Maafîu 21 - Yálá laawoo hɛɓɛ (dc)Jesus ə tɛ Ɉerusalɛmə ( Markə 11.1-11 ; Lukə 19.28-40 ; Ɉaan 12.12-19 ) 1 Ɓɛlɔwai Jesus da nwɔ kalan nɛai di kɛi həli la Ɉerusalɛmə, di tɛ taa lon da hu, yii da kɛ mą Bɛtfaze, Olivə yee koo mu. Jesus ə nwɔ kalan nɛai veelɛ tɔɔ taai yɛ diɛ: 2 «Ka li, daa ŋɛ̨i ka tɔwɔ ɉu, ka káá li hoohvaalən da kaai gbulɔnɉaa non nɛ ɓo gwɛlɛ, ka volón ka pa a diɛ bɔ́. 3 Nu ta a ka mąąlən gɛ, ka kɛ mą: ‹Námu mąąkpaan gaa mą.› Ə ŋąąɓa a ka lɛɛ laa ka paa la.» 4 Yili ə kɛ tii, ə gɛ, mɛ̨nį Yálá kwəi mɛ̨nį hukulɔ mun ə mo naa ə hon, yaa ə kɛ mą: 5 «Ka mo Siɔn nuą diɛ kaa diɛ: ‹Ka wɔ tɔɔmun nwɔ mɛ̨nį lɛlɛɛ kaa pai ka pɔ, ɉeɛ hoohvaalən non mɛ̨i.›» 6 Galan nɛai tii də li, pələi tii Jesus ə mo la diɛ di gɛ kpɔlɔɔ tii. 7 Di pa a di pa a nwɛlɛhoo lon da nee. Di di mąą həɠəɠaa kulɔ diɛ di bu nwɛlɛhoo hveelɛi tii pulu, Jesus ə tɛ ə hee dɔ̨nɔ̨ mɛ̨i. 8 Nu tamąą di di mąą həɠəɠaa pɛlɛ bələi nwɛlɛhoo tɔwɔ, daɠaa diɛ gwalalaa tee diɛ bɛlɛ bələi. 9 Nu kpului tii kɛ bulu pələ da dɔwɔ pələ di kɛi tómą diɛ kɛ mą: «Mąąwiɛ ə kɛ Davidə Lon ɓa. Nui ŋɛ̨i gaa pai Ną́mu laa hu, lúwɔ́ ə kɛ mą. Mąąwiɛ kaa Yálá ɓa yələkɔlɔn ɉu!» 10 Ɓɛlɔwai Jesus ə lɔ la Ɉerusalɛmə, daa kɛ pələ wiɛ-wiɛ, daai nuą kəlee di kɛi kɛ diɛ: «Nu lə kɛɛ ɓəi?» 11 Daɠaa diɛ kɛ mą: «Yálá kwəi mɛ̨nį hukulɔ mun ŋɛ̨i da kɛ mą Jesus yaa li, yaa ŋɛ̨i həɠə Nazarɛtə daai Galile lɔi hui.» Jesus ə lɔ Yálá hee pɛlɛ́ mu ( Markə 11.15-19 ; Lukə 19.45-48 ; Ɉaan 2.13-22 ) 12 Jesus ə lɔ Yálá hee pɛlɛ́ mu, ə lɔwɔ́tɔɔ nuą da wali mąąhvalin nuą kaa laa, ə haŋą diɛ ə di kpɛ. Ə nwali mąąhvalin nuą di wɔ taɓaliɠaai laapɛlɛ, ə donwələn nɔwɔtɔɔ nuą di wɔ kpəlinŋąai too. 13 Yili pulu yɛ diɛ: «Yálá ə mo nawoo hɛɓɛ́ hu yɛ mą: ‹Nwɔ́ pɛlɛi laa heɛi a Yálá hee pɛlɛ́.› Kɛlaa, ka wɛi kaa gɛ a nwuɔ̨ nuą hee pɛlɛ́!» 14 Ɲɛi pu nuą da kɔ́wɔ nwąną nuą di lɛɠɛ Jesus ɓa Yálá hee pɛlɛ́ mu ə di kɔ́lɔi pono. 15 Mɛ̨nįɠaa tii Jesus ə gɛ Yálá hee pɛlɛ́ mu da tomąi tii nɛapəlɛɛɠaa di kɛi mo, diɛ kɛ mą: «Mąąwiɛ kaa Davidə Lon ma!» Yili ə nwąną ɉaláá laa həli nuą nwun nąmįną da dɔ́n galamɔ̨ɔ̨ɠaa diɛ. 16 Diɛ Jesus ɓa: «Akɛti mɛ̨nį ŋɛ̨i di kaa moi ə kaa mɛ̨n ɉi?» Jesus ə di woo ŋąąpənə yɛ diɛ: «Gáá mɛ̨n ɉii.» Yili pulu yɛ diɛ: «Ka hvo nii galan ni Yálá laawoo hɛɓɛ́ hu diɛ kɛ mą: ‹Yaa gɛ kpɔ lɛapɛlɛɛɠaa da ɲįnį kpələ lonnii diɛ mąąwiɛ tɛɛ ə́ pɔ.›» 17 Yili pulu ə di lɛɛ laa ə pənə ə li Bɛtani daai ə yii laa. Jesus ə ɓɔɔlaa wulu ta nɛ̨ŋɛ̨n naa ( Markə 11.12-14 , 20-24 ) 18 Mąą yələ laa ɓoɔ, ɓɛlɔwai di kɛi tɛ Ɉerusalɛmə, pulu ə Jesus hon 19 Jesus ə ɓɔɔlaa wulu ta kaa bələ kwɛlɛ, ə lɛɠɛɛ mą, kɛlaa hvo mą kaa ɉu, naa lɔ ɓə kɛ ɲąąnɛ̨ɛ̨ mą. Ə nwului tii nɛ̨ŋɛ̨n naa yɛ mą: «Hva kpɔ kɛa ɓa tɔ̨nɔ̨ kpɛli!» Mɔɔlaa wului tii ə kpala kpɔlɔ tii ɲąąɓa. 20 Ɓɛli kaai galan nɛa di mo; di kwəi ə pili diɛ. Diɛ Jesus ɓa: «Ə kɛ pələ kɛ ləi yaai mɔɔlaa wului ŋɛ̨i a kpala kpɔlɔ tii ŋąąɓa?» 21 Jesus ə di woo ŋąąpənə yɛ diɛ: «Gáá moi kaa a tɛ̨ą: akɛ laa na laa a kɛ ka yəi da ɲį́nɛ̨n-ɲį́nɛ̨n a wala kɛ ka hui, mɛ̨nį ŋɛ̨i ɲą́ą́ gɛ a mɔɔlaa wului ŋɛ̨i ka pɛli ɲɔ̨nwɔ mąn gɛi. Ka pɛli kɛi ɲee ŋɛ̨i ɓa: ‹Həɠə ɓɛ ə pili gboloyá hu›, a pɛli ə gɛi. Ka pɛli kɛi ɲee ŋɛ̨i ɓa: ‹Həɠə ɓɛ ə pili gboloyá hu›, a pɛli ə gɛ. 22 Akɛ ka laa Yálá la, yii lɔpee ka vɛli mą a dɛɛ ka pɔ.» Ɓəi Jesus nwɔ huwalawala a həɠə laa? ( Markə 11.27-33 ; Lukə 20.1-8 ) 23 Jesus ə lɔ Yálá hee pɛlɛ́ mu yɛ nuą kalan. Ɉaláá laa həli nwun nąmįną da Ɉuifə hulɔgoloɠaa di lɛɠɛ Jesus ɓa diɛ mą: «Mɛ̨nįɠaa ŋɛ̨i ə́ kaa gɛi, gbɛɛ ɓə mąąlaa tɛɛ ə́ pɔ?» 24 Jesus ə mo diɛ yɛ diɛ: «Ɲą́ą́ gbɛli gáá ka woo ŋąąpənəi a kɛɛmąąlən, akɛ ka nwóó ŋąąpənəi, ɓɛi ŋį́ mɛ̨nįɠaa ŋɛ̨i kɛɛ nwɔ huwalawala a hɔlɔɓo laa ŋą naa lɛ kaa. 25 Akɛti, mąąwaai ŋɛ̨i Ɉaan ə kɛi gɛi, gbɛɛ ɓə dɔɔ la; nuą ɓə? Ɓaa Yálá ɓə?» Di mo di kee lɔwai diɛ kɛ mą: «Gwa kɛ mą Yálá ɓə», gaa pai kɛi diɛ: «Lə mɛ̨nį ɓa ka hvo laa li na?» 26 Akɛ nwɔ̨nɔ̨ gwa kɛ mą «Nuą ɓə», yaan hvo kɛli gwa ɲɔ̨w nuą diɛ. Mąąhɔlɔɓo, nu kəlee laai na diɛ Ɉaan ə kɛ a Yálá kwəi mɛ̨nį hukulɔ mun. 27 Di mo kɛa Jesus ɓa, diɛ mą: «Ku hvo gɔlɔn!» Jesus yaa kpɛli yɛ diɛ: «Akɛti nui mɛ̨nįɠaa ŋɛ̨i kɛ huwalawala tɛɛ bɔ́, vá naa ɓo kaa.» Lon ɉinąą hveelɛ mąą hanwon 28 Jesus ə kɛ nuą tii diɛ: «Gáá hanwon ɉɔi kaa. Hulɔnu ta ə kɛ laa, lon ɉinąą hveelɛ yɛ ɓo mą. Yɛ dɔ̨nɔ̨ ɓa: ‹Nón, li ə koló kɛ ɲəi ɉihɛn ɲɛa.› 29 Yili yɛ mą: ‹Və́ lii.› Kɛlɛ naa tawolo ə gɛ lɔ, ə nwɔ kiliŋąhiɛ mąąhvalin. Yili pulu ə həɠə yɛ li góló kɛi ɲɛa. 30 Ɉulɔnui tii ə non veelɛ nąą pɔɔli yɛ mą: ‹Nón li ə kólo kɛ ɉihɛn ɲɛa.› Yili yɛ mą: ‹Oowei! Ną́n, gáá li.› Kɛlaa hvo gɛ hvo li. 31 Akɛti, gáá ka mąąni kɛi; nɛapəlɛɛ hveelɛi tii, nɛlɛ ɓə nąn niiɓa kɛ?» Nuą tii di Jesus nwoo ŋąąpənə diɛ mą: «Nón dɔlɔɔ tii ɓə.» Jesus ə mo kɛa diɛ yɛ diɛ: «Gáá tɛ̨ą ɓoi kaa, niihɔ̨nwɔ̨ kulɔ nuą da wɛli hon nuą di kaa pai tɛi ka tɔwɔ Yálá-taa tɔɔlaa hu. 32 Mąąhɔlɔɓo, Ɉaan ə pa ə tɛ̨ą hu hiɛ ɓo pələ lɛ kaa, ka hvo laa na. Kɛlaa, niihɔ̨nwɔ̨ kulɔ nuą da wɛli hon nuą di laa na. Ka wɛi, pələi mąn ka mɛ̨nįɠaa tii kaa la, ka hvo ka túwɔ́ pələ ɲɔ̨nwɔ̨ɠaa mąąhvelən ni ka hvo laa na.» Kólo kɛ nuą hɔn ɲɔ̨nwɔ̨ɔ̨ ( Markə 12.1-13 ; Lukə 20.9-19 ) 33 Jesus ə mo diɛ yɛ diɛ: «Gáá hanwon da kpɛli hɔɔi kaa. Hulɔnu ta ə kɛ laa ə hihɛn ŋɛ̨i da kɛ mą viɲə, ə ɲɛa laa, ə mąąkwəli a hį́i ə viɲə ya kulɔi pɛli, ə pɛlɛ́ tɔɔ Ɉį́i ɲɛ. Ə viɲə yɛa həɠə ə dɛɛ nuą pɔ, ə gə di kólo kɛ ɉu, diɛ gulɔ. 34 Viɲə ɓai lɔwai, ɉulɔnui tii ə nwɔ kɛlaɠaa tɛɛ laa ə gɛ yii góló kɛ nuą daa gulɔ di nwɛi tɛɛ. 35 Kɛlaa, góló kɛ nuą di wóló gəlaɠaa diɛ, di dɔ̨nɔ̨ paa a kwɛli hɛn di dɔ̨nɔ̨ paa a kwɛni kpuwulu. 36 Ɉulɔnui tii ə pənə ə nu takpɛliɠaa tɛɛ, di tamąą, di tɛɛ dɔlɔɔɠaa diɛ, bələi tii di nu dɔlɔɔɠaa tii kɛ la, di nɛɛ buluɠaa kɛ lɔ tii. 37 Yili pulu, ɉulɔnui tii ə gbɔɔ-kpɔ lon dɛɛ, yɛ giliŋąhiɛ yɛ kɛ diɛ: ‹Gbəli hu, di kaa lii ɲɔ̨wi mą di mąąwiɛ mąąhɔlɔɓo, ɲą́ą́ nón ni.› 38 «Kɛlaa, yii lɔ di gaa yɛ pa, di mo di kee lɔwai diɛ kɛ mą: ‹Nui ɉihɛn gaa pai lɛɛ ɲəi a gwɛli hɛn ya ka. Ka gu baa, ɉihɛn ə lɛɛ ka gu yəi.› 39 «Góló kɛ nuą tii di Ɉon, di kulɔ la ɉihɛn ɲɛa pulu pələ di baa. 40 «Akɛti, ɉihɛn ɲeai tii nąmu a pa yaa kpinįi, lə ɓə a gɛ a nuą tii?» 41 Ɉaláá laa həli nwun nąmįną da tɔ́n galamɔ̨ɔ̨ɠaa di Jesus woo ŋąąpənə diɛ mą: «A góló kɛ nuą tii hon, ə gəlee paa kpɔ tɛ̨ɛ̨tɛ̨ɛ̨? Hva dɔ̨nɔ̨ kpɛli ɲɛ̨imąąwɛli kaa. Yili pulu a kólo kɛ nuą takpɛliɠaa həɠə ə di tɛɛ ɲəi ɉihɛn ɲɛa, yiiɠaai da pɛli gɛi ə nwɔ hihɛn dɔ̨nɔ̨ hɔlɔɓo ɓɛlɔwai gaa la bɔ.» 42 Yili pulu, Jesus ə mo diɛ yɛ diɛ: «Akɛti, mɛ̨nį Yálá laawoo hɛɓɛ́ ə mo ka hvo ta mɔ̨ɔ̨ yili kalan ni? Yaai ə kɛ mą: «‹Gwɛnii bɛlɛ́ tɔɔ nuą di lɛnɛ mą, ya ɓə kɛ a bɛlɛ́ tɔɔ kwɛni kpɔ-kpɔɔ. Yili ɓə Ną́mu Yálá ə gɛ, gaa gu ɲɛ̨i ɓa a kwəi pili mą mɛ̨nį.›» 43 Jesus ə mo nwɔ̨nɔ̨ diɛ, yɛ giə: «Gáá moi kaa, Yálá-taa tɔɔlaa kaa pai kulɔi ka yəi, ə tɛɛ nu takpɛliɠaa pɔ, yiiɠaai di túwɔ́ pələ a kɛ a bɛliɛ dɔɔlaai tii ɓa. 44 Nui a too gwɛni ŋɛ̨i mɛ̨i, a wólo, ə lɛɛ gwɛni ŋɛ̨i a too nu ta mɔ̨i a vunwɔ̨.» 45 Yii kɛa ɉaláá laa həli nwun nąmįną da Farisiɛ̨ɠaa di ɉanwon tii mɛ̨n, di gɔlɔn diɛ, diɛ ɓə Jesus ə kɛ diɛ. 46 Di kɛi Jesus hon bələ kwɛli mą. Kɛlaa, diɛ ɲɔ̨w nu kpulu ɓa, mąąhɔlɔɓo, yiliɠaa di kɛi Jesus kaa a Yálá kwəi mɛ̨nį hukulɔ mun. |