Maafîu 11 - Yálá laawoo hɛɓɛ (dc)

Ɉaan-Batistə nwɔ kɛlaɠaa

¹ Ɓɛlɔwai Jesus ə kpɛɛ la a niɛwooɠaa tii kɛɛ, nwɔ kalan nɛa pow-kɔw-hveelɛi diɛ, ə həɠə laa, yɛ li, yɛ kalan gɛ nɔi tii hu taa kpɛa-kpɛaɠaa hu.

² Nąąlɔwai, Ɉaan ə kɛ gaho ŋą, ə Kristə nwɔ kólo kɛɛ mɛ̨i woo mɛ̨n; ə nwɔ kalan nɛai taɠaa tɔɔ diɛ li Jesus mąąni kɛi.

³ Diɛ kɛ mą: «Akɛti, nui kwa kɛ mąą mɛ̨nį mɛ̨n ɉii diɛ kɛ: Gaa pai, ya ɓaa a yɛ́? A wala kɛ tii, mąąnɛ̨ɛ̨ ku da kpɛli mąą kpɔn?»

⁴ Jesus ə di woo ɲąąpənə, yɛ diɛ: «Yii kaa mɛ̨n, yii kaa gaa, ka li ka ɉukulɔ Ɉaan ɓa.

⁵ Kaa mą: Ɲɛ̨ipu nuą kaa kɛɛ kaai, kɔ́wɔnwąną nuą diɛ hiɛ, hvólóɲɔ̨n gɛ nuą kɔ́lɔi aa pono, di mąą aa həɠə, wəlitini nuą diɛ mɛ̨nį mɛ̨n, haaɓɛlaa diɛ nwun. Nwɛlɛɛ lɛlɛɛ laa aa həli yeehvowolo nuą diɛ.

⁶ Nui hvo pai laa na laa pələ lɛɛi, ɲą́ą́ mą́ą́ mɛ̨nį ɓa, nwun na nɛ̨ɛ̨i.»

⁷ Yii kɛa Ɉaan nwɔ kalan nɛai di kɛi li, Jesus ə kɛi Ɉaan mąą mɛ̨nį hukulɔ nu kpului tii ɓa, yɛ kɛ diɛ: «Líi ka mo nɔi pun ɉu, lə ɓə ka gaa? Hveen gbaɠa yii hvaŋą a dumo ya ɓə mɔ̨ɔ̨?

⁸ Akɛti, lə kpɔ ɓə ka li gaai? Nu mąą yiliɛ a həɠə lɛlɛɛ? Kɛlaa, nuąi di mąą yiliɛ a həɠə lɛlɛɛ, di kaa tɔɔ pɛlɛ́ɠaa mu.

⁹ Ka li nɔi pun ɉu, lə ɓə kani ka gaa? Yálá kwəi mɛ̨nį hukulɔ mun da ɓə ka gaa? Oowei! Teą li. Gáá moi kaa, gɛnɛ̨i dɛɛ yili ɓa.

¹⁰ Mąąhɔlɔɓo, Ɉaan tii ɓə mąą mɛ̨nį pɛ̨ɛ̨ kɛ Yálá laawoo hɛɓɛ́ hu, ‹Yálá kpinį yɛ kɛ mą: Gáá pai gwə́i mɛ̨nį hukulɔ mun dɔɔi ə́ tɔwɔ, ə ə́ wɔ pələi pɛli.›

¹¹ Gáá tɛ̨ą ɓoi kaa, nui kpɔ nɛ̨ɛ̨nu ə gaa, da hvo kɛnɛ̨ li hvo tɛɛ Ɉaan-Batistə ɓa. Kɛlaa yaan, nui gaa a lokolo Yálá-taa tɔɔlaa hu, mąą nu kɛnɛ̨i dɛɛ mą.

¹² Ə həɠə Ɉaan-Batistə nwɔ kalan gɛ hvólói ɓa, ə hɛli la yiihu ɓa, Yálá-taa tɔɔlaa mɛ̨i kpulɔɔi a huwalawala, əlɛɛ, huwalawala nuą kaa bɔ di ɉɔlɔɓo a di wɔɔ.

¹³ Yálá kwəi mɛ̨nį hukulɔ nuą, da Moisə nwɔ tɔ́n, di kɛi Yálá-taa tɔɔlaa mąą mɛ̨nį ɓo, ə lɛɛ la ɉu, ə həli la Ɉaan-Batistə nwɔ yələi ɓa.

¹⁴ Gáá tɛ̨ą ɓoi kaa, akɛ ka káá bɔ ka ŋąą kaa a nɛlɛɛ; di kɛ kaa: Eli kaa pai! Mąą Eli ɓaa Ɉaan.

¹⁵ Nui wəli kaa mą, ə mɛ̨n.

¹⁶ «Lə ɓə ŋą pɛli ŋį́ nuą ŋɛ̨i kɔ́ɔn mą? Di kaa yɛ lɛapɛlɛɛ yiiɠaai di kaa heeni kwəli hɛ̨ąi, daɠaa diɛ haŋą di ɓɛlaa diɛ;

¹⁷ diɛ kɛ diɛ: ‹Kwaa kwəinɛ̨ɛ̨ tulu hvɛɛ, ka hvo mąną li; kwaa haa too, ka hvo wɔlɔ li!›

¹⁸ Yaan, Ɉaan pai ə mo, hvo kɔ̨nɔ̨n mį́į́, hvo kɛi lɔɔ kpələ, kɛlaa, di kɛ mą: ‹Ɲįnɛ̨n gaa bulu.›

¹⁹ Nu Lon ə pa, yɛ kɔ̨nɔ̨n mį́į́, yɛ gbələ. Diɛ kɛ mą: ‹Nui ŋɛ̨i nwɛi, gwəi kɛnɛ̨i, yɛ lɔɔ kpələ, yɛ ɓo a nįįhɔ̨nwɔ̨ kulɔ nuą da mɛ̨nį ɲɔ̨n gɛ nuą di ɓɛlan.› Kɛlaa, Yálá kɔ́lɔn gili ə lɛ a ɉaŋąą dúwɔ pələɠaa hu.»

Taa yiiɠaai di hvo laa na

²⁰ Taa yiiɠaai Jesus ə tɛɛ ɉu, yɛ kpalo mɛ̨nį kpɛa-kpɛaɠaa kɛ, ə kɛi kɛa haŋą diɛ. Mąąhɔlɔɓo, daaɠaa tii hu nuą di hvo di túwɔ́ pələ mąą hvalin ni.

²¹ Ə mo diɛ, yɛ diɛ: «Kpalo ɓɛlaai yɛ́, Korazɛn taa! Kpalo ɓɛlaai yɛ́, Bɛtsaida taa! Mąąhɔlɔɓo, gbalo mɛ̨nįɠaai kɛ ka hu, akɛ tii kɛ Tirə da Sidɔn, yɛ nąą nuą də li kɛ di hɔn mąąhvalin di mąąwɛli hee ɓo, di too muluun ɉu diɛ wɔlɔ, di həɠə haɠa kɛ diɛ, diɛ hiɛ di luwu ɓa, ə gɛ, di nɛ diɛ mą, daa di túwɔ́ pələ mąąhvalin.

²² Gáá tɛ̨ą ɓoi kaa, Yálá nwɔ kitii tee lɔwai, Tirə da Sidɔn taa di wɔ gahoi a hviɛlaɓo ə tɛɛ ka wɛi ɓa.

²³ Kafarnaumə taa yɛ́ kpɛli, gaa ə́ kwəi di kaa pai ə́ tɛnɛ̨i mɔ̨ɔ̨, di ə́ tɛ yələi? Kpaa-o! Di kaa pai ə́ ɲɛ̨i hvalai ə́ yɛɛ ŋąmuą taa. Mąąhɔlɔɓo, gbalo mɛ̨nįɠaai kɛ ə́ hu, akɛ tii kɛ Sodomə, yɛ mą gaa ni yɛnɛ̨ɛ̨ yiihu.

²⁴ Yili ɓə gaa mą, gáá moi kaa, Yálá nwɔ kiti teei lɔwai Sodomə taa nwɔ gahoi a hviɛlaɓo ə́ wɛi ɓa.»

Jesus Yálá Lon

²⁵ Nąąlɔwai, Jesus ə nwooɠaa ŋɛ̨i ɓo, yɛ diɛ: «Oo Ną́n Yálá, gáá ə́ hɛɠɛɛɓoi kpɔ kɛnɛ̨, yɛ́i ə́ kaa a yələkɔlɔn da lɔi di Nąmu. Gáá ə́ hɛɠɛɛɓoi, mąąhɔlɔɓo, yaa mɛ̨nį ŋɛ̨i loo kilimąą nuą diɛ da mɛ̨nį kɔ́lɔn nuą, yaa nɛ lɛapɛlɛɛɠaa diɛ.

²⁶ Oowei, Ną́n, gáá ə́ mąątɛ̨nɛ̨i yili hu, mąąhɔlɔɓo, yili ɓə kɛ a ə́ liiɓa.

²⁷ «Nąn aa hɛn gəlee tɛɛ bɔ́. Nu ta hvo Nąn gɔlɔn, hvo kɛ li Non. Nu ta hvo Non gɔ́lɔn, hvo kɛ li Nąn, ɛlɛɛ, da nui Non gaa bɔ ə Nąn nɛ mą.

²⁸ «Ka pa bɔ́, kaai ka káá mɔ̨nɔ̨ mį́į́ ka nwuɔ̨ tiɛ̨ mu, da ka hviikpɛɛ, ŋą hvįįtɔɔ tɛɛ ka pɔ.

²⁹ Ka ka nwun ɉee nwɔ́ tiɛ̨i mu, həɠə ka nwɔ́ liɛwooɠaa hon. Mąąhɔlɔɓo, níí laai, kaa kpɛli, ka hvii tɔɔ hɔlɔɓo ka lii ə laa.

³⁰ Mąąhɔlɔɓo, nwɔ́ tiɛ̨i həɠə laa hvo wala li, əlɛɛ, hvo wiɛ li.»