Lonon mo 5 - Yálá laawoo hɛɓɛ (dc)

Nuąi tɔ́n a kɛ diɛ, ka di kulɔ di ɓɛlaa lɔwai

¹ Yai-Laa yɛ Moisə ɓa:

² «'Mo Israɛlə nuą diɛ, yɛ́ diɛ: «Hvoló ɲɔ̨n gɛ nuą, nuąi nu mąą kala yá ɲɔ̨n gaa diɛ, nuąi daa di mąąliɓi a di yee pɛlɛɛ powa ɓa; ka nuą tii kəlee kulɔ daa pulu pələ.

³ Ka di kpɛ, ɉinąą mąn, nɛ̨ąą mąn, ka di kpɛ taai. Di hvo Israɛlə lonnii di wɔ taai mąąliɓi. Mąąhɔlɔɓo, gáá Israɛlə lonnii lɔwai.»

⁴ Israɛlə lonnii di gɛ tii, di nuą tii kulɔ daai, Israɛlə lonnii di gɛ yɛ bələi Yai-Laa ə mo la Moisə ɓa.

Nuą pɔɔŋą pɛli mɛ̨nį

⁵ Yai-Laa yɛ Moisə ɓa:

⁶ «'Mo Israɛlə lonnii diɛ, yɛ́ diɛ, «Akɛ hulɔnu, awala kɛ tii, nɛ̨ɛ̨nu, a ɉɔn gɛ a Yai-Laa, ə nɛ̨ŋɛ̨n ɉəɠə mɛlan gaalon ma, mąą nu aa kɛ a hɔn mąą mun.

⁷ Nɛ̨ŋɛ̨n nu a ɉəɠə, mąąnɛ̨ɛ̨ ə hvaa mą. Nui ɉɔn gɛ, ɉɛn ə mɛlan vulu la, a ɲąą pɛliɛ tɛɛ bɔ, ə ɉɛn tii ɉɔ̨nwɔ̨ heei lɔɔli dɔ̨nɔ̨ pɛlɛ mą.

⁸ Nui di vulu, gaayɔwɔ ta a wala kɛ laa, ɉɛn di vulu ɉu diɛ bɔɔ tɛɛ, mąąnɛ̨ɛ̨ di dɛɛ Yai-Laa pɔ, ya ɓaa ɉaláá laa həli mun, bɛlɛɛ nu pɔɔŋą pɛli ɓɛlaa hilɛ ɓa, ya ɓə da nɛ̨ŋɛ̨n mąąhvaalɛɛ kóló kɛ la nui ɉɔn gɛ mɛ̨i.

⁹ Ɉɛnŋąąi kpɔ Israɛlə lonnii da gulɔ ɉalááɠaa hu, ɉɛn mąąhəɠɛɛɠaai kpɔ da paa la ɉaláá laa həli mun bɔ, yili nwɔɔ li.

¹⁰ Nwɔɔ ɓaa nu kəlee nwɔ hɛn mąąhəɠɛɛɠaa. Ɉɛn nu tɛitɛi a dɛɛ ɉaláá laa həli mun bɔ, ɉaláá laa həli mun nwɔɔ li.»

Haláái vilɛn ŋąą wɛli mɛ̨nį nɛ̨ŋɛ̨n ma

¹¹ Yai-Laa yɛ Moisə ɓa:

¹² «'Mo Israɛlə lonnii diɛ, yɛ́ diɛ: «Hulɔnu ta a kɛ laa, nɛ̨ą yɛ túwɔ́ a ɲɔ̨nwɔ̨ɔ̨, yɛ mowo,

¹³ da hulɔnu ta kpɛli diɛ laa ɉilɛ tɛɠii, yɛ gbɔwɔ mąąliɓi, loo pələi, gɛla hvo mą, di hvo ɉon ni ɉɔn ɉu,

¹⁴ toló kili a lɔ ɉilɛ kwəi, gili yɛ hvilɛn na nɛ̨ą ɓa, ɛlɛɛ yaan nɛ̨ą aa gbɔwɔ mąąliɓi kpɔ tii a neelee, a wala kɛ tii ə ɓo lɔ a toló yɛ hvilɛn nɛ̨ą ɓa, ɛlɛɛ yaan hvo gbɔwɔ mąąliɓi li,

¹⁵ mąąnɛ̨ɛ̨ ɉulɔnui tii ə li a nɛ̨ą ɉaláá laa həli mun bɔ, ə pa a dɔ́n ɉalá hɛn, gəgən ɲąą haaɓa kpai hunwɔ̨ hu. Hva wulɔ pu mą, hva lansan hee mɛ̨i, mąąhɔlɔɓo, toló haláá da nu hɔn mo haláá li.

¹⁶ Ɉaláá laa həli mun a nɛ̨ɛ̨nu lɛɠɛ mą, ə dɔɔ Yai-Laa líílaa.

¹⁷ Ɉaláá laa həli mun a yá mąąhəɠɛɛ həɠə ləɠi kpɛli hu, ə bɛlɛ́n muluun gbala ta həɠə, ə bu ɲái.

¹⁸ Ɉaláá laa həli mun a nɛ̨ɛ̨nui tii nwun volóon, ə dɔɔ Yai-Laa lííla, ɉaláá hɛn tii di paa la ɉɔn mo mɛ̨nį ɓa, ə naa ɲee ŋą, ya ɓaa ɉilɛ nwɔ toló haláá hɛn tii. Kɛlaa, nwąną kulɔ yá da nɛ̨ŋɛ̨n naa yá di ɓo ɉaláá laa həli mun ɲəi.

¹⁹ Ɉaláá laa həli mun a mo nɛ̨ɛ̨nui tii ɓa, ə gwɛla. Yɛ mą: ‹Akɛ ka hulɔnu takpɛli ka hvo haɠa kpɔn ni, akɛ hvo túwɔ́ li a ɲɔ̨nwɔ̨ɔ̨, yɛ́ ə́ kpɔwɔ mąąliɓi a ə́ hilɛ ɓowoi ə́ mo, nɛ̨ŋɛ̨n naai nwąną kulɔ yái ŋɛ̨i hu, ə hvóló yɛ́.

²⁰ Kɛlaa, akɛ ə́ ə́ yee too wɛli mɛ̨nį hu ka hulɔnu takpɛli, yii hvo a ə́ hilɛ ka yaa kaa haɠa kpɔn, yɛ́ ə́ kpɔwɔ mąąliɓi.›

²¹ Ɉaláá laa həli mun a mo mą, ə gwɛla. Yili pulu, ɉaláá laa həli mun yɛ mą: Yai-Laa ə ə́ kɛ ə́ kaayɔwɔɠaa lɔwai a nui da mɛ̨nį kɔ́ɔn mą nɛ̨ŋɛ̨n naa mɛ̨nį hu, kwɛla mɛ̨nį hu, ə ə́ kwəi haa, ə ə́ koo tɛ ə́ ɲą.

²² Ɲái ŋɛ̨i nɛ̨ŋɛ̨n naa kaa ɉu, gaa pai yɛɛ ə́ kwəi, ə ə́ koo tɛ ə́ ɲą, ə ə́ kwəi paa. Nɛ̨ɛ̨nui tii a mu hon, yɛ mą: ‹Mįiną! Mįiną!›

²³ «Yili pulu, ɉaláá laa həli mun ə nɛ̨ŋɛ̨n naa, nwooɠaai tii pɛ̨ɛ̨, ə di waa nwąną kulɔ yá hu.

²⁴ Gɛɛ ɉaláá laa həli mun hvo nwąną kulɔ yái tii tɛɛ nɛ̨ɛ̨nui pɔ hvo gbələ,

²⁵ a gbɛa ɉɔn mo haláá hɛn tii həɠə nɛ̨ɛ̨nu yəi, ə naa həli Yai-Laa ɓa, yɛ bələi da gɛ la a bɔlɔ ɉaláá kulɔ kəhi mɛ̨i.

²⁶ Ə ɲee ɲąą tɔ̨nɔ̨ həɠə ɉu, yii da kɛ mą kili too ŋą hɛn, ə gələn ɉaláá kəhi mɛ̨i. Yili pulu ə ɲái tii tɛɛ kɛa nɛ̨ɛ̨nui pɔ, ə gbələ.

²⁷ A ɲá tɔɔ na, mɛ̨nįi a kɛ ya ka: Akɛ nɛ̨ɛ̨nui tii a gbɔwɔ mąąliɓi, yɛ ɉilɛ ɓowo, ɲái tii nɛ̨ŋɛ̨n naa kaa ɉu, a nwąną na, a yɛɛ gwəi, a goo tɛ ŋą, gwəi ə haa. Ɛlɛɛ, mąą nɛ̨ɛ̨nui a kɛ a nui da mɛ̨nį kɔ́ɔn mą nwɔ lɔi hu, nɛ̨ŋɛ̨n naa mɛ̨nį hu.

²⁸ Kɛlaa, akɛ nɛ̨ɛ̨nui tii hvo gbɔwɔ mąąliɓi li, ə ɓo a nui hɔn və mą, nwɔ kwəi kwələ laa a too pɔ̨nɔ̨ŋą, yɛ lon gaa.»

²⁹ Toló mąą mɛ̨nį kɛ pələ ka tii, yɛ hvilɛn na nɛ̨ɛ̨nu ɓa, yii ɲee kaa wɛli mɛ̨nį hu, yɛ ɉilɛ ɓowo, yɛ gbɔwɔ mąąliɓi,

³⁰ a wala kɛ tii, toló kili a lɔ hulɔnu hu yɛ hvilɛn nɛ̨ą ɓa, a li la Yai-Laa lííla, ɉaláá laa həli mun a mɛ̨nįɠaai tii kəlee kɛ mą, yɛ bələi bɛ̨ɛ̨ la.

³¹ Ɉilɛ nwɛi, mɛ̨nį hva kɛ nwəli pulu, nɛ̨ɛ̨nu yaan, nwɔ nɛ̨ŋɛ̨n nwulu a lɛɛ nwuɔ̨.