Maafîu 17 - Yálá laawoo hɛɓɛ (dc)Jesus ɲɛ̨i laa mąą ə hvalin ( Markə 9.2-13 ; Lukə 9.28-36 ) 1 Hvóló mɛ̨ihveelɛ tɛɛ pulu, Jesus ə Piɛrə, Ɉakə da nəɠə Ɉaan ni həɠə ə li a diɛ yee ta tona, di tɔ̨nɔ̨ kɛɛ naa. 2 Di lɛɛ lɔ laa, Jesus ɲɛ̨i laa mąą ə hvalin. Yɛ lən yɛ hvóló. Mąą həɠə ə kwələ yɛ kɛɛ pono. 3 Di Moisə da Eli di kaa Jesus kwɛlɛ da diɛni diɛ mɛ̨nį ta ɓo. 4 Ŋąąɓa Piɛrə ə nɛɛmą yɛ Jesus ɓa: «Ną́mu, akɛ ya hvaa mą, gu kɛ lɔ kɛa ɓɛi, ŋą kpuwulu haaɓa tɔɔ ɓɛ, dɔ̨nɔ̨ ə kɛ a ə́ wɔ, dɔ̨nɔ̨ ə kɛ a Moisə nwɔɔ, dɔ̨nɔ̨ ə kɛ a Eli nwɔɔ.» 5 Ə lɛɛ lɔ moi tii, tulɔ kpinįn ɉu ponoɔ̨ ta ə yɛɛ di mɛ̨i; woo ta ə kulɔ ɉu yɛ mą: «Nííɓa lon ga ŋɛ̨i, ya ɓə ŋą́ą́ mą́ą́ mɛ̨nįɠaa kəlee lɛɛ ma. Mąąnɛ̨ɛ̨ ka ka wəli tɔɔ nwoo ɓa!» 6 Yii kɛa galan nɛa haaɓai tii di nwoo tii mɛ̨n, di ɲɔ̨w, di pɛlɛ nɔi ɓa. 7 Jesus ə mąą lɛɠɛ diɛ ə ɲee pɛlɛ diɛ yɛ diɛ: «Ka hvo ɲɔ̨w, ka ka muhəɠə.» 8 Di di nwun muhəɠə, Jesus yaa tɔ̨nɔ̨ lɔ ɓə kɛ laa tɔɔni. 9 Di kɛɛ kɛa ɲee yɛɛi, Jesus ə mo diɛ yɛ diɛ: «Gɛɛ ŋɛ̨i ka gaa, ka hvo bələ ɓo nui lɔpee ta ɓa ə lɛɛ la ɉu Nu Lon ə nwun ə kulɔ haa ɓɛlaa lɔwai.» 10 Galan nɛai di Jesus mąąni kɛ diɛ mą: «Lə mɛ̨nį ɓa, dɔ́n galamɔ̨ɔ̨ɠaa da kɛ kɛi diɛi: Hvo kɛli Eli a gbɛa pa?» 11 Jesus ə di woo ŋąąpənə yɛ diɛ: «Tɛ̨ą li, Eli a gbɛa pa, ə mɛ̨nįɠaa kəlee hee pələ pɛli. 12 Kɛlaa, gáá moi kaa, Eli aa gbɛa kɛ pa. Nuą di hvo gɔlɔn ni, kɛlaa, di ɉɔn a ɲɔ̨nwɔ̨ɔ̨ yɛ pələi di kɛ la bɔ. Pələ lɔ ɓə di kaa pai Nu Lon hon Ɉii la, di naanɔ̨nwɔ̨ ɓo a di liiɓa pələ.» 13 Galan nɛa di gbaɠala kaa, diɛ, Ɉaan-Batistə ka tii Jesus kaa kɛi ma Eli. Jesus ə hvɛli-hvɛli ɲɔ̨n gɛmun da kɔ́lɔi pono ( Markə 9.14-29 ; Lukə 9.37-43a ) 14 Ɓɛlɔwai Jesus da nwɔ kalan nɛa haaɓai tii di həli la nu kpulu ɓa, hulɔnu ta ə pa ə pu nwungbəla Jesus kɔ́wɔ mu, yɛ mą: 15 «Nwɔ́ mɛ̨nį Nąmu, nwɔ́ lokoloi ɲɛ̨imąąwɛli kaa. Hvɛli-hvɛli kaa mą yɛ naanɔ̨nwɔ̨ ɓo kpɔ a mɔlɔɔ. Hvóló taɠaa, a gulɔ, a doo nwɔ̨n, daɠaa, yɛ bili yai. 16 Ŋą́ paa la ə́ wɔ kalan nɛai pɔ, kɛlaa, di hvo pɛli gɔlɔi ponoi.» 17 Jesus ə haŋą nuą tii kɛ laa diɛ, yɛ diɛ: «Ka wɔ mɛ̨nį ɲɔ̨nwɔi, laa na laa hvo ka yəi! Akɛti, gáá pai lɛɛ ka mu kpəŋəi hąą, hvo kɛli mįnɛ̨ lɔwai? Yili pulu yɛ diɛ: Ka pa a nokolo kpɔ bɔ́.» 18 Jesus ə haŋą vɛli-hvɛli ɲį́nɛ̨n tii ɓa, ə həɠə nokoloi tii pulu, gɔlɔi ə pono kpɔlɔɔ tii ŋąąɓa. 19 Jesus nwɔ kalan nɛai di lɛɠɛ mą di tɔ̨nɔ̨ kɛɛnąą, diɛ mą: «Lə mɛ̨nį ɓa ku hvo pɛli li ɲį́nɛ̨n tii kpɛi nokoloi tii pulu?» 20 Ə di woo ŋąąpənə yɛ diɛ: «Mąąhɔlɔɓo, ka wɔ laa na laa hvo kɛnɛ̨ li. Gáá moi kaa a tɛ̨ą, akɛ, ka wɔ laa na laa kɛnɛ̨ pələ a kɛ yɛ bələi ɓənən gɔw, ka pɛli kaa ɲee ŋɛ̨i ɓa: Həɠə ɓɛi ŋɛ̨i ə kaa laai, ə li pələ takpɛli. A həɠə kpɔlɔɔ tii laa. Mɛ̨nį lɔpee ta hva walawala kɛ kaa. 21 Kɛlaa, ɲį́nɛ̨n ɉuwui ŋɛ̨i, hvo kɛli Yálá hvɛliɛ di hįn nɔɔ ɓə a ɉəɠə nu pulu.» Jesus ə pənə ə Ɉaa mɛ̨nį da nwun mɛ̨nį ɓo ( Markə 9.30-32 ; Lukə 9.43-45 ) 22 Ɓɛlɔwai Jesus da nwɔ kalan nɛai kəlee di kɛ la Galile lɔi hu, ə mo diɛ yɛ diɛ: Di kaa pai Nu Lon laakwɛlanmoi nuą diɛ. 23 Di kaa pai baai, kɛlaa, voló haaɓa yələ, gaa pai nwun ɉii ə kulɔ haaɓɛlaa lɔwai. Nwoo tii ə nwɔ kalan nɛai kwəi pili ə di liihɛlɛn. Jesus da Piɛrə di wɔ nįįhɔ̨nwɔ̨ kulɔ mɛ̨nį 24 Jesus da nwɔ kalan nɛai dəli Kafarnaumə daai. Di wɔ kalan bɛlɛi mu, nįįhɔ̨nwɔ̨ kulɔ nuą di lɛɠɛ Piɛrə ɓa di mąąni kɛ diɛ mą: «Ka kalamɔ̨ɔ̨ a kɛ nįįhɔ̨nwɔ̨ kulɔi Yálá hee pɛlɛ́ mu?» 25 Piɛrə yɛ mą: «A kɛ gulɔi.» Ɓɛlɔwai Piɛrə ə lɔ la bɛlɛ́n, Jesus ɓə tɔlɔɔ pələ pili mą, yɛ mą: «Akɛti, gbɛɛ ɓə mąąnɛ̨ɛ̨ ə nįįhɔ̨nwɔ̨ kulɔ tɔɔmun ma, nɔi lon mə mɔ̨ɔ̨? A wala kɛ tii, nwea ɓə?» 26 Piɛrə yɛ mą: «Nwea ɓə.» Jesus yɛ mą: «Mąą hvo nɛ̨ɛ̨li lɔi lon və nįįhɔ̨nwɔ̨ kulɔ. 27 Kɛlaa, gu wɛi, gu hvo bɔ gu hvo nuą lii hu kala. Yili ɓa, ɉɔwɔlee kwɛli həɠə, ə́ li bówa hu, ə́ kwɛli pili; Ɉɔwɔlee tɔlɔɔ tii ə́ kaa pai gulɔi, na kaa, wali kaa na, yii a pɛli gu nu hveelɛ guɔ nįįhɔ̨nwɔ̨ ɓa, ɉəɠə ə́ pa, ə́ guɔ nįįhɔ̨nwɔ̨i kulɔ la.» |