Maafîu 22 - Yálá laawoo hɛɓɛ (dc)

Jesus ə húlu lɔ kwəinɛ̨ɛ̨ mąą haɉon Ɉoo

¹ Jesus ə haɉonɉaa hɔɔ nwɔ̨nɔ̨ nwoo mɛ̨n nuą diɛ, yɛ diɛ:

² «Yálá-taa tɔɔlaa kɛ pələ kaa yɛ, tɔɔmun da yii ə non ɉulɔnu nwɔ húlu lɔ kɔ̨nɔ̨n gɛ pələ pɛli.

³ Ə mo nwɔ tínuą diɛ, yɛ diɛ: ‹Ka li ka mo mɛlaa diɛ di pa ku ku laa mįi, mąąhɔlɔɓo, ɉáá ɉɛnɉaa kəlee kɛ pələ pɛli.› Kɛlaa, nuą ə di təli, di hvo gɛ di hvo pa.

⁴ «Ə pənə ə nwɔ tínuą takpɛliɠaa tɔɔ, yɛ diɛ: ‹Ka li nuą tii ŋą́ di təli kaa diɛ: «Niɉɛ gbɔnɉaai ŋą́ di paa gəlee daa mɔ. Di pa kɛa ku ku kwəinɛ̨ɛ̨ nón nwɔ húlu lɔ hɛlii hu.»›

⁵ «Kɛlaa, nuąi tii di di təli, di hvo kpɛli di təli mɛ̨nį kaa a mɛ̨nį walawala, di kəlee di kɛi li di liiɓa kɛɛnąąɠaa ɓa: daɠaa diɛ li di yəi ɲɛa, daɠaa diɛ li lɔwɔ́tɔɔ ɓa.

⁶ Daɠaa dinuą tii hon di di paa.

⁷ «Dɔɔmun tii líí ə holi ə nwɔ holahiɠaa tɔɔ, ə gə, də li nuą tii dinuą paa, di yiliɠaai paa, ə lɛɛ, di nwɔ̨n nɔ di wɔ taa hu naa ə kələn.

⁸ Tɔɔmun ə mo nwɔ tínuą diɛ, yɛ diɛ: ‹Vúlu lɔ kɔ̨nɔ̨n aa mɔ; kɛlaa, nuąi kɛ mąąnɛ̨ɛ̨ di mįi di hva kpɔ kɛa da mįi.

⁹ Yili ɓə gaa mą, ka tɛɛ bələ leeɠaa hu, gwəliɠaa lɔwai nui lɔpee ka gaa, ka mo mą ə pa.›

¹⁰ «Diɓo kɛ nuą di hɛgɛ də li gwəliɠaa lɔwai, nuą lɔpee di kɛi di kaa, nu lɛlɛɛ ma ə mą kɛ nu ɲɔ̨nwɔ, di kɛi di təli tɔɔmun nwɔ hɛli hu. Gəlee di pa di bɛlɛ́ laa hvɛɛ.

¹¹ «Tɔɔmun ə lɔ yɛ nuąɠaa kaa, ə nu tɔ̨nɔ̨ kaa di lɔwai yii ɉɛli həɠə ta hvo kɛ gwąną.

¹² Ə mo yili ɓa yɛ mą: ‹Náwɛi, ə́ gɛ pələ kɛ ləi yɛ́ lɔ ɓɛ yaan ɉɛli həɠə ta hvo ə́ kwaną?› Kɛlaa, nui tii hvo hvaa.

¹³ «Tɔɔmun ə mo nwɔ tínuą diɛ, yɛ diɛ: ‹Ka nui ŋɛ̨i yee laa bulu, ka ɲili, ka gɔwɔ kwaną yili, ka bili ɲɛnɛ̨ɛ̨ gbinį hu ɓɛi wɔ́lɔ́ da ɲį́n ɲa mįi di kaa laa.›»

¹⁴ Jesus ə mo kɛa diɛ, yɛ diɛ: «Nu tamąą təliɛi, kɛlaa, dɛitɛi ɓə ɲɛɠɛɛ ɉu.»

Nįįhɔ̨nwɔ̨ kulɔ mɛ̨nį Sesarə ɓa

¹⁵ Farisiɛ̨ɠaa dɛ li di di nwun dɔɔ a pələi kpɔ da tɛɛ la di Jesus hon vaa woo hu.

¹⁶ Yili pulu, di di wɔ kalan nɛai taɠaa tɔɔ da Herodə yee pɔ nuą taɠaa, ə gɛ, di pa di Jesus mąąni kɛ, diɛ mą: «Mąąkwɛli kɛmun, ku gɔlɔn kuɔ ya tɛ̨ą ɓo, yɛ́ nuą kalan a Yálá liiɓa tɛ̨ą pələ mɛ̨i, hvá ɲɔ̨w nuą di wɔ kiliŋąhiɛ ɓa. Mąąhɔlɔɓo, mɛ̨nį yii nuą da gaa a mɛ̨nį walawala, hvá gaa a mɛ̨nį walawala.

¹⁷ Akɛti, gu wɔ tɔ́n a hvaa mą gu nįįhɔ̨nwɔ̨ kulɔ Sesarə ɓa, yii gaa a guɔ lɔi nwun nąmu? Ku ka bɔ ə́ ku kilaa pono yili hu.»

¹⁸ Kɛlaa, Jesus ə di wɔ gbanalaa tii kaa, ə mo diɛ, yɛ diɛ: «Ka tɛ ɲɛ̨i mɛ̨nį kɛ nuą ŋɛ̨i, lə mɛ̨nį ɓa ka káá gɛi a ɉáátɛ pələ?

¹⁹ Wali yii ka kɛ nįįhɔ̨nwɔ̨ kulɔi la ka paa la ŋą́ gaa.»

²⁰ Yili pulu, yɛ diɛ: «Nu nwun galən mąąnįnįn ŋɛ̨i da nu yee pɔɔ, ŋɛ̨i kaa a gbɛɛ ɉɔɔ?»

²¹ Nuą di nwoo ŋąąpənə diɛ mą: «Sesarə ɓə!» Jesus yɛ diɛ: «A kɛ tii, ka Sesarə nwɛi tɛɛ Sesarə pɔ, ka Yálá nwɛi tɛɛ Yálá pɔ.»

²² Yii kɛa Jesus ə di woo ŋąąpənə tii, di Jesus lɛɛ laa, diɛ li.

Mąąlən gɛ yii Sadusiɛ̨ɠaa di gɛ yɛ hvilɛn na haaɓɛlaa muhəɠə mɛ̨nį ɓa

²³ Voló tɔ̨nɔ̨i tii hu lɔ, nuą yiiɠaai da kɛ diɛ Sadusiɛ̨ɠaa, diɛ di hvo kɛ laa li haaɓɛlaa muhəɠə mɛ̨nį la, di pa di Jesus mąąlən gɛ, diɛ mą:

²⁴ «Mąąkwɛli kɛmun, mɛ̨nį Moisə ə mo ya ka, ‹Akɛ nu ta a nɛ̨ą həɠə, ə nɛ̨ą lɛɛ ə haa, hvo lon gaa li mą, mąąnɛ̨ɛ̨ gaayɔwaa da ə nɛ̨ɛ̨nui tii həɠə a nɛ̨ą, ə gɛ, nui ŋɛ̨i haa, ə ɉuwu kulɔ.›

²⁵ Yaan, nąn kaa mɛ̨ihveelɛ kaa kɛ ɓɛ dɔlɔɔ ə nɛ̨ą həɠə, hvo lon gaa mą ə haa. Nɛ̨ɛ̨nu ə lɛɛ bulu ləɠə yəi.

²⁶ Yili kpɛli hvo lon gaa mą ə haa. Di lɛɛ yili hu tii ə lɛɛ la ɉu ɉinąą mɛ̨ihveelɛi tii gəlee di haa, da hvo lon gaa nɛ̨ɛ̨nui tii ɓa.

²⁷ Yili pulu nɛ̨ɛ̨nui tii ə haa yaa kpɛli.

²⁸ Akɛti, haaɓɛlaa muhəɠəi lɔwai, nɛ̨ɛ̨nui tii a kɛ a nu mɛ̨ihveelɛi tii nɛlɛ nɛ̨ą? Mąąhɔlɔɓo, nɛ̨ɛ̨nui tii ə hilɛtaai kɛ gəlee pɔ.»

²⁹ Jesus ə di woo ŋąąpənə yɛ diɛ: «Ka káá ka kpɔɔ ɓowoi, mąąhɔlɔɓo, ka hvo Yálá laawoo hɛɓɛ́ kɔ́lɔn, ə mą kɛ Yálá nwɔ huwalawala.

³⁰ Gáá moi kaa, haaɓɛlaa muhəɠəi lɔwai, hulɔnu hva nɛ̨ɛ̨nu mɛ̨nį ɓo, nɛ̨ɛ̨nu kpɛli mąn hva hulɔnu mɛ̨nį ɓo. Mąąhɔlɔɓo, nu kəlee da kɛ yɛ yələkɔlɔn ɉu malakaɠaa.

³¹ Yii ɓaa haaɓɛlaa muhəɠə mɛ̨nį ka hvo ta galan ni Yálá laawoo hɛɓɛ́ hu, Yálá yɛ kɛ diɛ:

³² ‹Gáá ɓaa a Abrahamə nwɔ Yálá, Isaakə nwɔ Yálá, da Ɉakɔbə nwɔ Yálá.›» Jesus yɛ diɛ: «Yálá kaa a nu huluɠaa di wɔ Yálá; hvo a haaɓɛlaa di wɔ Yálá.»

³³ Nuą kpɔ Jesus woo tii mɛ̨n, di kwəi ə pili diɛ.

Tɔ́n ɲii gɛnɛ̨

³⁴ Yii kɛa Farisiɛ̨ɠaa di gaa diɛ Jesus aa Sadusiɛ̨ɠaa laa kpala diɛ, di hvo pɛli mɛ̨nį ta ɓoi; di di mąą lɛɠɛ Jesus ɓa.

³⁵ Tɔ́n vili nąmu tɔ̨nɔ̨ ə kɛ bɔ ə ɉon vaa woo hu, ə mo mą yɛ mą:

³⁶ «Mąąkwɛli kɛmun, tɔ́n nɛlɛ ɓə gɛnɛ̨ dɛɛ tɔ́n gəlee ɓa?»

³⁷ Jesus yɛ mą: «‹Mąąnɛ̨ɛ̨ ə́ Ną́mu Yálá wɛli la kɛ a ə́ lii kəlee da ə́ kpinį kəlee ɛlɛɛ, da ə́ wɔ kiliŋąhiɛ kəlee.›

³⁸ Dɔ́n yili ɓə gɛnɛ̨ ɛlɛɛ, mąą mɛ̨nį walawala dɛɛ gəlee ɓa.

³⁹ Yii nwɔ̨nɔ̨ nɛɠɛɛ gwɛlɛ, ya ɓaa: ‹Ə́ nuą wɛli la kɛ, yɛ ə́ kpinįi.›

⁴⁰ Mɛ̨nį hveelɛi tii ɓə Moisə nwɔ tɔ́n da Yálá kwəi mɛ̨nį hukulɔ nuą da kɛ mąą mɛ̨nį kalan ɉi nuą diɛ.»

Mąąlən gɛ yii vilɛn ɉaai Davidə Lon ɓa

⁴¹ Farisiɛ̨ɠaa ɉaakpɔn ɉaai kɛ, Jesus ə di mąąlən gɛ, yɛ diɛ:

⁴² «Ka kɛ ka kiliɉaniɛ ləi Nwun mąąɓomun Yálá ə naakwɛlanmo mąą mɛ̨nį ɓa? Ka gaa, gaa a gbɛɛ huwu hu mun da?» Di nwoo ŋąąpənə diɛ mą: «Davidə lon ɉulɔnu li!»

⁴³ Jesus yɛ diɛ: «Ə kɛ pələ kɛ ləi, yai Davidə gili ŋą ponoi Yálá ə mo yɛ kɛ non ɉulɔnu ɓa ‹Námu›? Mąąhɔlɔɓo, ə kɛ mą:

⁴⁴ «‹Yálá ə mo nwun mąąɓomun yii ə mąą minə həɠə mą, yɛ mą: «Pa ə́ hee má-mɛɛ-yee hu, ə lɛɛ la ɉu ŋą́ ə́ yowoɠaa too ə́ kɔ́wɔ mu ə́ hiɛ di mɛ̨i.»›

⁴⁵ «Akɛ Davidə a kɛ Nwun mąąɓomun Yálá ə naakwɛlanmo mą, ‹Námu›, Nwun mąąɓomun Yálá ə naakwɛlanmo a pɛli kɛi ləi a Davidə huwu hu mun?»

⁴⁶ Di ta lɔpee hvo pɛli nwoo ŋąąpənəi. Ə həɠə ɲələ ɓa, nui lɔpee ta hvo kɛa giliŋąhiɛ Jesus mąąni kɛ mɛ̨nį ba.