Maafîu 20 - Yálá laawoo hɛɓɛ (dc)Jesus ə Yálá-taa tɔɔlaa kɔ́ɔn kólo kɛ nuą diɛ 1 «Yálá-taa tɔɔlaa kaa yɛ; hulɔnu ta yii kólo ə kɛ ɲei. Ə kulɔ yələ wala pɔ yɛ kólo kɛ nuąa kwɛli, ə gɛ, ə di tɛɛ ɲei ɉihɛn ɲɛa. 2 Ɲələ walai tii hu, ə nuą hɔlɔɓo da diɛ ni di pɛli ɉu, yɛ diɛ: Gáá hvóló tɔ̨nɔ̨ wali tɛɛi ka pɔ a wali kwələ tɔ̨nɔ̨ nu tɔ̨nɔ̨. Ə di tɛɛ ɲei ɉihɛn ɲɛa. 3 «Ə pənə nwɔ̨nɔ̨ ə li gɛɛnąą tɔ̨nɔ̨i tii ɓa, ə nu takpɛliɠaa kaa laa tɔɔ ni, a kpɔn nii lɔwai, di hvo kɛi hɛn da kɛ. 4 Ə mo yiliɠaa diɛ yɛ diɛ: ‹Ka pa kaa kpɛli ka li ɲéi ɲɛa; yii bɛliɛi hvóló tɔ̨nɔ̨ hala ɓa, ŋį́ dɛɛ ka pɔ.› 5 Yiliɠaai də li. Yili pulu, ə li nwɔ̨nɔ̨ gɛɛnąą tɔ̨nɔ̨i tii ɓa, ə nu takpɛliɠaa kaa nwɔ̨nɔ̨ laa a kpɔn naamii lɔwai, ə mo lɔ nwɔ̨nɔ̨ yiliɠaai diɛ yɛ pələi kɛ ə mo la nu kpulu dɔlɔɔɠaa diɛ. Yili pulu, pɛlɛ kɔ́n nįnįn gulaa kɛa, ə gɛ lɔ nwɔ̨nɔ̨ tii. 6 «Hvóló laa kɛa kpɔlɔ ŋą, ə pənə nwɔ̨nɔ̨ ə li gɛɛnąą tɔ̨nɔ̨i tii ɓa, ə nu ta kpɛliɠaa kaa laa; yɛ diɛ: ‹Lə mɛ̨nį ɓa ka túwɔ háá ɓɛ, ka hvo hɛn da kɛi?› 7 «Di mo mą diɛ mą: ‹Mąąhɔlɔɓo, nu ta hvo kólo tɛɛ li ku pɔ.› Ə mo diɛ yɛ diɛ: ‹Ka li kaa kpɛli ka kólo kɛ ɲə́i ɲɛa, gaa pai ka halai.› 8 «Hvóló toɔ kɛa, góló nąmu ə mo nui kɛ góló nwun na ma, yɛ mą: ‹'Nuą muhəɠə kɛa, ə́ lɛɛ, ə́ nu kəlee hala tɛɛ bɔ, kɛlaa, gɔɠɔ tɔɔ nɛɛ pulu nuą diɛ.› 9 «Nuą kɛ pa a hvóló laa kpɔlɔ ŋą, di wali kwələ tɛitɛi tɛɛ di pɔ. 10 Nuą kɛ pa yələ wala pɔ, di kɛi di kiliŋąhiɛ diɛ kɛ: Di kaa pai di wɛi ta laai mɛ̨i, ə tɛɛ voló laa kpɔlɔ ŋą kólo kɛ nuą di wɛi ɓa, kɛlaa, diɛ kpɛli wali kwələ tɛitɛi lɔ ɓə di ɉɔlɔɓo. 11 Ɉɔlɔɓoi tii di mo tii, di kwəi hvo nɛ̨ɛ̨. Mɛ̨nįi tii góló nąmu ə gɛi, di gɔɠɔ tɔɔ kɛa diɛ ɉaa. 12 Diɛ kɛ mą: ‹Nuą lɔi ŋɛ̨i pa hvóló aa laa kpɔlɔ ŋą, di hvo kpɛli lamuli kólo kɛi ya ɓə ə hvóló tɔ̨nɔ̨ hala həɠə ə dɛɛ di pɔ yɛ kuɔi ŋɛ̨i háá kwaa tuwɔ kólo kɛi?› 13 Kɛlaa, góló nąmu ə mo dɔ̨nɔ̨ ɓa yɛ mą: ‹Náwəi! Və́ kɛ ə́ hulu li. Gu pɛli kɛ ɉu, gɛ yɛ́, ŋą hvóló tɔ̨nɔ̨ wali tɛɛ ə́ pɔ a wali kwələ tɔ̨nɔ̨, hvo kɛ tii? 14 Yii gaa a ə́ hala yaa li. Ɉon ə́ li. Nui ŋɛ̨i pa voló laai kpɔlɔ ŋą lɔwai, gáá bɔ, yii ŋį́ dɛɛ ə́ pɔ ŋą yili ɲɔ̨nwɔ̨man dɛɛ bɔ. 15 Akɛti, vá pɛli nííɓa kɛi mɔ̨ɔ̨ ɲə́i hɛn gɔw hu? Mɛ̨inɛ̨ɛ̨ ŋɛ̨i ŋį́ gɛ yili mąątóló ɓə ə́ kaa gulɔi?›» 16 Jesus kpɛɛ kɛa a mɛ̨nįɠaa tii ɓoɔ, ə nwoo ŋɛ̨i ɓo kɛa, ə naa mɛ̨i yɛ diɛ: dɔɔ dɔwɔɠaa kaa pai kɛi a nɛɛ bulu nuą, nɛɛ pulu nuą di kɛ a dɔɔ dɔwɔ nuą. Jesus haa mɛ̨nį da nwun mɛ̨nį ɓoi ɉaaɓa nąą ( Markə 10.32-34 ; Lukə 18.31-34 ) 17 Ɓɛlɔwai Jesus da nwɔ kalan nɛai di kɛi tɛ la Ɉerusalɛmə ə mo diɛ bələ pɔ yɛ diɛ: 18 «Gu kaa kɛa tɛi Ɉerusalɛmə; di kaa pai Nu Lon tɛŋɛ̨n gwɛlɛi ɉaláá laa həli nuą kpɛa-kpɛaɠaa diɛ, da dɔ́n galamɔ̨ɔ̨ɠaa. Di mąą ɲaba lɔ ə gɛ, di baa. 19 Nuąi di hvo Yálá kɔ́lɔn di kaa pai dɛɛi di pɔ, di yɛlɛ kulɔ ɉu, di gɛlɛ a hvaɠa di gbanwo kolɔwa ɓa ə haa. Voló haaɓa yələ, a nwun ə kulɔ haaɓɛlaa lɔwai.» Ɉakə da Ɉaan di lee ə mɛ̨nį ta hvɛli Jesus ɓa ( Markə 10.35-45 ) 20 Zebede lon ɉinąą hveelɛ di lee ə pa ə pɛlɛ Jesus kɔ́wɔ mu. Ə gɛ ə mɛ̨nį ta hvɛli ma nonnii hveelɛi mąą mɛ̨nį ɓa. 21 Jesus yɛ mą: «Lə ɓə ə́ kaa bɔ?» Nɛ̨ɛ̨nui tii yɛ mą: «Gáá bɔ ə́ ə́ woo kwɛlɛ mą́ą́ nónnii hinąą hveelɛi ŋɛ̨i mąą mɛ̨nį ɓa; ɓɛlɔwai ə́ kaa pai kɛi la ə́ wɔ tɔɔlaai hu, dɔ̨nɔ̨ ə hee ə ɓa-mįi-yee mɛ̨i, dɔ̨nɔ̨ ə hee ə́ kɔ́ɓɛyee mɛ̨i.» 22 Jesus ə nwoo ŋąąpənə yɛ mą: «Yii ka káá vɛɛli ka hvo gɔlɔn. Mɔ̨nɔ̨i gáá pai mįi ka pɛli ka mįi?» 23 Diɛ mą: «Kwa pɛli ku mįi!» Jesus yɛ diɛ: «Yii ɓaa mɔ̨nɔ̨ nwɛi, ka káá pai miii, kɛlaa, yii ɓaa nu tɔ̨nɔ̨ hee mɛ̨nį mamįiyee hu, da gɔɓɛyee hu, ɲą́ą́ hvei yili kaa ná. Nuąi Ną́n Yálá ə gɛɛnąąɠaa tii pɛli a di wɔɔ, diɛ ɓə nąą kaa a di wɔɔ.» 24 Galan nɛa powi tii lɛɛ, yii kɛa di yili mɛ̨n di ɓɛlaa hveelɛi tii la, di líí ə holi di pɔ. 25 Kɛlaa, Jesus ə di kəlee di təli yɛ diɛ: «Ka ɲɛ̨i kaa mą, lɔi nwun nąmįną di di wɔ ɲɛ̨itɔwɔ laa nwɔ huwalawala lɛ di yeemu nuą diɛ. 26 Ka wɛi, yili mąą hvo nɛ̨ɛ̨li hvo kɛ ka lɔwai. Yaamun, akɛ nu ta a kɛ ka lɔwai yii gaa bɔ ə kɛ a nu kɛnɛ̨; mąąnɛ̨ɛ̨ ə kɛ a mɛlaa di wɔ tí mun. 27 Akɛ nwɔ̨nɔ̨ ka ta kaa bɔ ə kɛ a nu kɛnɛ̨mun, mąąnɛ̨ɛ̨ ə kɛ a ka wɔ tí mun. 28 Yili ɓə gaa mą, Nu lon ə pa, ə gɛ, ə kɛ a nuą di wɔ kólo kɛmun, ə gɛ ə gbɔwɔ kwɛlɛ nu kpulu kɛnɛ̨ nwun mąąɓo mɛ̨nį ɓa.» Jesus ə ɲɛ̨ipu nuą hveelɛ ɲɛ̨i hvoloon ( Markə 10.46-52 ; Lukə 18.35-43 ) 29 Ɓɛlɔwai Jesus ə kɛi kulɔ la Ɉeriko daai, nu kpulu kɛnɛ̨ ə hvilɛn bulu. 30 Ɲɛ̨i pu nuą hveelɛ di kɛ heeni bələ kwɛlɛ, yii kɛa di Jesus paa mąą woo mɛ̨n yɛ tɛɛ, di nu hveelɛi di tómą kpɔ kɛnɛ̨ diɛ mą: «Davidə Lon Ną́mu ku ŋɛ̨i mąąwɛli kaa!» 31 Nu kpului tii di kɛi di woo hupu diɛ kɛ diɛ: ka ka laa pilɛ. Kɛlaa, ə mą kɛ tii, di kɛi lɔ tómą yɛ tɛɛ dɔlɔɔ ɓa; diɛ kɛ mą: «Ną́mu Davidə Lon ku ŋɛ̨i mąąwɛli kaa.» 32 Jesus ə tɔɔ ə di təli yɛ diɛ: «Lə ɓə ka káá bɔ ŋį́ gɛ kaa?» 33 Diɛ mą: «Ku kaa bɔ ə́ ku ɲɛ̨i hvoloon ku kɛɛ kaa.» 34 Di mąąwɛli ə Jesus hon, ə ɲee pɛlɛ di ɲɛ̨i, ɲąąɓa di ɲɛ̨i ə hvoloon diɛ kɛɛ kaa. |