Maafîu 25 - Yálá laawoo hɛɓɛ (dc)Nɛ̨ɛ̨gbɛla pow mąą hanwon 1 «Yálá-taa tɔɔlaa kɛ pələ kaa yɛ nɛ̨ɛ̨gbɛla pow yiiɠaai kɛi li di ɓɛlan ɉilɛ laakwiɛn ɉii; di di wɔ labonŋąai həɠə, diɛ li. 2 Nɔɔli ə kɛ ɉu diɛ ɓo a kilimąą nuą, nɔɔli kilaa hvo kɛ pono li. 3 Nɛ̨ɛ̨gbɛla lɔɔlii ŋɛ̨i kili ə kɛ diɛ, di kɛɛ di wɔ labonŋąai həɠəi, di wulɔ həɠə di bu kpowoɠaa hu, di ɉon di yee pɔ. 4 Nɔɔlii tii gilaa hvo kɛ pono li, di wɛi, di hvo wulɔ həɠə li di yee pɔ. 5 Yii kɛa di ɓɛlan ɉilɛ hvo kɛi pa ɉa, kpinį hu kwɛaa kɛa, yii ə tɛɛ a nɛ̨ɛ̨gbɛlaɠaa tii. 6 «Kwííhąąi lɔwai, woo ta ə tɔɔ, yɛ kɛ mą: ‹Ka ɓɛlan ɉilɛ kaa pai, ka kulɔ ka li ka naakwiɛn!› 7 Nąąlɔwai, nɛ̨ɛ̨gbɛla powi tii, di di muhəɠə, diɛ di wɔ labonŋąai pɛli. 8 Nɛ̨ɛ̨gbəla lɔɔlii ŋɛ̨i kɛ di kilaa hvo kɛ pono li, diɛ di ɓɛlaa lɔɔli tii nwulɔ həɠə diɛ: ‹Ka ku kɔ́ a ka wɔ wulɔi tawolo, ku pu kuwɔ labonŋąai hu; ka káá gaai, kuwɔ labonŋąai diɛ di luwun.› 9 Gilimąą nɛ̨ą lɔɔlii tii, diɛ di ɓɛlaa diɛ: ‹Kpaa! Mąąhɔlɔɓo, yii gaa ku yəi hvo kɛnɛ̨ li, hva pɛli gu kəlee guɔ labonŋąai hu. Kaa mun, ka li ɲɔ̨w kɛ nuą tii pɔɔli ka da ya.› 10 Nɛ̨ɛ̨lea tii dəli lɔ nwulɔ yai pələ, di lɛɛ laa, di ɓɛlan ɉilɛ ə pa. Gilimąą nɛ̨ąą lɔɔli ŋɛ̨i kɛ di kɛ pələ pɛliɛ, da diɛni di lɔ vúlú lɔ pɛlɛ mu a kwəinɛ̨ɛ̨, di bɛlɛ́ laa kpulu. 11 Nąą tawolo ə gɛ lɔ, nɛ̨ɛ̨lɛa lɔɔli tii li nwulɔ yai diɛ pa; diɛ gbon gɛlɛ diɛ mą: ‹Ną́mu Ną́mu! Ka bɛlɛ́ laa ɓo ku lɔ.› 12 Kɛlaa, di ɓɛlan ɉilɛ hvo gɛ hvo bɛlɛ́ laa ɓo. Yɛ diɛ gáá moi kaa a tɛ̨ą, və́ ka kɔ́lɔn.» 13 Jesus yɛ nwɔ kalan nɛai diɛ: «Ka ka kpɔɔ mɛ̨i kaa, ka kɛ gili-gili. Mąąhɔlɔɓo, ka hvo Ną́mu pa yələ kɔ́lɔn, ka hvo bai lɔwai kɔ́lɔn.» Hanwon yii vilɛn ŋąąi tínuą haaɓa ɓa ( Lukə 19.11-27 ) 14 Jesus yɛ diɛ: «Yálá-taa tɔɔlaa kaa lɔ nwɔ̨nɔ̨ pai kɛi yɛ, hulɔnu ta yii kɛi li hiɛ ɓa. Ə nwɔ tínuą haaɓai təli ə gɛ yiliɠaai di di ɲɛ̨i kɛ ɲəi hɛn gɔwɠaa diɛ. 15 Ə wali kwələ lɔɔli həɠə ə dɛɛ dɔlɔɔ pɔ, ə hveelɛ həɠə ə dɛɛ veelɛ nąn pɔ, ə li ə tɔ̨nɔ̨n həɠə ə dɛɛ ɉaaɓa nąn pɔ. Ə dɛɛ di pɔ yɛ pələi di wɔ hvaŋą lɔ laa kaa la. Yili pulu ə li hiɛ ɓa. 16 Nui ŋɛ̨i di nwali kwələ lɔɔli tɛɛ bɔ, ə li ə nɔɔli kwɛli ə bɛlɛ ma. 17 Nui tii veelɛ hɔlɔɓo, ə li ə veelɛ kwɛli ə bɛlɛ veelɛi tii ɓa. 18 Kɛlaa, nui ŋɛ̨i tɔ̨nɔ̨ gbən-gbən hɔlɔɓo, ə li ə lɔwa tee ə nwɔ mɛ̨nį nąmu nwɔ wali tɔ̨nɔ̨i tii loo ɉu. 19 «Hvóló tamąą tɛɛ pulu, góló nąmu ə həɠə ɉiɛ ɓa ə pa, yɛ diɛ: ‹Nu kəlee ə pa ə gwɛlan mo.› 20 «Nui tii lɔɔli hɔlɔɓo, ə pa a wali kwələ pow, yɛ nąmu ɓa: ‹Námu, wali kwələ lɔɔli ɓə hiɛ ə́ dɛɛ bɔ́ ə́ lii lɔwai, kɛlaa, ŋą́ą́ kólo kɛ ɉu, ŋą́ą́ nɔɔli hɔlɔɓo ŋą́ą́ bɛlɛ ma.› 21 «Nąmu yɛ mą: ‹Yaa gɛ a nəlɛɛ, kólo kɛmun dəlimoɔ ɓaa yɛ́. Yaa tələnmolaa kɛ mɛ̨nį logolo hu, gáá pai gáá pai ə́ heei mɛ̨nį kɛnɛ̨ɛ̨ nwun na. Pa ə́ hee gwɛ́lɛ kwəinɛ̨ɛ̨ hu.› 22 «Yili pulu, nui ŋɛ̨i nwali kwələ hveelɛ hɔlɔɓoi, yaa kpɛli ə pa yɛ di nąmu ɓa: ‹Ną́mu, wali kwələ hveelɛ ɓə hiɛ ə dɛ bɔ́ yɛ li. Kɛlaa, ŋą́ą́ kólo kɛ ɉu ŋą́ą́ veelɛ hɔlɔbo ŋą́ą́ bɛlɛ ma, ya ka.› 23 «Nąmu yɛ mą: ‹Yaa gɛ a nəlɛɛ, kólo kɛmun dəlimoɔ ɓaa yɛ́. Yaa tələnmolaa kɛ mɛ̨nį logolo hu gáá pai gáá pai ə́ heei mɛ̨nį kɛnɛ̨ɛ̨ nwun na; pa ə́ hee gwɛ́lɛ kwəinɛ̨ɛ̨ hu.› 24 «Yili pulu, nui ŋɛ̨i nwali kwələ tɔ̨nɔ̨ hɔlɔɓoi, yaa kpɛli ə pa yɛ nąmu ɓa: ‹Ną́mu ŋą ə́ kɔ́lɔn a nui gili wala-walaa, nwɔ mɛ̨nį wala-walaa, ɓɛi hvó kɛɛhi li laa, nąą ɓə yá mɔ̨nun dee laa, ɓɛi hvó mɔ̨nun dan ni laa, nąą ɓə yá mɔ̨nun giɲɛ̨ kələ laa. 25 Ya ɓə gɛ ŋį́ ɲɔ̨w, ŋą li a yɛ wali tɔ̨nɔ̨i tii, ŋį́ lɔwa tee ŋį́ now ɉu. Yili ɓai tii, yɛ wali tɔ̨nɔ̨ kpɔ ka.› 26 «Nąmu ə nwoo ŋąąpənə yɛ mą: ‹Kólo kɛmun hɔn ɲɔ̨nwɔ̨ɔ̨ ɓaa a yɛ́, ə́ gɔlɔn gbɔ kɛ yɛ́ diɛ ɓɛi və́ tii kɛli laa, nąą ɓə ŋą mɔ̨nun dee la, ɓɛi və́ mɔ̨nun dan ni laa, nąą ɓə ŋą mɔ̨nun giɲɛ̨ kələ laa. 27 Mąąnɛ̨ɛ̨ kani kɛ ə́ nwɔ́ wali tɔ̨nɔ̨i ŋɛ̨i tɛɛ kɛ tɔ̨nɔ̨ kwɛli mun da pɔ, ə gɛ, ə da kwɛli kɛ ə bɛlɛ ma, ŋą pənə ŋį́ tɔ̨nɔ̨ hɔlɔɓo ma.› 28 Nąmu ə mo kɛa yɛ diɛ: ‹Ka nwali tɔ̨nɔ̨i tii kulɔ ɲəi ka dɛɛ nui tii nwali kwələ pow kaa ɲəi bɔ. 29 Mąąhɔlɔɓo, nui da kaa ɲəi, da pɛlɛ mą, ə gɛ, ə kɛnɛ̨ ɲəi. Kɛlaa, nui da hvo ɲəi, yii woloi gaa ɲəi da ɉəɠə ɲəi. 30 Yii ɓaa góló kɛmun viɲąą tii nwɛi, 'ka ɉon ka bili ɲɛnɛ̨ɛ̨ pələ ɓɛi wɔlɔ da ɲį́n ɲąą mįi di kaa laai.›» Kítí kpəli teei lɔwai 31 «Ɓɛlɔwai Nu Lon gaa pai pai la, nwɔ tɔɔlaai hu, da malakaɠaa kəlee, gaa pai heei nwɔ tɔɔ kpəlin mąąwiaa hu; 32 yɛnɛ̨ɛ̨ nuą kəlee di kaa pai di ɲąąkpɔn ɉii nií la, a di ɓɛlaɓo ɉu a kpulu heei hveelɛ yɛ pələi taa-təlɛɛ nąmu a ɓooliɠaa da ɓɛlaaɠaa di ɓɛlaɓo la. 33 A mɛlaaɠaa tɛɛ ma-mii yee hu pələ, ə mooliɠaa tɛɛ gɔɓɛyee hu pələ. 34 Nąąlɔwai, tɔɔmun a mo mamįiyee hu nuą diɛ yɛ diɛ: ‹Kaa yiiɠaai a Ną́n nwɔ lúwɔ́ lonnii, ka pa ka lɔ nwɔ tɔɔlaai hu, ɓɛi aa kɛ nąą pɛli ka mąą mɛ̨nį ɓa gɛɛ yɛnɛ̨ɛ̨ kɔ́wɔ hvo tɔɔ. 35 Mąąhɔlɔɓo, pulu ə kɛ mą́ą́, ka gɔ́ a kɔ̨nɔ̨n. Kpələ wɛli ə kɛ mą́ą́, ka yalaɠi tɛɛ bɔ́. Ŋą kulɔ kaa a nweą, ka nweə̨ laa kɛ. 36 Mą́ą́ haɠaai kɛ, ka həɠə kɛ mą́ą́. Ɲɔ̨n ə kɛ mą́ą́, ka mą́ą́ kɔ́nwɔ̨. Ŋį́ kɛ gaho ŋą, kaa pa kaa ka woo pili mą́ą́.› 37 «Nąąlɔwai, nuą tii da mo kɛa ma, diɛ mą: ‹Námu, mįnɛ̨ lɔwai ɓə ku ə́ kaa la, pulu yɛ ɓo yɛ́, kuɔ ə́ kɔ́ a kɔ̨nɔ̨n? Mįnɛ̨ lɔwai ɓə kpələ wɛli ə kɛ la yɛ́, kuɔ ya laɠi tɛɛ la ə́ pɔ? 38 Mįnɛ̨ lɔwai ɓə ə́ kulɔ la kuɔ a nweą kuɔ ə́ nweą laa kɛ? Mįnɛ̨ lɔwai ɓə ə́ mąą haɠaa kɛ la kuɔ həɠə kɛ yɛ́? 39 Mįnɛ̨ lɔwai ɓə ə́ kɛ la gaho ŋą kuɔ ku woo pili yɛ́? Mįnɛ̨ lɔwai ɓə ə́ kɛi ɲɔ̨n gɛ la kuɔ ə́ mąąkɔ̨nwɔ̨.› 40 «Tɔɔmun a mo kɛa diɛ yɛ diɛ: ‹Gáá moi kaa a tɛ̨ą, ɓɛlɔwai lɔpee ka kɛi mɛ̨nįɠaa tii ta kɛ la nwɔ́ lɛapɛlɛɛɠaa ŋɛ̨i ta ɓai, ɲą́ą́ ka tii ka kɛi gɛ mą́ą́.› 41 «Yili pulu, tɔɔmun a mo gɔɓɛyee hu nuą diɛ yɛ diɛ: ‹Ka ka mąąkwɛa mą́ą́, kaa yiɠaai ka nɛ̨ŋɛ̨n naa Yálá yəi, ka li nwɔ̨n yii luwun və mą ɉu. Yii bɛliɛ kɛ nąnį da nwɔ ɲį́nɛ̨nŋąai diɛ. 42 Mąąhɔlɔɓo, ka ɲɛ̨i walawalaai, pulu ə kɛ mą́ą́ ka hvo gɔ́ a kɔ̨nɔ̨n. Kpələ wɛli ə kɛ mą́ą́ ka hvo yalaɠi tɛɛ bɔ́. 43 Ŋį́ kulɔ kaa a nweą, ka hvo nwéą laa kɛ. Mą́ą́ haɠaai kɛ, ka hvo həɠə kɛ mą́ą́. Ɲɔn ə kɛ mą́ą́, ka hvo mą́ą́ kɔ́nwɔ̨. Ŋą́ kɛ gaho ɲą, ka hvo ka woo pili mą́ą́.› 44 «Nąąlɔwai diɛ kpɛli da nwoo ŋąąpənə diɛ mą: ‹Námu mįnɛ̨ lɔwai ɓə ku ə́ kaa la pulu ə ɓo yɛ́, ku hvo ə́ kɔ́ a kɔ̨nɔ̨n? Kpələ wɛli ə ɓo yɛ́ ku hvo yalaɠi tɛɛ ə́ pɔ? Ə́ kulɔ la kuɔ a nweą, ku hvo ə́ nweą laa kɛ? Ə́ mąą haɠaa, ku hvo həɠə kɛ yɛ́? A wala kɛ tii, ə́ ɓo gaho ŋą, ku hvo ku woo pili yɛ́?› 45 «Tɔɔmun a mo kɛa yɛ diɛ: ‹Gáá tɛ̨ą ɓoi kaa, ɓɛlɔwai ka kɛi nwɔ́ lɛapɛlɛɛɠaa ŋɛ̨i ta kaa la mɛ̨nįɠaa ŋɛ̨i ta hu, ka hvo mąąkpɔn mąąɓo, ɲą́ą́ ka tii ka gwəiɲɔ̨n tii kulɔ mą́ą́.› 46 «Yili pulu yiliɠaa da li laa nɔ̨nwɔ̨ hu yii kpɛɛ hvo mą, kɛlaa, təli monuą da li yɛnɛ̨ɛ̨ hu yii kpɛɛ hvo mą ɉu.» |