Lonon mo 9 - Yálá laawoo hɛɓɛ (dc)

Pakə hɛli pu yələ

¹ Yai-Laa ə mɛ̨nį ɓo Moisə ɓa Sinai nɔi pun ɉu, ə kɛ tii di kulaa Eziptə lɔi hu, gwɛlan veelɛnąą nwɔɔ ɲąnin dɔlɔɔ hu li kɛ, yɛ mą:

² «Mąąnɛ̨ɛ̨ Israɛlə lonnii di pakə hɛli pu a bu yələ kpɔkpɔɔ.

³ Ɲąnin ŋɛ̨i ka káá ɉu, nwɔ hvóló pow kɔ́w nąąn ɲələ hvitili ɓa lɔwai, ka bu pələ kɛ kpɔlɔ yɛ bələi pakə hɛli mąą tɔ́n gaa la a bɔlɔ.»

⁴ Moisə ə mo Israɛlə lonnii diɛ, di pakə hɛli pu.

⁵ Di ɉɛlii tii pu Sinai nɔi pun ɉu, a ɲąnin dɔlɔɔi tii nwɔ hvóló pow kɔ́w nąąn ɲələ, hvitili ɓa; bələi tii Yai-Laa ə Moisə tí la, bələ kpɔlɔ ɓə Israɛlə lonnii di gɛ la.

⁶ Kɛlaa, tɔ́n ə kɛ nu taɠaa diɛ a volói tii, mąąhɔlɔɓo daa kɛ tunwɔ̨n powa ɓa. Di hva pɛli kɛ pakə hɛli pui a volói tii. Di mo Moisə da Aarɔn diɛ a volói tii lɔ,

⁷ diɛ diɛ: «Ku mąą hvo həɠə li, mąąhɔlɔɓo kwaa tunwɔ̨n powa ɓa. A kɛ tii, mąą hvo nɛ̨ɛ̨li ku hvo pa a ku wɔ kɔ́ɓo hɛnŋąą Yai-Laa pɔ yɛ bələi ku ɓɛlaa kaa gɛi la, mąąhɔlɔɓo yili kun gaa mą?»

⁸ Moisə yɛ diɛ: «Ka mą́ą́ kpɔn, ŋį́ li ŋį́ Yai-Laa mąąni kɛ, Ə mɛ̨nį ta mo mą́ą́ ka mąą mɛ̨nį hu.»

⁹ Moisə ə Yai-Laa mąąni kɛ. Yai-Laa yɛ mą:

¹⁰ «'Li ə́ mo Israɛlə lonnii diɛ yɛ diɛ: Akɛ tɔ́n a kɛ nu ɓa, mąąhɔlɔɓo aa tunwɔ̨n powa ɓa, a wala kɛ tii ə kɛ hiɛ ɓa kwɛa la, mɛ̨nįi ŋɛ̨i gáá nɛi kaa, gaa a ka wɔɔ ka ka lonnii, ya ɓaa: Mąą nu a pɛli mą ə pakə hɛli pu Yai-Laa laa hu.

¹¹ Kɛlaa, akɛ a ɲąnin veelɛnąą nwɔ hvóló pow kɔ́w nąąn ɲələ hvitili ɓa, ya ɓə da pɛli di ɉɛlii tii pu la. Da mɛlaa lon mįi a lɛɠɛi dɛ hɛn və ɉu, da nɔ́w nwąnąąɠaa.

¹² Di hva da hee yələ hvo ɓo, di hva ɉuwɔ kɔ́w ta yali. Da ɉɛli pu kpɔlɔ yɛ bələi mąą tɔ́n bɔlɔ kaa la.

¹³ Kɛlaa, akɛ tɔ́n a wala kɛ nu ta ɓa a mɛ̨nį ta mąą mɛ̨nį, hvo nwɔ̨nɔ̨ hiɛ ɓa, a pakə hɛli mąą mɛ̨nį viikpɛɛ kulɔ, mąą nui tii, ɓə da gulɔ nwɔ nuą lɔwai, pai tii hvo mo li a nwɔ kɔ́ɓo hɛn Yai-Laa pɔ a guui tii di dɔɔi. Mąą nu nwɔ nɛ̨ŋɛ̨n nwulu a lɛɛ gbɔwɔ nwuɔ̨.

¹⁴ Akɛ nwɛ̨ąi gaa heeni ka kɔ́wɔ mɛ̨i, akɛ bɔ ə pakə hɛli pu Yai-Laa laa hu, bələi lɔ pakə hɛli mąą tɔ́n gaa la, bələ lɔ ɓə a gɛ la. Ɓɛlaɓo hva kɛ ka wɛi pu pələ da nwɛ̨ą nwɛi pu pələ di lɔwai.»

Tulɔ kpilinin ə pɛlɛ gee kaa kələ mɛ̨i

¹⁵ Ɲələi ŋɛ̨i di gee kaa kələ tɔɔ la; tulɔ kpinįn ə yɛɛ, ə pɛlɛ mɛ̨i, ɓɛi ŋɛ̨i mįnɛ̨ kəhi ə kɛ laai. Yələ wulii pɔ, ə kɛ nąą nwun mɛ̨i yɛ nwɔ̨n gɛ pələ, ə lɛɛ ɉu yələ ə ɓɔ.

¹⁶ Dulɔ kpinįn tii, ə kɛ lɔ tii yələ kəlee, ə kɛ gɛɛnąąi tii mɛ̨i; kpinį a pɛlɛ yɛ ɓo yɛ nwɔ̨n.

¹⁷ Ɓɛlɔwai lɔpee dulɔ kpinįn tii a muhəɠə kɛ la ɉəɠə pɛlɛ́ mɛ̨i, Israɛlə lonnii da nɛɛ mą di di muhəɠə diɛ li. Ɓɛi nwɔ̨nɔ̨ a tɔɔ laa, nąą ɓə da diɛ taa pu laa.

¹⁸ Bələ ɓə di kɛi di muhəɠə la diɛ li, awala kɛ tii diɛ daa pu kɛɛnąą ta, yɛ bələi Yai-Laa a di tí la. Bələi lɔ kɛ dulɔ kpinįn a lamun la laa, bələ lɔ ɓə di kɛi lamu la laa.

¹⁹ Dulɔ kpinįn a kɛi lamun gələ mɛ̨i, Israɛlə lonnii di kɛi Yai-Laa nwɔ tíɓoɠaai ɲɛ̨i kulɔ, di hva kɛ həɠə laa.

²⁰ Da a kɛ, dulɔ kpinįn hva lamun pɛlɛ ni gələ mɛ̨i, da daa pu, di ɉəɠə diɛ li yɛ bələi Yai-Laa a di tí la.

²¹ Da a kɛ, dulɔ kpinįn a pɛlɛ gələ mɛ̨i, yələ wala pɔ, ə muhəɠə. Ɓɛlɔwai a muhəɠə la, Israɛlə lonnii diɛ kpɛli, da di muhəɠə diɛ li. Da a kɛ, ə hvóló tɔ̨nɔ̨ da kpinį tɔ̨nɔ̨ kɛ. A muhəɠə lɔ, diɛ kpɛli di di muhəɠə diɛ li.

²² Dulɔ kpinįn a kɛ lɔ pɛlɛ ni gələ mɛ̨i, bələi lɔ a lamun na laa, bələ lɔ ɓə diɛ kpɛli da lamun na gɛɛnąąi tii, yɛi kɛ a hvóló hveelɛ, ɲąnin dɔ̨nɔ̨, a wala kɛ tii a lɔwai hu kwɛaa, Israɛlə lonnii da kɛ lɔ gɛɛnąąi tii, di hva həɠə laa. Ɲələi dulɔ kpinįn a muhəɠə la, ɲələ ɓə da li la.

²³ Da diɛ taai pu kɛɛnąą ta, a wala kɛ tii di ɉəɠə diɛ li, yɛ bələi Yai-Laa a di tí la. Diɛ Yai-Laa nwɔ tíɓoɠaai kɛ, yɛ bələi ə mąą liɛwoo tɛɛ la Moisə pɔ.