Lonon mo 34 - Yálá laawoo hɛɓɛ (dc)

Kanaan lɔi ɲɛ̨n

¹ Yai-Laa yɛ Moisə ɓa:

² «Mɛ̨nįi ŋɛ̨i ɓo Israɛlə lonnii diɛ, yɛ́ diɛ: «Ka pa lɔi Kanaan lɔi hu, nɔi pai lɛɛi ka yəi a ka wɔɔ, ya ka; bələi Kanaan lɔi tii ɲɛn gaa pai kɛi la bələ ka:

³ «Ɉɛɠɛɛ pələ, ka ɲɛn gaa pai kɛi a Sin lɔi pun da Edɔmə lɔi; voló kulɔi pələ, ka ɲɛn gaa pai həɠəi Gboloyá Kponą ɉɛɠɛɛ pələ.

⁴ Ə laa a Ɲɔ̨n-gaalə Yee lɔwai pələ, ə tɛɛ Sin, ə li ə hee Kadɛsə-Barnea ɓa gɔwɔ mu pələ, ə pənə ə ɉaŋą a Hasarə-Adarə pələ, ə tunwɔ̨n Asmɔn ɓa.

⁵ Ə həɠə Asmɔn ɓa, ə kpəlaan Eziptə ya pɔ pələ, yɛ hvilɛn gboloyá kɛnɛ̨ ɓa.

⁶ «Voló tooi pələ, gboloyá kɛnɛ̨ ɓə pai kɛi a ka ɲɛn.

⁷ «Ɲələi pələ ɲɛn ga; ka ɉəɠə gboloyá kɛnɛ̨ ɓa, ka vilɛn Hɔrə yee ɓa.

⁸ Ə həɠə Hɔrə yee ɓa, ka ka ɲɛn naa, ka ɉəli Lebo-Hamatə ɓa. Ka ɲɛn gaa pai hvilɛn ɉii Sedadə ɓa.

⁹ Yili pulu, ə ɉon a Ɉifrɔn pələ, yɛ hee Hasarə-Einan ɓa; ɲələi pələi ɲɛn ga tii.

¹⁰ Voló həɠəi pələ ɲɛn ga: Ə həɠə Hasarə-Einan ɓa, ə həli Sefamə ɓa.

¹¹ Ə həɠə Sefamə, ka ɲɛn a yɛɛ Rivla tənən ma pələ, nu a kɛ Ain voló həɠəi pələ; yili pulu, ə yɛɛ ə hee Kinerɛtə yee kpu kpu ɓa gboloyá kwɛlɛ,

¹² yɛ kɛa yɛɛ Ɉurdɛn ɓa, yɛ kpəla gboloyá kponą ɓa. Ka wɔ lɔi ɲɛnŋąą ka tii.»

¹³ Moisə ə dɔ́nŋąą tii ɓo Israɛlə lonnii diɛ, yɛ diɛ: «Nɔi ka káá pai ɲąąkwɛlɛi, kaa gɔ́ a kpɛ̨ɛ̨n, ya ka tii. Nɔi Yai-Laa ə mo yɛ ə dɛɛ nu huwu mɛ̨inąąn da gbulɔ pɔ, ya ka tii.

¹⁴ Hvo gaai Rubɛn huwu, Gadə huwu, da Manase huwu bələ tɔ̨nɔ̨, daa gbɛa di hee lɔi hɔlɔɓo.

¹⁵ Nu huwu hveelɛi tii da nu huwu kpulɔi tii daa di hee lɔi hɔlɔɓo Ɉurdɛn pulu pələ, Ɉeriko tənə ma, voló həɠəi pələ.»

Nɔi ɲąąkwɛlɛ nuą laa ka

¹⁶ Yai-Laa ə mo Moisə ɓa, yɛ mą:

¹⁷ «Nuąi pai nɔi ɲąąkwɛlɛi ka lɔwai, diɛ ka: Ɉaláá laa həli mun Eleazarə da Nun lon Ɉosue.

¹⁸ Ə́ kaa pai nu tɔ̨nɔ̨ həɠəi huwu tɛitɛi hu, ə́ bɛlɛ diɛ, nɔi ɲąąkwɛlɛ mɛ̨nį hu.

¹⁹ Nuąi tii laa ka: Ɉuda huwu nwɛi, Yefunɛ lon Kalɛbə.

²⁰ Simeɔn huwu hu, Amihudə lon Semuɛlə.

²¹ Bɛnɉamɛn huwu hu, Kislɔn lon Elidadə.

²² Dan huwu hu, Yogli lon Buki.

²³ Ɉosɛfə lon Manase huwu hu, Efɔdə lon Haniɛlə.

²⁴ Ɉosɛfə lon Ɛfraimə huwu hu, Siftan lon Kemuɛlə.

²⁵ Zabulɔn huwu hu, Parnakə lon Elisafan.

²⁶ Isakarə huwu hu, Azan lon Paltiɛlə.

²⁷ Asɛrə huwu hu, Selomi lon Ahihudə.

²⁸ Nɛftali huwu hu, Amihudə lon Pedahɛlə.»

²⁹ Nuąi Yai-Laa ə mo yɛ di Kanaan lɔi ɲąąkwɛlɛ Israɛlə lonnii diɛ, diɛ ka tii.