Lonon mo 36 - Yálá laawoo hɛɓɛ (dc)

Nɛ̨ąi da pɛli di kaa nuą kwɛlin da hɔlɔɓoi di wɔ hilɛ tai pɛlɛ́ mu

¹ Ɉosɛfə huwu hu, Manase lon Makirə Galaadə lonnii di wɔ kwəli nąmįną; diɛ kpɛli di pa Moisə da Israɛlə ɲɛ̨itɔwɔ nuą kəlee lííla,

² di mo mą diɛ mą: «Yai-Laa ə mo ku wɔ mɛ̨nį nąmu Moisə ɓa, yɛ mą: Nɔi ɲąąkwɛlɛ Israɛlə lonnii diɛ a kpɛ̨ɛ̨n. Ɛlɛɛ Yai-Laa ə ku wɔ mɛ̨nį nąmu tí, yɛ di kaayɔwɔ Selofehadə hee lɔi tɛɛ nonnii nɛ̨ąą pɔ.

³ Kɛlaa, da hilɛ həɠə pɛlɛ́ takpɛli mu, nɔi kɛ a di kwɛlin da naa kulɔ ku huwu kwɛlin ma, di bɛlɛ ɉilɛ yəi bɛlɛ́n nuą kwɛlin ma; nɔi kwa ɉɔlɔɓo da da kulɔ mą.

⁴ Ɛlɛɛ ɓɛlɔwai nɔi hvįįtɔɔ kwɛlan a ɉəli la Israɛlə lonnii yəi, nɛ̨ąąɠaa tii, di wɔ lɔiɠaai a pɛlɛ di hilɛni di wɔ lɔiɠaai diɛ; di gulɔ kɛa ku wɔ lɔiɠaai hu.»

⁵ Yai-Laa ə Moisə tí, yili ə mɛ̨nįi tii hon bələ lɛ Israɛlə lonnii diɛ, yɛ diɛ: «Tɛ̨ą kaa Ɉosɛfə huwu pɔ di mo tii.

⁶ Mɛ̨nįi Yai-Laa ə mo Selofehadə lonnii nɛ̨ąą diɛ, ya ka: yɛ diɛ: Hulɔnui a nɛ̨ɛ̨ diɛ, ya ɓə mąąnɛ̨ɛ̨ di hee bɔ; kɛlaa, ə kɛ a di huwu.

⁷ Yili a kɛ tii, nɔiɠaai di ɲąąkwɛlɛ ka lɔwai, hva kulɔ huwu ta yəi hvo li da kpɛli pɔ; əgɛ, huwu kəlee kwɛlin ə lɛɛ ɲəi.

⁸ Akɛ huwu ta lɔwai, nɛ̨ɛ̨nu a lɔi hɔlɔɓo a gwɛlin, mąą nɛ̨ɛ̨nui tii a kɛ gaa hilɛ həɠəi a ɉəɠə lɔ nąn ɉuwu hu; ya ɓə a gɛ huwu tɛi tɛi kəlee nwɔ lɔi ə lɛɛ ɲəi, yɛ bələi di ɲąąkwɛlɛ la ka nąnni diɛ.

⁹ Yili a kɛ tii, nɔi tɔ̨nɔ̨i tii hva həɠə ɉuwu yəi, hvo li ɉuwu yii pɔ. Nu kəlee nwɔɔ a lɛɛ ɲəi, yɛ bələi di nąnni di ɉɔlɔɓo la.»

¹⁰ Selofehadə lonnii nɛ̨ąą di gɛ yɛ bələi Yai-Laa ə Moisə tí la.

¹¹ Selofehadə lonnii nɛ̨ąą laa ka: Makla, Tirsa, Hogla, Milka da Noa. Nɛ̨ąąɠaa tii di hee di nąn ɉuwu hu hinąą pɔ.

¹² Yɛ bələi di lɛɛ la hilɛtai Ɉosɛfə lon Manase huwu hu, di nąnni kwɛlin nɔi tii ə lɛɛ a di wɔɔ.

¹³ Yili ɓə kɛ a Yai-Laa nwɔ tɔ́n da bɔ liɛwoo, yii ə bɛ̨ɛ̨ ə dɛɛ Moisə pɔ, Israɛlə lonnii mąą mɛ̨nį ɓa; Moabə yɛɛ kɔ́wɔ hu Ɉurdɛn yá kwɛlɛ, Ɉeriko taa tənən ma.