Maafîu 14 - Yálá laawoo hɛɓɛ (dc)Ɉaan-Batistə haa mɛ̨nį ( Markə 6.14-29 ; Lukə 9.7-9 ) 1 Nąąlɔwai Herodə ə kɛ Ɉude lɔi nwun na, ə Jesus mąą mɛ̨nį bələ mɛ̨n. 2 Ə mo nwɔ tínuą diɛ yɛ diɛ: «Ɉaan-Batistə ka tii, a muhəɠə a kulɔ haaɓɛlaa lɔwai. Mɛ̨nį gɛi, yɛ gbalo mɛ̨nį tamąą tii kɛ la yaa li.» 3 Yaan Herodə aa kɛ mo, yɛ diɛ: Di Ɉaan hon di doo gaho ŋą, Herodə nəɠə Filipə nɛ̨ą Herodiadə mąą mɛ̨nį ɓa. 4 Mąąhɔlɔɓo, Ɉaan ə kɛ Herodə ɓa: «Mąą hvo nɛ̨ɛ̨li nu hvo ə ləɠə nɛ̨ą həɠə a ə nɛ̨ą!» 5 Herodə ə kɛ bɔ ə Ɉaan paa, kɛlaa ə kɛi ɲɔ̨w Ɉuifəɠaa diɛ. Mąąhɔlɔɓo, nu kəlee di kɛi Ɉaan kaa yɛ Yálá kwəi mɛ̨nį hukulɔ mun. 6 Yələ ta, Herodə ə kɛi gbɔwɔ kaa hvóló mąą kwəinɛ̨ɛ̨ kulɔ; ə mɛlaaɠaa tamąą təli. Herodiadə lon nɛ̨ɛ̨nu ə mąną kpɔ a nəlɛɛ Herodə da mɛlaa di ɲɛ̨i ɓa, mąną pələ ə Herodə liihon. 7 Herodə ə nɛ̨ɛ̨mą ə gwɛla, yɛ nɛ̨ɛ̨non ɓa: Yii lɔpee ya vɛli mą́ą́ ŋą dɛɛ ə́ pɔ, ə mą kɛ nwɔ́ tɔɔlaai bələ tɔ̨nɔ̨ ɓə. 8 Nɛ̨ɛ̨non nee ə dəli loo pələi, yɛ mą: «Li yɛ́ mąi: Ɉaan-Batistə nwun galən mə gáá bɔ ə́ dɛɛ bɔ́ naa gəgən ɉu.» 9 Yili mɛ̨n tɔɔmun ə mo gwəi hvo nɛ̨ɛ̨. Kɛlaa, gwɛla woo mąą mɛ̨nį ɓa, mɛlaa ɲɛ̨i ɓa, ə mo yɛ diɛ: Ka dɛɛ bɔ. 10 Ə holahiɠaa tɔɔ də li di Ɉaan nwun dee ɲą gaho pɛlɛ́ mu. 11 Di naa gəgən ɉu, di paa la. Di dɛɛ nɛ̨ɛ̨non pɔ, yili yaan ə li la ə dɛɛ nee pɔ. 12 Ɉaan nwɔ kalan nɛai di pa di bowa həɠə, də li di noo. Yili pulu, də li di di woo hu kulɔ Jesus ɓa. 13 Yii kɛa Jesus ə Ɉaan-Batistə haa mɛ̨nį bələ mɛ̨n, ə muhəɠə da nwɔ kalan nɛai di hee gələn ɉu di bówa teen, diɛ li di tɔ̨nɔ̨ kɛɛ nąą. Kɛlaa, yii kɛa nuą di gbaɠala kaa tii, di laa a ɲa koo, da diɛni di kwiɛn ɲa pulu pələ. Nuą tii di həɠə taa tamąą hu diɛ pa. Jesus ə nu waa lɔɔli kɔ̨nɔ̨n gɛ ( Markə 6.30-44 ; Lukə 9.10-17 ; Ɉaan 6.1-14 ) 14 Di kulaa gələn ɉu Jesus ə nu kpulu kɛnɛ̨i tii kaa di ɲɛ̨imąąwɛli ə Ɉon; ɲɔ̨n gɛ nuąi di paa a diɛ, ə gəlee kɔ́lɔi pono. 15 Yələ wulii pɔ, hvitili yɛ kɛa pu, Jesus nwɔ kalan nɛai di lɛɠɛ mą diɛ mą: «Mo nuą ŋɛ̨i diɛ də li gu kwɛlɛ taaɠaa hu di di kɔ̨nɔ̨n gwɛli. Mąąhɔlɔɓo, ɓɛ kaa a lɔi pun ɉu hɛn da hvo ɓɛ.» 16 Jesus ə mo diɛ yɛ diɛ: «Mąą hvo nɛ̨ɛ̨li də li diɛ di kɔ̨nɔ̨n gwɛli pələ ta kpɛli; mąąnɛ̨ɛ̨ kaa mun ka di kɔ̨nɔ̨n gɛ.» 17 Di mo Jesus ɓa diɛ mą: «Lɛɠɛ lɔɔli lɔ ɓə gaa ku yeei da hɔ̨nwɔ̨lee hveelɛ.» 18 Jesus yɛ diɛ: «Ka pa a yili bɔ́.» 19 Yii kɛa di dɛɛ bɔ, ə mo diɛ yɛ diɛ: 'Ka mo nuą ŋɛ̨i diɛ, di kəlee di hee nɔi ɓa. Yili pulu, ə nɛɠɛ lɔɔli da Ɉɔwɔlee hveelɛi tii həɠə, ə ɲɛ̨i hee ɲələi, ə Yálá hɛɠɛɛɓo. Yili pulu ə ɉu tee-tee ə dɛɛ nwɔ kalan nɛai pɔ, yɛ diɛ: Ka ŋąąkwɛlɛ nu kəlee ɓa. 20 Nu kəlee di mį́į́ di pilɛ, gbuwɔɠaai lɛɛ, ə kpɔlɔ pow-kɔw-hveelɛ laa hvɛɛ. 21 Nu kpului tii kɛ laa, ɉinąą lɔ ɓə di di lono; diɛ ɓo a nu waa lɔɔli, nɛ̨ą da lɛapəlɛɛ di laa hvo kɛ ɉu. Kɛlaa, nu kəlee ɓə nɛɠɛ mįi di pilɛ. Jesus ə hiɛ ya ŋą ( Markə 6.45-52 ; Ɉaan 6.15-21 ) 22 Ŋąąɓa, Jesus ə mo nwɔ kalan nɛai diɛ yɛ diɛ: 'Ka tɛ gələn ɉu ka ɲa teen dɔ́wɔ́. Ɲą́ą́ gbíní gáá moi nuą ŋɛ̨i diɛ: Də li di pɔ taai. 23 Nu kpului tii liɛɛ pulu, Jesus ə tɛ yee kpukpu ta ɓa, yɛ Yálá hvɛli yaa tɔ̨nɔ̨; kpinį yɛ kɛa pɛlɛ. 24 Ə kɛ tii kɛa, gələn aa mąą kwɛa gbukpu ɓa, hvaŋą yɛ ɲa takpa-takpa ɓo. 25 Yələ ɓɔi kpinį mu, Jesus ə hvilɛn ɲa ŋą yɛ pa nwɔ kalan nɛai pɔ. 26 Kɛlaa, yii kɛa yiliɠaai di ɉukpini kaa ɲa ŋą, yɛ pa di pɔ, di ɲɔ̨w, di kwəi ə pili diɛ, diɛ kɛ mą: «Haaŋąmu ka tii pai!» Diɛ tómą. Di wɔ ɲɔ̨w hu ə wiɛ. 27 Ŋąąɓa Jesus ə mo diɛ yɛ diɛ: «'Ka hvo ɲɔ̨w, ka ka liilaa; ɲą́ą́ ka tii!» 28 Piɛrə yɛ mą: «Ną́mu, akɛ yɛ́ li kɛ mą́ą́, ‹Pa bɔ́ ɲa ŋą.›» 29 Jesus yɛ mą: «'Pa!» Piɛrə ə kulɔ gələn ɉu, yɛ li Jesus pɔ ɲa ŋą. 30 Piɛrə ə gwɛlɛ kaa, vaŋą yɛ ɲa kɛ takpa-takpa, ə ɲɔ̨w, yɛ kɛa lɔ ɲa mu. Ə tómą yɛ mą: «Ną́mu, málo!» 31 Ŋąąɓa Jesus ə Ɉon a ɲee yɛ mą: «Éé kə Piɛrə! Ə́ wɔ laa na laa tiikpəɛ ɓee. Lə mɛ̨nį ɓa ɲį́nɛ̨n-ɲį́nɛ̨n ə too ə́ hu?» 32 Jesus da Piɛrə di tɛ gələn ɉu. Yili pulu vaŋą kɔ́lɔ ə haa ma. 33 Galan nɛa yiiɠaa tii kɛ gələn ɉu, di pu di kpəlin na Jesus kɔ́wɔ mu diɛ mą: «Ə́ kaa a Yálá Lon gbɔ-kpɔ a tɛ̨ą.» Jesus ə ɲɔ̨n gɛ nuą kɔ́lɔi pono Gɛnesarɛtə lɔi hu ( Markə 6.53-56 ) 34 Jesus da nwɔ kalan nɛai di bówa teen Gɛnesarɛtə lɔi hu. 35 Nɔi tii hu nuą di Jesus kaa lɔ di gɔlɔn; di nɛ̨ɛ̨mą di wəlɛɛ tɔɔ di kwɛlɛ lɔi nąą kəlee. Nu tamąą di pa a ɲɔ̨n gɛ nuą, ə gɛ, Jesus ə di kɔ́lɔi pono. 36 Di kɛi nɛ̨ɛ̨mąą hvə Jesus ɓa diɛ kɛ mą: Nɛɛ kpɛli ku ku yee hee ə́ wɔ həɠəi won ma; yaan, nuą kpɔ di yee hee nwɔ həɠə won ɓa, di kɔ́lɔi ə pono. |