Maafîu 15 - Yálá laawoo hɛɓɛ (dc)Mɛ̨nįi nu pɔlɔɠaa di mo ( Markə 7.1-13 ) 1 Farisiɛ̨ɠaa da tɔ́n galamɔ̨ɔ̨ɠaa di həɠə Ɉerusalɛmə di pa di Jesus kaa, di mąąni kɛ diɛ mą: 2 «Lə mɛ̨nį ɓa mɛ̨nįi nu pɔlɔ-pɔlɔɠaa di mo gu huwula mɛ̨nį hu, ə́ wɔ kalan nɛai di hva yili hon; mąąhɔlɔɓo, di hva di yəi waai, yɛ bələi dɔ́n nwɔ liɛwoo kaa la, di kɔ̨nɔ̨n mį́į́ lɔwai?» 3 Jesus yɛ diɛ: «Kaa kpɛli, lə mɛ̨nį ɓa ka kɛ Yálá nwɔ tɔ́n kalaɠalai a ka nąnni di wɔ huwula mɛ̨nįɠaa? 4 Mąąhɔlɔɓo, Yálá ə mo yɛ: ‹Ə́ lee da ə́ nąn di mąąwiɛ›, da ‹Nui nwɔ̨nɔ̨ a woo ɲɔ̨n mo nee ɓa, a wala kɛ tii nąn ma, mąąnɛ̨ɛ̨ di yili mąą nui paa.› 5 Kɛlaa, ka wɛi, ka wɔ huwula mɛ̨nį pɔlɔɠaa hu, ka nąnni pɔlɔɠaa di mo diɛ mą: ‹Nui a kɛ nee da nąn diɛ: Kpɔnmąąi ŋą kɛi pa dɛɛi ka pɔ, gáá yili laaikɛi ŋį́ dɛɛ Yálá pɔ.› 6 A kɛ tii, mąą nu hvo kpɔnmąą tɛɛ mɛ̨nį ɓa gaa nuą pɔ. Pələ ɓə ka kɛ Yálá laawoo mąą pənəi la a ka wɔ huwula mɛ̨nįɠaai, ka hvilɛŋąą bulu kaa gɛ. 7 Ka tɛ ɲɛ̨i mɛ̨nį kɛ nuąi ŋɛ̨i, kaa kpɔ ɓə Yálá ə kɛi ka mąą mɛ̨nį gwəi mɛ̨nį hukulɔ mun Esai laaləi yɛ kɛ mą: 8 «‹Nu huwui ŋɛ̨i a mą́ą́wiɛ lɔ a naaləi, Kɛlaa, di wɔ kiliŋąhiɛ mąą kwɛaa mą́ą́. 9 Gwɛlii da vilɛn mą́ą́, gaa a kpɛli-kpɛli. Mąąhɔlɔɓo, nuą túwɔ́ pələ lɔ ɓə da galan di kee ɓa; diɛ ɲą́ą́ Yálá nwɛ́i lɛɛ laa.›» Hɛn ɲii a nu mąą liɓi ( Markə 7.14-23 ) 10 Yili pulu, ə nu kpului tii təli yɛ diɛ: «Mɛ̨nįɠaa ŋɛ̨i gáá moi kaa, ka ka wəli tɔɔ ka mɛ̨n a nəlɛɛ. 11 Hɛn nɔpee nu a dɛ na, hva mąą liɓi. Kɛlaa, yii a kulɔ nu la, ya ɓə a mąąliɓi.» 12 Jesus nwɔ kalan nɛai di lɛɠɛ mą diɛ mą: «Ə́ gɔlɔn yɛ diɛ mɛ̨nįɠaa ŋɛ̨i ə́ mo Farisiɛ̨ɠaa, diɛ aa kɛ yɛ kwɛi kɔ́wɔ a kpəɲan di tɔwɔ?» 13 Ə́ di woo ŋąąpənə yɛ diɛ: «Wulu yii kpɔ, Ną́n Yálá gaa yələkɔlɔn ɉu hvo ɉi li, da gulɔ. 14 Ka di lɛɛ laa, ɲɛ̨ipunuą ka tii di ɓɛlaa di wɔ tunwɔ̨n ɉon ɉii. Ɲɛipumun lɔpee a mɛlan nwɔ tunwɔ̨n ɉon, di nu hveelɛ da too lɔwai.» 15 Piɛrə yɛ Jesus ɓa: «Ɉanwon yili mukulɔ.» 16 Jesus yɛ diɛ: «Akɛti kaa kpɛli ka hva pɛli yili mukulaa kɔ́lɔn ɉi? 17 Ka hvo gɔlɔn kaa hɛn nu a nɔ na, a li gwəi; yili pulu, yɛ pa li la hį́i pulu? 18 Kɛlaa, yii a kulɔ nu la, a həɠə nwɔ kiliŋąhiɛ hu. Yili ɓə a nu mąą liɓi. 19 Mąąhɔlɔɓo, nu nwɔ kiliŋąhiɛ hu ɓə mɛ̨nį ɲɔ̨n a kulɔ laa, yɛ pələi: Nu paa mɛ̨nį kaa la, wɛli hon ŋąą, túwɔ́ pələ ɲɔ̨n, nwuɔ̨ kɛɛ, ə lɛɛ kɛla hvaa ɲɔ̨nwɔ̨ɔ̨ ɓoɔ, da lalan biliɛ. 20 Mɛ̨nįɠaa tii ɓə da nu mąą liɓi. Kɛlaa, nu yəi lɛɛ tii yɛ kɔ̨nɔ̨n mį́į́, a wala kɛti ə́ ə́ yəi waa yɛ bələi ka wɔ huwula mɛ̨nį pɔlɔɠaa kaa la, yili hvəə a nu mąąliɓi.» Nweą nɛ̨ɛ̨nu yii la Jesus la ( Markə 7.24-30 ) 21 Yili pulu, Jesus ə li Tirə da Sidɔn di lɔwai taa ta hu. 22 Kanaan nąąnu ta ə kɛ laa nɔi tii hu, ɲį́nɛ̨n ə ɓo non nɛ̨ɛ̨nu pulu yɛ naanɔ̨nwɔ̨ ɓo kpɔ a mɔlɔɔ. Nɛ̨ɛ̨nu tii ə pa Jesus pɔ ə wɔlɔ ma yɛ mą: «Davidə Lon, Ną́mu, ɲɛ̨́i mąą wɛli kaa. Ɲį́nɛ̨n gaa nón nɛ̨ɛ̨nu pulu yɛ naanɔ̨nwɔ̨ ɓo kpɔ a mɔlɔɔ, gɛ́ ə́ gbɛ bulu.» 23 Jesus hvo kpɛli nwoo ŋąąpənə. Nwɔ kalan nɛai di lɛɠɛ mą diɛ mą: «'Hva nɛ̨ɛ̨nu ŋɛ̨i kpɛ gu pulu, hvo pa kɛ lɔ gu pulu yɛ tómą.» 24 Jesus ə nɛ̨ɛ̨nui tii woo ŋąąpənə yɛ mą: «Ŋą́ pa lɔ Israɛlə ɓɛlaa yiiɠaai di piliɛ di mąą mɛ̨nį ɓa.» 25 Kɛlaa, nɛ̨ɛ̨nui tii ə pa ə too gɔɠɔ mu yɛ mą: «Nwɔ́ mɛ̨nį Nąmu, ɲɛ̨́i mąą wɛli kaa.» 26 Jesus ə nwoo ŋąąpənə yɛ mą: «Mąą honɛɛ li, nu hvo lɛapɛlɛɛ kɔ̨nɔ̨n dɛɛ yilɛɠaa pɔ.» 27 Nɛ̨ɛ̨nui tii yɛ mą: «Ną́mu, tɛ̨ą li. Kɛlaa, yilɛ nąmu aa kɛi kɔ̨nɔ̨n mį́į́, bɛnɛɠaai tii da kɛ tooi, ɲilɛɠaa da yiliɠaai mįi a di kɔ̨nɔ̨n.» 28 Jesus yɛ mą: «Nɛ̨ɛ̨nu, ə́ wɔ kilitɔɔ mąą kɛnɛ̨i pələi tii ə́ wɔ laa na laa kaa la. Yii ə́ kaa ə́ kiliŋąhiɛi ma, ə kɛ kpɔlɔɔ tii yɛ́.» Nɛ̨ɛ̨non tii kɔ́lɔi ə pono, ɲį́nɛ̨n tii ə həɠə bulu kpɔlɔɔ nąąlɔwai. Jesus ə ɲɔ̨n gɛ nuą tamąą kɔ́lɔi pono 29 Jesus ə həɠə laa ə li Galile Powaya kwɛlɛ, ə tɛ yee kpukpu ta nwuɔ̨ ə hee. 30 Nu kpulu kɛnɛ̨ ə həɠə yɛ pa bɔ. Daɠaa diɛ pa a di wɔ kɔ́wɔ nwąną ɲɔ̨n gɛ nuą, daɠaa diɛ ɓo a ɲɛ̨i pu nuą, daɠaa diɛ ɓo a muugbɛ, daɠaa diɛ ɓo a kpɛɠii ɲɔ̨n gɛ nuą, ə lee, da ɲɔ̨n ɉuwu lɔpee gəlee kɛ nuą. Di pa a diɛ di di pu Jesus kɔ́wɔ, mu ɲee kɔ́wɔ la, ə gəlee kɔ́lɔi pono. 31 Nu kpului tii kəlee kwəi ə pili diɛ ɓɛlɔwai di muugbɛɠaa kaa la diɛ hvaa, kɔ́wɔ nwąną ɲɔ̨n gɛ nuą diɛ hiɛ, ɲɛ̨i pu nuą diɛ kɛɛ kaa, yiiɠaai kpɛɠi ɲɔ̨n ə kɛ diɛ, di ŋąą pɛliɛ. Di kəlee di kɛi Israɛlə nwɔ Yálá mąmąɓo. Jesus ə nu waa nąąn gɔ̨nɔ̨n gɛ ( Markə 8.1-10 ) 32 Jesus ə nwɔ kalan nɛai kəlee təli yɛ diɛ: «Nuą ŋɛ̨i mąąwɛli aa Ɉón, və́ bɔ di hvo lɛɛ a pulu, gwa diɛ ni guɔ gu ɓɛlaɓo, ə gɛ, di púlú pənəi lɔwai, da hvo pa kpɔlɔɔn a pulu.» 33 Nwɔ kalan nɛai di nwoo ŋąąpənə diɛ mą: «Mįnɛ̨ kpɔ ɓə kwa pɛli kɔ̨nɔ̨n Ɉɔlɔɓoi laa ɓɛ mɔi pun ŋɛ̨i hu?» 34 Jesus ə di mąąni kɛ yɛ diɛ: «Lɛɠɛ yɛli ɓə ka yəi?» Diɛ mą: «Lɛɠɛ mɛ̨ihveelɛ da hɔ̨nwɔ̨lee pəlɛɛɠaa.» 35 Ə mo nuą diɛ yɛ diɛ: «'Ka hee nɔi ɓa.» 36 Ə nɛɠɛ mɛ̨ihveelɛi tii həɠə da Ɉɔwɔleeɠaa, ə Yálá mąmąɓo. Yili pulu, ə gəlee hu tee-tee ə dɛɛ nwɔ kalan nɛai pɔ, yɛ diɛ: «Ka ŋąąkwɛlɛ nuą diɛ.» 37 Nu kəlee di mįi di pilɛ. Gbəlii lɛɛ ə kɛ a kpɔlɔ mɛ̨ihveelɛ. 38 Nuąi mįi di kɛ a nu waa nąąn. Di hvo nɛ̨ą da lɛapɛlɛɛ di lono. 39 Yili pulu, Jesus ə mo nuą tii diɛ yɛ diɛ: Nu kəlee ə li bɔ taai. Yai tii ə tɛ gələn ɉu ə li Magadan lɔi hu. |