Maafîu 16 - Yálá laawoo hɛɓɛ (dc)Farisiɛ̨ɠaa da Sadusiɛ̨ɠaa di kɛ bɔ Jesus ə kpalo mɛ̨nį ta kɛ di gaa ( Markə 8.11-13 ; Lukə 12.54-56 ) 1 Farisiɛ̨ɠaa da Sadusiɛ̨ɠaa di pa ə gɛ, di Jesus hon nwoo hu. Di mo mą diɛ mą: «Mɛ̨nį ta kɛ, yii kwa gaa kuɔ ə́ wɔ huwalawalai ə həɠə Yálá pɔ.» 2 Jesus ə di woo ŋąąpənə yɛ diɛ: «Kaai ka hvóló lii lɔwai kaa lɔ, kaa kɛ mą: ‹Yələ lɛlɛɛ laa kaa tinąą pai ɓɔi, mąąhɔlɔɓo, yələi kpɔluɔi.› 3 Yələ wala pɔ, yələ a kɛ a ɲɛɛ, kaa mą: ‹Tulɔ kaa pai bui háákələi.› Ka wəlɛɛi yələi mɛ̨nįɠaa hukulɔ, kɛlaa, mɛ̨nį yii yələ ɓɔɔ tɛitɛi kəlee da nɛ, ka hvo gɔlɔn. 4 Háákəlee nuą ŋɛ̨i di hva tələnmo túwɔ́ ɓo Yálá ɲɛ̨i ɓa, diɛ ŋą mɛ̨nį ta kɛ di gaa. Kɛlaa, mɛ̨nį takpɛi hva pɛli lɛi diɛ, akɛ Ɉonasə mąą mɛ̨nį hvəə.» Yili pulu, ə di lɛɛ laa ə həɠə laa. Farisiɛ̨ɠaa da Sadusiɛ̨ɠaa di wɔ kalan yii gɔwɔɉaai lɛɠɛ tɛ hɛn ma ( Markə 8.14-21 ) 5 Jesus nwɔ kalan nɛai di kɛɛ lii bówa pulu pələ, di lɛ̨ą di hvo lɛɠɛ həɠə. 6 Jesus ə mo diɛ yɛ diɛ: «'Ka gɛ a nəlɛɛ Farisiɛ̨ɠaa da Sadusiɛ̨ɠaa di wɔ lɛɠɛ tɛ hɛn mąą mɛ̨nį ɓa.» 7 Galan nɛa kwəi ə pili diɛ, diɛ kɛ di kee ɓa: «Akɛti, nɛɠɛi tii gu hvo ɉəɠə li mąą mɛ̨nį ɓə gɛi yɛ mo la tii?» 8 Yii kɛa Jesus ə di wɔ kiliŋąhiɛ kaa tii, ə di mąąni kɛ yɛ diɛ: «Lə mɛ̨nį ɓa ka káá kɛi ka kee ɓa: Akɛti, nɛɠɛi tii gu hvo ɉəɠə li mąą mɛ̨nį ɓə gaa moi la tii! Éé ka wɔ laa na laa tiikpə ɓə ee! 9 Akɛti, ka hva mɛ̨nį kpaɠala kaa? Nɛɠɛ kpuwulu nɔɔli ŋɛ̨i ŋį́ nu waa lɔɔli kɔ̨nɔ̨n gɛ la, gbaɠala hvo kaa? 10 Yii nwɔ̨nɔ̨ kɛ a nɛɠɛ mɛ̨ihveelɛi, gɛ́ nu waa nąąn gɔ̨nɔ̨n gɛ la yili kpaɠala hvo nwɔ̨nɔ̨ kaa? 11 Akɛti, lə mɛ̨nį ɓa ka hvo gbaɠala kaa li kaa kɛ diɛ: Lɛɠɛ yii gaa a kɔ̨nɔ̨n, mąą mɛ̨nį hvəə gáá yili ɓoi la kaa. Ka gɛ a nəlɛɛ Farisiɛ̨ɠaa da Sadusiɛ̨ɠaa di wɔ lɛɠɛ tɛ hɛn mąą mɛ̨nį ɓa.» 12 Yili pulu di gɔlɔn kɛa diɛ, lɛɠɛ tɛ hɛn vəi Jesus ə kɛ mą. Kɛlaa, Farisiɛ̨ɠaa da Sadusiɛ̨ɠaa di wɔ kalan gɛ pələ ɓə ə kɛ mą. Piɛrə ə mo yɛ Jesus kaa a Yálá nwɔ nwun mąąɓomun dɔɔ ( Markə 8.27-30 ; Lukə 9.18-21 ) 13 Jesus da nwɔ kalan nɛai də li Sesare Filipə taa. Jesus di mąąni kɛ yɛ diɛ: «Ɲą́ą́ ŋɛ́i a Nu Lon, nuą da kɛ kɛi lə mą́ą́ mɛ̨nį hu?» 14 Di nwoo ŋąąpənə diɛ mą: «Nu taɠaa da kɛ kɛi diɛ: Ɉaan-Batistə ɓaa a yɛ́. Daɠaa diɛ kɛ diɛ: ə́ kaa a Eli. Daɠaa diɛ kɛ diɛ: ə́ kaa a Ɉeremi, a wala kɛ tii, Yálá kwəi mɛ̨nį hukulɔ mun ta lɔ ɓaa a yɛ́.» 15 Jesus yɛ diɛ: «Ɛlɛɛ káán! Ká kɛ gáái yɛ gbɛɛ?» 16 Simɔn Piɛrə ə nwoo ŋąąpənə yɛ mą: «Ə́ kaa a Kristə, yai di dɔɔ, Yálái gaa a vulú Non ɉulɔnu.» 17 Jesus ə mo Piɛrə ɓa, yɛ mą: «Simɔn, Ɉonasə lon ɉulɔnu, ə́ nwun na nɛ̨ɛ̨i; mąąhɔlɔɓo dɛ̨ą ŋɛ̨i yaa mo, nu hvəə a nɛ nu ɓa; hvɛɛ Ną́n Yálá yai gaa yələkɔlɔn ɉu, ya ɓə a pɛli nɛi nu ɓa. 18 Gáá tɛ̨ą ɓoi yɛ́, ə́ laa ɓaa a Piɛrə. Gwɛnii tii mɛ̨i ɓə gáá pai nwɔ́ nu kpului ŋąąkpɔn ɉii laa. Haa yee hvə pai pɛli mą. 19 Gáá pai yələ kɔ́lɔn ɉu tɔɔlaa laaɓo kwɛli tɛɛi ə́ pɔ; Hɛn nɔpee yá tɔn dɔɔ mą lɔi mɛ̨i, dɔɔ li mą yələkɔlɔn ɉu. Yii nwɔ̨nɔ̨ yá tɔn gulɔ mą lɔi mɛ̨i, gulaa li mą yɛlɛkɔ́lɔnɉu.» 20 Yili pulu, ə mo nwɔ kalan nɛai diɛ yɛ diɛ: «'Ká hvo kɛ nui lɔpee ta ɓa: Ɲą́ą́ ɓə gáá a Nwun mąąɓomun Yálá ə naakwɛlanmo.» Jesus ə ɉaa mɛ̨nį da nwun mɛ̨nį ɓo ( Markə 8.31—9.1 ; Lukə 9.22-27 ) 21 Ə həɠə nąąlɔwai ɓa, Jesus ə mo nwɔ kalan nɛai diɛ a ɉu ponoɔ̨ yɛ diɛ: «Hvo kɛli ŋą́ li Ɉerusalɛmə, ə gɛ, nu pɔlɔɠaa, da ɉaláá laa həli nuą nwun nąmįną, ə mą kɛ dɔ́n galamɔ̨ɔ̨ɠaa di mɔ̨nwɔ̨ ɓo kpɔ kɛnɛ̨, ə lɛɛ, di báá. Kɛlaa, voló ɉaaɓa yələ, ŋą́ nwun, ŋą́ kulɔ haa yəi.» 22 Yili pulu Piɛrə ə Jesus təli di nu hveelɛi kɛɛnąą, yɛ niɛwoo kɛ, yɛ kɛ mą: «Yálá ə ə́ mɛ̨i kaa, yili hvo pai həli yɛ́.» 23 Kɛlaa, Jesus ə tinɛ̨n, yɛ Piɛrə ɓa: «Ə́ mąą kwɛa mą́ą́ ɓilihi! Ə́ kaa a kɔ́wɔ tuwɔ kwɛni nwɔ́ pələi mɛ̨i. Mąąhɔlɔɓo, ə́ wɔ kiliŋąhiɛ hvo yɛ Yálá nwɛi, kɛlaa, gaa a nu kiliŋąhiɛ.» 24 Nąąlɔwai, Jesus ə mo nwɔ kalan nɛai diɛ, yɛ diɛ: «Nui gaa bɔ ə hvilɛn búlú, hvo kɛli ə lənə gbɔwɔ ɓa. Ə gbɔwɔ haa wulu həɠə ə hvilɛn búlú. 25 Nui a nɔw hviɛlaɓo ə tɛɛ mą́ą́ mɛ̨nį ɓa, a hvɛɠɛ la. Kɛlaa, nui a mą́ą́ mɛ̨nį hviɛlaɓo ə dɛɛ nɔw ɓa, mąą nui nwɔ yɛnɛ̨ɛ̨ a lɛɛ ɲəi. 26 Nu a yɛnɛ̨ɛ̨ hɛn gɔw kəlee hɔlɔɓo, ə hvɛɠɛ a nwɔ yɛ̨nɛ̨ɛ̨, yili dɔlɔ ɓaa a lə? 27 Ɓɛlɔwai Nu Lon kaa pai pai la, Nąn Yálá nwɔ mąąwiɛi hu, da nwɔ malakaɠaai, nąąlɔwai ɓə gaa pai nu tɛitɛi kəlee hvɛla kulɔi la, yɛ pələi dúwɔ́ pələ ə kɛ la. 28 Gáá moi kaa a tɛ̨ą, nu taɠaa kaa ɓɛ ka lɔwai, di hvo pai haai, ə lɛɛ la ɉu di Nu Lon gaa yɛ pa la yɛ tɔɔmun.» |