Maafîu 19 - Yálá laawoo hɛɓɛ (dc)Jesus nwɔ kalan yii vilɛnŋąąi hvulu taɠa mɛ̨nį ɓa ( Markə 10.1-12 ) 1 Yii kɛa Jesus ə kpɛɛ a niɛwooɠaa tii kɛɛ, di həɠə Galile lɔi hu diɛ li Ɉude lɔi taa ta hu, Ɉurdɛn yá pulu pələ. 2 Nu kpulu kɛnɛ̨ ə hvilɛn Jesus pulu, ə di wɔ ɲɔ̨n gɛ nuą kəlee kɔ́lɔi pono. 3 Farisiɛ̨ taɠaa di kɛ laa di kɛ bɔ di Jesus hon nwoo hu. Di pa diɛ mą: «Akɛti, gu wɔ tɔ́n a hvaa mą nu ə nɛ̨ą kpɛ hɔn nɔpee gəlee mąą mɛ̨nį ɓa?» 4 Jesus ə di woo ŋąąpənə yɛ diɛ: «Akɛti, ka hvo ta mɛ̨nįɠaa ŋɛ̨i kalan ni Yálá laawoo hɛɓɛ́ hu, diɛ kɛ mą: ‹Tɔlɔɔ-tɔlɔ Yálá ə hulɔnu da nɛ̨ɛ̨nu di pɛliə?›» 5 Yili pulu ə mo yɛ diɛ: «Yili ɓə gaa mą, hulɔnu a nąn da nee di lɛɛ, ə pa, da nɛ̨ą di pɛlɛ di kee ɓa diɛ kɛ tɔ̨nɔ̨. 6 Yili ɓa, di hva kɛ kɛa a nu hveelɛ, kɛlaa, da kɛ a nu tɔ̨nɔ̨. Mąą hvo nɛ̨ɛ̨li, yii Yálá aa ɲili gee ɓa, nu hvo gulɔ gee ɓa.» 7 Farisiɛ̨ɠaa diɛ Jesus ɓa: «Akɛti, lə mɛ̨nį ɓa yai Moisə ə kɛ diɛ: Nu ta a kɛi nɛ̨ą kpɛ, mąąnɛ̨ɛ̨ ə nɛ̨ą kpɛ hɛɓɛ́ tɛɛ bɔ yɛ mą: 'Li?» 8 Jesus ə di woo ŋąąpənə yɛ diɛ: «Moisə ə yili kɛ tii ka wɔ kili walawala laa mąą mɛ̨nį ɓa. Kɛlaa, hvo kɛ tii tɔlɔɔ-tɔlɔɔ. 9 Gáá moi kaa, akɛ nu ta a nɛ̨ą kpɛ, a kɛ hvo gbɛli wɛli hon mɛ̨nį ɓa, ə pənə ə nɛ̨ą takpɛli həɠə, a kɛ tii a wɛli ɲɔ̨nwɔ hon.» 10 Jesus nwɔ kalan nɛ̨ąąi diɛ mą: «Akɛ bələ ɓə hulɔnu da nɛ̨ą di lɔwai mɛ̨nį kaa la, viɛlaɓoɔi ka ni nu hvo nɛ̨ą həɠə.» 11 Jesus ə di woo ŋąąpənə yɛ diɛ: «Nu kəlee hvəə a pɛli niɛwoo ŋɛ̨i hon ɉi, hvo kɛli nuą Yálá a mąą kili tɛɛ di pɔ. 12 Mąąhɔlɔɓo, mɛ̨nįi a gɛ nu tamąą di hva nɛ̨ą hee nwun damąąi. Da daɠaa kaa, hulɔnu laa hva kɛ di yəi, daɠaa diɛn, nuą ɓə da hulɔnu laa kulɔ di yəi, daɠaa nwɔ̨nɔ̨, di hva gɛ di hvo nɛ̨ą hee Yálá-taa tɔɔlaa mąą mɛ̨nį ɓa. Nui a pɛli niɛwoo ŋɛ̨i hon ɉi, ə ɉon.» Jesus ə lúwɔ́ too lɛapɛlɛɛɠaa diɛ ( Markə 10.13-16 ; Lukə 18.15-17 ) 13 Nuą di pa a lɛapɛlɛɛ Jesus pɔ, ə gɛ, ə ɲee laa di mɛ̨i ə Yálá hvɛli diɛ. Kɛlaa Jesus nwɔ kalan nɛai di haɉa nuąa tii diɛ! 14 Jesus ə mo diɛ yɛ diɛ: «'Ka lɛapɛlɛɛ lɛɛ laa di pa bɔ́, ka hvo kpɛ̨ąn di tɔwɔ. Mąąhɔlɔɓo, nuąi di kaa yɛ nɛapəlɛɛ ŋɛ̨i, diɛ ɓə Yálá-taa tɔɔlaa kaa a di pɔɔ.» 15 Jesus ə ɲee laa nɛapəlɛɛ tii mɛ̨i, yili pulu ə həɠə laa diɛ li. Hulɔnon da yai kɛ a hɛn gɔw nąmu ( Markə 10.17-31 ; Lukə 18.18-30 ) 16 Hulɔnu ta ə pa Jesus pɔ ə mąąni kɛ yɛ mą: «Mąąkwɛli kɛmun, lə mɛ̨nį ɓə mąąnɛ̨ɛ̨ ŋą gɛ, ə gɛ, ŋį́ yɛnɛ̨ɛ̨ yii kpɛɛ hvo mą ɉɔlɔɓo?» 17 Jesus ə mo mą yɛ mą: «Lə mɛ̨nį ɓa ə́ kaa mą́ą́ləngɛi mɛ̨nį lɛlɛɛ kɛ mɛ̨nį ɓa? Hɛn dɔ̨nɔ̨ lɔ ɓə nəlɛɛ. Akɛ ə́ kaa bɔ ə́ yɛnɛ̨ɛ̨i kpɛɛ hvo mą hɔlɔɓo Yálá-taa, mąąnɛ̨ɛ̨ lɔ ə́ dɔ́nŋąa hon.» 18 Yili yɛ mą: «Nɛlɛɠaa ɓə?» Jesus yɛ mą: «Hvo nu paa. Hvo kɛ a wɛli hon mun. Hvo nwuɔ̨ kɛ. Hvo lɛɛ kɛla hvaa ɓo a nu ta laa. 19 Ə́ nąn da ə́ lee di mąąwiɛ. Ə́ heeyɔwɔ wɛli la kɛ yɛ ə́ kpinį.» 20 Ɉulɔnon tii yɛ Jesus ɓa: «Ŋą́ą́ yiliɠaa kəlee hɔn, lə ɓə nwɔ̨nɔ̨ mąąnɛ̨ɛ̨ ŋą́ gɛ?» 21 Jesus yɛ mą: «Akɛ ə́ kaa bɔ ə́ mąą mɛ̨nį laa ə hvɛɛ, li, Ɉɛnɉaai gaa ə́ yəi, ə́ gəlee lɔwɔ́tɔɔ, ə́ nwali ɉaa kwɛlɛ yeehowolo nuą diɛ. Yili pulu ə́ pa ə́ hvilɛn búlú. A kɛ tii ya kɛ a hɛn gɔw nąmu Yálá-taa tɔɔlaa hu.» 22 Yii kɛa ə nwooɠaa tii mɛ̨n, nii ə kələn gwəi, ə pənə yɛ li. Mąąhɔlɔɓo, hɛn gɔw kɛnɛ̨ ə kɛ ɲɛ̨i. 23 Jesus ə mo nwɔ kalan nɛai diɛ yɛ diɛ: «Gáá moi kaa a tɛ̨ą, hɛn gɔw nąmu lɔ laa walaai Yálá-taa tɔɔlaa hu. 24 Gáá pənəi ŋą́ mo kaa, hɛn gɔw nąmu lɔ laa walaai Yálá-taa tɔɔlaa hu ə tɛɛ hoo lɔi haliɛn nwolo hu ɓa.» 25 Yii kɛa galan nɛa di nwoo tii mɛ̨n, di kwəi ə pili diɛ. Diɛ Jesus ɓa: «Akɛti, gbɛɛ ɓə ka ni pai ɓaloi?» 26 Jesus ə ɲɛ̨i hee diɛ yɛ diɛ: Yii gɛ la walaai nuą yəi, gɛ la hvo wala li Yálá yəi. 27 Nąąlɔwai, Piɛrə ə mo Jesus ɓa yɛ mą: «Akɛti kani, kuɔi ŋɛ̨i kwaa hɛn gəlee lɛɛ laa kwaa hvilɛn ə́ pulu, ku wɛi kaa pai kɛi ləi?» 28 Jesus yɛ diɛ: «Gáá moi kaa a tɛ̨ą, ɓɛlɔwai Nu Lon kaa pai kɛi la heeni Nąn Yálá nwɔ tɔɔkpəlin mąąwiɛ hu, ka nu pow-kɔw-hveelɛ ŋɛ̨i hvilɛn búlúi, ka kɛ laa kaa kpɛli ka wɔ kpəlin ɉaai hu, kaa Israɛlə nu huwu heei pow-kɔw-hveelɛ ɉaa woo ɓo. 29 Ə lɛɛ, nui lɔpee a nwɔ pɛlɛ́i lɛɛ, ə nąn nonni hinąą da nąn nonni nɛ̨ą lɛɛ, ə nąn a wala kɛ tii ə nee lɛɛ, ə nonni da nwɔ hihɛn ɉaa kəlee lɛɛlaa náá mąą mɛ̨nį ɓa, a gbulu kɛnɛ̨ hɔlɔɓo, ə yɛnɛ̨ɛ̨ kpɛɛ hvo mą hɔlɔɓo Yálá yəi. 30 Kɛlaa, yiihu, yiiɠaai di kaa a dɔɔ dɔwɔɠaa di kaa pai lɛɛi a pulu nuą. Nɛɛ pulu nuą di kɛ a dɔɔ dɔwɔɠaa.» |