ, di hvo mąąliɓi.» Hɛn vɛliɛɛ da hɛn gwɛliɛɛ ( Lukə 11.9-13 ) 7 «Ka vɛli, da dɛɛ ka pɔ. Ka gwɛli, ka ɉɔlɔɓo. Ka gbon gɛlɛ, da naaɓo ka tɔwɔ. 8 Mąąhɔlɔɓo, nui lɔpee a hvɛliɓo kɛ, da gɔ́; nui a hɛn gwɛli, a ɉɔlɔɓo; əlɛɛ, da pɛlɛ laaɓo naa kɛlɛ mun dɔwɔ. 9 Nu ta kaa ka lɔwai, yii non a kɛ mą: gɔ́ a kɔ̨nɔ̨n, yɛ kwɛni tɛɛ bɔ? 10 A wala kɛti, a kɛ mą: gɔ́ a hɔ̨nwɔ̨lee, yɛ kaalə tɛɛ bɔ? 11 Ka nu ɲɔ̨nwɔ̨ɔ̨ɠaai ŋɛ̨i, akɛ ka pɛli hɛn nɛlɛɛ tɛɛi ka lonnii pɔ, gu hvo mun kɛ ka Ną́n gaa yələkɔlɔn ɉu! Nwɛi a hɛn nɛlɛɛ tɛɛ nwɛlikɛmąą lonnii pɔ yiiɠaai da vɛli. 12 «Mɛ̨nįi ə́ kaa bɔ nuą di gɛ yɛ́, mąąnɛ̨ɛ̨ ə́ yili ɲɔ̨nwɔ̨mą gɛ diɛ. Yili ɓə gaa Yálá laawoo hu, yii Moisə ə bɛ̨ɛ̨ da Yálá kwəi mɛ̨nį hukulɔ nuą.» Bɛlɛ́ laaləi logolo ( Lukə 13.24 ) 13 «'Ka lɔ bɛlɛ́ laaləi logolo ɓa. Mąąhɔlɔɓo, bɛlɛ́ laaləi kɛnɛ̨ kaa a pələ yii ɉu hiɛɓo laa nɛ̨ɛ̨. Kɛlaa, a nu nwun napili; bələ yili ɓə nu tamąą da ɉon na. 14 Bɛlɛ́ laaləi logolo nwɛi, gaa a pələ lon, ɉu hiɛɓo laa walaa, əlɛɛ, yɛ li a nu yɛnɛ̨ɛ̨ yii kpɛɛ hvo mą, ɉu. Nu tɛitɛi ɓə da ɉon a bələ yili.» Wulu kɔ́lɔn ɉɛn mąą a ma ( Lukə 6.43-44 ) 15 «'Ka ka kpɔɔ mɛ̨i kaa, nuąi da di kpɔɔ kɛ a Yálá kwəi mɛ̨nį hukulɔ nuą di mąą mɛ̨nį ɓa. Mąąhɔlɔɓo, da lɔ ɓɛlaa kɔ́lɔ hu, diɛ pa ka pɔ. Kaa di kaa yɛ ɓɛlaaɠaa, a mɛ̨nį gɛ kwɛ́li hvulúɠaa li. 16 Gáá moi kaa, ka di kɔ́lɔn nɔ pai kɛi a di túwɔ́ pələ. Mąąhɔlɔɓo, nu hva pɛli gbɔlɔhvɛɛ ɓələ kulɔi yɔuɲąąlən ɉu. A wala kɛti, nu hva pɛli towələ kulɔi kowa wulu hu. 17 Wulu lɛlɛɛ, ɓa lɛlɛɛi. Wulu ɲɔ̨nwɔ̨ɔ̨ ɓa ɲɔ̨nwɔ̨ɔ̨. 18 Wulu lɛlɛɛ hva pɛli ɓa ɲɔ̨nwɔ̨ɔ̨ ɓoi, wulu ɲɔ̨nwɔ̨ɔ̨ hva pɛli ɓa lɛlɛɛ ɓoi. 19 Yili ɓə gaa mą, hihɛn nwulu yii hva ɓa lɛlɛɛ ɓo, da dee di bili nwɔ̨n ɉu. 20 Yili ɓa, nuąi da di kpɔɔ kɛ a Yálá kwəi mɛ̨nį hukulɔ nuą, ka káá pai di kɔ́lɔn ɉii, a di túwɔ́ pələ.» Yii ka mo, ka gɛ ( Lukə 13.25-27 ) 21 «Nuąi da kɛ mą́ą́: ‹Ną́mu, Ną́mu›, gəlee hvo pai lɔi Yálá-taa tɔɔlaa hu. Hvɛɛ yiiɠaai da Ną́n gaa yələi, niiɓa kɛ, diɛ ɓə pai lɔi laa. 22 Volói tii, nu tamąą kaa pai kɛi mą́ą́: ‹Ną́mu, Ną́mu. Kɛlɛi, ku kɛi Yálá mąą mɛ̨nį ɓo nuą diɛ, ə́ laa hu? Ku kɛi ɲį́nɛ̨nŋąą kpɛ nuą pulu ə́ laa hu? Kuɔ kpalo mɛ̨nį tamąą kɛ ə́ laa hu?› 23 Nąąlɔwai, ŋą kɛ diɛ: ‹Və́ ka kɔ́lɔn! Ka ka mąą kwɛa mą́ą́ ka mɛ̨nį ɲɔ̨n gɛ nuą ŋɛ̨i.›» Pɛlɛ hveelɛ mąą mɛ̨nį ( Lukə 6.47-49 ) 24 «Yili ɓa, mɛ̨nįɠaai ŋɛ̨i gáá moi, nui a mɛ̨n, ə bɔ mɛ̨nį kɛ, a kɛ yɛ kilimąą mun yii a nwɔ pɛlɛ́ tɔɔ kwɛni mɛ̨i. 25 Hvaŋą a kɛlɛ ɉu, tulɔ ə pu, ya nwaną ə hee mą. Kɛlaa, hva mɛ̨nį ta kɛ a bɛlɛi tii. Mąąhɔlɔɓo, dɔɔi kɛ kwɛni mɛ̨i. 26 Kɛlaa, nui gaa nwóó ŋɛ̨i mɛ̨n ɉii, hvo bɔ mɛ̨nį kɛi, a kɛ yɛ kilikpɛɛɲeimun, yii aa nwɔ pɛlɛ́i tɔɔ ɲɛa hu. 27 Ɓɛlɔwai hvaŋą ə dɛɛ la, tulɔ ə pu, ya ə hvɛɛ, bɛlɛi tii pɔ ə kulɔ, ə pu. Ə kala kpɔ tɛ̨ɛ̨tɛ̨ɛ̨?.» Jesus nwɔ heeɓo laa ( Markə 1.22 ; Lukə 4.32 ) 28 Ɓɛlɔwai Jesus ə kpɛɛ la a mɛ̨nįɠaa tii kəlee ɓoɔi, nu kpului tii kəlee kwəi ə pili diɛ, a Jesus nwɔ kalan gɛ pələ. 29 Mąąhɔlɔɓo, bələ hvəə di wɔ tɔ́n galamɔ̨ɔ̨ɠaa da di kalan na. Jesus ə kɛi di kalan a heeɓo laa. |