Lonon mo 35 - Yálá laawoo hɛɓɛ (dc)

Levi lonnii di wɔ taaɠaa

¹ Yai-Laa ə pələ ɓo Moisə ɓa Moabə yɛɛ kɔ́wɔ hu, Ɉurdɛn kwɛlɛ, Ɉeriko tənə ma, yɛ mą:

² «'Mo Israɛlə lonnii diɛ, di di wɔ taaɠaai, da gwɛlɛ lɔiɠaa ta tɛɛ Levi lonnii pɔ, di hee ɉu.

³ Daaɠaa da kɛ a di wɔɔ, diɛ pɛli heei laa. Ɛlɛɛ, ɲɛɛ kɔ́wɔɠaa da kɛ a di wɔ taatɛlɛɛɠaa pɛlɛi, da di wɔ nįŋɛ̨ɠaai laa mįi, da di wɔ tíiɠaa kɛi.

⁴ Nɔiɠaai tii pai kɛi daaɠaa kwɛlɛ, ka di tɛɛ Levi lonnii pɔ. Ɉįį pulu pələ ə həɠə daa hįį kpoloon ma, yɛ kɛa li la, a yee laa mą waa tɔ̨nɔ̨ a ɉaŋąą, ə tinɛ̨n ɉįi ɓa, ə doo geei.

⁵ Ka daa pulu pələ kɔ́ɔn a bomo nąąn; voló həɠəi pələ, yee laa mą waa hveelɛ, voló tooi pələ yee laa mą waa hveelɛ, ɉɛɠɛɛ pələ, yee laa mą waa hveelɛ, ɲələi pələ, yee laa mą waa hveelɛ, daa ə lɛɛ hąąi. Nɔiɠaai pai lɛɛi di wɔ taaɠaai kwɛlɛ, diɛ ka tii.

⁶ Daaɠaai ka káá pai dɛɛi Levi lonnii pɔ, diɛ ɓaa nu mąąkilɛ taa mɛ̨ida. Ka káá pai di mąą mɛ̨nį ɓoi, nu paa nuą diɛ pɛli di mąąkilɛi laa. Ka taa pow nąąn kɔ́w hveelɛ pɛlɛ diɛ.

⁷ Daaɠaai mąąnɛ̨ɛ̨ ka pa dɛɛ Levi lonnii pɔ, da kɛ a taa pow nąąn kɔ́w mɛ̨ihaaɓa, da di kwɛlɛ lɔiɠaa.

⁸ Daaɠaai tii, ka káá pai di həɠəi Israɛlə lonnii di wɔ lɔi hu. Nui nwɔɔ hu kɛnɛ̨, ka ɉəɠə ɲəi tamąą, nui nwɔɔ lɔi hvo kɛnɛ̨ li, ka ɉəɠə ɲəi a bɛliɛ. Mąąnɛ̨ɛ̨ huwu tɛitɛi ə ɲee kulɔ nwɔ taa taɠaa hu, a Levi lonnii di wɔɔ. Yɛ bələi lɔ nwɔ lɔi kaa pai kɛi la.»

Nu mąąkilɛ taaɠaa

⁹ Yai-Laa ə mo Moisə ɓa, yɛ mą:

¹⁰ «'Mo Israɛlə lonnii diɛ, yɛ́ diɛ: «Ka pa Ɉurdɛn teen ɉii, ka lɔ Kanaan lɔi hu,

¹¹ mąąnɛ̨ɛ̨ ka pa ka yee lɛ taa taɠaa diɛ, a nu mąąkilɛ taaɠaa. Nui a nu ta paa dɛɠii, yɛ pɛli pui yɛ li laa.

¹² Ka káá pai kɛi ka mąąkilɛi daaɠaai tii hu, kaa pɛli pui nwąną kulɔmun dɔwɔ. Nui a nu paa, di hva pɛli baai, hvo kɛ li a gbɛa li kiti haɠa ɓa, galanɉonŋąą líí la.

¹³ Daaɠaai ka káá pai di həɠəi ɉu a nu mąąkilɛ taaɠaa, da kɛ mɛ̨ida.

¹⁴ Ka ɉaaɓa həɠə Ɉurdɛn pulu pələ, ka ɉaaɓa həɠə Kanaan lɔi hu. Nu mąąkilɛ taaɠaa li.

¹⁵ Ə kɛ a Israɛlə lon, ə kɛ a nui heeni ka kɔ́wɔ mɛ̨i, ə kɛ a tɛɛ nwɛ̨ą; daaɠaai tii kaa pai kɛi a nu kəlee mąąkilɛi. Nui lɔpee a nu paa hvo gili ɓo li, a pɛli ə mąąkilɛ laa.

¹⁶ «Akɛ kwɛli hɛn mə ə ɉee mɛlan ma, yɛ haa, nu paamun ni, mąąnɛ̨ɛ̨ di nu paamun tii paa.

¹⁷ Akɛ ə ɉɔɔ a kwɛni ə haa, a wala kɛ tii, ə kwɛni pili ə hee nu ɓa ə baa, nu paamun ni, mąąnɛ̨ɛ̨ di nu paamun tii paa.

¹⁸ Akɛ ə hɛn da pili yɛ gbɔn gɛ pələ, yɛ mɛlan baa la, nu paamun ni mąąnɛ̨ɛ̨ di nu paamun tii paa.

¹⁹ Nwąną kulɔ kɛ mun mə a nu paamun tii paa, ɓɛlɔwai da yaa da kwiɛn na, a baa.

²⁰ Nu a kɛlɛ mɛlan ɉu a wɛli kpɛɛ mąą laa, a wala kɛti, ə hɛn da pili mą a kiliŋąhiɛ ɲɔ̨nwɔ̨ɔ̨, ɛlɛɛ mɛlan ə haa;

²¹ a duwɔ a ɲee kpuwulu a yowo laa, yɛ baa; nui gɛlɛ ɓo kɛ, mąąnɛ̨ɛ̨ di baa, nu paamun ni. Nwąną kulɔ mun mə a nui tii paa, ɓɛlɔwai a gaa la.

²² «Kɛlaa da taɠa nu hu di hvo gili li, di hvo gɛ li a yowo laa, a wala kɛ tii di hɛn da pili, hvo ɓaa kiliŋąhiɛ ɲɔ̨nwɔ̨ɔ̨,

²³ a wala kɛ tii, kwɛni a kulɔ nu yəi ə hee nu ta ɓa, ə baa, mɛ̨nį taaləi tii a kɛ, yowo laa hvo ɉu, mɛ̨nį ɲɔ̨nwɔ̨ɔ̨ kɛ kiliŋąhiɛ hvo ɉu,

²⁴ galanɉonŋąą ɓə da mɛ̨nį ɲɔ̨n gɛ mun, da nwąną kulɔ kɛ mun di lɔwai mɛ̨nį ɓo. Mɛ̨nįi tii ɓo pələ ka:

²⁵ Mąąnɛ̨ɛ̨ galanɉonŋąą di nu paamun gulɔ nwąną kulɔ kɛ mun ɲəi, di pənə di li la mąąkilɛ taa hu, ɓɛi ə gbɛa mąąkilɛ laa. «A lɛɛ laa, ə lɛɛ ɉu, ɉaláá laa həli mun gɛnɛ̨ɛ di ɉee, a nwulɔ mąąhəɠɛɛ, ə haa.

²⁶ Kɛlaa nu paamun a kulɔ mąąkilɛ taa hu, ə pu yɛ li nɔi ɲɛn ɉu,

²⁷ nwąną kulɔ kɛ mun a gaa, a wala kɛ mąąkilɛ taa nwɔ lɔi hu, a baa; nwąną kulɔ kɛ mun hvo mɛ̨nį kalaa kɛ li.

²⁸ Mąąnɛ̨ɛ̨ nu paamun ə lɛɛ mąąkilɛ taa hu, ə lɛɛ ɉu, ɉaláá laa həli mun gɛnɛ̨ɛ̨ ə haa. Yili a haa, nu paamun a pənə ə li nwɔ lɔi hu.

²⁹ «Ka hiɛ pələ ka tii pai kɛi, kwɛlan gəlee da nwɔɔ, ɓɛi lɔpee ka káá pai kɛi laa heeni.

³⁰ «Nu paa mɛ̨nį lɔpee hu, di hva pɛli nu paamun baai, hvo kɛ li nu tamąą da gbɛa mąą kɛla hvaa ɓo. Mąą hvo nɛ̨ɛ̨li di hvo nu paa nu tɔ̨nɔ̨ woo ɓa.

³¹ Mąą hvo nɛ̨ɛ̨li di hvo hɛn da hon a nu paamun nwun mąąɓo hɛn. Akɛ haa mɛ̨nį kaa nwəli pulu, mąąnɛ̨ɛ̨ di baa.

³² Mąą hvo nɛ̨ɛ̨li nwɔ̨nɔ̨, di hvo hɛn da hon, diɛ pɛli nɛɛi laa yɛ li mąąkilɛ taa hu, a wala kɛ tii yɛ pənə yɛ li bɔɔli, yii ɉaláá laa həli mun və ni haa li.

³³ «Mąą hvo nɛ̨ɛ̨li nɔi ŋɛ̨i ka káá ɉu, ka hvo mąą liɓi, mąąhɔlɔɓo, ɲąmą kaa a hɛn a lɔi mąą liɓi, ɛlɛɛ ɲąmą a pu lɔi ɓa, hva pɛli waai a hɛn da kpɛli, hvo kɛli lɔ nui ɲąmąi tii pu nwɔ ɲąmą.

³⁴ Mąą hvo nɛ̨ɛ̨li nɔi ka káá ɉu ka hvo mąą liɓi, ɓɛi gáá laa heeni, mąąhɔlɔɓo gáá a Yai-Laa. Ɛlɛɛ gáá heeni Israɛlə lonnii lɔwai.»