Maafîu 28 - Yálá laawoo hɛɓɛ (dc)

Jesus nwun mɛ̨nį yɛ kulɔ gámą hu

¹ Hvįįtɔɔ yələ tɛɛ, ɉimahi yələ, yələ wala piinɛ̨ɛ̨, Mari Magdala mun da Mari yii tii di humo diɛ pa gámą la kaai.

² Ɲələ walai tii hu, lɔi ə kpɛlin kpɔ kɛnɛ̨, Yálá nwɔ malaka ə həɠə yələi ə hvilɛn, ə gwɛni kiliɠilin ə ɉəɠə gámą laaləi, ə tɛ ə hee mɛ̨i.

³ Ɲɛ̨i laai ə kɛi lən, mąą həɠə kwələə kpɔ pə-pə.

⁴ Ɉolahiɠaa tii di ɲɔ̨w di too yɛ da haa.

⁵ Malakai tii ə mo nɛ̨ą tii diɛ yɛ diɛ: «Ka hvo ɲɔ̨w. Gíli kaa ɉu gɛ́ diɛ Jesus ŋɛ̨i di gbanwo kolɔwa ɓa ya ɓə ka káá gwɛli.

⁶ Hvo kɛa ɓɛ, aa nwun, aa kulɔ haa yəi, yɛ pələi ə mo la kaa. Ka pa ɓɛi, ə kɛ laa laani, ka nąą kaa.

⁷ Ka pənə, kaamun ka li ka mo nwɔ kalan nɛai diɛ, kaa diɛ: ‹Aa nwu, aa kulɔ haaɓɛlaa lɔwai. Gaa lii ka mąąkpɔn ɉii Galile lɔi hu nąą ɓə ka káá li gaai laa.› Yili lɔ ɓə ŋą kɛi pa moi kaa.»

⁸ Nɛ̨ąą tii, di di pulu pənə kpɔlɔɔ tii a mąą hulaa diɛ li, di kwəinɛ̨ɛ̨ kpɔ kɛnɛ̨, kɛlaa ɲɔ̨w yɛ ɓo di hu, di gilɛ həɠə də li di nwəlɛɛ tii ɓoi, Jesus nwɔ kalan nɛai diɛ.

⁹ Nɛ̨ąą tii da Jesus ni di kwiɛn, ə nwoo pili diɛ. Di di mąą lɛɠɛ mą, di pɛlɛ gɔwɔ mu di kwɛli hvilɛn mą.

¹⁰ Jesus yɛ diɛ: «Ka hvo ɲɔ̨w. Ka li ka mo Ną́n nonnii diɛ də li Galile lɔi hu nąą ɓə di kaa pai gáái laa.»

Ɉolahiɠaa woo hukulɔ woo

¹¹ Ɓɛlɔwai nɛ̨ąą tii di kɛ la bələ pɔ, ɉolahiɠaa ŋɛ̨i di di hee gámą la, daɠaa di gilɛ həɠə də li taai. Mɛ̨nįi kpɔ di gaa, di gəlee hukulɔ ɉaláá laa həli nuą kpɛa-kpɛa nwun nąmįną diɛ.

¹² Ɉaláá laa həli nuą kpɛa-kpɛa nwun nąmįną, da Ɉuifə kalanɉonŋąą di di ŋąąkpɔn; di pɛli mɛ̨nį tɔ̨nɔ̨ ɓa. Di wali kɛnɛ̨ həɠə di dɛɛ Gɔ́kulááɠaa tii pɔ,

¹³ diɛ diɛ: «Yili ɓa ka li kɛ diɛ: ‹Jesus nwɔ kalan nɛai di pa di bowa nwuɔ̨ a kpinį ɓɛlɔwai ku kɛi yii la.›

¹⁴ Akɛ ɉį́í lɔi mɛ̨ihveelɛi nwun nąmu kili a pu ɉu, kwa tɔɔ ka pulu, mɛ̨nį ɲɔ̨n nɔpee ta hva həli kaa.»

¹⁵ Ɉolahiɠaa diɛ kpɛli di nwali hon, əlɛɛ, pələi tii di mo la diɛ, di gɛ tii. Mɛ̨nįi tii bələ ə taɠa-taɠa Ɉuifəɠaa lɔwai, hááɓa-háá bələ kaa nii mą.

Jesus ə gbɔwɔ lɛ nwɔ kalan nɛai diɛ

¹⁶ Galan nɛa pow-kɔw-tɔnɔ̨ tii di həɠə diɛ li Galile lɔi hu ɲeei ŋɛ̨i Jesus ə vaa ɓo diɛ mɛ̨i.

¹⁷ Yii kɛa di Jesus kaa, gəlee di kwɛli hvilɛn mą. Kɛlaa, daɠaa di kɛi ɲinɛ̨-ɲinɛ̨n.

¹⁸ Jesus ə lɛɠɛ diɛ yɛ diɛ: «Daa hééɓolaa kəlee tɛɛ bɔ́ yələkɔlɔn ɉu ə mą kɛ lɔi mɛ̨i.

¹⁹ 'Ka li yɛnɛ̨ɛ̨ nąą kəlee, ka nu kəlee kalan, ka di kɛ a nwɔ́ kalan nɛa. Ka di mąąwaa Ną́n Yálá da Non da Kili-Mąąhəɠɛɛ laa hu.

²⁰ Yiiɠaai ŋį́ ka tí la, ka nuą mąąkwɛli mą a ɉon bələ. Gáá ka pɔ a yələ kəlee, ə lɛɛ ɉu yɛnɛ̨ɛ̨ ɲąą ə kpɛɛ la.»