Maafîu 2 - Yálá laawoo hɛɓɛ (dc)Kilimąą nuą di pa Jesus tuoɓoi 1 Jesus ə hɔlɔɓo Bɛtleɛmə daai Ɉude lɔi hu, a Herodə nwɔ tɔɔlaa yələ. Ɉɔlɔɓoɔ pulu, kilimąą nuą di həɠə hvóló kulɔi pələ, diɛ pa Ɉerusalɛmə. 2 Di mąąni kɛ kɛ, diɛ mą: «Ɉuifəɠaa di wɔ tɔɔmun nįnɛ̨i daa gaa, gaa mį? Mąąhɔlɔɓo kwaa nwɔ pɛmɛ̨lɛ̨n gɔw kaa voló kulɔi pələ. Ku pa kwɛli hvilɛn ɉi mą.» 3 Ɓɛlɔwai tɔɔmun Herodə ə nwoo tii mɛ̨n na, ɉu ə pu mą kpɔ kɛnɛ̨, ə mą kɛ Ɉerusalɛmə nuą kəlee. 4 Ə ɉaláá laa həli nuą nwun nąmįną da tɔ́n galamɔ̨ɔ̨ɠaa kəlee təli, ə di mąąni kɛ, yɛ diɛ: «Mį ɓə di kɛi pa Kristə kaai laa?» 5 Di nwoo pulu pənə diɛ mą: «Gaa pai hɔlɔɓoi Bɛtleɛmə daai Ɉude lɔi hu. Mąąhɔlɔɓo pələ ɓə Yálá kwəi mɛ̨nį hukulɔ mun ə bɛ̨ɛ̨ la, yɛ mą: 6 «‹Yɛ́ Bɛtleɛmə taa, hvo ɓaa taa logolo Ɉuda daa kpɛa-kpɛaɠaa lɔwai. Mąąhɔlɔɓo, tɔɔmun da kaa pai kulɔi ə́ hu, yii a tɔɔ Israɛlə nwɔ́ nu huwui ɲɛ̨itɔwɔ.›» 7 Herodə ə mageɠaa tii təli loo pələi, ə di mąąni kɛ, yɛ diɛ: «Mįnɛ̨ lɔwai ɓə ka bɛmɛ̨lɛ̨n-gɔwi tii kaa la?» 8 Yili pulu, yɛ diɛ: «'Ka li Bɛtleɛmə daai, 'ka nokoloi tii mąą mɛ̨nį hukulaa lɛlɛɛ kaa, 'ka pa, ka mo mą́ą́; ə gɛ, ɲą́ą́ gbɛli ŋį́ li ŋį́ kwɛli hvilɛn mą.» 9 Yii kɛa tɔɔmun ə mo tii diɛ, ə di tɔɔ bələi, də li. Bɛmɛ̨lɛ̨n-gɔwi hiɛ di gaa voló kulɔi pələ, ə hvilɛn di ɲɛ̨itɔwɔ, ə li ə tɔɔ ɓɛi nokoloi tii ə kɛ laa nąą nwun mɛ̨i. 10 Ɓɛlɔwai di bɛmɛ̨lɛ̨n-gɔwi kaa la tɔɔni bɛlɛ mɛ̨i; di kwəi ə nɛ̨ɛ̨ kpɔ kɛnɛ̨. 11 Di lɔ bɛlɛ́n, di nokoloi da nee Mari di kaa. Di pu di nwungbəla, di kwɛli hvilɛn mą. Yili pulu, di di tiɛ̨ hvoloon. Di ɉamą a: hɛni, lansan, da mirə wulɔ. 12 Yili pulu, Yálá ə di kilaa pono hįį pələ yɛ diɛ: «Ka hvo pənə ka hvo tɛɛ a tɔɔmun Herodə pɔɔli pələ.» Di tɛɛ a pələ ta kpɛli, diɛ li di wɔ lɔi hu. Ɉosɛfə da Mari də li di lon mąąkilɛi 13 Kilimąą nuą liɛ pulu, Ɉosɛfə ə Ną́mu nwɔ malaka tɔ̨nɔ̨ kaa hį́i, yɛ mą: «Ɉosɛfə! 'Nokoloi ŋɛ̨i da nee di həɠə ə pu a diɛ ka li Eziptə lɔi hu. Ka li, ka lɛɛ laa, ə lɛɛ la ɉu, ŋį́ pənə ŋą ka təli. Mąąhɔlɔɓo, Herodə kaa pai nokoloi ŋɛ̨i kwɛli baa mɛ̨nį ɓa.» 14 Gbinii tii hu, Ɉosɛfə ə nokoloi da nee di həɠə, ə li a diɛ Eziptə lɔi hu. 15 Di lɛɛ laa, ə lɛɛ la ɉu, Herodə ə haa. Yili ə kɛ tii, ə gɛ, mɛ̨nįi Ną́mu ə mo gwəi mɛ̨nį hukulɔ mun ma, naa ə hon, yai ə kɛ la mą: «Ŋą́ą́ nón ɉulɔnu təli ə kulɔ Eziptə lɔi hu.» Lon ɉinąą paa mɛ̨nį 16 Yii kɛa Herodə ə gbaɠala kaa yɛ, kilimąą nuą daa mowo, nii ə hvoli kpɔ a mɔlɔ. Ə nuą tɔɔ Bɛtleɛmə daai da gwɛlɛ taaɠaa kəlee hu, ə gɛ, di lɛapɛlɛɛ yiiɠaai di kaa kwɛlan gaa tɔ̨nɔ̨ a wala kɛ tii hveelɛ, di di paa, yɛ pələi maageɠaa di nokoloi kaa mɛ̨nį gilaa pono tɛɛ la bɔ. 17 Yili ə kɛ tii, ə gɛ, mɛ̨nį Yálá kwəi mɛ̨nį hukulɔ mun Ɉeremi ə mo, naa ə hon, yai ə kɛ la mą: 18 «Woolaa woo, da wɔlɔ woo di kaa tɔɔ Rama; Rasɛlə ɓə nonnii haa wɔlɔ ɓoi. Hvo gɛi hvo naapilɛ, mąąhɔlɔɓo, nonnii daa haa.» Ɉosɛfə pənə mɛ̨nį yɛ li Israɛlə lɔi hu 19 Herodə haa pulu, Ɉosɛfə ə Yálá nwɔ malaka ta kaa hįį pələ, Eziptə lɔi hu, 20 yɛ mą: «Ɉosɛfə! 'Ka pənə ka li Israɛlə lɔi hu, ɓɛi ka həɠə laai. Mąąhɔlɔɓo, nuąi kɛ bɔ di nokoloi paa, daa haa.» 21 Ɉosɛfə ə nokoloi da nee di həɠə, di pənə diɛ li Israɛlə lɔi hu. 22 Kɛlaa, ɓɛlɔwai Ɉosɛfə ə mɛ̨n na, diɛ kɛ mą, Arselausə ɓə hee Ɉude lɔi nwun na a tɔɔmun, a nąn bɔɔi, ə ɲɔw, hvo li laa. Yálá ə niɛwoo ɓo hįį pələ yɛ mą: 'Li Galile lɔi hu. 23 Ə li kɛa ə hee Nazarɛtə daai, ə gɛ, mɛ̨nį Yálá kwəi mɛ̨nį hukulɔ nuą di mo, naa ə hon; yai di mo, diɛ kɛ la mą: «Di kaa pai kɛi nokoloi tii ɓa Nazarɛtə mun.» |