Maafîu 27 - Yálá laawoo hɛɓɛ (dc)Də li a Jesus Pilatə pɔ ( Markə 15.1 ; Lukə 23.1-2 ; Ɉaan 18.28-32 ) 1 Yələ wala pɔ, ɉaláá laa həli nuą kpɛa-kpɛa nwun nąmįną da Ɉuifə kalaɉonŋąą di di ŋąąkpɔn, ə gɛ, di Jesus paa. 2 Yili pulu, di Jesus yili di dɛɛ Pilatə pɔ, yaai kɛ a Romə nuą di wɔ hį́í lɔi mɛ̨ihveelɛi nwun nąmu. Ɉudasə haa mɛ̨nį ( Gɛlaɠaa 1.18-19 ) 3 Ɉudasə ŋɛ̨i Jesus lɔwɔtɔɔ, yii kɛa gaa yɛ daa Jesus hon diɛ li baai, naa mąąwɛli ə ɉon níí ə holi, ə pənə ə pa a nwalii tii di Jesus ya la, ə dɛɛ ɉaláá laa həli nuą kpɛa-kpɛa nwun nąmįną da Ɉuifə kalaɉonŋąą pɔ, yɛ diɛ: 4 «Ŋą́ą́ nɛ̨ŋɛ̨n ɉəɠə mun, mąąhɔlɔɓo, nui hɔn və mą ŋą́ą́ dɛɛ diɛ li baai.» Kɛlaa, yiliɠaai di mo mą diɛ mą: «Ku mąą kpaan və ɉu! Ə́ kpɔɔ mɛ̨nį li.» 5 Ɉudasə ə nwali pili, ə taɠa-taɠa Yálá hee pɛlɛ́ mu, ə li ə gbɔwɔ hɛlɛn. 6 Ɉaláá laa həli nuą kpɛa-kpɛa nwun nąmįną di nwali yɛɠɛ, diɛ diɛ: «Guɔ tɔ́n yɛ nwali huwu yii mąą hvo nɛ̨ɛ̨li guɔ Yálá kɔ́ hɛn gɔw hu. Mąąhɔlɔɓo, ɲąmą hɛn gɔw li.» 7 Di kəlee di hvaamą, ə gɛ, di ləɠi tɔɔmun da nwɔ lɔi ya a nwali, ə gɛ, di nąą kɛɛ a nwɛ̨ąą kámą la. 8 Yili ɓə gɛ gɛɛnąą tii di ɲa, di nąą laa hee a: ɲąmą lɔi naa tii ɓə ma, ə mą kɛ háákələi. 9 Yili ə kɛ tii, ə gɛ, mɛ̨nįi Yálá kwəi mɛ̨nį hukulɔ mun Ɉeremi ə mo, bɔ mɛ̨nį ə kɛ; yaai ə kɛ la mą: «Nwali kwələ pow haaɓai ŋɛ̨i Israɛlə nuą kəlee di hvaamą di ɲa la, di ɉəɠə, 10 ə gɛ, di ləɠi tɔɔmun da nwɔ lɔi ya la, yɛ pələi Ną́mu ə mo la mą́ą́ əgɛ, ŋį́ mo diɛ.» Pilatə ə Jesus mąąni kɛ ( Markə 15.2-5 ; Lukə 23.3-5 ; Ɉaan 18.33-38 ) 11 Jesus ə kɛ tɔɔ ni Pilatə líílaa, yili ə mąąni kɛ, yɛ mą: «Ɉuifəɠaa di wɔ tɔɔmun ɓaa a yɛ́?» Jesus yɛ mą: «Ya ka tii ə́ mo!» 12 Yili pulu, haláá laa həli nuą kpɛa-kpɛa nwun nąmįną da Ɉuifə kalaɉonɉaa di lɛɛ mɛ̨nį tamąą ɓo a Jesus laa. Jesus hvo da lɔpee ŋąąpənə. 13 Pilatə yɛ Jesus ɓa: «Mɛ̨nį tamąą ŋɛ̨i di kaa moi a ə́ laa, ə́ kaa kɛi lə?» 14 Jesus hvo kpɛli nwoo ŋąąpənə, yili ə Pilatə kwəi pili mą kpɔ kɛnɛ̨. Nu kəlee di hvaamą diɛ Jesus ə haa ( Markə 15.6-15 ; Lukə 23.13-25 ; Ɉaan 18.39—19.16 ) 15 Pakə hɛli həli pələ tɛitɛi kəlee, ɉį́į lɔi mɛ̨ihveelɛ nwun nąmu ə kɛi tee gaho nąmu tɔ̨nɔ̨ ɓa, kɛlaa, a kɛ a yii nɔi nuą kəlee da hvaamą diɛ mą: «Yii ɓə ku kaa bɔ.» 16 Nąąlɔwai, mɛ̨nį ɲɔ̨n gɛmun gɛnɛ̨ ta ə kɛ laa gaho ɲą diɛ kɛ naa ɓa: Barabasə, nu ɲɔ̨nwɔ kɛnɛ̨ ta ka tii kɛ. 17 Ɉuifəɠaa kəlee ŋąąkpɔn ŋąąi kɛ Pilatə lííla, ə di mąąni kɛ kɛ, yɛ diɛ: «Gbɛɛ ɓə ka káá bɔ ŋį́ ɓo mą? Barabasə, a wala kɛ tii, Jesus ŋɛ̨i gaa a Nwun mąąɓomun yaai Yálá ə naakwɛlanmo?» 18 Mąąhɔlɔɓo, Pilatə ə gɔlɔn yɛ nuą tii di Jesus hon a tolo, diɛ paa la bɔ. 19 Ɓɛlɔwai Pilatə ə kɛ heeni la gití tee kpəlin ɉu, nɛ̨ą ə wəlɛɛ tɔɔ yɛ di moi mą, diɛ mą: «Ə́ laa kulɔ nu haŋąą ŋɛ̨i mąą mɛ̨nį hu, hvo mɛ̨nį lɔpee ta kɛ la. Mąąhɔlɔɓo, ŋį́ háá mɔ̨nɔ̨ mį́į́ kpɔ kɛnɛ̨, a kpinį hįį pələ mąą mɛ̨nį hu.» 20 Ɉaláá laa həli nuą kpɛa-kpɛa nwun nąmįnąɠaa da Ɉuifə kalaɉonŋąą di mo nɔi nuą kəlee diɛ, diɛ diɛ: «Ka gu hvaamą, di ɓo Barabasə ɓa, di Jesus paa.» 21 Ɉį́i lɔi mɛ̨ihveelɛ nwun nąmu ə pənə, ə di mąąni kɛ, yɛ diɛ: «Nu hveelɛi ŋɛ̨i, nɛlɛ ɓə ka káá bɔ ŋą́ ɓo mą?» Nuą kəlee diɛ mą: «Barabasə ɓə ku kaa bɔ ə́ ɓo mą.» 22 Pilatə yə diɛ: «Lə ɓə ŋą gɛ a Jesus ŋɛ̨i da kɛ mą: Nwun mąąɓomun Yálá ə naakwɛlanmo?» Nu kəlee diɛ mą: «Ku kaa bɔ, ə́ gbanwo kolɔwa ɓa!» 23 Pilatə yɛ diɛ: «Mɛ̨nį ɲɔ̨n nə kɛ ɓə ə gɛ?» Nuą tii kəlee di tómą kpɔ a di woo kɛnɛ̨, diɛ mą: «Gbanwo! Gbanwo kolɔwa ɓa! Ə haa.» 24 Yii kɛa Pilatə ə gaa yɛ diɛ, mɛ̨nįi gaa moi, di hvo nwoo hon ɉi, kɛlaa yaamun, nuą huluun nwoo lɔ ɓə ɉu ə kɛi kɛnɛ̨; ə ya həɠə, ə ɲəi waa nu kəlee ɲɛ̨i ɓa, yɛ diɛ: «Nui ŋɛ̨i hɔn və mą, ɲə́ə́ hvo baa mɛ̨nį hu gɔ́wɔ́ hvo ɉu; ka nwuɔ̨ tiɛ̨ li.» 25 Nu kpului tii kəlee diɛ mą: «Ɲąmą wulu a lɛɛ ku nwuɔ̨ kwa ku lonnii.» 26 Nąąlɔwai Pilatə ə tee Barabasə ɓa, ə Jesus tɛɛ di gɛlɛ a hvaɠa, ə dɛɛ diɛ li gbanwoi. Holahiɠaa di yɛlɛ kulɔ Jesus hu ( Markə 15.16-20 ; Ɉaan 19.2-3 ) 27 Nąąlɔwai, Pilatə nwɔ holahiɠaai də li a Jesus gwəli hɛ̨ąąi. Ɉolahiɠaa kəlee di Jesus mąą tinɛ̨n. 28 Di Jesus nwɔ həɠəɠaai kəlee kulɔ gwaną, di holahi həɠə kpɔluɔ ta too gwaną. 29 Yili pulu, di ɲąąlən gɛ a kálán di ɉee nwun ma, yili pulu, di hveen gbaɠa tee di nɔ mamįiyee ŋą, diɛ pu di kpəlin na diɛ yɛlɛ kulɔ ɉu, diɛ kɛ mą: «Ɉuifəɠaa di wɔ tɔɔmun, ə́ yii kpɛli.» 30 Diɛ di laayá taɠa mą, di veen gbaɠai tii kulɔ ɲəi, diɛ gɛlɛ nwuɔ̨. 31 Yii kɛa di mɛ̨lɛkpɛɛ mą a di liiɓa pɛlɛ, di ɉəɠə kɛnɛ̨i tii kulɔ kɛa gwaną, di nwɔ hɛɠɛ too gwaną, diɛ li la gbanwoi kolɔwa ɓa. Di Jesus kpanwo kolɔwa ɓa ( Markə 15.21-32 ; Lukə 22.26-43 ; Ɉaan 19.17-27 ) 32 Di kɛɛ kulɔi a Jesus taai, diɛ li la gbanwoi, di Sirɛnə mun da kaa diɛ kɛ naa ɓa Simɔn. Ɉolahiɠaa di mo mą diɛ mą: «Pa ɓɛ, ə́ Jesus nwɔ kolɔwa həɠə.» 33 Də li a Jesus ɓɛi da kɛ mą: Gɔlgota (mukulaa ɓaa: Nwun gonon ɲee ɓa.) 34 Nąą ɓə di lɔɔ kpona tɔɔlaa Jesus la. Gɔɔn tii ə mo, hvo gɛ hvo gbələ. 35 Di nɛ̨ɛ̨mą di Jesus kpanwo kolɔwa ɓa. Di mąą həɠəɠaa həɠə di ŋąąkwɛlɛ, di nwɔ həɠə muhəɠəi kɔ́ a kpɛ̨ɛ̨n. 36 Yili pulu, di hee laa di ɲɛ̨i yɛ ɓo Jesus ɓa. 37 Di hɛɓɛ́ ta pɛ̨ɛ̨ di ɉɛlɛn Jesus nwun mɛ̨i yii a ɉaa mɛ̨nį nwun nɛ, diɛ mą: «Jesus ka! Yaai a Ɉuifəɠaa di wɔ tɔɔmun ka.» 38 Di mɛ̨nį ɲɔ̨n gɛ nuą hveelɛ kpanwo kolɔwa ɓa Jesus kwɛlɛ. Dɔ̨nɔ̨ yɛ ɓo mamįiyee hu, dɔ̨nɔ̨ yɛ ɓo gɔɓɛyee hu. 39 Nuą tii kɛi tɛɛ bələi, da di ɲɛ̨i hee Jesus ɓa, diɛ di nwun gbɛŋɛ̨n diɛ nalan diɛ kɛ mą: 40 «Yɛ́i kɛi kɛ diɛ ya Yálá hee pɛlɛ́ pu ə́ pənə ə́ dɔɔ hvóló haaɓa yee mu, ə́ kpɔɔ ɓalo wɛ! Yɛ́ kpinįi. Akɛ Yálá Lon mąą a yɛ́, ə́ kpɔɔ kulɔ wɛ golɔwa ɓa ə́ hvilɛn.» 41 Ɉaláá laa həli nuą kpɛa-kpɛa nwun nąmįnąɠaa da tɔ́n galamɔ̨ɔ̨ɠaa ə mą kɛ Ɉuifə kalaɉonɉaa di kɛi yɛlɛ Jesus ɓa, diɛ kɛ mą: 42 «Aa nu tamąą nwun mąąɓo, ə kpɔɔ nwun mąąɓo kan kɛa; gaa a Israɛlə tɔɔmun, ə kpɔɔ kulɔ kan kolɔwa ɓa ə hvilɛn, a gɛ tii, kwa laa ə la. 43 Ə gilitɔɔi Yálá ɓa, ə mo yɛ diɛ: ‹Gáá a Yálá Lon.› Yili ɓa, ka gu gu ɲɛ̨i hee laa, akɛ Yálá kaa pai nwun gulɔi.» 44 Ə mą kɛ nuą ɉɔi kɛ di kpanwoɔ kolɔwa ɓa gwɛlɛ, diɛ kpɛli di kɛi nalan nɔ tii. Jesus haa mɛ̨nį ( Markə 15.33-34 ; Lukə 23.44-49 ; Ɉaan 19.28-30 ) 45 Ə kɛ a hvóló tɛɛ nwun mą lɔwai, kpinį ə pɛlɛ lɔi mɛ̨i nąą kəlee ə lɛɛ ɉu, hvóló ə gɔwɔ kulɔ mu. 46 Voló kɔ́wɔ kulaa mu kɛa, Jesus ə tómą kpɔ a nwoo kɛnɛ̨, yɛ mą: «Eli, Eli, lema sabaktani?» (Mukulaa ɓaa: «Nwɔ́ɔ́ Yálá, nwɔ́ɔ́ Yálá, lə mɛ̨nį ɓa ə́ ə́ kili kulɔ ɉú?») 47 Nuą tii kɛ laa tɔɔ ni di nwɔlɔ woo tii mɛ̨n diɛ mą: «Gaa Eli təli.» 48 Nuą tii kɛ laa dɔ̨nɔ̨ ə li ə yeehunwɔ kpinįn hveen gbaɠa ɓa ə nɔ lɔɔ kponą hu, ə nɛɠɛ Jesus laaləi, əgɛ, ə gbələ. 49 Kɛlaa, nu taɠaa di kɛi kɛ diɛ: «Ka tɔɔ. Gu gu ɲɛ̨i hee mą akɛ Eli kaa pai nwun gulɔi ɉu.» 50 Yili pulu, Jesus ə tómą kpɔ kɛnɛ̨, nįį ə kulɔ. 51 Nąąlɔwai ɉəɠə ɓɛla ŋɛ̨i kɛ Yálá hee pɛlɛ́ mu, ɉu ə ɓɛla ə həɠə yələi ə yɛɛ gɔwɔ la. Lɔi ə kpɛlin, kwɛni kpɛa-kpɛaɠaa diɛ ɓɛla. 52 Kámą tamąą laa yɛ ɓo, Yálá nwɔ nuą mąąhəɠɛɛɠaa tamąą di nwun di kulɔ haa yəi 53 diɛ kulɔ di kámą hu. Jesus nwunŋąą ə kulɔ gámąi, Yálá nwɔ nu mąąɠəɠɛɛɠaa tamąą tii di tɛ Ɉerusalɛmə Yálá nwɔ taai hu, nu tamąą di di kaa. 54 Nɔi kpɛlinɉąą, da mɛ̨nįɠaa tii kɛɛpulu, ɉolahi nwun nąmu da nwɔ holahiɠaai ŋɛ̨i kɛi di ɲɛ̨i kɛ Jesus ɓa, di yiliɠaai kaa di ɲɔ̨w kpɔ kɛnɛ̨, diɛ kɛ diɛ: «Nui ŋɛ̨i ə kɛ kpɔ a Yálá Lon a tɛ̨ą.» 55 Nɛ̨ąą tamąą di kɛ laa di tɔɔ kwɛaala di ɲɛ̨i hiɛ Jesus ɓa. Nɛ̨ąą tii ɓə kɛ Jesus pɔ diɛ kpɔnmąątɛɛ bɔ, da diɛni kəlee ɓə həɠə Galile lɔi hu. 56 Nɛ̨ąąɠaa tii lɔwai Mari ŋɛ̨i kɛ a Magdala mun ə kɛ laa, ə mą kɛ, Ɉakə da Ɉosɛfə di lee Mari, da Zebede lonnii hinąą hveelɛi di lee, diɛ ɓə kɛ laa. 57 Yələ wulii pɔ, nu ta ə pa, ə ɓo a hɛn gow nąmu, Arimate mun ni kɛ; diɛ kɛ naa ɓaa a Ɉosɛfə, yaa kpinįi ə kɛ a Jesus pɔ kalan non da. 58 Ə li ə mo Pilatə ɓa yɛ mą: «Jesus powa tɛɛ bɔ́.» Pilatə ə mo nuą diɛ, ə gɛ, di Jesus powa tɛɛ bɔ. 59 Ɉosɛfə ə Jesus powa mąąkpinįn gɛ a həɠə nįnɛ̨, 60 gbɔwɔ kámąi ŋɛ̨i ə dee, nąą ɓə ə noo laa: Yii di hvo nii kɛ nu ta loo li ɉu. Yili pulu, di kwɛni kpuwulu kɛnɛ̨ kiliɠilin di dɔɔ gámą la. 61 Mari Magdala mun da Mari yii tii di kɛ heeni gámą kwɛlɛ. Nuą hee mɛ̨nį Jesus kámą la 62 Mąą yələ laaɓoɔ a hvįįtɔɔ yələ mąą yii, haláá laa həli nuą kpɛa-kpɛa nwun nąmįną da Farisiɛ̨ɠaa də li diɛ Pilatə ɓa: 63 «Tɔɔmun, mɛ̨nį ta nąą kili aa too ku ŋą yɛ hvilɛn na nɛɛ mun tii ɓa. Gɛɛ a vulú, ə mo yɛ: ‹Da baa, hvóló haaɓa tɛɛ pulu a muhəɠə ə kulɔ haaɓɛlaa lɔwai.› 64 Kuɔ ə́ hvaa mą ə́ holahiɠaa tɛɛ də li di gámą mąąkpɛ ə lɛɛ ɉu, hvóló haaɓa ə tɛɛ, ə gɛ, nwɔ kalan nɛai di hvo pa li laa di hvo bowa nwuɔ̨, diɛ kɛ diɛ: ‹Aa muhəɠə.› A kɛ tii, nɛɛ mɛ̨nį yili hu a kɛnɛ̨ ə tɛɛ dɔlɔɔ tii ə gɛ mą.» 65 Pilatə ə holahiɠaa tɛɛ di pɔ yɛ diɛ: «'Ka li, di nąą mąąkpɛ yɛ pələi ka káá la bɔi.» 66 Di gwɛni kwɛlɛ lɔ a ləɠi pɔlɔ, gɔ́kulaa nwun nąmu ə tɔɔmun kɔ́lɔn Ɉɛn bɔɔ laa mą, yɛ diɛ ɉolahiɠaa diɛ: «'Ka tɔɔ ɓɛ kpąą.» |