Lukə 3 - Yálá laawoo hɛɓɛ (dc)Ɉaan-Batistə nwɔ kalan gɛ woo ( Matie 3.1-12 ; Markə 1.1-18 ; Ɉaan 1.19-28 ) 1 Sesarə Tibɛrə nwɔ tɔɔlaa gwɛlan pow-gɔw-lɔɔli lɔwai, Pɔnsə Pilatə ə kɛ a gbahalanamą Ɉude lɔi hu. Herodə yɛ ɓo a tɔɔmun Galile lɔi hu; nəɠə Filipə yɛ ɓo a tɔɔmun Iture lɔi da Trasonitə lɔi nwun na. Lisiasə yɛ ɓo a tɔɔmun Abilɛnə lɔi hu. 2 Nąąlɔwai ɓə Hanə da Kaifə di kɛ la a ɉala laa həli nuą kpɛa-kpɛaɠaa; nąąlɔwai tii lɔ ɓə Ɉakali lon Ɉaan ə Yálá woo mɛ̨n na ɲɛa lɔi pun ɉu. 3 Ɉaan ə kɛi lia tɛɛ Ɉurdɛn kwɛlɛ taaɠaa hu, yɛ Yálá laawoo laa həli, yɛ kɛ diɛ: «Ka kpəla mɛ̨nį ɲɔ̨n gɛɛ ɓa, ka ka túwɔ́ pələɠaa mąą hvalin, ka pa ŋį́ ka mąąwaa, əgɛ, Yálá ə ka kɛ nɛ̨ŋɛ̨nŋąa mąąhvaalɛɛ.» 4 Yili ə kɛ tii, əgɛ, mɛ̨nį Yálá kwəi mɛ̨nį hukulɔ mun Esai ə bɛ̨ɛ̨ nąą ə hvɛɛ; ə bɛ̨ɛ̨ yɛ mą: «Nu ta woo kaa tɔɔi ɲɛa lɔi pun ɉu, yɛ kɛ mą: Ka Ną́mu nwɔ pələi pɛli ka bələ pɛlɛɛɠaa kəlee haŋą. 5 Ka molonŋąa kəlee laahvɛɛ, Ka ɲee kpɛa-kpɛaɠaa kəlee taɠa. Ka bələ huhiɛɛɠaa kəlee haŋą, Ka nowa pɛlɛɛɠaa kəlee hu kpulu. 6 Yálá nwɔ nwun mąąɓo laa yii aa dɛɛ, nu kəlee kaa pai gaai.» 7 Nu kpulu kɛnɛ̨ ə kɛi pai Ɉaan pɔ, əgɛ, ə di mąąwaa. Ɉaan ə kɛi mo diɛ, yɛ kɛ diɛ: «Kaa yii ka wɔ mɛ̨nį ɲɔ̨nwɔ̨ɔ̨ ŋɛ̨i yɛ tumo kwəi lonni, gbɛɛ ɓə kɛ kaa ka pu ka həɠə Yálá nwɔ liiɲąnwanąąi ŋɛ̨i pai dɔwɔ? 8 Yili ɓə gaa mą, túwɔ́ pələ yii a nɛ yɛ kaa ka yii pələ ɲɔ̨nwɔ̨ɔ̨ɠaa mąąhvalin, mąąnɛ̨ɛ̨ ka yili kɛ. Ka hvo ka kiliŋąhiɛ kaa kɛ diɛ: ‹Ku kalaɓɔlɔ ɓaa a Abrahamə.› Gaa moi kaa, Yálá a pɛli mą ə gwɛniɠaa ŋɛ̨i mąą pənə ə di kɛ a Abrahamə huwuhu nuą. 9 Yili mąą mɛ̨nį ɓa: Ɲowa ɲąą a hee nwulu hamu ɓa. Wului lɔpee a wala ɓa, a nɛlɛɛ, da dee, ə kɛ a kwɛi di gələn.» 10 Nu kpului tii kəlee di Ɉaan mąąni kɛ diɛ mą: «Akɛti, lə ɓə Yálá kaa bɔ ku gɛ?» 11 Ə di woo pulu pənə yɛ diɛ: «Nui həɠə hveelɛ kaa ɲei, ə dɔ̨nɔ̨ tɛɛ nui da hvo ɲei bɔ; nui kɔ̨nɔ̨n gaa ɲei, ə mɛlaa kɔ́.» 12 Nįįhɔ̨nwɔ̨ kulɔ nuą diɛ kpɛli di pa, əgɛ, ə di mąąwaa. Di Ɉaan mąąni kɛ diɛ mą: «Kalamɔ̨ɔ̨, akɛti, lə ɓə mąąnɛ̨ɛ̨ kuɔ kpɛli ku gɛ?» 13 Ə di woo pulu pənə yɛ diɛ: «Mąą hvo nɛ̨ɛ̨li ka hvo nįįhɔ̨nwɔ̨ ta laa mɛ̨i nuą diɛ gulɔ, ə lɛɛ lɔ a yii di vaaɓo kaa.» 14 Holahiɠaa di Ɉaan mąąni kɛ diɛ kpɛli diɛ mą: «Lə ɓə mąąnɛ̨ɛ̨ ku gɛ?» Ɉaan yɛ diɛ: «Ka hvo lɛɛ pɛlɛ nu ta ɓa, ka hvo toomɛ̨i hɛn ɉəɠə nu ta yəi. Mąąnɛ̨ɛ̨ ka hvɛla ə ka lii hon.» 15 Nuą tii kəlee laaikɛ na, diɛ di kiliŋąhiɛ diɛ kɛ diɛ: Ɉaan ɓə kpɔ kiɛ a nwun mąąɓomun yii Yálá ə naakwɛlanmo. 16 Ɉaan ə mo nuą tii kəlee diɛ, yɛ diɛ: «Nwɛ́i gáá ka mąąwaai yai; kɛlaa, nu ta kaa pai pai, huwalawala kɛnɛ̨ kaa ɲəi dɛɛ mą́ą́, ɲą́ mąą hvo nɛ̨ɛ̨li kpɛli a ŋą kɔ́lɔ laa yili yɛli hvólóon mun. Gaa pai ka mąąwaai a Kili-Mąąhəɠɛɛ da nwɔ̨n. 17 Nwɔ laɠai kaa ɲei yɛ paa la, gaa pai gɔw da gala di ɓɛlaɓoi, a gɔw pu nwɔ hɛnŋąŋąi hu, ə gala kələn a nwɔ̨n yii hva luwun.» 18 Ɉaan ə kɛi nuą tii liɛwoo ɓo, yɛ wɛlɛɛ woo lɛlɛɛ ɓo diɛ. 19 Ɉaan ə haŋą tɔɔmun Herodə ɓa, mąąhɔlɔɓo, aa hvilɛn nəɠə Filipə nɛ̨ą Herodiadə pulu aa ɉəɠə a nɛ̨ą, ə lɛɛ da túwɔ́ pələ ɲɔ̨n da kpɛliɠaa yii əgɛ. 20 Herodə ə gbɔwɔ nwɔ túwɔ́ pələ ɲɔ̨n tii da laa mɛ̨i, ya ka tii ə Ɉaan hon na ə doo gaho ŋą. Ɉaan ə Jesus mąąwaa ( Matie 3.13-17 ; Markə 1.9-11 ) 21 Ɉaan ə nu kpului tii mąąwaa lɔ, ə Jesus yaa kpɛli mąąwaa. Ɓɛlɔwai ə kɛi Yálá hvɛli la, yələkɔlɔn nąą ə ɓo; 22 Kili-Mąąhəɠɛɛ ə yɛɛ mɛ̨i yɛ tonwələn. Woo ta ə tɔɔ yɛ həɠə yələkɔlɔn ɉu, yɛ kɛ mą: «Yɛ́ ɓə ə́ kaa a nííɓa Lon ɉulɔnu, yii nwɛli kaa mą́ą́; ŋą́ą́ nííɓa mɛ̨nįɠaa kəlee lɛɛ yɛ́.» Jesus galaɓɔlɔni laa ( Matie 1.1-17 ) 23 Jesus kaa kwɛlan ə kɛ pu-haaɓa ɓɛlɔwai ə nwɔ kolói kɔ́wɔ tɔɔ la. Yɛ bələi nuą di wɔ kiliŋąhiɛ ə kɛ la, diɛ kɛ mą: nąn ma kɛ a Ɉosɛfə, Ɉosɛfə yaa nąn ma kɛ a Heli. 24 Heli nąn ma kɛ a Matatə, Matatə nąn mąą Levi, Levi nąn mąą Mɛlsi. Mɛlsi nąn mąą Ɉanąąi. Ɉanąąi nąn mąą Ɉosɛfə. 25 Ɉosɛfə nąn mąą Matatiasə. Matatiasə nąn mąą Amɔsə, Amɔsə nąn mąą Naumə. Naumə nąn mąą Hesli. Hesli nąn mąą Nagai. 26 Nagai nąn mąą Maatə. Maatə nąn mąą Matatiasə, Matatiasə nąn mąą Semein. Semein nąn mąą Iosɛkə. 27 Iosɛkə nąn mąą Ioda. Ioda nąn mąą Ioanan, Ioanan nąn mąą Resa. Resa nąn mąą Zorobabɛlə. Zorobabɛlə nąn mąą Salatiɛlə, Salatiɛlə nąn mąą Neri. 28 Neri nąn mąą a Mɛlsi, Mɛlsi nąn mąą Adi. Adi nąn mąą Kosamə. Kosamə nąn mąą Ɛlmadamə, Ɛlmadamə nąn mąą Ɛrə. 29 Ɛrə nąn mąą Ɉosue. Ɉosue nąn mąą Eliɛsɛrə, Eliɛsɛrə nąn mąą Iorimə. Iorimə nąn mąą Matatə. Matatə nąn mąą Levi, Levi nąn mąą Simeɔn. 30 Simeɔn nąn mąą Ɉuda. Ɉuda nąn mąą Ɉosɛfə, Ɉosɛfə nąn mąą Ionamə. Ionamə nąn mąą Ɛliakimə. 31 Ɛliakimə nąn mąą Melea. Melea nąn mąą Mɛna. Mɛna nąn mąą Matata, Matata nąn mąą Natan. Natan nąn mąą Davidə. 32 Davidə nąn mąą Ɉɛse, Ɉɛse nąn mąą Obɛdə, Obɛdə nąn mąą Boozə. Boozə nąn mąą Sala. Sala nąn mąą Naasɔn. 33 Naason nąn mąą Aminadabə, Aminadabə nąn mąą Admin. Admin nąn mąą Arni, Arni nąn mąą Ɛsrɔmə. Ɛsrɔmə nąn mąą Farɛsə, Farɛsə nąn mąą Ɉuda. 34 Ɉuda nąn mąą Ɉakɔbə, Ɉakɔbə nąn mąą Isaakə. Isaakə nąn mąą Abrahamə, Abrahamə nąn mąą Tara. Tara nąn mąą Nakɔrə. Nakɔrə nąn mąą Serukə. 35 Serukə nąn mąą Ragau, Ragau nąn mąą Falekə. Falekə nąn mąą Ebɛrə. Ebɛrə nąn mąą Sala. 36 Sala nąn mąą Kainamə, Kainamə nąn mąą Arfasadə. Arfasadə nąn mąą Sɛmə. Sɛmə nąn mąą Noe. Noe nąn mąą Lamɛkə, Lamɛkə nąn mąą Matusala. 37 Matusala nąn mąą Henɔkə, Henɔkə nąn mąą Iarɛtə. Iarɛtə nąn mąą Maleleɛlə. Maleleɛlə nąn mąą Kainamə, Kainamə nąn mąą Enɔsə. 38 Enɔsə nąn mąą Sɛtə, Sɛtə nąn mąą Adamə, Adamə nąn mąą Yálá. |