Maafîu 23 - Yálá laawoo hɛɓɛ (dc)

Jesus ə nuą liɛwoo ɓo mąąkwɛli kɛ nuą da Farisiɛ̨ɠaa di mąą mɛ̨nį ɓa

¹ Yili pulu, Jesus ə ɲɛ̨i tinɛ̨n nu kpului tii pɔ da nwɔ kalan nɛai. Yɛ diɛ:

² «Tɔ́n galamɔ̨ɔ̨ɠaa da Farisiɛ̨ɠaa ɓə da Moisə nwɔ tɔ́n hukulɔ kaa.

³ Mąąnɛ̨ɛ̨ ka di woo hon, kɛlaa, ka hvo túwɔ́ yɛ diɛ. Mąąhɔlɔɓo, yii da nuą kalan na, di hva bɔ mɛ̨nį kɛ.

⁴ Da tiɛ̨ wiɛ pɛli, di ɉee nuą nwuɔ̨, di hva di laa hon gbɛli tiikpə.

⁵ Da di kɛ mɛ̨nįɠaa kɛ nuą ɲɛ̨i ɓa, ə gɛ di di kaa. Ka di tɔwɔla kaa, Yálá nwɔ tɔ́n taɠaa pɛ̨ɛ̨ kaa huwɔ kɔ́lɔ hu, a mɛla ɲa kɛnɛ̨ bəlɛɛ di tɔwɔla. Daɠaa yiliɛɛ di yee ɓa. Ɲalai da dɔɔ di wɔ həɠəɠaai mu, gaa a mɛla ŋą kɛnɛ̨.

⁶ Da di təli kwəinɛ̨ɛ̨ kɛɛnąą. Laa mįi mɛ̨nį ɓa, da kɛ bɔ di hee tɔwɔ pələ nu kpɛa-kpɛaɠaa heei; da lɔ di wɔ Yálá hvɛli pɛlɛ́ɠaa mu, tɔwɔ pələ lɔ ɓə da gwɛli di hee la.

⁷ Di kaa bɔ, nu ta a kɛi di túwɔ ɓo kpɔn ɉu, ə mąą yee di kɔ́wɔ mu; yɛ kɛ diɛ: ‹Nwɔ́ mɛ̨nį nąmu!› Ə gɛ nuą di di mąąwiɛ kili kɔ́lɔn.

⁸ Ka wɛi, mąą hvo nɛ̨ɛ̨li, kaa kɛ ka kee ɓa: ‹Nwɔ́ mɛ̨nį nąmu›, kɛlaa, ka kɛ ka kee ɓa: ‹Gááyɔwɔ.› Mąąhɔlɔɓo, mɛ̨nį nąmu tɔ̨nɔ̨ gbən mə gaa ka nwun mɛ̨i.

⁹ Ka hvo kɛ nui lɔpee ta ɓa: ‹Nán›, ɓɛ lɔi mɛ̨i. Mąąhɔlɔɓo, Nąn dɔ̨nɔ̨ gbən mə gaa kaa yəi yələkɔlɔn ɉu.

¹⁰ Ka hvo kɛ ka kee ni diɛ: ‹Nwún nąmu›, mąąhɔlɔɓo, Nwun nąmu tɔ̨nɔ̨ gbən mə gaa kaa, ya ɓaa: a Nwun mąąɓomun Yálá ə naakwɛlanmo.

¹¹ Nui gaa a nu kɛnɛ̨ ka lɔwai, mąąnɛ̨ɛ̨ ə kɛ a ka wɔ kólo kɛmun.

¹² Nui a gbɔwɔ ɲąą kɛnɛ̨, Yálá a tinąą mąą yɛɛ, nui a gbɔwɔ mąą yɛɛ, Yálá a tinąą gɛnɛ̨ ə dɛ tɔwɔ.»

Jesus ə haŋą Farisiɛ̨ɠaa da tɔ́n mąąkwɛli kɛ nuą diɛ

¹³ «Tɔ́n galamɔ̨ɔ̨ɠaa ka Farisiɛ̨ɠaa, ka tɛ ɲɛ̨i mɛ̨nį kɛ nuą ŋɛ̨i, kpalo kaa ka tɔwɔ! Mąąhɔlɔɓo, kaa Yálá-taa pələ too, kaa kpəɲan bələi. Ka hvo lɔi, ə lɛɛ, ka hvo nɛɛi laa, nuąi naa wɛli kaa diɛ, di hvo lɔ.

¹⁴ «Tɔ́n galamɔ̨ɔ̨ɠaa ka Farisiɛ̨ɠaa, ka tɛ ɲɛ̨i mɛ̨nį kɛ nuą ŋɛ̨i, kpalo kaa ka tɔwɔ! Mąąhɔlɔɓo, ka kɛ tooi kalanin nɛ̨ąą mɛ̨i, kaa hɛn gulɔ di yəi, kaa lamu Yálá hvɛliɛ hu, ə gɛ, nuą di ka káá a nu haɉaaɠaa. Yili ɓə gaa mą, ka wɔ kitii kaa pai walawalai kpɔ kɛnɛ̨.

¹⁵ «Tɔ́n galamɔ̨ɔ̨ɠaa ka Farisiɛ̨ɠaa, ka tɛ ɲɛ̨i mɛ̨nį kɛ nuą ŋɛ̨i, kpalo kaa ka tɔwɔ! Mąąhɔlɔɓo, ka hiɛ lɔi mɛ̨i nąą kəlee da gboloyá ŋą nąą kəlee, ə gɛ, ka nu tɔ̨nɔ̨ hɔlɔɓo ə kɛ a ka wɔ kalan non. Ka ɉɔlɔɓo, ka galan ə kɛ nui da tinąą bili ɉahanąmą nwɔ̨n ɉu, nwɔ mɔ̨nɔ̨i ə kɛnɛ̨ a ɉeei hveelɛ, ə tɛɛ ka wɛi ɓa.

¹⁶ «Kpalo ɓɛlai kaa, kaa yiiɠaai ka ɲɛ̨i puɔ, kaa ɲɛ̨i pu nuą di wɔ tunwɔ̨n ɉon! Mąąhɔlɔɓo, ka kɛ nuą diɛ: ‹Nu a gwɛla a Yálá hee pɛlɛ́, yili hvo ɓaa a mɛ̨nį ta, gwɛla a həɠə mą. Kɛlaa, nu a gwɛla a Yálá hee pɛlɛ́ mu hɛni ta, yili walawalaai kpɔ kɛnɛ̨, ə lɛɛ gwɛla yili, hvo kɛli ə bɔ mɛ̨nį kɛ.›

¹⁷ Éé! Ka hva mɛ̨nį ɲąą kaa, ka ɲɛ̨i puɔ. Akɛti, ɉɛn veelɛi tii nɛlɛ ɓə gɛnɛ̨, Yálá hee pɛlɛ́, ɓaa mu hɛni? Yaan, Yálá hee pɛlɛ́ ɓə a gɛ mu hɛni mąą yɛ wiɛ.

¹⁸ Ka kɛ nwɔ̨nɔ̨ kɛi diɛ: ‹Nu a gwɛla a ɉaláá kulɔi kəhi, mɛ̨nį walawala hvo li, gwɛla a pɛli həɠəi mą. Kɛlaa, nui a gwɛla a haláá hɛn yii gaa laa ni gəhi mɛ̨i, a kɛ tii mąą nui a gwɛla walawala ɓo, hvo kɛli ə bɔ mɛ̨nį kɛ.›

¹⁹ Ka ɲɛ̨i puɔi! Akɛti, ɉɛn veelɛ tii nɛlɛ ɓə mąąwiaa, gəhi mə, a wala kɛ tii ɉaláá hɛn? Kɛlɛi, gəhi ɓə a ɉaláá hɛn mąąwiɛ ee!

²⁰ Nui a gwɛla a haláá kulɔ kəhi, a kɛ tii a gwɛla a gəhi da ɉaláá hɛn yii gaa laa ni mɛ̨i.

²¹ Nui a gwɛla a Yálá hee pɛlɛ́, a kɛ tii a gwɛla a bɛlɛi tii da Nąmu.

²² Nui a gwɛla a yələkɔlɔn, a kɛ tii a gwɛla a Yálá nwɔ tɔɔ kpɛlin da Yálá yii gaa heeni ɉu.

²³ «Tɔ́n galamɔ̨ɔ̨ɠaa ka Farisiɛ̨ɠaa, ka tɛ ɲɛ̨i mɛ̨nį kɛ nuą ŋɛ̨i, kpalo ɓɛlaai kaa! Mąąhɔlɔɓo, ka ka hɔlɔɓo hɛn bow nąn tɛɛ Yálá pɔ, ə mą kɛ ka yəi ɲɛa nɔwɠaa kəlee. Kɛlaa, ka dɔ́n yiiɠaai lɛɛ laa, yɛ pələi: tələnmolaa, túwɔ́ pələ lɛlɛ da woo tɔ̨nɔ̨ nąmu laa kaa la. Mąąnɛ̨ɛ̨i kɛ kaa kɛi yiiɠaa tii kɛ, ka hvo gbəliɠaa ŋɛ̨i lɛɛ pulu.

²⁴ Ka kɛ ka nuą tənən dɔɔ ka ɲɛ̨ipuɔ! Ka ka kpələ-yá hukpɛ kaa hįįlon bowa kulɔ ɉu, kaa ɲinɛ̨ powa lɛɛ ɉu kaa gbələ.

²⁵ «Tɔ́n galamɔ̨ɔ̨ɠaa ka Farisiɛ̨ɠaa, kpalo ɓɛlaai kaa! Mąąhɔlɔɓo, ka kpələ kɔ́wɔ da gəgənŋąa pulu pələ waa, kɛlaa, ɉu pələ laa hveelɛ a nwuɔ̨ hɛnŋąa da ka wɔ túwɔ́ pələ ɲɔ̨n giliŋąhiɛɠaa.

²⁶ Farisiɛ̨ɠaa ka ɲɛ̨ipuɔi! Ka gbɛa nii gbələ kɔ́wɔ da gəgən ɉu pələ waa, a kɛ tii, gɔlɔ ɓa a pɛli lɛlɛ.

²⁷ «Tɔ́n galamɔ̨ɔ̨ɠaa ka Farisiɛ̨ɠaa, kpalo ɓɛlaai kaa. Mąąhɔlɔɓo, ka káá yɛ kámą yii da mɛ̨i pələ kwələ, ya gaa yɛ ɉu pələ a kɛ a nəlɛɛ. A mɛ̨nį gɛ, nu kɔ́w lɔ ɓə puuni ɉu.

²⁸ Pələ kpɔlɔ ɓə ka káá la. Ka ka kpɔɔ lɛ nuą diɛ, a nu haŋąąɠaa a mɛ̨nį gɛ, tɛ ɲɛ̨i mɛ̨nį kɛ laa da mɛ̨nį ɲɔ̨n giliŋąhiɛ lɔ ɓə gaa kaa.»

Jesus ə gaho mɛ̨nį ɓo

²⁹ «Tɔ́n galamɔ̨ɔ̨ɠaa ka Farisiɛ̨ɠaa, ka tɛ ɲɛ̨i mɛ̨nį kɛ nuą ŋɛ̨i, kpalo ɓɛlaai kaa. Mąąhɔlɔɓo, ka Yálá kwəi mɛ̨nį hukulɔ nuą pɔlɔɠaai da tələnmo nuą kámą pɛli a nəlɛɛ.

³⁰ A kɛ tii kɛa kaa kɛ mą: ‹Akɛ kɛ ku wɔlɔ kɛ ku nąnni di wɔ hvólói hu, ku hvə li too di pɔ, ku hvo Yálá kwəi mɛ̨nį hukulɔ nuąi paa.›

³¹ Ka káá ka kpɔ mąą tɛ̨ą ɓoi, ka gɔlɔn gbɔ kaa, ka káá a Yálá kwəi mɛ̨nį hukulɔ nuąi paa nuą lonnii.

³² Akɛti, ka ka nąnni túwɔ́ pələ ɲɔ̨n tii laa kulɔ lɔ.

³³ Kaa yii ka wɔ mɛ̨nį ɲɔ̨nwɔ̨ɔ̨ ŋɛ̨i yɛ tumo, ka pɛli kulɔ pələ kɛi ləi ɉahanąmą gaho nwɔ̨n ɉu?

³⁴ Yili ɓə gaa mą ka ka wəli tɔɔ a nəlɛɛ. Gáá Yálá kwəi mɛ̨nį hukulɔ nuą tɛɛi kaa, ə mą kɛ, mɛ̨nį kɔ́lɔn nuą da tɔ́n galamɔ̨ɔ̨ɠaa. Ka káá pai daɠaa kpanwoi kolɔwa ɓa, kaa daɠaa kɛlɛ ka wɔ Yálá hvɛli pɛlɛ́ɠaa mu a hvaɠa, kaa hvilɛn daɠaa pulu, kaa di kpɛ daa kpɛa-kpɛaɠaa hu.

³⁵ Ya ɓə a gɛ, nu haŋąąɠaai daa di ɲąmą pu ɓɛ nɔi ŋɛ̨i ɓa, ə həɠə nu tɔlɔɔ Abɛlə ɓa ə həli la Barasi lon ɉulɔnu Zakari ɓa yai kɛ a nu gbɛli, yii ka baa ɉaláá kulɔ kəhi da Yálá hee pɛlɛ́ di lɔwai, di ɲąmą wulu a lɛɛ ka nwuɔ̨.

³⁶ Gáá moi kaa a tɛ̨ą, nuąɠaa tii ɲąmą wulu kaa pai lɛɛi háákələi nuą nwuɔ̨.»

Jesus ə nwoo laa Ɉerusalɛmə taa mąą mɛ̨nį ɓa

³⁷ «Ɉerusalɛmə taa! Oo Ɉerusalɛmə, yɛ́i yá Yálá kwəi mɛ̨nį hukulɔ nuą paa, yiiɠaai Yálá a di tɔɔ ə́ pɔ, yɛ́ di hɔɔ a kwɛni diɛ. Ŋą́ kɛ bɔ ŋį́ ə́ lonnii kəlee ŋąąkpɔn yɛ pələi tɛ́ɛ́ kɔ́nwɔ̨lee a nonnii kəlee ŋąąkpɔn na goon mu.

³⁸ Yili ɓə gaa mą, ka wɔ pɛlɛ́i lɛɛ kpɔ ka tii gbɔwɔ ɓa.

³⁹ Gáá moi kaa a tɛ̨ą, ə həɠə yiihu ɓa, ka hvo kɛa pai gáái, ə lɛɛ la ɉu, hvo kɛli ɓɛlɔwai ka káá pai kɛi la ma: ‹Nui ŋɛ̨i pai Ną́mu laa hu, lúwɔ́ ə kɛ mą.›»