Lonon mo 31 - Yálá laawoo hɛɓɛ (dc)

Israɛlə ə kɔ́ pɛlɛ Madian ɓa

¹ Yai-Laa yɛ Moisə ɓa:

² «Israɛlə lonnii nwąną kulɔ, mɛ̨nį ɲɔ̨nwɔ̨ɔ̨i Madian nuą di naa diɛ mąą mɛ̨nį ɓa; hvó tɛɠa kɛ laai ə́ nąnni kwɛlɛ.»

³ Moisə yɛ nɔi lonnii diɛ: «Hinąą taɠaa di di hąą yili kɔ́ mɛ̨nį ɓa, di kaa li kɔ́ ɓa; di kaa lii kɔ́ pɛlɛi Madian ɓa, diɛ Yai-Laa nwąną kulɔ Madian ɓa.

⁴ Huwu tɛitɛi kəlee, nu waa tɔ̨nɔ̨ Israɛlə lonnii kəlee lɔwai, diɛ ɓə ka di tɛɛ gɔ́ ɓa.»

⁵ Israɛlə kɔlaɠaɠaa lɔwai, di waa tɔ̨nɔ̨ həɠə huwu tɛitɛi kəlee hu. Nu waa pow kɔ́w hveelɛ, di mąą mɛ̨nį kəlee pɛliɛ ɉu, diɛ li gɔ́ ɓa.

⁶ Moisə ə di tɛɛ gɔ́ ɓa, huwu tɔ̨nɔ̨ nu waa tɔ̨nɔ̨; ə di tɛɛ gɔ́ mɛ̨i da ɉaláá laa həli mun Pinasə, Eleazarə lon; ya ɓə bɛlɛ́ mąąhəɠɛɛ mu hɛnŋąą di kɛ ɲəi, da nuą təli túlúɠaa.

⁷ Di li di gɔ́ pɛlɛ Madian ɓa, yɛ bələi Yai-Laa ə mo la Moisə ɓa. Di ɉinąą kəlee paa.

⁸ Hvo lɛɛ lɔ a yili, di Madian tɔɔɓɛlaa paa, diɛ ɓaa: Ewi, Rɛkɛmə, Surə, Hurə da Rɛva; Madian tɔɔɓɛlaa lɔɔli. Di Beɔrə lon Balaamə paa a ɓɔwa kwɛa.

⁹ Israɛlə lonnii di Madian nɛ̨ąą da di lonnii hon a kɔluwɔɠaa, di di wɔ taatɛlɛɛɠaai kəlee həɠə, daatɛlɛɛ kpulu kəlee, da di yəi hɛnŋąą kəlee.

¹⁰ Daa kpɛa kpɛaai kpɔ Madian nuą di kɛ ɉu, di gəlee kələn, da daa pɛlɛɛɠaa.

¹¹ Di di pulu pənə a gɔ́ honŋąą kəlee. Hɛn kpɔ di ɉon, ə kɛ a nu, ə kɛ a taatɛlɛɛ,

¹² di pa a gɔ́ luwɔɠaa Moisə pɔ, da ɉaláá laa həli mun Eleazarə, da Israɛlə lonnii kəlee, da ɉɛnŋąą kpɔ di di hon gɔ́ hu. Di gəlee ɲąąkpɔn ɓɛi di kɛ laa, Moabə Yee kɔ́wɔ mu, Ɉurdɛn kwɛlɛ, Ɉeriko tənə ma.

¹³ Moisə da ɉaláá laa həli mun Eleazarə da nɔi ɲɛ̨itɔwɔ nuą kəlee, di li di laa kwiɛn ɉii daa kpala.

¹⁴ Moisə ə níiholi gɔ́kulaa nwun nąmįnąąi kɛ a gɔ́laɠa ɲɛ̨itɔwɔ nuą di pɔ, diɛi tii kɛi həɠə gɔ́i tii ɓa.

¹⁵ Yɛ diɛ: «Éé! Ka nɛ̨ąą kəlee lɛɛ a di hvulú!

¹⁶ Kɛlɛi diɛ ɓə gɛ Israɛlə lonnii diɛ kulɔ Yai-Laa woo mu; Balaamə nwɔ liɛwoo pɔ, Peɔrə mɛ̨nįi hu, lɔi wolo ɲɔ̨n yɛ pɛlɛ Yai-Laa nwɔ nu kanɠaa diɛ.

¹⁷ 'Ka ɉilɛlɛa kəlee paa, ɛlɛɛ nɛ̨ąąi kpɔ hulɔnu mɛ̨nį hu kɔ́lɔn, ka gəlee paa.

¹⁸ Kɛlaa nɛ̨ąąi di hvo ta hulɔnu mɛ̨nį kɛ li, ka di lɛɛ a di hvulú, a ka wɔɔ.

¹⁹ Ɛlɛɛ, kaa kpinįi ka lɛɛ daa kpala hvóló mɛ̨ihveelɛ yee mu; kaai kpɔ tii nu paa, a wala kɛ tii kaai tunwɔ̨n nu powa ɓa, mąąnɛ̨ɛ̨ ka ka mąąhəɠə a voló ɉaaɓa yələ da voló mɛ̨ihveelɛ yələ. Kaa kpinįi, da ka wɔ luwɔ nɛ̨ąąi.

²⁰ Ə mą kɛ ɉəɠə ɓɛla kəlee, ɉuwɔ kɔ́lɔ hɛnŋąą kəlee; ɉɛnŋąąi kpɔ di bɛli a ɓolu ləɠaɠaa, a wulu, ka gəlee mąąhəɠə.»

²¹ Ɉaláá laa həli mun Eleazarə yɛ gɔ́kulaaɠaai tii həɠə gɔ́ mɛ̨i diɛ: «Dɔ́n ɉu woo ka, yai Yai-Laa ɓə mo Moisə ɓa:

²² Hɛni, wali, ɓala-kwɛli, kwɛli leelee, da hoa,

²³ Hɛnŋąą kpɔ nwɔ̨n va di kələn, ka di lɔ nwɔ̨n ɉu, di mąąhəɠə mɛ̨nį ɓa. Yili pulu, ka di mąąhəɠə a yá mąąhəɠɛɛ. Ɉɛnŋąąi tii nwɔ̨n va ɲɛ̨i tɔɔ diɛ, ka di mąąhəɠə lɔ a yá.

²⁴ Ka ka mąą həɠəɠaa waa a voló mɛ̨ihveelɛ yələ, tɔ́n a kulɔ kaa, yili pulu kaa kɛa tɛ taai.»

Gɔ́ pulu hɛn ɲąąkwɛlɛ pələ

²⁵ Yai-Laa yɛ Moisə ɓa:

²⁶ «Yɛ́ kpinįi, ka ɉaláá laa həli mun Eleazarə, ka nɔi hu pɛlɛ́ nąmįną; ɉɛnŋąąi di di hon, yɛi kɛ a nu, yɛi kɛ a taatɛlɛɛ, ka di lonon.

²⁷ Ɉɛnŋąąi di di hon, di di ɲąąkwɛlɛ, bələ tɔ̨nɔ̨ ə lɛɛ nuąi li gɔ́ ɓa di yəi, bələ tɔ̨nɔ̨ ə lɛɛ nuąi lɛɛ nɔi di yəi.

²⁸ Nuąi li gɔ́ ɓa, mąąnɛ̨ɛ̨ ə́ di wɛi ta həɠə ɉu, a Yai-Laa nwɔɔ. Nu nwun nɔɔli a lɛɛ nu yəi, mąąnɛ̨ɛ̨ ə nu tɔ̨nɔ̨ tɛɛ; a kɛ a taatɛlɛɛ nwun nɔɔli ə daatɛlɛɛ tɔ̨nɔ̨ tɛɛ a Yai-Laa nwɔɔ; ə kɛ a nįŋɛ̨, ə kɛ a hoohvaalən, ə kɛ a taatɛlɛɛ pɛlɛɛ.

²⁹ Ə́ kaa gɔ́ honŋąąi tii həɠəi di wɛi hu, yɛ di tɛɛ ɉaláá laa həli mun Eleazarə pɔ, a nįįhɔ̨nwɔ̨i mąąnɛ̨ɛ̨ ə kulɔ a Yai-Laa nwɔɔ.

³⁰ Israɛlə nu kpɔn nwɛi, ə kɛ a nu kan, ə kɛ a nįŋɛ̨, ə kɛ a hoohvaalən, ə kɛ a taatɛlɛɛ pɛlɛɛ, ə kɛ a taatɛlɛɛ lɔpee, yá pow lɔɔli lonon, dɔ̨nɔ̨ həɠə ɉu, ə́ di tɛɛ Levi lonnii pɔ, diɛi tii da kɛ Yai-Laa nwɔ pɛlɛ́i mąą kóló kɛi.»

³¹ Moisə da ɉaláá laa həli mun Eleazarə, di gɛ yɛ bələi Yai-Laa ə mo la Moisə ɓa.

³² Ɉɛn di ɉon gɔ́ hu; gɔ́ honŋąąi tii nuąi li gɔ́ ɓa di ɉon diɛ paa la, ya ka: Taatɛlɛɛ pɛlɛɛ waa nwun mɛ̨ida waa pow mɛ̨ihveelɛ kɔ́w lɔɔli (675.000).

³³ Nįŋɛ̨ waa pow mɛ̨ihveelɛ kɔ́w hveelɛ (72.000).

³⁴ Hvoohvaalən waa pow mɛ̨ida kɔ́w tɔ̨nɔ̨ (61.000).

³⁵ Nu kan nwɛi, diɛ ɓaa nɛ̨ai di hvo ni kɛ hulɔnu mɛ̨nį hu kɔ́lɔn, di kɛ a nu waa pow haaɓa kɔ́w hveelɛ (32.000).

³⁶ Ɉɛnŋąąi di hvo di hu kala, da nuąi di hvo di paa, nuąi li gɔ́ ɓa di wɛi ka: Daatɛlɛɛ pɛlɛɛ waa nwun ɉaaɓa ɲee haaɓa kɔ́w mɛ̨ihveelɛ pulu nwun nɔɔli (337.500),

³⁷ yii di ɉəɠə daatɛlɛɛ pɛlɛɛ hu a nįįhɔ̨nwɔ̨, a Yai-Laa nwɔɔ nwun mɛ̨ida ɲee mɛ̨ihveelɛ kɔ́w lɔɔli (675).

³⁸ Nįŋɛ̨ waa pow haaɓa kɔ́w mɛ̨ida (36.000), yii di ɉəɠə ɉu a nįįhɔ̨nwɔ̨, a Yai-Laa nwɔɔ, ə kɛ pow mɛ̨ihveelɛ kɔ́w hveelɛ (72).

³⁹ Ɉoohvaalən ə kɛ waa pow haaɓa pulu nwun nɔɔli (30.500), Yai-Laa nwɛi ə kɛ pow mɛ̨ida kɔ́w tɔ̨nɔ̨ (61).

⁴⁰ Nu kan waa pow kɔ́w mɛ̨ida (16.000), Yai-Laa nwɛi ə kɛ a nu pow haaɓa kɔ́w hveelɛ (32).

⁴¹ Yii di gulɔ ɉu a nįįhɔ̨nwɔ̨, a Yai-Laa nwɛi; Moisə ə dɛɛ ɉaláá laa həli mun Eleazarə pɔ, yɛ bələi Yai-Laa ə dí la.

⁴² Bələ tɔ̨nɔ̨i tii lɛɛ a Israɛlə nu kpulu nwɛi, yai Moisə ə ɉəɠə nuąi li gɔ́ ɓa di yəi;

⁴³ ɛlɛɛ, yɛ dɛɛ nu kpɔn bɔ, ya ka: daatɛlɛɛ pɛlɛɛ waa nwun ɉaaɓa waa pow haaɓa kɔ́w mɛ̨ihveelɛ pulu nwun nɔɔli (337.500);

⁴⁴ Nįŋɛ̨ɠaa di kɛ waa pow haaɓa kɔ́w mɛ̨ida (36.000).

⁴⁵ Ɉoohvaalənŋąą di ɓo waa pow haaɓa pulu nwun nɔɔli (30.500).

⁴⁶ Nu kanŋaa di ɓo a nu waa pow kɔ́w mɛ̨ida (16.000).

⁴⁷ Moisə ə nu pow lɔɔli ɲɔ̨nwɔ̨mąn ɉəɠə Israɛlə huwu tɛitɛi lɔwai, ə mą kɛ di wɔ taatɛlɛɛɠaa lɔwai, ə di tɛɛ Levi lonnii pɔ diɛi tii da kɛ kóló kɛi Yai-Laa nwɔ pɛlɛ́i mu; yɛ bələi Yai-Laa ə dí la.

Yálá kɔ́ haláá

⁴⁸ Nuąi kpɔ kɛ gɔ́laɠaɠaa nwun na, yɛi kɛ a nu waa tɛitɛi, yɛi kɛ a nu nwun dɛitɛi, di pa diɛ Moisə ɓa:

⁴⁹ «Ə́ wɔ tínuą daa kɔ́kulááɠaai kɛ di yee mu di lonon, nu ta lɔpee hvo lɛɛ li gɔ́ hu.

⁵⁰ Yili mąą mɛ̨nį ɓa, ɉɛnŋąąi kpɔ ku di kaa a hɛni, ku kaa pai a diɛ a Yai-Laa kɔ́ hɛn, ku mąąhəɠə mɛ̨nį ɓa Yai-Laa yəi, ə kɛ a yee kwaną kwɛli, ə kɛ a gbono, ə kɛ a kɔ́wɔ ɓa kwɛli, ə mą kɛ a wəlii kwɛli.»

⁵¹ Moisə da ɉaláá laa həli mun Eleazarə di ɉɛniɠaai tii hon di yəi, gəlee ə kɛ a bɛliɛ a yɛlɛ.

⁵² Ɉɛnii kpɔ di gulɔ a nįįhɔ̨nwɔ̨, a Yai-Laa nwɔɔ, ə kɛ a kilə nwun dɔ̨nɔ̨ ɲee mɛ̨ihveelɛ (170), ya ɓə gɔ́ nwun nąmįną pɛlɛɛ da gbɛa-kpɛa di Yálá kɔ́ la.

⁵³ Gɔ́kulááɠaai di wɛi, ɉɛnŋąąi di ɉɔlɔɓo a di wɔɔ, ə lɛɛ di yəi a ɲąą pɛliɛ.

⁵⁴ Moisə da ɉaláá laa həli mun Eleazarə di ɉɛnii tii hon gɛa gɔ́ nwun nąmįną yəi, di li la gee kaa kələ mu Yai-Laa lííla, yili yɛ pɛli kɛi a kili lɛɛ ɉu hɛn.