Maafîu 10 - Yálá laawoo hɛɓɛ (dc)

Galan nɛa pow-kɔw-hveelɛi laa

¹ Jesus ə nwɔ kalan nɛa pow-kɔw-hveelɛi təli, ə ɲį́nɛ̨n gbɛ huwalawala tɛɛ di pɔ, da ɲɔ̨n ɉuwu kəlee kpɛɛ mɛ̨nį nuą diɛ, ə mą kɛ nuąi kpɛɠii kaa diɛ.

² Nu pow-kɔw-hveelɛi Jesus ə di tɔɔ di laa ka: Dɔlɔɔ ɓa Simɔn, yii naa mɛ̨i hee ɓa a Piɛrə, da nəɠə Andre. Ɉakə da nəɠə Ɉaan diɛi kɛ a Zebede lonnii.

³ Filipə da Bartelemi, Tomasə da nįįhɔ̨nwɔ̨ kulɔ mun Matie. Ɉakə Alfe lon da Tade.

⁴ Simɔn yai kɛ a Kanaan mun, da Ɉudasə Iskariɔtə mun, yaai pai kɛ Jesus tɛŋɛ̨n gwɛlɛi.

Jesus ə nwɔ kalan nɛa pow-kɔw-hveelɛi tɔɔ

⁵ Nu pow-kɔw-hveelɛi tii Jesus ə di tɔɔ, ə di liɛwoo kɛ, yɛ diɛ: «Líi ka káá moi; ɓɛi Ɉuifəɠaa di hvo laa, 'ka hvo li nąą bələ. 'Ka hvo li kpɛli Samari taa ta hu.

⁶ Kɛlaa, 'ka li Israɛlə nuą yiiɠaai daa pili, ka di kwɛli.

⁷ Ka kɛ bələ ɓa, ka Yálá-taa tɔɔlaa mąąkpuɔ mąą wɛlɛɛ laa həli.

⁸ 'Ka li, ka ɲɔ̨n gɛ nuą kəlee kɔ́lɔi pono, 'ka haa nuą nwun, ka hvólóɲɔ̨n gɛ nuą kɔ́lɔi pono, ka di mąą həɠə, ka ɲį́nɛ̨nŋąą kpɛ nuą pulu. Bələi ka ɉɔlɔɓo la a mɛ̨inɛ̨ɛ̨, 'ka dɛɛ tii a mɛ̨inɛ̨ɛ̨.

⁹ 'Ka hvo hɛni həɠə, ka hvo wali həɠə, ka hvo wali kɔ́w kpɛli too ka yəi ɲiɓɛi.

¹⁰ 'Ka hvo hiɛ kulɔ ɓíi həɠə, ka hvo həɠə hveelɛ həɠə, ə mą kɛ, kɔ́lɔ, da hiɛ tunwɔ̨n. Mąąhɔlɔɓo, koló kɛmun mąąnɛ̨ɛ̨ ə gɔ̨nɔ̨n ɉɔlɔɓo.

¹¹ «Taa lɔpee ka tɛ ɉu, ə kɛ a taa kɛnɛ̨, ə kɛ a taa logolo, ka li, nui a ɲee hee ka mu, ka lɛɛ mąą nu pɔɔli, ə lɛɛ ɉu ka pulu pənəi lɔwai.

¹² Pɛlɛi lɔpee ka lɔ mu, ka kɛ mą: ‹Liilaa ə tɛɛ ka pɔ!›

¹³ Akɛ bɛlɛi tii mu nuą da di yee hee ka mui, ka wɔ liilaai a kɛ diɛ. Kɛlaa, da wala di yee hee ka mu, ka wɔ liilaai a lɛɛ ka yəi.

¹⁴ Pɛlɛ́i lɔpee ka lɔ mu, da taa lɔpee ka tɛ ɉu; da lənə kaai, da wala di wəli tɔɔ ka woo ɓa, ka kulɔ mąą pɛlɛ́i mu, a wala kɛ tii, ka kulɔ mąą taai hu, ka ka kɔ́wɔ ɲą muluun gbɛŋɛ̨n ka nɛɛ laa.

¹⁵ Gáá moi kaa a tɛ̨ą; gití tee lɔwai, bɛlɛi tii mu nuą, a wala kɛti, daa tii hu nuą, di wɔ kitii a tinąą walawala ə tɛɛ Sodomə da Gomorə di wɛi ɓa.»

Ɓɛlɛkpɛɛ mąą yii gaa pai

¹⁶ Jesus ə mo nwɔ kalan nɛai diɛ, yɛ diɛ: «Ka ka wəli tɔɔ! Gáá ka tɛɛi yɛ ɓɛlaa lonnii kwɛliɠaa lɔwai. Ka kɛ gili-gili yɛ kaalə, ka kɛ a ka wɔ mɛ̨nį lɛlɛɛ, yɛ gbohvoló-hvoló.

¹⁷ 'Ka ka mɛ̨i kaa, nuą mąą mɛ̨nį ɓa. Mąąhɔlɔɓo, di kaa pai kɛi lii a kaa kiti pɛlɛ́ɠaa mu; diɛ ka kɛ́lɛ́ a hvaɠa di wɔ Yálá hvɛli pɛlɛ́ɠaa mu.

¹⁸ Di kaa pai lii a kaa lɔi nąmįną lííla, ə mą kɛ tɔɔ ɓɛlaa lííla, mą́ą́ mɛ̨nį ɓa. Ə gɛ, ka mą́ą́ kɛla hvaa ɓo di ɲɛ̨i ɓa, da nuąi di hvo Yálá kɔ́lɔn.

¹⁹ Da li a kaa gɛɛnąąɠaai tii ɓa, yii mąąnɛ̨ɛ̨ ka mo, da bələi mąąnɛ̨ɛ̨ ka mo la, yili niihɛlɛn və too kaa. Nąąlɔwai, woo yii mąąnɛ̨ɛ̨ ka mo, da mo pələ, a lɛ kaa.

²⁰ Yii a tɛ ka la, ka mo. Hvó gaai, pələi ka káá pai moi, hva həɠə ka pɔ, ka Ną́n nwɔ Kilii ɓə a dɛ ka la.

²¹ «Nuą kaa pai kɛi di kpɔ-kpɔɔ ləɠəni paai, nu taɠaa diɛ yili ɲɔ̨nwɔ̨mąn gɛ a di lonnii. Lon yɛ pɛlɛ gaamun ma, baa mɛ̨nį ɓa.

²² Ka wɛli a kpɛɛ nu kəlee ɓa náá mąą mɛ̨nį ɓa, kɛlaa nui a tɔɔ a nwąnąi ə lɛɛ ɉu yɛnɛ̨ɛ̨ ɲąąkpɛɛi lɔwai, mąą nu ɓə nwun mąą a ɓo.

²³ Akɛ da ka ɓɛlɛkpɛɛ kaa daa yiihu, 'ka pu, ka li da kpɛli hu. Gáá tɛ̨ą ɓoi kaa, ka hvo pai kpɛɛi a Israɛlə lɔi taaɠaa kəlee hu hiaa Nu Lon yɛ pa.

²⁴ «Kalan non hvo kɛnɛ̨ li hvo tɛɛ galamɔ̨ɔ̨ ɓa, luwɔ hvo kɛnɛ̨ li hvo tɛɛ nąmu ɓa.

²⁵ Mąąnɛ̨ɛ̨ lɔ kalan non ə kɛ yɛ galamɔ̨ɔ̨. Luwɔ ə kɛ yɛ nuwɔ nąmu. Akɛ di kɛ pɛlɛ́ nąmu ɓa: Beɛlzebulə, gu hvo mun kɛ bɛlɛ́n nuą! Da di laa hee a ɲɔ̨nwɔ̨ɔ̨ ə tɛɛ la bɛlɛ nąmu ɓa.»

Ka hvo ɲɔw hɛn da ɓa

²⁶ «Ka hvo ɲɔw nui lɔpee ta ɓa. Mɛ̨nį yiiɠaai mɛ̨i kpulɔɔ, mɛ̨i kaa pai həɠəi, nu kəlee di gɔlɔn.

²⁷ Yii ŋą mo kpinįi, ka mo hvóló ŋą. Yii da mo kaa a ɲįį-ɲįį woo, ka mo a lolo.

²⁸ Nui a nu paa, hva pɛli hɛn da kɛi a níi, ka hvo ɲɔw mą. Nui a pɛli nu paai, ə níi pili ɉahanąmą nwɔ̨n ɉu, kaa mun ka ɲɔw mą.

²⁹ Kɛlɛi nwɛ̨ni pəlɛɛ hveelɛ hɔ̨nwɔ̨ kaa a wali tɔ̨nɔ̨. Kɛlaa yaamun, di tɔ̨nɔ̨ kpɛli hva too lɔi ɓa, akɛ hvo a ka Ną́n niiɓa?

³⁰ Ka wɛi, ka nwun nɛɠaɠaa kəlee lonɔɔ kpaɠala kaa mą.

³¹ Ka hvo ɲɔw, ka hviɛlaɓoɔi ə tɛɛ nwɛ̨ni pɛlɛ́ɠaai tii diɛ.»

Jesus mąą kɛla hvaa ɓo mɛ̨nį nuą diɛ

³² Jesus ə mo diɛ, yɛ diɛ: «Nui a mo nu kpɔn ɉu yɛ mą, ɲą́ą́ ɓə gáá a Nąmu, ɲą́ą́ gbɛli, ŋą mąą nu lɛ Ną́n gaa yələkɔlɔn ɉu mą, gɛ́ mą, mąą nu kaa a nwɔ́ɔ́.

³³ Kɛlaa, nui a lənə mą́ą́ nuą ɲɛ̨i ɓa, ɲą́ą́ gbɛli ŋą lənə lɔ mąą nu ɓa Ną́n ɲɛ̨i ɓa, yai gaa yələkɔlɔn ɉu.»

Və́ pa li a liilaa, ŋą pa a kɔ́

³⁴ «Ka hvo ka kiliŋąhiɛ kaa kɛ mą: Liilaa ɓə ŋį́ paa la. Və́ kɛ pa li a liilaa, kɛlaa ɓɔwa kwɛaa ɓə ŋį́ paa la.

³⁵ Ŋą́ pa, ŋį́ lon ɉulɔnu da nąn di ɓɛlaɓo, ŋį́ lon nɛ̨ɛ̨nu da nee di ɓɛlaɓo; ŋį́ lon nɛ̨ą da ɉilɛ-lee di ɓɛlaɓo.

³⁶ Nu ɲowo ɓa pai kɛi a ɲəi bɛlɛ́n nuą.

³⁷ Nui a nąn da nee di wɛli la kɛ ə tɛɛ mą́ą́, a kɛ tii hvo ɓaa nwɔ́ nui ta. Nui a non ɉulɔnu a wala kɛ tii non nɛ̨ɛ̨nu wɛli la kɛ ə tɛɛ mą́ą́, a kɛ tii hvo ɓaa nwɔ́ nui ta.

³⁸ Nui a wala nwɔ kolɔwa həɠə hvo hvilɛn búlú, a kɛ tii nwɔ́ nui ta hvəli.

³⁹ Nui a nɔw mąą liihɛlɛn ɉee, a hvɛɠɛla. Nui a mą́ą́ mɛ̨nį niihɛlɛn ɉee ə tɛɛ gbɔwɔ nɔw ɓa, a lɛɛ a vulú.»

Hvɛla kulɔ

⁴⁰ «Nui a ɲee hee ka mu, a kɛ tii, mąą nu aa ɲee hee mú. Nui yaan a ɲee hee múi, a kɛ tii, aa ɲee hee nui dɔ́ɔ́ mu.

⁴¹ Nui a ɲee hee Yálá kwəi mɛ̨nį hukulɔ nuą ŋɛ̨i ta mui, mąąhɔlɔɓo, Yálá kwəi mɛ̨nį hukulɔ mun ni, mąą nui a vɛla hɔlɔɓo yɛ Yálá kwəi mɛ̨nį hukulɔ mun. Nui a ɲee hee nu haŋąą ta mu, mąąhɔlɔɓo, ɉaŋąąi Yálá ɲɛ̨i ɓa, mąą nu a mąą hvɛla hɔlɔɓo Yálá yəi.

⁴² Nui lɔpee a kpələ kɔ́wɔ ɲąątɔ̨nɔ̨ tɛɛ nɛapəlɛɛ ŋɛ̨i ta pɔ, mąąhɔlɔɓo, nwɔ́ kalan non ni, mąą nui a mąą hvɛla hɔlɔɓo.»