Lonon mo 6 - Yálá laawoo hɛɓɛ (dc)

Nuąi da di kpɔwɔ tɛɛ Yálá pɔ

¹ Yai-Laa yɛ Moisə ɓa:

² «'Mo Israɛlə lonnii diɛ, yɛ́ diɛ: «Hulɔnu ta, a wala kɛ tii, nɛ̨ɛ̨nu, a nwoo kwɛlɛ yɛ kɛ diɛ gaa gbɔwɔ tɛɛi Yai-Laa nwɔ kólói pɔ, a nwoo kwɛlɛ, yɛ gbɔwɔ tɛɛ Yai-Laa pɔ,

³ mąą nu hva lɔɔ kpələ da kpələ hɛn lɔpee a nu nwun ɉu tinɛ̨n. Hva lɔɔ kponą lɔpee ta kpələ, hva viɲə ya kpələ, hva nwunu mįi ə mą kɛ gbala.

⁴ Ɓɛlɔwai gaa ni la a naakwɛlanmoɔ Yálá ɓa, hɛn kpɔ da bɛli lɔɔ ə ɓo ɉu, a wala kɛ tii viɲə ɓá ə ɓo ɉu, yɛ ə kɛ a gɔw awala kɛ tii gɔlɔ, hva da mįi.

⁵ Ɓɛlɔwai kpɔ tii ə gbɔwɔ tɛɛ la Yai-Laa pɔ, nwun mo kwɛli hva lɛɠɛ nwun ma, ə lɛɛ ɉu ɲələi ə vaa ɓo ə ɉəli. Mąąnɛ̨ɛ̨ ə kɛ a nu mąąhəɠɛɛ, ə nwun nəɠa lɛɛ laa ə tɛ.

⁶ «Volóɠaai tii gaa la a Yai-Laa nwɔɔ, mąą hvo nɛ̨ɛ̨li hvo li nu powa kɛɛnąą.

⁷ Ə kɛ a nąn mąą mɛ̨nį, ə mą kɛ kpɛli nee, nąn non ɉulɔnu, ə mą kɛ mąąhala; mąą hvo nɛ̨ɛ̨li hvo gbɔwɔ mąąliɓi yɛ tunwɔ̨n da powa ɓa, mąąhɔlɔɓo gbɔwɔ tɛɛ tii ə mo Yálá pɔ, gɔlɔn ɉɛn gaa nwuɔ̨.

⁸ «Volóɠaai kpɔ tii ə gbɔwɔ kɛ la a Yai-Laa nwɔɔ, akɛ a nu mąąhəɠɛɛ.

⁹ Nu ta a haa gwɛlɛ dɛɠii, mąą a liɓi nu powai tii mąą mɛ̨nį ɓa, a kɛ tii nwɔ lɔwai a tee mɛ̨i. Hvóló mɛ̨ihveelɛ tɛɛ pulu, mąą a həɠə, a nwun bu a volói tii.

¹⁰ Voló mɛ̨ihaaɓa yələ, a pa a ɓopo hveelɛ, a wala kɛ tii tonwələn veelɛ, ɉaláá laa həli mun bɔ, gee kaa kələ laaləi.

¹¹ Ɉaláá laa həli mun a dɔ̨nɔ̨ kulɔ a nɛ̨ŋɛ̨n mąąhvaalɛɛ haláá, ə dɔ̨nɔ̨ kɛ a Yálá mąąwiɛ haláá, ɛlɛɛ, ə nɛ̨ŋɛ̨n mąąhvaalɛɛ kóló kɛ nui tii gbɔwɔ tɛɛi Yálá pɔ mɛ̨i. Nɛ̨ŋɛ̨n ə ɉəɠə nu powa ɓa, yili mąą mɛ̨nį ɓa. Mąą yələ, nui tii a nwun mąąhəɠə.

¹² A pənə nwɔ̨nɔ̨ ə gbɔwɔ laakwɛlanmo Yai-Laa ɓa, yɛ bələi ə gɛ la a voló tɔlɔɔ yələi ə gbɔwɔ kwɛlɛ la Yai-Laa ɓa. A pa a kwɛlan dɔ̨nɔ̨ ɓɛlaa lon, a bɔɔŋą pɛli haláá hɛn. Voló yiiɠaa tii laa hva kɛ ɉu, mąąhɔlɔɓo, gbɔwɔ kwɛlɛi ə mo, ə mąą kala.

¹³ «Nu a gbɔwɔ laakwɛlanmo Yálá ɓa, ɉon bələ ka: Ɲələi ə gbɔwɔ laakwɛlanmo la, naakwɛlanmo hvólóɠaa tii da tɛɛ, da pa a mąą nu gee kaa kələ laaləi.

¹⁴ A pa a kwɛlan dɔ̨nɔ̨ ɓɛlaa hilɛ lon kpɛɠii hva kɛ mą, a Yai-Laa kɔ́ hɛn a nɛ̨ŋɛ̨n mąąhvaalɛɛ haláá hɛn, ə bɛlɛ ɓɛlaa hilɛ tɔ̨nɔ̨ ɓa yii kpɛɠii hvo mą, a liilaa haláá.

¹⁵ Kpɔlɔ tɔ̨nɔ̨ laa hvɛɛ a lɛɠɛ mɔ̨n ŋąą yii lɛɠɛ tɛ hɛn və ɉu, da nwɔ̨mįi yii di ɲɔwɔɔn a wulɔ, da Yálá kɔ́ hɛnŋąą, bɛlɛɛ lɔɔ ɓa, da wulɔ yii mąąnɛ̨ɛ̨ ə paa la.

¹⁶ Ɉaláá laa həli mun a li a ɉɛnŋąą tii kəlee Yai-Laa lííla, ə nɛ̨ŋɛ̨n mąąhvaalɛɛ haláá da liilaa haláá kulɔ.

¹⁷ Mɛlaa hilɛ nwɛi, a gulɔ Yai-Laa ɓa a liilaa haláá, bɛlɛɛ nɛɠɛɠaa tii gbɔlɔ hu yai di hvo dɛ hɛn bu li ɉu. Yili pulu, ɉaláá laa həli mun ə Yálá kɔ́ hɛnŋąą tii laa həli, diɛ ɓaa: nwulɔ da nɔɔ.

¹⁸ Nąąlɔwai, nui tii gbɔwɔ laakwɛlanmo Yálá ɓa, nwun nəɠai tii a kɛ nwuɔ̨, da bu gee kaa kələ laaləi, nwun nəɠai tii kɛ nwuɔ̨, naakwɛlanmoɔ Yálá ɓa, a nwun nəɠai tii həɠə, ə bu nɛ̨ɛ̨yɔwɔ laa haláá hɛn tii kələn ɉii nwɔ̨n ɉu.

¹⁹ Ɉaláá laa həli mun a mɛlaa hilɛ yee tɔ̨nɔ̨ həɠə, yii daa mɔ̨n, ə bɛlɛ nɛɠɛ ɓa, yii gaa gbɔlɔ hu lɛɠɛ tɛ hɛn və ɉu, da nwɔ̨mįi tɔ̨nɔ̨, yii dɛ hɛn və ɉu, ə di laa nui tii yee ŋą, nwun buɔ pulu.

²⁰ Ɉaláá laa həli mun a di laa həli Yai-Laa ɓa, a di laa həli pələ. Ɉaláá laa həli mun nwɔɔ li, bɛlɛɛ gəŋə ɓa, da ɉuwɔ nwɛlɛ yii gaa a nwɔɔ a bɔlɔ. Ə həɠə nąą lɔwai ɓa, ɉulɔnui tii a pɛli kɛa ə lɔɔ kpələ.

²¹ Nui a gbɔwɔ laakwɛlanmo Yálá ɓa, bələ ɓə da ɉon bələ kɛ tii la, ɉɛn mąą nɛ̨ɛ̨ ə Yai-Laa kɔ́ la, ya ka tii, gbɔwɔ laakwɛlanmo mɛ̨nį hu. Akɛ ə hɛn da kpɛli laakwɛlanmo Yai-Laa ɓa, ɉɛn ə naakwɛlanmo, yɛ bələi nu kpɔwɔ tɛɛ mɛ̨nį Yálá pɔ ə mo la, mąąnɛ̨ɛ̨, ə bɔ mɛ̨nį kɛ.»

Lúwɔ́ too pə́lə́

²² Yai-Laa yɛ Moisə ɓa:

²³ «'Mo Aarɔn da nonnii diɛ, yɛ́ diɛ: «Bələi da lúwɔ́ too la Israɛlə lonnii diɛ, bələ ka:

²⁴ «‹Yai-Laa ə lúwɔ́ too kaa, ə ka mɛ̨i kaa.

²⁵ Yai-Laa ə ɲɛ̨i lɛlɛɛ hee kaa, ə ka kɔ́ a nwɔɔ mɛ̨inɛ̨ɛ̨.

²⁶ Yai-Laa ə ɲɛ̨i pili ka mɛ̨i, ə liilaa tɛɛ ka pɔ.›

²⁷ «Da Yai-Laa təli tii a naa, Israɛlə lonnii mɛ̨i, yaa tii a Yai-Laa a lúwɔ́ too Israɛlə lonnii diɛ.»